ఈ వారంలో జరిగే నాలుగు రోజుల  ట్రేడింగ్‌లో బడ్జెట్‌పై అంచనాలు, కార్పొరేట్‌ క్యూ3 ఫలితాలు, నెలవారీ డెరివేటివ్స్‌ ఎక్స్‌పైరీ, ప్రపంచ పరిణామాలతో ఇన్వెస్టర్ల అప్రమత్తతో ఒడిదుడుకుల ట్రేడింగ్‌కు అవకాశం ఉండొచ్చని నిపుణులు అభిప్రాయం వ్యక్తం చేస్తున్నారు.  ఈ తరుణంలో సోమవారం ఉదయం 9.46 నిమిషాల సమయానికి సెన్సెక్స్‌ 413 పాయింట్ల లాభంతో  61035 వద్ద ట్రేడ్‌ అవుతుండగా నిఫ్టీ 110 పాయింట్లు లాభ పడి 18138 వద్ద ట్రేడింగ్‌ను కొనసాగిస్తుంది.  ఆల్ట్రాటెక్‌ సిమెంట్‌,ఎన్‌టీపీసీ,జేఎస్‌డబ్ల్యూ స్టీల్‌,అదానీ పోర్ట్స్‌, డాక్టర్‌ రెడ్డీస్‌ ల్యాబ్స్‌, అదానీ ఎంటర్‌ ప్రైజెస్‌, గ‍్రసిం,టాటా స్టీల్‌, ఏసియన్‌ పెయింట్స్‌ షేర్లు లాభాల్లో ట్రేడ్‌ అవుతుండగా..హీరోమోటో కార్ప్‌, పవర్‌ గ్రిడ్‌ కార్పొరేషన్‌, యూపీఎల్‌, టాటా మోటార్స్‌, హిందాల్కో, కొటక్‌ మహీంద్రా, ఎథేర్‌ మోటార్స్‌,ఎస్‌బీఐ షేర్లు నష్టాలతో కొట్టుమిట్టాడుతున్నాయి.  అంతకు ముందు ఈ రోజు ఉదయం సెన్సెక్స్‌ 288 పాయింట్లు లాభంతో 60909 వద్ద, నిఫ్టీ 78 పాయింట్ల లాభంతో 18106 ట్రేడింగ్‌ ప్రారంభమైంది. ఇక 1620 షేర్లు అడ్వాన్స్‌గా ట్రేడ్‌ అవుతుండగా.. 616 షేర్లు నష్టాల్లో నష‍్టాలతో ఆరంభించాయి. 143 షేర్లలో ఎలాంటి మార్పులు చోటు చేసుకోలేదు. 

ముంబై: ఆర్థిక మాంద్యం భయాలతో దేశీయ స్టాక్‌ సూచీల రెండురోజుల ర్యాలీకి గురువారం బ్రేక్‌ పడింది. కేంద్ర బడ్జెట్, రానున్న ప్రధాన కంపెనీల త్రైమాసిక ఆర్థిక ఫలితాల విడుదల నేపథ్యంలో ఇన్వెస్టర్లు అప్రమత్తత వ్యవహరించారు. ఆటో, విద్యుత్, ఎఫ్‌ఎంసీజీ షేర్లలో అమ్మకాలు తలెత్తడంతో సెన్సెక్స్‌ 187 పాయింట్లు నష్టపోయి 60,858 వద్ద స్థిరపడింది. నిఫ్టీ 58 పాయింట్లు పతనమై 17,108 వద్ద నిలిచింది. అయితే ప్రభుత్వరంగ బ్యాంక్స్, ఐటీ రంగ షేర్లకు స్వల్ప  కొనుగోళ్ల మద్దతు లభించింది. ఆసియా మార్కెట్ల నుంచి ప్రతికూల ప్రతికూల సంకేతాలు అందుకున్న సూచీలు ఉదయం నష్టాలతో మొదలయ్యాయి. ట్రేడింగ్‌లో తీవ్ర ఒడిదుడుకులకు లోనవుతూ లాభ, నష్టాల మధ్య కదలాడాయి. సెన్సెక్స్‌ 60,716 వద్ద కనిష్టాన్ని, 61,032 వద్ద గరిష్టాన్ని నమోదు చేసింది. నిఫ్టీ 18,064 – 18,155 పరిధిలో కదలాడింది. అమెరికా తయారీ రంగ, రిటైల్‌ అమ్మకాలు మెప్పించకపోవడంతో ప్రపంచ ఈక్విటీ మార్కెట్లు బలహీనంగా ట్రేడవుతున్నాయి.  మార్కెట్లో మరిన్ని సంగతులు   ►డిసెంబర్‌ క్వార్టర్‌ ఆర్థిక ఫలితాలు అంచనాలను అందుకోలేకపోవడంతో ఏషియన్‌ పెయింట్స్‌ షేరు 3% నష్టపోయి రూ.2,868 వద్ద స్థిరపడింది.  ► ఫాలో ఆన్‌ పబ్లిక్‌ ఆఫర్‌(ఎఫ్‌పీఓ) ప్రకటన తర్వాత అదానీ ఎంటర్‌ప్రైజెస్‌ షేరు అమ్మకాల ఒత్తిడికి లోనవుతుంది. బీఎస్‌ఈలో నాలుగుశాతం క్షీణించి రెండు నెలల కనిష్ట స్థాయి రూ.3462 వద్ద స్థిరపడింది.   ►బలమైన ఆదాయాల వృద్ధి నమోదు ఆశలతో ఓఎన్‌జీసీ షేరు రెండు శాతం పెరిగి ఆరు నెలల గరిష్టం రూ.152 వద్ద స్థిరపడింది.

