హైదరాబాద్‌:  సీపీఎం చేపట్టిన మహా పాదయాత్ర ముగింపు సందర్భంగా ఈనెల 19న నిజాం కాలేజ్ గ్రౌండులో తలపెట్టిన సభకు ఇచ్చిన అనుమతిని పోలీసులు రద్దు చేశారు. ఈ సభకు ముఖ్య అతిథిగా కేరళ ముఖ్యమంత్రి పినరయి విజయన్‌ విచ్చేస్తున్నారు. అయితే ఆయన రాకను ఆర్‌ఎస్‌ఎస్‌, ఇతర అనుబంధ సంస్థలు తీవ్రంగా వ్యతిరేకిస్తున్నాయి. కాగా, పోలీసులు అనుమతి ఇవ్వకున్నా అదే రోజు మరోచోట సభ నిర్వహిస్తామని సీపీఎం వర్గాలు స్పష్టం చేశాయి.
 
  


 ఏర్పాట్లపై సమీక్ష నిర్వహించిన డిప్యూటీ సీఎం మహమూద్ అలీ
 సాక్షి, హైదరాబాద్: ప్రభుత్వం ఈ నెల 12న నిజాం కాలేజీ మైదానంలో ప్రతిష్టాత్మకంగా నిర్వహిస్తున్న రంజాన్ దావత్-ఎ-ఇఫ్తార్ కార్యక్రమానికి ఏర్పాట్లను పక్కాగా పూర్తి చేయాలని ఉపముఖ్యమంత్రి మహమూద్‌అలీ అధికారులను ఆదేశించారు. గురువారం ఆయన సచివాలయంలో టాస్క్‌ఫోర్స్ కమిటీ సభ్యులతో సమీక్ష నిర్వహించారు. ఇఫ్తార్‌కు ఎలాంటి  ఆటంకాలు కలుగకుండా చూడాలని, గట్టి పోలీసు బందోబస్తు ఏర్పాటు చేయాలని సూచించారు.
 
 రంజాన్ కానుకగా ప్రభుత్వం ప్రకటించిన కొత్త దుస్తుల పంపిణీ కార్యక్రమానికి మసీదు కమిటీలు సంపూర్ణ సహకారం అందించేలా చర్యలు చేపట్టాలన్నారు. రాష్ట్రంలోని రెండు లక్షల మంది నిరుపేదలకు రూ.10 కోట్ల విలువైన బట్టలు పంపిణీ చేయాలని ప్రభుత్వం నిర్ణయించిందని చెప్పారు.    ఈనెల 15లోగా బట్టలు పంపిణీ పూర్తి చేయాలని నిర్ణయించినట్లు చెప్పారు. ఈ సమావేశంలో టాస్క్‌ఫోర్స్ కమిటీ చైర్మన్, ఏసీబీ డీజీపీ ఏకే ఖాన్, ప్రొటోకాల్ కార్యదర్శి వికాస్‌రాజ్, డెరైక్టర్ అరవింద్ సింగ్, మైనార్టీ సంక్షేమ శాఖ కార్యదర్శి సయ్యద్ ఉమర్ జలీల్, డెరైక్టర్ జలాలుద్దీన్ అక్బర్, రాష్ట్ర హజ్ కమిటీ స్పెషల్ అధికారి ఎస్‌ఎం షుకూర్ పాల్గొన్నారు.


 కమ్యూనిస్టులకు పునర్వైభవం తీసుకొద్దాం
 బహిరంగ సభలో పార్టీ శ్రేణులకు సీపీఎం పిలుపు
 అరుణ వర్ణమైన నిజాం కాలేజీ గ్రౌండ్
 ప్రజా ఉద్యమాలను బలోపేతం చేయాలని ఏచూరి పిలుపు
 రాష్ర్టంలో బలమైన ప్రత్యామ్నాయంగా మారతాం
 అన్ని శక్తులను కలుపుకొని ప్రజల్లోకి వెళ్తామన్న తమ్మినేని
 60 మందితో రాష్ర్ట కమిటీ, 13 మందితో కార్యదర్శివర్గం ఏర్పాటు
 ముగిసిన పార్టీ తెలంగాణ తొలి మహాసభలు
  
