విద్యుత్‌షాక్‌తో అసిస్టెంట్‌ హెల్పర్‌కు తీవ్ర గాయాలు

ఎల్లారెడ్డిపేట(సిరిసిల్ల): మండలంలోని కోరుట్లపేటలో గ్రామ పంచాయతీ అసిస్టెంట్‌ హెల్పర్‌ మోకినపల్లి దేవరాజు విద్యుత్‌షాక్‌కు గురై, తీవ్రంగా గాయపడ్డాడు. స్థానికుల వివరాల ప్రకారం.. కోరుట్లపేటలో సోమవారం విద్యుత్‌ సరఫరాలో లోపం తలెత్తింది. సరిచేసేందుకు అసిస్టెంట్‌ హెల్పర్‌ దేవరాజు ట్రాన్స్‌ఫార్మర్‌ పైకి ఎక్కాడు. పైన ఉండగానే విద్యుత్‌ సరఫరా కావడంతో కరెంట్‌షాక్‌కు గురై, కిందపడ్డాడు. ఈ ప్రమాదంలో గాయపడిన ఆయనను స్థానికులు ఆస్పత్రికి తరలించారు. ఆ సమయంలో సబ్‌స్టేషన్‌ ఆపరేటర్‌ మరో ఇద్దరు వ్యక్తులతో కలిసి సబ్‌స్టేషన్‌లోనే మద్యం సేవిస్తున్నాడని, ప్రమాదం జరిగినా పట్టించుకోలేదంటూ సెస్‌ ఏఈ పృథ్వీదర్‌గౌడ్‌కు ఫిర్యాదు చేశారు. అతనిపై చర్యలు తీసుకోవాలని కోరారు.