ముంబై: క్రిస్మస్‌ పండుగ తర్వాత రోజు స్టాక్‌ మార్కెట్లో శాంటాక్లాజ్‌ ర్యాలీ కనిపించింది. కోవిడ్‌ భయాలతో గతవారం అమ్మకాల ఒత్తిడికి లోనైన దేశీయ మార్కెట్‌ సోమవారం భారీ లాభాలను ఆర్జించింది. ఇటీవల మార్కెట్‌ పతనంతో కనిష్టాలకు దిగివచ్చిన షేర్లకు డిమాండ్‌ లభించింది. అధిక వెయిటేజీ ఐసీఐసీఐ బ్యాంక్, రిలయన్స్‌ షేర్లు ఒకటిన్నర శాతం రాణించి సూచీల ర్యాలీకి దన్నుగా నిలిచాయి. అంతర్జాతీయ మార్కెట్లలోని మిశ్రమ సంకేతాలు ట్రేడింగ్‌పై పెద్దగా ప్రభావాన్ని చూపలేదు. ఉదయం సెన్సెక్స్‌ 90 పాయింట్ల స్వల్ప నష్టంతో 59,845 వద్ద, నిఫ్టీ 23 పాయింట్ల పతనంతో 17,830 వద్ద ట్రేడింగ్‌ను ప్రారంభించాయి. జాతీయ, అంతర్జాతీయంగా ట్రేడింగ్‌ను ప్రభావితం చేసే ప్రతికూలాంశాలేవీ లేకపోవడంతో సూచీలు స్థిరంగా ముందుకు కదిలాయి. ఒక దశలో సెన్సెక్స్‌ 989 పాయింట్లు దూసుకెళ్లి 60,834 వద్ద, నిఫ్టీ 277 పాయింట్లు బలపడి 18,084 వద్ద ఇంట్రాడే గరిష్టాలను నమోదు చేశాయి. ఆఖర్లో స్వల్ప లాభాల స్వీకరణ చోటు చేసుకోవడంతో చివరికి సెన్సెక్స్‌ 721 పాయింట్ల లాభంతో 60,566 వద్ద స్థిరపడింది. నిఫ్టీ 208 పాయింట్లు పెరిగి 18,015 వద్ద నిలిచింది. సెన్సెక్స్‌ సూచీలో 30 షేర్లలో ఐదు మాత్రమే నష్టపోయాయి. దీంతో స్టాక్‌ సూచీల నాలుగురోజుల వరుస నష్టాల నుంచి గట్టెక్కాయి. ఫార్మా మినహా అన్ని రంగాల షేర్లు రాణించాయి. ముఖ్యంగా ఫైనాన్స్, ఇంధన, ఐటీ షేర్లను కొనేందుకు ఇన్వెస్టర్లు ఆసక్తి చూపారు. విస్తృత స్థాయిలో మార్కెట్లో చిన్న, మధ్య తరహా షేర్లు భారీ డిమాండ్‌ నెలకొంది. ఫలితంగా బీఎస్‌ఈ స్మాల్, మిడ్‌ క్యాప్‌ ఇండెక్స్‌లు వరుసగా 3.13%, 2.31 శాతం చొప్పున ర్యాలీ చేశాయి. విదేశీ ఇన్వెస్టర్లు రూ.498 కోట్ల షేర్లను అమ్మేశారు. సంస్థాగత ఇన్వెస్టర్లు రూ.1286 కోట్ల ఈక్విటీలను కొనుగోలు చేశారు. ఆసియా అరశాతం చొప్పున లాభపడ్డాయి. డాలర్‌ మార్కెట్లో రూపాయి విలువ 17 పైసలు బలపడి 82.65 స్థాయి వద్ద స్థిరపడింది. సెన్సెక్స్‌ ఒకశాతానికి పైగా ర్యాలీ చేయడంతో స్టాక్‌ మార్కెట్లో రూ. 5.79 లక్షల కోట్ల సంపద సృష్టి జరిగింది. దీంతో బీఎస్‌ఈలోని కంపెనీల మొత్తం విలువ రూ.277.91 లక్షల కోట్లకు చేరింది. రాయ్‌ దంపతులు ఎన్‌డీటీవీలోని తమ వాటాను అదానీకి విక్రయించనుండటంతో 5% బలపడి రూ. 358 వద్ద ఇంట్రాడే గరిష్టాన్ని తాకిన ఎన్‌డీటీవీ, చివరికి 1% లాభంతో రూ.343 వద్ద స్థిరపడింది. 