 సాక్షి, హైదరాబాద్: నాటి తెలంగాణ సాయుధ రైతాంగ పోరాటాన్ని, వారసత్వాన్ని స్ఫూర్తిగా తీసుకుని నేటి తెలంగాణ రాష్ర్టంలో కొత్త చరిత్రకు శ్రీకారం చుట్టాలని, కమ్యూనిస్టులకు పునర్వైభవం తీసుకురావాలని పార్టీ శ్రేణులకు పార్టీ నాయకత్వం పిలుపునిచ్చింది. సమస్యలపై ప్రజా ఉద్యమాల నిర్మాణమే శరణ్యమని పేర్కొన్నారు. ప్రజల ఆశలు, ఆకాంక్షలను నెరవేర్చేందుకు, సమస్యల పరిష్కారానికి కేంద్ర, రాష్ట్ర ప్రభుత్వాలపై ఒత్తిడి తెచ్చేలా ఉద్యమాలు చేపట్టేందుకు ప్రతిజ్ఞ చేయాలన్నారు.
 వామపక్షాలు, ప్రగతిశీల శక్తులు, సామాజిక శక్తులు, అణగారిన వర్గాలు, సంస్థలను కలుపుకొని రాష్ర్టంలో రాజకీయ ప్రత్యామ్నాయ శక్తిగా  మారాల్సిన అవసరముందని సూచించారు. సీపీఎం రాష్ర్ట తొలి మహాసభల ముగింపు సందర్భంగా హైదరాబాద్‌లోని నిజాం కాలేజీ మైదానంలో బుధవారం నిర్వహించిన బహిరంగ సభ అరుణ వర్ణాన్ని సంతరించుకుంది. పార్టీ ముఖ్య నేతలంతా ఈ సభకు హాజరయ్యారు.
  
 కమ్యూనిస్టులకు ఆదరణ పెరుగుతోంది: సీతారాం ఏచూరి
 రాష్ట్రంలో వామపక్షాలకు వస్తున్న ఆదరణను చూస్తుంటే తెలంగాణలో క మ్యూనిస్టులకు పూర్వవైభవం వస్తుందన్న నమ్మకం కలుగుతోందని పార్టీ పొలిట్‌బ్యూరో సభ్యుడు సీతారాం ఏచూరి అన్నారు. ఇందుకు అన్ని సమస్యలపై ప్రజా ఉద్యమాలను బలోపేతం చేయడమే పార్టీ ముందున్న ఏకైక కర్తవ్యమని పేర్కొన్నారు. ప్రజలకిచ్చిన హామీలను రాష్ర్ట ప్రభుత్వం నిలుపుకోకపోవడం, ప్రజా సమస్యలు, ఇతర అంశాలపై ఈ మహాసభల్లో చర్చించామని, వీటిపై ప్రజా ఉద్యమాలను బలపరచాలని పార్టీ నిర్ణయించిందని ఏచూరి తెలిపారు.
 ప్రజా వ్యతిరేక విధానాలను అమలు చేస్తూ, దేశ సెక్యులర్ విలువలకు తూట్లు పొడుస్తూ, ప్రజలపై ఆర్థిక  భారాన్ని మోపుతున్న ఎన్డీయే సర్కారుకు ‘హనీమూన్ పీరియడ్’ ముగియకుండానే ఢిల్లీ ఎన్నికల్లో, రాజ్యసభలో ఎదురుదెబ్బలు తగిలాయన్నారు.
  
