పెళ్లైన రెండు రోజులకే..

- బుధవారం ఇష్టంలేని పెళ్లి చేసిన పెద్దలు
- గురువారం ప్రియుడితో పరార్
- శుక్రవారం ఇద్దరూ కలిసి ఆత్మహత్య

వికారాబాద్ (రంగారెడ్డి జిల్లా) : అక్క మరిదిని ప్రేమించింది. పెళ్లికి పెద్దలు అంగీకరించలేదు. ఈ నెల 17న ఇష్టం లేని పెళ్లి చేశారు. పెళ్లైన తెల్లారే ప్రియుడితో కలసి ఇంటి నుంచి వెళ్లిపోయింది. ఆ మరుసటిరోజే ప్రేమికులిద్దరూ కలిసి రైలు పట్టాలపై ఆత్మహత్యకు పాల్పడ్డారు.  

రంగారెడ్డి జిల్లా నవాబ్‌పేట మండలం ఎక్‌మామిడి గ్రామానికి చెందిన లావణ్య(18)కు కొంపల్లికి చెందిన రాంనివాస్(23) తో పరిచయం ఉంది. అక్క మరిది కావడంతో వారి పరిచయం ప్రేమగా మారింది. ఈ క్రమంలో లావణ్యకు ఇంట్లో వాళ్లు ఫిబ్రవరి 17న ఇష్టంలేని పెళ్లి చేశారు. తరువాత రోజు గురువారం ఆమె తన ప్రియుడితో కలసి ఇంటినుంచి వెళ్లిపోయింది.

కాగా శుక్రవారం మధ్యాహ్నం వికారాబాద్-చిట్టిగడ్డ మధ్య ప్రాంతంలో రైలు కింద పడి ప్రేమజంట బలవన్మరణానికి పాల్పడ్డారు. పెళ్లి జరిగిన రెండు రోజులకే పెళ్లికూతురు ఆత్మహత్య చేసుకోవడంతో గ్రామంలో విషాదచాయలు అలుముకున్నాయి. పోలీసులు కేసు నమోదు చేసుకుని దర్యాప్తు చేస్తున్నారు.