TV
రాంబాబు ఫ్యామిలీ స్టోరీ
రాంబాబు ఓ కేబుల్ ఆపరేటర్. అతనిది చిన్న కుటుంబం. చింతలు లేని కుటుంబం. మనసెరిగిన భార్య. రత్నాల్లాంటి ఇద్దరమ్మాయిలు. ఓ సంఘటన ఈ కుటుంబాన్ని కల్లోలానికి గురి చేస్తుంది. అదేంటో తెలియాలంటే ‘దృశ్యం’ సినిమా చూడాల్సిందే. వెంకటేశ్, మీనా ఇందులో హీరో హీరోయిన్లు. చంటి, సుందరకాండ, అబ్బాయిగారు, సూర్యవంశం లాంటి హిట్ సినిమాలు వీరి కాంబినేషన్‌లో రూపొందాయి. సీనియర్ కథానాయిక శ్రీప్రియ ఈ చిత్రానికి దర్శకురాలు.
డి. సురేశ్‌బాబు, రాజ్‌కుమార్ సేతుపతి నిర్మించిన ఈ సినిమా ఈ నెల 11న విడుదల కానుంది. ఈ సందర్భంగా డి. సురేశ్‌బాబు మాట్లాడుతూ -‘‘ఇప్పటి వరకూ ఎన్నో కుటుంబ కథా చిత్రాలు, థ్రిల్లర్ సినిమాలు చూశాం. ఈ రెంటినీ మిళితం చేసి తీసిన సినిమా ఇది. ఇందులో కుటుంబ భావోద్వేగాలతో పాటు థ్రిల్ కూడా ఉంటుంది’’ అని చెప్పారు. శ్రీప్రియ మాట్లాడుతూ -‘‘మలయాళంలో ఘనవిజయం సాధించిన ‘దృశ్యం’కు ఇది రీమేక్. ఇందులో ప్రతి పాత్రనూ అందరూ ఐడెంటిఫై చేసుకుంటారు’’ అన్నారు.
