అలరించిన సదర్‌ ఉత్సవాలు

అలరించిన సదర్‌ ఉత్సవాలు

కోస్గి: మండల కేంద్రంలో బుధవారం రాత్రి యాదవ సంఘాల ఆధ్వర్యంలో నిర్వహించిన సదర్‌ ఉత్సవాలు అలరించాయి. పట్టణంలోని వేణుగోపాలస్వామి ఆలయం దగ్గర దున్నపోతులను ప్రత్యేకంగా అలంకరించి పూజలు నిర్వహించారు. అనంతరం డోలు వాయిద్యాల మధ్య స్థానిక శివాజీ చౌరస్తా వరకు ర్యాలీ నిర్వహించారు. ఈ సందర్భంగా దున్నపోతుల విన్యాసాలు ఆకట్టుకున్నాయి. ఈ సదర్‌ ఉత్సవాలకు పెద్ద ఎత్తున జనం హాజరయ్యారు. కాంగ్రెస్‌ నియోజకవర్గ ఇన్‌చార్జ్‌ తిరుపతిరెడ్డి ముఖ్య అథితిగా హాజరయ్యారు. అనంతరం ఏర్పాటు చేసిన బహిరంగ సభలో పలువురు యాదవ సంఘ ప్రతినిధులు సదర్‌ ఆవశ్యకతను వివరించారు. కళాకారుల ఆటపాటలు ఎంతగానో ఆకర్షించాయి.కార్యక్రమంలో జిల్లా యాదవ సంఘం గౌరవ అధ్యక్షుడు పీరంపల్లి శ్రీనివాస్‌, అధ్యక్షుడు గొల్ల నర్సిములు, నాయకులు బస్వరాజ్‌ యాదవ్‌, గుర్రం హన్మంతు, రమేష్‌, హన్మంతు, పూర్ణచందర్‌ యాదవ్‌ పాల్గొన్నారు.