పాత కక్షలతో కత్తితో దాడి

పాత కక్షలతో కత్తితో దాడి

నవీపేట: పాతకక్షలతో ఓ యువకుడిపై మరో యువకుడు కత్తితోదాడి చేశాడు. ఈ ఘటన మండల కేంద్రంలో సోమవారం రాత్రి చోటు చేసుకున్నట్లు ఎస్సై వినయ్‌ మంగళవారం తెలిపారు. మండల కేంద్రంలోని దర్యాపూర్‌ కాలనీకి చెందిన షేక్‌ అమన్‌ ఆరు నెలల క్రితం డీజే సౌండ్‌ పెట్టి శుభకార్యాన్ని జరుపుకోగా శబ్ద కాలుష్యమవుతోందని అదే కాలనీకి చెందిన షేక్‌ సోహెల్‌ వాగ్వాదానికి దిగి పోలీసులకు ఫిర్యాదు చేశాడు. పోలీసులు డీజేను నిలిపివేయించారు. దీంతో కక్షపెంచుకున్న షేక్‌ అమన్‌ సోదరుడు షేక్‌ గౌస్‌ సోమవారం రాత్రి స్నేహితులతో సోహెల్‌పై కత్తితో దాడి చేసి గాయపరిచాడు. గాయపడిన సోహెల్‌ను జిల్లా కేంద్రంలోని ప్రైవేట్‌ ఆసుపత్రికి తరలించారు. బాధితుని మామ షేక్‌ రజియొద్దీన్‌ ఫిర్యాదు మేరకు కేసు నమోదు చేసుకుని దర్యాప్తు చేస్తున్నట్లు ఎస్సై తెలిపారు.