 అన్ని శక్తులను కలుపుకొని పోతాం: తమ్మినేని వీరభద్రం
 వామపక్ష, లౌకిక, సామాజిక, ప్రగతిశీల శక్తులను ఏకం చేసి రాష్ర్టంలో బలమైన ప్రత్యామ్నాయాన్ని ప్రజల ముందుకు తీసుకొచ్చేందుకు కృషి చేస్తామని సీపీఎం రాష్ర్ట కార్యదర్శి తమ్మినేని వీరభద్రం పేర్కొన్నారు. కొత్త రాష్ర్టంలో సవాళ్లను అధిగమించేందుకు సమష్టిగా కృషి చేస్తామన్నారు. రాష్ర్టంలో రాజకీయ పరిస్థితులు, ప్రభుత్వ విధానాలను బట్టి ఉద్యమాలను రూపొందించుకునే సత్తా పార్టీకి ఉందన్నారు. పట్టభద్రుల ఎమ్మెల్సీ ఎన్నికల్లో వామపక్షాలు బలపరిచిన ప్రభాకర్‌రెడ్డిని గెలిపించేందుకు పార్టీ శ్రేణులు కృషి చేయాలని తమ్మినేని పిలుపునిచ్చారు.
  
 కేంద్రంలో బీజేపీ ప్రభుత్వం విషయంలో సీఎం కేసీఆర్ వైఖరిని తెలియజేయాలని డిమాండ్ చేశారు. కేంద్రంపై వీరోచితంగా పోరాడి హక్కులు, నిధులను సాధించుకోవాలే తప్ప కాళ్లపై పడి తాబేదార్లలా బేరసారాలు చేయడం మంచిదికాదన్నారు. రాజకీయ అవకాశవాదాన్ని రాష్ర్ట ప్రజలు సహించరన్నారు. వాస్తు బాగా లేదని, అందుకే పనులు చేయడం లేదని కేసీఆర్ చెప్పడం పిచ్చి పరిపాలనగా ఉందని తమ్మినేని విమర్శించారు.
  
  సమగ్ర తెలంగాణ కోసం పోరాడుదాం: బీవీ రాఘవులు
 ప్రజలందరికి కూడు, గూడు, విద్య, ఉద్యోగం, వైద్య అవకాశాలు కల్పించే సమగ్ర తెలంగాణ కోసం పోరాడుదామని పార్టీ పొలిట్‌బ్యూరో సభ్యుడు బీవీ రాఘవులు పిలుపునిచ్చారు. రాష్ర్ట ముఖ్యమంత్రి కేసీఆర్ బంగారు తెలంగాణ తెస్తానంటుంటే ఏపీ సీఎం చంద్రబాబు చెప్పిన స్వర్ణాంధ్రప్రదేశ్ గుర్తుకువస్తుందన్నారు. స్వర్ణాంధ్రప్రదేశ్ చెస్తానన్న చంద్రబాబు చివరికి సారాంధ్రప్రదేశ్‌గా, రైతు ఆత్మహాత్యల ప్రదేశ్‌గా మార్చారని వ్యాఖ్యానించారు.
  
 చంద్రబాబు సింగపూర్ అంటూ.. కేసీఆర్ బంగారు తెలంగాణ  అంటూ ప్రజలను మోసం చేస్తున్నారని ధ్వజమెత్తారు. కాగా, దొరల రాజ్యం పోయిందనుకుంటే, కొత్త దొరలు వస్తున్నారని.. వారికి కూడా నైజాం నవాబుకు గోరి కట్టినట్లుగానే తగిన బుద్ధి చెప్పడానికి ప్రజలు సిద్ధంగా ఉండాలని తెలంగాణ పోరాట యోధురాలు మల్లు స్వరాజ్యం పిలుపునిచ్చారు. మీడియాపై అంక్షలు విధించడం అప్రజాస్వామికమని సీనియర్ నేత ఎస్. వీరయ్య విమర్శించారు.
  
 ఈ సభలో పార్టీ కేంద్ర కమిటీ సభ్యుడు ఎంఏ గపూర్, ఇతర నేతలు కూడా ప్రసంగించారు. అంతకుముందు సుందరయ్య విజ్ఞానకేంద్రం నుంచి నిజాం కాలేజీకి ‘ఎర్రసేన కవాతు(రెడ్‌షర్ట్ వాలంటీర్స్)’ పేరుతో ర్యాలీ నిర్వహించారు. వివిధ ప్రాంతాల నుంచి వేలాదిగా తరలివచ్చిన పార్టీ కార్యకర్తలు బహిరంగ సభలో పాల్గొన్నారు. ఈ సందర్భంగా సభా వేదికపై ప్రజానాట్య మండలి కళాకారులు ప్రదర్శించిన సాంస్కృతిక కార్యక్రమాలు ఆకట్టుకున్నాయి.
  
