జీవీకి.. అమరన్‌ కానుక

జీవీకి.. అమరన్‌ కానుక

తమిళసినిమా: నటుడు శివ కార్తికేయన్‌ కథానాయకుడిగా నటించిన చిత్రం అమరన్‌. నటి సాయి పల్లవి నాయకిగా నటించిన ఈ చిత్రాన్ని రాజ్‌ కుమార్‌ సామి దర్శకత్వంలో సోనీ పిక్చర్స్‌ సంస్థతో కలిసి నటుడు కమలహాసన్‌ తన రాజ్‌ కమల్‌ ఫిలిం ఇంటర్నేషనల్‌ పతాకంపై నిర్మించిన విషయం తెలిసిందే. జీవి ప్రకాష్‌ కుమార్‌ సంగీతాన్ని అందించిన ఈ చిత్రం దీపావళి సందర్భంగా ప్రపంచవ్యాప్తంగా విడుదలై ఘన విజయాన్ని సాధించింది. అమరవీరుడు మేజర్‌ ముకుంద్‌ వరదరాజన్‌ జీవిత చరిత్రతో రూపొందిన ఈ చిత్రాన్ని పలువురు సినీ రాజకీయ నాయకులు ఎంతగానో ప్రశంసించారు. ముఖ్యంగా నామ్‌ తమిళర్‌ పార్టీ నేత సీమాన్‌, బీజేపీ నేత అన్నామలై, నటుడు రజనీకాంత్‌, శివకుమార్‌, సూర్య, జ్యోతిక, దర్శకుడు లోకేష్‌ కనకరాజ్‌, ఎస్‌జే సూర్య అమరన్‌ చిత్రాన్ని, అందులో ప్రధాన పాత్రలు పోషించిన నటుడు శివకార్తికేయన్‌, నటి సాయి పల్లవిలను ఎంతగానో ప్రశంసించారు. ఇకపోతే ఈ చిత్ర ఘనవిజయాన్ని పురస్కరించుకొని నటుడు శివ కార్తికేయన్‌ సంగీత దర్శకుడు జీవీ.ప్రకాష్‌ కుమార్‌కు ఖరీదైన వాచ్‌ను బహుమతిగా అందించారు. కాగా అమరన్‌ చిత్రం డిసెంబర్‌లో ఓటీటీలో స్ట్రీమింగ్‌కు సిద్ధమవుతోందని సమాచారం.