భవిష్యత్‌ను తీర్చిదిద్దుకొనేదిలా!

హైదరాబాద్: నేటి తరం విద్యార్థుల్లో మెళకువలు, నైపుణ్యాలు కొరవడుతున్నాయి. ఉన్నత విద్య అభ్యసించినా సరైన ఉద్యోగావకాశాలు అందుకోలేకపోతున్నారు. తాము చదివిన చదువుకు సంబంధం లేని కొలువులు చేస్తూ అరకొర వేతనాలతో కాలం వెళ్లదీస్తున్నారు. ఇంకొందరు నిరుద్యోగులుగానే మిగిలిపోతున్నారు. వారిని సరైన మార్గనిర్దేశం లేకపోవడం వల్లే కెరీర్ పరుగులో వెనుకంజ వేస్తున్నారు. ఈ పరిస్థితిని నివారించడానికి పాఠశాల స్థాయి నుంచే అకడమిక్ కెరీర్ ప్లానింగ్‌పై అవగాహన కల్పించే నూతన కార్యక్రమాన్ని పాఠశాల విద్యాశాఖ ఇటీవల చేపట్టింది. సెంటర్ ఫర్ ఇన్నోవేటివ్ లెర్నింగ్(సీఎఫ్‌ఐఎల్) సహకారంతో ప్రయోగాత్మకంగా గుంటూరు, కృష్ణా జిల్లాల్లో నిర్వహించిన ఈ కార్యక్రమానికి విద్యార్థులు, తల్లిదండ్రులు, టీచర్ల నుంచి అనూహ్య స్పందన లభించింది. దీన్ని ఇతర జిల్లాల్లోనూ కొనసాగించాలని అధికారులు యోచిస్తున్నారు.