  
 రాష్ట్రకార్యదర్శిగా మళ్లీ తమ్మినేని
  సీపీఎం రాష్ట్ర కమిటీ కార్యదర్శిగా తమ్మినేని వీరభద్రం తిరిగి ఎన్నికయ్యారు. 60 మంది సభ్యులతో రాష్ట్ర కమిటీ, 13 మందితో రాష్ట్ర కార్యదర్శివర్గం ఏర్పాటైంది. రాష్ర్ట విభజన ప్రకటన తర్వాత గత ఏడాది ఫిబ్రవరిలో పార్టీ రాష్ట్ర కార్యదర్శిగా తమ్మినేని బాధ్యతలు చేపట్టిన సంగతి తెలిసిందే. తాజాగా వచ్చే మూడేళ్లకు పార్టీ కార్యదర్శిగా తిరిగి ఆయనే ఎన్నికయ్యారు. ఇక గతంలో రాష్ర్ట కమిటీలో 41 మంది సభ్యులుండగా, ప్రస్తుతం వారిలో ఆరుగురిని తప్పించి మరో 25 మందిని కొత్తగా చేర్చారు. కాగా, ఈ పదవుల కోసం మొత్తం 61 మంది పోటీపడటంతో ఎన్నిక అనివార్యమైంది. గతంలో ఖమ్మం ఎంపీ సీటుకు పోటీచేసిన ధర్మా ఈసారి రాష్ట్రకమిటీకి పోటీచేసి ఓటమి పాలయ్యారు. 
 రాష్ట్రకమిటీ నుంచి తప్పించిన వారిలో సారంపల్లి మల్లారెడ్డి(సెక్రటేరియట్ సభ్యుడు), లంక రాఘవులు, సామినేని రామారావు, సోమయ్య, పీఎస్‌ఎన్ మూర్తి, మెట్టు శ్రీనివాస్ తదితరులు ఉన్నారు. సారంపల్లి మల్లారెడ్డిని రాష్ట్ర కంట్రోల్ కమిషన్ చైర్మన్‌గా నియమించే అవకాశముందని పార్టీవర్గాల ద్వారా తెలుస్తోంది. గత కమిటీలో ఉన్న ఏడుగురు సెక్రటేరియట్ సభ్యుల్లో(సారంపల్లిని మినహాయించి) ఎస్.వీరయ్య, చెరుపల్లి సీతారాములు, జి.నాగయ్య, చుక్కరాములు, నంద్యాల నర్సింహారెడ్డి, సున్నం రాజయ్యను కొత్త కమిటీలోనూ కొనసాగించారు.
  
  కొత్తగా పోతినేని సుదర్శన్, టి.జ్యోతి, బి.వెంకట్, జూలకంటి రంగారెడ్డి, జి.రాములు, డీజీ నరసింహారావు రాష్ట్ర కార్యదర్శివర్గంలోకి ఎన్నికయ్యారు. ప్రత్యేక ఆహ్వానితులుగా మల్లు స్వరాజ్యం, కె.వెంకటయ్య, పి.రాజారావు, పీఎస్‌ఎన్ మూర్తి, పి.సోమయ్య నియమితులయ్యారు.


 హైదరాబాద్: సకల జనభేరీలో భాగంగా టీఆర్ఎస్ అధ్యక్షుడు కె.చంద్రశేఖర రావు నిజాం కాలేజీ గ్రౌండ్స్ కు చేరుకున్నారు. ఆయన కాసేపట్లో తెలంగాణ ఉద్యమకారులను ఉద్దేశించి మాట్లాడతారు. అంతకుముందు టీఎన్జీవోలు మాట్లాడుతూ.. తెలంగాణ విభజనకు వ్యతిరేకంగా ఏపీఎన్జీవోల చేస్తున్న ఉద్యమాన్ని తీవ్రంగా తప్పుబట్టారు. సీమాంధ్రలో చేస్తున్న ఉద్యమంలో స్పష్టత లేదని మండిపడ్డారు.
  
