10న హరివిల్లు – చిన్నారుల పిల్లల పండుగ

10న హరివిల్లు – చిన్నారుల పిల్లల పండుగ

కృష్ణలంక(విజయవాడతూర్పు): బాలల దినోత్సవం సందర్భంగా ఈ నెల పదో తేదీ మధ్యాహ్నం మూడు గంటలకు హరివిల్లు – చిన్నారుల రంగుల పండుగ నిర్వహిస్తామని ఫోరమ్‌ ఫర్‌ ఆర్టిస్ట్స్‌ అధ్యక్షుడు ఎ.సునీల్‌కుమార్‌ తెలిపారు. రాఘవయ్య పార్కు సమీపంలోని ఎంబీ విజ్ఞాన కేంద్రంలో బుధవారం జరిగిన విలేకరుల సమావేశంలో హరివిల్లు కార్యక్రమ పోస్టర్‌ను ఆవిష్కరించారు. ఈ సందర్భంగా సునీల్‌కుమార్‌ మాట్లాడుతూ.. జాషువా సాంస్కృతిక వేదిక, ఫోరమ్‌ ఫర్‌ ఆర్టిస్ట్స్‌ సంయుక్త ఆధ్వ ర్యంలో ఎస్‌బీఐ లైఫ్‌ సౌజన్యంతో ఎంబీ విజ్ఞాన కేంద్రంలో చిన్నారుల రంగుల పండుగను నిర్వహిస్తున్నామని పేర్కొన్నారు. ఈ చిత్రలేఖనం పోటీలు మూడు గ్రూపులుగా జరుగుతాయని, ప్రవేశం ఉచిత మని వివరించారు. ఒకటి, రెండు, మూడు తరగతుల విద్యార్థులు సబ్‌ జూనియర్స్‌గా, నాలుగు, ఐదు, ఆరు తరగతుల విద్యార్థులు జూనియర్స్‌గా, ఏడు నుంచి పదో తరగతి విద్యార్థులు సీనియర్స్‌ కేటగిరీలో పోటీలు జరుగుతాయని తెలిపారు. విద్యార్థులు తమ పేర్లను ఈ నెల ఎనిమిదో తేదీలోగా వాట్సాప్‌ నంబర్‌ 9347950085కు పంపి నమోదు చేసుకోవాలని సూచించారు. పోటీలు అనంతరం ప్రముఖ చిత్రకారిణి స్వాతి పూర్ణిమ పిల్లలకు క్రాఫ్ట్‌ వర్క్స్‌లో మెలకువలు ప్రదర్శిస్తారని తెలిపారు. ఈ కార్యక్రమంలో జాషువా సాంస్కృతిక వేదిక కార్యదర్శి గుండు నారాయణ, ప్రముఖ చిత్రకారుడు అరసవిల్లి గిరిధర్‌, ఫోరమ్‌ ఫర్‌ ఆర్టిస్ట్స్‌ మహిళా విభాగం బాధ్యులు అరసవిల్లి సంధ్య, స్వాతి పూర్ణిమ, మైక్రో చిత్రకారు శ్రావణ్‌ కుమార్‌ తదితరులు పాల్గొన్నారు.