‘ఇందిరమ్మ’ సర్వేకు సహకరించాలి

‘ఇందిరమ్మ’ సర్వేకు సహకరించాలి

భైంసాటౌన్‌: ఇందిరమ్మ ఇళ్ల లబ్ధిదారుల ఎంపిక కోసం చేపట్టనున్న సర్వేకు దరఖాస్తుదారులు సహకరించాలని మున్సిపల్‌ వైస్‌చైర్మన్‌ ఎండీ.జాబీర్‌ అహ్మద్‌ కోరారు. మున్సిపల్‌ కార్యాలయంలో మంగళవారం మాట్లాడారు. ప్రజాపాలనలో భాగంగా ఇందిరమ్మ ఇళ్ల కోసం పట్టణంలో 12,711 మంది దరఖాస్తు చేసుకున్నారని, ఈ మేరకు ప్రభుత్వం లబ్ధిదారుల ఎంపికకు సర్వే చేపడుతుందన్నారు. సర్వే బృందం దరఖాస్తుదారుల ఇంటికి వచ్చినప్పుడు వారు అడిగే వివరాలతోపాటు సంబంధిత ధ్రువపత్రాలు కలిగి ఉండాలని సూచించారు.

● గతంలో ఇందిరమ్మ కింద లబ్ధి పొందారా..?

● సొంత ఇంట్లో ఉంటున్నారా.. అద్దె ఇల్లా..

● అద్దె ఇంట్లో ఉంటే అది ఆర్‌సీసీనా రేకులు, కూనల ఇళ్లా..

● గోడలు ఇటుకలతో కట్టినవా, రేకులు, ఇతరత్రా..

● దరఖాస్తుదారు ప్రస్తుతం ఉంటున్న ఇల్లు, ఖాళీస్థలం వద్ద దిగిన మూడు ఫొటోలు దగ్గర ఉంచుకోవాలి.

● అలాగే ఇంటిలోపలి ఫొటోలు సైతం మూడు అందుబాటులో ఉండాలి.

● ఇంటి కుటుంబసభ్యుల వివరాలు, వారి వివాహ స్థితిగతులు..

● ఖాళీస్థలం ఉంటే, ఫొటో, సర్వే నంబరు, విస్తీర్ణం, సంబంధిత డాక్యుమెంట్‌, సాదాబైనామా, తదితర వివరాలు,

● కరెంట్‌ బిల్లు, మున్సిపల్‌ ట్యాక్స్‌, పొజిషన్‌ సర్టిఫికెట్‌ వగైరా..

● పట్టణంలో ఎన్నేళ్ల నుంచి నివాసముంటున్నారు.. వంటి వివరాలు అడుగుతారని పేర్కొన్నారు. ఆందోళన చెందకుండా ముందస్తుగా సంబంధిత ధ్రువపత్రాలు సిద్ధంగా ఉంచుకోవాలని సూచించారు. అనంతరం సర్వే బృందం దరఖాస్తుదారుల వివరాలను యాప్‌లో నమోదు చేస్తారని, అర్హుల జాబితా ప్రభుత్వం ప్రకటిస్తుందన్నారు.