 సకల జన భేరి సభకు తెలంగాణ జిల్లాలోని వివిధ  గ్రామాల నుండి తెలంగాణ వాదులు ఆదివారం భారీగా తరలి వెళ్లారు. ఈ సందర్భంగా మండల జేఏసీ ఆధ్వర్యంలో బస్‌లు, సుమోలను ఏర్పాటు చేశారు. ఉపాధ్యాయ ,విద్యుత్‌ రంగ కార్మికులు ,విద్యార్థి సంఘాల నాయకులు ప్రజలను భారీగా తరలించారు.


 
  వరంగల్ సిటీ, న్యూస్‌లైన్
  సకల జనభేరి సభకు భారీగా తరలివెళ్లేందుకు తెలంగాణవాదులు సన్నద్ధమవుతున్నారు. హైదరాబాద్ నిజాం కళాశాల గ్రౌండ్‌లో తెలంగాణ జేఏసీ ఆధ్వర్యంలో ఆదివారం  జరిగే సభకు ఓరుగల్లు నుంచి 30వేల మందిని తరలించేందుకు తెలంగాణవాదులు కార్యాచరణ సిద్ధం చేసుకున్నారు. ప్రజాసంఘాలు, తెలంగాణ ఉద్యోగ, విద్యార్థి, వృత్తి సంఘాలు, న్యాయవాదులు, డాక్టర్ల జేఏసీలు తమ శ్రేణులను తరలించేందుకు ప్రణాళికలు రూపొందిం చుకున్నాయి. బస్సులు, రైళ్లలో తరలి వెళ్లే వారితోపాటు,  ప్రైవేటు బస్సులు, డీసీఎంలు, వ్యాన్‌లు, ఇతరత్రా ప్రైవేటు వాహనాలు ఏర్పాటు చేసుకునే పనిలో నిమగ్నమయ్యారు. తెలంగాణవాదుల నుంచి అంచనాలకు మించి స్పందన వస్తున్నందున వాహనాల సమస్య తలెత్తనున్నట్లు భావిస్తున్నారు. వీటిని అధిగమించేందుకు ముఖ్యనాయకులు ప్రయత్నాలు ముమ్మరం చేశారు.
  
   సకల జనభేరి సభ నేపథ్యంలో తెలంగాణ జేఏసీ ఆధ్వర్యంలో వారం రోజులుగా మండల స్థాయిలో సమావేశాలు, ప్రచారం నిర్వహించారు. ఉద్యోగ జేఏసీలు ప్రత్యేక ప్రచారం చేపట్టారుు. విద్యుత్, వైద్య, రెవెన్యూ, పంచాయతీరాజ్ ఇతరత్రా ఉద్యోగులు తరలివెళ్ళేందుకు సిద్ధమవుతున్నారు. ఈ విషయమై టీఆర్‌ఎస్ నేతలు   సమావేశాలు ఏర్పాటు చేసుకుని జనసమీకరణపై పని విభజన చేసుకున్నారు. నియోజకవర్గాల వారీగా బాధ్యతలు కేటాయించారు. బీజేపీ, న్యూడెమోక్రసీ, సీపీఐ నాయకులు, కార్యకర్తలు కూడా హైదరాబాద్ సభకు భారీగా వెళ్లనున్నారు. ఈ దఫా పోలీసుల అడ్డంకులు, నిఘా లేకపోవడంతోపాటు ప్రత్యేక సందర్భంలో సభ నిర్వహిస్తున్నందున తెలంగాణవాదుల్లో పట్టుదల కనిపిస్తోంది


