హరితహారం చెట్ల నరికివేత..!

హరితహారం చెట్ల నరికివేత..!

భైంసాటౌన్‌: పట్టణంలోని బస్టాండ్‌ ప్రధాన రహదారి వెంబడి మున్సిపల్‌ ఆధ్వర్యంలో పెంచిన హరితహారం చెట్లు ఆదివారం నరికివేతకు గురయ్యాయి. స్థానిక ఐబీ ప్రాంతం, దర్శన్‌ లాడ్జి ఎదుట రోడ్డు వెంబడి కొన్నిచెట్లు నరికివేశారు. కొన్నింటికి కొమ్మలు తొలగించగా, మరికొన్నింటిని మొదళ్ల వరకు నరికేశారు. ఈ విషయమై మున్సిపల్‌ శానిటరీ ఇన్‌స్పెక్టర్‌ అనీస్‌ను వివరణ కోరగా, చెట్లు నరికివేసిన మాట వాస్తవమేనని తెలిపారు. కానీ, ఎవరు చేశారో తెలియదని పేర్కొన్నారు. విషయం కమిషనర్‌ దృష్టికి తీసుకెళ్లి ఆయన ఆదేశాల మేరకు తగిన చర్యలు తీసుకుంటామని తెలిపారు.