తిమార్‌పూర్‌లో అత్యాధునిక ఎస్టీపీ

న్యూఢిల్లీ: పర్యావరణానికి హాని చేయని పద్ధతిలో వ్యర్థాలను తొలగిస్తూ నీటిని శుద్ధీకరించగల అత్యాధునిక మురుగునీటి శుద్ధీకరణ ప్లాంటు (ఎస్టీపీ)ను ప్రయోగాత్మకంగా తిమార్‌పూర్‌లో ప్రారంభిం చారు. రక్షణ పరిశోధన, అభివృద్ధి సంస్థ (డీఆర్‌డీఓ) పేటెంటు పొందిన బయో-డిజిస్టర్ టెక్నాలజీ పద్ధతిలో దీనిని సంస్థ నివాసగృహ సముదాయం ఆవరణలో మంగళవారం ప్రారంభించారు. పర్యావరణ అనుకూల విధానంలో వ్యర్థాలను శుద్ధీకరించే అర్కిన్ క్రియేషన్ అనే సంస్థ బయో-డిజిస్టర్ టెక్నాలజీ పద్ధతిని రూపొందించింది. ‘ఈ ప్లాంటు ప్రతినిత్యం 900 మందికి సేవలు అందిస్తుంది. దాదాపు 1.25 లక్షల లీటర్ల నీటిని నిత్యం శుద్ధీకరిస్తుంది. ఇది పర్యావరణానికి హాని చేయకుండా, తక్కువ శక్తితో మున్సిపల్ వ్యర్థాలను బాగుచేస్తుంది’ అని అర్కిన్ క్రియేషన్ డెరైక్టర్ మదన్‌ఝా అన్నారు.