 అఫ్జల్‌గంజ్, న్యూస్‌లైన్: నిజాం కాలేజీ గ్రౌండ్స్‌లో గణేష్ మండప నిర్వాహకుల బహిరంగ సభ ఆదివారం కోలాహలంగా జరిగింది. అభిమానులు పెద్దసంఖ్యలో హాజరయ్యారు. ఈ సందర్భంగా విశ్వహిందూ పరిషత్ (వీహెచ్‌పీ) సంరక్షకులు అశోక్‌సింఘాల్ ఉద్వేగభరితంగా ప్రసంగించారు. అనంతరం వీహెచ్‌పీ అంతర్జాతీయ అధ్యక్షులు, భాగ్యనగర్ గణేష్ ఉత్సవ సమితి అధ్యక్షులు జి. రాఘవరెడ్డి మాట్లాడుతూ దేశంలో హిందూత్వాన్ని నిర్వీర్యం చేసేందుకు దుష్టశక్తులు చేస్తున్న కుట్రలను భగ్నం చేయాల్సిన అవసరం ఉందన్నారు.
 
 హిందూ జాతి పరిరక్షణ కోసం హిందూ ఫోర్స్ రూపొందాల్సిన అవసరం ఆసన్నమైందన్నారు. హిందూ దేవాలయాల పరిరక్షణ సమితి కన్వీనర్ స్వామి కమలానంద భారతి మాట్లాడుతూ హిందువులు సభలు, సమావేశాలు జరుపుకొనేందుకు వెయ్యి ఎకరాల స్థలాన్ని కేటాయించాలని డిమాండ్ చేశారు. లక్షలాది మంది హిందువులు పాల్గొనే గణేష్ నిమజ్జనోత్సవం ప్రపంచంలోనే అరుదైన సామాజిక ఉత్సవమన్నారు. మాజీ ఎంపీ స్వామి చిన్మయానంద మాట్లాడుతూ అక్టోబర్ 18న దేశవ్యాప్తంగా లక్ష శిబిరాలలో అయోధ్య మందిర పునర్నిర్మాణం కోసం ప్రతిజ్ఞ చేయించేందుకు ఏర్పాట్లు చేస్తున్నట్లు తెలిపారు.  
 
 స్వామి పరిపూర్ణానంద మాట్లాడుతూ దేహానికి రోగం వస్తే మందులు బ్రతికిస్తాయని, దేశానికి జబ్బు పడితే గణపతి మాత్రమే రక్షించగలడన్నారు. ఉత్సవ సమితి ప్రధాన కార్యదర్శి డాక్టర్. భగవంత్‌రావు మాట్లాడుతూ సీఎం సమక్షంలో గణపతి మండపాలకు అనుమతి అవసరం లేదని నిర్ణయించినప్పటికీ కింది స్థాయి పోలీసు అధికారులు మాత్రం అనుమతులు తప్పని సరి అని వేధింపులకు పాల్పడుతున్నారని ధ్వజమెత్తారు. ఎంఐఎంపై ఘాటు విమర్శలు చేశారు.
 
 భాగ్యనగర్ గణేష్ ఉత్సవ సమితి ఆధ్వర్యంలో నిర్వహించిన ఈ కార్యక్రమంలో మాతా నిర్మల యోగానంద భారతి, సత్యస్వరూపానందస్వామి, అవధూత రామకృష్ణానంద, కేంద్ర మాజీమంత్రి బండారు దత్తాత్రేయ, గణేష్ ఉత్సవ సమితి సీనియర్ నాయకులు, మాజీ ఎమ్మెల్యే బద్దం బాల్‌రెడ్డి, సుదర్శన్‌రెడ్డి, కార్పొరేటర్లు బంగారి ప్రకాష్, దేవర కరుణాకర్, సహదేవ్ యాదవ్, ఉదయ్ కుమార్, రాజాసింగ్‌లోథా, మెట్టు వైకుంఠం, ఆలె జితేంద్ర, కన్నె ఉమారమేష్ యాదవ్, గ్రేటర్ బీజేపీ నాయకులు గొడుగు శ్రీనివాస్ యాదవ్, తూముకుంట అరుణ్ కుమార్ తదితరులు పాల్గొన్నారు.