వేసవిలో ఆరోగ్యం జర జాగ్రత్త..!

నిడమర్రు : వేసవి కాలం వచ్చింది, తనతోపాటు వడగాడ్పులు, దాహం, నీరసం తీసుకువస్తుంది. వీటితో చిరాకు, మరింత నీరసం. పగలంతా భానుడు నిప్పులు చెరుగుతాడు. ఆ ఎండలకు ఒకటే ఉష్ణోగ్రతోపాటు పగలు సమయం ఎక్కువగాను, రాత్రి సమయం తక్కువగా ఉంటుంది. కొద్దిపాటి జాగ్రత్తలు తీసుకుంటే మండు వేసవి కూడా చల్లగా ఆస్వాదించవచ్చంటున్నారు వైద్యులు.

⇔ ఆహార పదార్థాల్లో నూనె తక్కువగా వాడాలి. ఆకుకూరలు ఎక్కువగా తీసుకోవాలి.
⇔ ఉదయం పూట అల్పాహారంలో నూనె వంటకాలు కాకుండా, ఆవిరి కుడుములు, ఇడ్లీలు ఆరోగ్యకరమైనవి
⇔ కర్బూజాలు ఎక్కువగా తీసుకోవాలి. మజ్జిగ అన్నంలో మామిడి పండ్లు తింటే విటమిన్‌ ఏ, డీ శరీరానికి ఎక్కువగా అందుతాయి.
⇔ శీతల పానీయాల కన్నా కొబ్బరి నీళ్లు చాలా మంచిది. కాఫీ/టీలకు వీలైనంత దూరంగా ఉండాలి.
⇔ కిటికీలకు గుమ్మాలకు వట్టివేళ్ల తెరలని తడిపి కర్టెన్స్‌ మాదిరిగా కట్టుకుంటే వేడిని ఇంటిలోకి రానివ్వకుండా చల్లదనం ఇస్తుంది.
⇔ సాధారణంగా పిల్లలు వేసవి సెలవుల్లో ఎండలోకి వెళ్లి ఆటలు ఆడతారు. తల్లిదండ్రులు పిల్లల్ని అలా ఎండలోకి వెళ్లనీయకుండా ఇండోర్‌ గేమ్స్‌ ఆడించాలి.
⇔ పలుచని మజ్జిగలో కాసింత నిమ్మరసం, ఉప్పు కలిపి పల్చగా కలిపి పిల్లా పెద్దా అందరూ తాగితే ఆరోగ్యానికి మంచిది.
⇔ వేసవిలో బయట జ్యూస్‌లు ఎక్కువగా తీసుకోకుండా ఇంట్లో అన్నిరకాల పండ్లతో మరియు కూరగాయలతో జ్యూస్‌లు చేసుకొని తాగేలా శ్రద్ధ వహించాలి.
⇔ పిల్లలకు మజ్జిగ కొబ్బరి నీళ్లు, గ్లూకోజ్‌ నీళ్లు, నిమ్మరసం, ఎండు ఖర్జూరం నానబెట్టిన నీళ్లు, సగ్గుబియ్యం కాసిన నీళ్లు తాగించడం అలవాటు చేయాలి
⇔ పెద్దలు, పిల్లలు గ్లాసుడు నీళ్లలో చిటికెడు ఉప్పు, ఒక స్పూన్‌ పంచదార కలిపి ఓఆర్‌ఎస్‌ ద్రావణంలా కలిపి తాగితే మంచిది.
⇔ తాటి ముంజులు వేసవిలో మాత్రమే అందుబాటులో ఉంటాయి. లేత కొబ్బరిలా ఉండే తాటి ముంజులు ఆరోగ్యానికి ఎంతో మేలు చేస్తాయి.
⇔ నీరు ఎక్కువగా ఉండే ఆహార పదార్థాలు తీసుకోవాలి. నీటిని ఎక్కువగా తాగాలి.
⇔ వేసవిలో బయటకు వెళ్లేటప్పుడు కంటికి సన్‌గ్లాసెస్, తలకు టోపీ ధరించాలి.
⇔ వయసు 50 దాటిన వారు తమ ప్రయాణాల్లో ఓఆర్‌ఎస్‌ ప్యాకెట్స్‌ వెంట తీసుకుని వెళ్లాలి.
⇔ ఒకవేళ వివిధ ఆరోగ్య సమస్యలు కలిగి ఉంటే మాత్రం ఎక్కువగా సూర్యరశ్మికి బహిర్గతం అవ్వకండి.
⇔ గుండె సంబంధిత వ్యాధులు మూత్రపిండ సమస్యలు కలిగి ఉన్నవారు సూర్య రశ్మికి బహిర్గతం అవ్వడం వల్ల త్వరగా డీ హైడ్రేషన్‌కు గురై ఆ వ్యాధి తీవ్రతలు అధికమవుతాయి.
⇔ వేసవికాలంలో శరీరానికి అతుక్కుని బిగుతుగా ఉండే దుస్తులు ధరించవద్దు. వదులుగా కాటన్‌తో తయారు చేసిన బట్టలు ధరించాలి. దీనివల్ల మీ శరీరానికి గాలి తగిలి డీహైడ్రేషన్‌ జరిగే అవకాశం తగ్గుతుంది.
⇔ మద్యపానం, సిగరెట్, కార్బొనేటెడ్‌ వంటి ద్రావణాలకు దూరంగా ఉండండి. వీటిని సేవించడం వల్ల శరీర ఉష్ణోగ్రతలు బాగా పెరుగుతాయి.
⇔ వేసవికాలంలో బయటకు వెళ్లేటప్పుడు మంచినీటి బాటిల్‌ తప్పకుండా తీసుకుని వెళ్లండి.
⇔ వేసవిలో కొబ్బరి బొండాం ఆరోగ్య ప్రదాయిని. కొబ్బరి బొండాలు కాస్త «ఖరీదైనా తర్వాత ఆస్పత్రి మందుల ఖర్చుతో పోల్చితే వీటికి పెట్టే ఖర్చు తక్కువే.
⇔ కొబ్బరి నీళ్లలో అనేక పోషకాలు ఉన్నాయి. అధిక ఉష్ణోగ్రతను తగ్గిస్తుంది. మూత్ర విసర్జన సాఫీగా అవుతుంది. కిడ్నీలకు సంబంధించిన వ్యాధులు దరికి చేరవు.
⇔ కొబ్బరి నీళ్లలో గ్లూకోజ్‌ కలుపుకుని తాగితే వేసవి బడిలక నీరసం చాలా త్వరగా తగ్గుతుంది.