కిక్కిరిసిన అయినవిల్లి

అయినవిల్లి: కార్తిక మాసం ఆదివారం కావడంతో అయినవిల్లి విఘ్నేశ్వర స్వామివారి ఆలయం భక్తులతో సందడిగా మారింది. ఆలయ ప్రధానార్చకుడు అయినవిల్లి సూర్యనారాయణ మూర్తి ఆధ్వర్యంలో స్వామికి మేలుకొలుపు సేవ, పంచామృతాభిషేకాలు, వివిధ పూజలు నిర్వహించారు. స్వామికి మహా నివేదన అనంతరం వివిధ పుష్పాలతో సర్వాంగ సుందరంగా అలంకరించారు. స్వామివారి లఘున్యాస, ఏకాదశ రుద్రాభిషేకాల్లో 99 మంది, పంచామృతాభిషేకాల్లో ఆరుగురు దంపతులు, లక్ష్మీగణపతి హోమంలో 23 మంది భక్త దంపతులు పాల్గొన్నారు. 21 మంది చిన్నారులకు తులాభారం, 21 మంది నూతన వాహన పూజ చేయించుకున్నారు. స్వామివారి అన్నదాన పథకంలో 5,420 మంది అన్నప్రసాదం స్వీకరించారు. స్వామికి వివిధ పూజలు, అన్నదాన విరాళాలుగా రూ.4,02,986 ఆదాయం లభించిందని ఆలయ ఈఓ, అసిస్టెంట్‌ కమిషనర్‌ ముదునూరి సత్యనారాయణ రాజు తెలిపారు.