పట్టభద్రుల ఓటు కోసం 40,105 మంది దరఖాస్తు

నరసరావుపేట: ఉమ్మడి కృష్ణా, గుంటూరు జిల్లా పట్టభద్రుల నియోజకవర్గ ఎమ్మెల్సీ ఎన్నికలకు సంబంధించి మంగళవారం నాటికి జిల్లాలో 40,105మంది ఓటు కోసం దరఖాస్తు చేసుకున్నారని జిల్లా కలెక్టర్‌ పి.అరుణ్‌బాబు మంగళవారం వెల్లడించారు. పట్టభద్రులు ఓటు కోసం దరఖాస్తు చేసుకునేందుకు బుధవారంతో గడువు ముగుస్తుందన్నారు. కావున 2021 నవంబరు ఒకటవ తేదీ నాటికి డిగ్రీ ఉత్తీర్ణులైన వారు తమ డిగ్రీ ప్రొవిజినల్‌ సర్టిఫికెట్‌, సాధారణ ఎన్నికల ఓటరుకార్డుల జిరాక్స్‌ కాపీలతోపాటు పాస్‌పోర్టుసైజు ఫొటో, ఫారం –18తో కలిపి ఓటుకోసం దరఖాస్తు చేసుకోవాలన్నారు. సమీపంలోని తహసీల్దార్‌, మున్సిపల్‌ కార్యాలయాలతో పాటు ఆన్‌లైన్‌ ద్వారా దరఖాస్తు చేసుకోవచ్చన్నారు.