కార్డులెప్పుడు?

పరకాల మున్సిపాలిటీ రెండో డివిజన్ లో సర్వే చేస్తున్న అధికారులు (ఫైల్)

సాక్షి ప్రతినిధి, వరంగల్‌: కొత్త రేషన్‌కార్డులతో ప‘రేషన్‌’ తప్పుతుందని భావించిన ఆశావహులకు ఎదురుచూపులు తప్పడం లేదు. పైలెట్‌ ప్రాజెక్టు కింద సర్వే చేసేందుకు ఉమ్మడి వరంగల్‌లోని ఒక అసెంబ్లీ నియోజకవర్గంలోని ఒక మండలంలోని ఓ గ్రామం, ఓ మున్సిపాలిటీ వార్డును ఎంపిక చేశారు. ఈ నెల 3 నుంచి 7 వరకు పైలెట్‌ ప్రాజెక్టు కింద ఎంపిక చేసిన గ్రామాల్లో అధికారులు బృందాలుగా సర్వే పూర్తి చేశారు. ఆ తర్వాత మూడు నెలల వ్యవధిలో కొత్త కార్డులు జారీ చేసేందుకు వీలుగా అన్ని ప్రాంతాల్లో సర్వే ప్రక్రియ ముగించనున్నట్లు ప్రకటించారు. పైలెట్‌ ప్రాజెక్టు కింద ఎంపిక చేసిన గ్రామాల్లో సర్వే ముగించిన అధికారులు.. మిగతా గ్రామాల్లో ఎప్పటి నుంచి చేయనున్నారో ఇంకా షెడ్యూల్‌ ఇవ్వలేదు. దీంతో ఈ ప్రక్రియ ఎప్పుడు ముగుస్తుంది? డిజిటల్‌ రూపంలో కొత్త కార్డులు ఎప్పుడు అందుతాయి? అన్న చర్చ సర్వత్రా జరుగుతోంది. ప్రభుత్వ మార్గదర్శకాల ప్రకారం కుటుంబాల సర్వే పూర్తి చేసి త్వరలోనే కార్డులు అందజేసే ప్రక్రియ జరుగుతున్నదని అధికారులు చెబుతున్నారు.

కొత్త రేషన్‌ కార్డులకు ఎదురుచూపులు...

ఉమ్మడి వరంగల్‌లో కొత్త కార్డుల కోసం సుమారు 72,104 మంది దరఖాస్తులు చేసుకున్నట్లు రెండు నెలల కిందట అధికారులు ప్రకటించారు. పౌరసరఫరాల సంస్థ గణాంకాల ప్రకారం ఉమ్మడి జిల్లాలో 11,05,543 కార్డుల ద్వారా 32,55,776 మంది కుటుంబసభ్యులు 33,153.976 మెట్రిక్‌ టన్నుల రేషన్‌ బియ్యం ప్రతీనెల పొందుతున్నారు. సుమారు ఐదేళ్లుగా కొత్త రేషన్‌కార్డులు జారీ చేయకపోగా.. ఆన్‌లైన్‌లో దరఖాస్తులను స్వీకరించి కూడా కొత్తగా ఎవరికీ ఇవ్వలేదు. ’ప్రజాపాలన’ కార్యక్రమంలో తెల్ల కాగితాలపై దరఖాస్తులు ఆహ్వానించినా పరిష్కరించలేదు. కొత్త రేషన్‌కార్డుల జారీకి రాష్ట్ర ప్రభుత్వం మంత్రివర్గ ఉపసంఘాన్ని ఏర్పాటుచేసి, సర్వేతోపాటు ఫ్యామిలీ డిజిటల్‌కార్డుల జారీకి ఆదేశాలిచ్చింది. ఉన్న కార్డుల్లో కుటుంబ సభ్యుల పేర్లను చేర్చడం.. ఆ తర్వాత కొత్త రేషన్‌కార్డులు జారీ చేయాలని సూచించినా ఆ ప్రక్రియ ముందుకు సాగడం లేదు.

వివరాలు తీసుకున్నరు.. ఇంకా ఏమీ చెప్పలే

అధికారులు మా గ్రామంలో కూడా ఇంటింటికి తిరిగి సర్వే నిర్వహించారు. డిజిటల్‌ సర్వేలో కుటుంబ సభ్యుల సంఖ్య, వివరాలను సేకరించడంతోపాటు మా గ్రూప్‌ ఫొటో తీసుకున్నారు. కుటుంబంలో కుమారులకు పెళ్లి అయినట్లయితే వేరుగా వివరాలను నమోదు చేశారు. ఆధార్‌కార్డుల నంబర్‌, పుట్టిన తేదీ వివరాలు అడిగారు. రేషన్‌ కార్డు ఉందా లేదా? అని కనుక్కొని వెళ్లారు. ఇంకా ఏమీ చెప్పలేదు.

– కుమ్మిత లలిత, పొట్లాపూర్‌

ఫ్యామిలీ డిజిటల్‌ రేషన్‌కార్డుల కోసం ఎదురుచూపులు

ఉమ్మడి వరంగల్‌ జిల్లాలో ఇలా..

మొత్తం కార్డులు : 11,05,543

(ఆహారభద్రత+అంత్యోదయ+అన్నపూర్ణ)

మొత్తం యూనిట్లు (కుటుంబసభ్యులు) : 32,55,776

మండల స్థాయి స్టాక్‌ పాయింట్లు : 18

మొత్తం రేషన్‌ దుకాణాలు: 2,364

ప్రతీనెల రేషన్‌ బియ్యం పంపిణీ : 33,153.976 మె.టన్నులు