న్యూఢిల్లీ: తాజాగా రెండు కంపెనీలు పబ్లిక్‌ ఇష్యూ బాట పట్టాయి. ఇన్‌ఫ్రాస్ట్రక్చర్‌ ఇన్వెస్ట్‌మెంట్‌ ట్రస్ట్‌ భారత్‌ హైవేస్‌ ఇన్విట్, వైట్‌ ఆయిల్స్‌ తయారీ కంపెనీ గాంధార్‌ ఆయిల్‌ రిఫైనరీ ఈ జాబితాలో చేరాయి. ఈ రెండు సంస్థలూ క్యాపిటల్‌ మార్కెట్ల నియంత్రణ సంస్థ సెబీకి ముసాయిదా ప్రాస్పెక్టస్‌ను దాఖలు చేశాయి. వివరాలు ఇలా..  రూ. 2,000 కోట్లకు రెడీ  పబ్లిక్‌ ఇష్యూలో భాగంగా భారత్‌ హైవేస్‌ ఇన్విట్‌ బుక్‌బిల్డింగ్‌ ద్వారా రూ. 2,000 కోట్ల విలువైన యూనిట్లను ఆఫర్‌ చేయనుంది. తద్వారా రూ. 2,000 కోట్లు సమకూర్చుకోనుంది. నిధులను ప్రాజెక్టŠస్‌ ఎస్‌పీవీకి చెందిన కొన్ని రుణాల చెల్లింపుతోపాటు.. సాధారణ కార్పొరేట్‌ అవసరాలకు వినియోగించనుంది. ఎస్‌పీవీ ప్రాజెక్టŠస్‌లో.. పోర్‌బందర్‌– ద్వారకా ఎక్స్‌ప్రెస్‌వే, వారణాశి– సంగమ్‌ ఎక్స్‌ప్రెస్‌వే, జీఆర్‌ సంగ్లీ– సోలాపూర్‌ హైవే, జీఆర్‌ అక్కల్‌కోట్‌– సోలాపూర్‌ హైవే, జీఆర్‌ ఫగ్వారా ఎక్స్‌ప్రెస్‌వే, జీఆర్‌ గుండుగొలను– దేవరాపల్లి హైవే ఉన్నాయి. 2022 ఆగస్ట్‌లో ఏర్పాటైన భారత్‌ హైవేస్‌ ఇన్విట్‌ ప్రాజెక్ట్‌ ఎస్‌పీవీలో ప్రతీ ప్రాజక్టులోనూ 100 శాతం చొప్పున వాటా కొనుగోలు చేయనుంది. ప్రాథమికంగా 49 శాతం వాటాను సొంతం చేసుకుంటుంది.  రూ. 500 కోట్లపై కన్ను  పబ్లిక్‌ ఇష్యూలో భాగంగా గాంధార్‌ ఆయిల్‌ రిఫైనరీ రూ. 357 కోట్ల విలువైన ఈక్విటీని తాజాగా జారీ చేయనుంది. వీటికి అదనంగా మరో 1.2 కోట్ల షేర్లను ప్రమోటర్లు, ప్రస్తుత వాటాదారులు విక్రయానికి ఉంచనున్నారు. తద్వారా రూ. 500 కోట్లు సమీకరించే యోచనలో ఉన్నట్లు తెలుస్తోంది. ఈక్విటీ జారీ నిధులను రుణ చెల్లింపులు, ఎక్విప్‌మెంట్‌ కొనుగోలుసహా.. సిల్వస్సా ప్లాంటులో ఆటోమోటివ్‌ ఆయిల్‌ తయారీ సామర్థ్య విస్తరణకు అవసరమైన సివిల్‌ వర్క్‌లకూ వెచ్చించనుంది. అంతేకాకుండా తలోజా ప్లాంటులో పెట్రోలియం జెల్లీతోపాటు.. సంబంధిత కాస్మెటిక్‌ ప్రొడక్టుల తయారీ విస్తరణకు సైతం వినియోగించనుంది. వైట్‌ ఆయిల్స్‌ తయారీకి మరిన్ని బ్లెండింగ్‌ ట్యాంకులను సైతం ఏర్పాటు చేయనుంది.

న్యూఢిల్లీ: వారాంతాన(23న) ప్రారంభంకానున్న పబ్లిక్‌ ఇష్యూకి రేడియంట్‌ క్యాష్‌ మేనేజ్‌మెంట్‌ సర్వీసెస్‌ రూ. 94–99 ధరల శ్రేణిని ఖరారు చేసింది. మంగళవారం(27న) ముగియనున్న ఇష్యూలో భాగంగా రూ. 60 కోట్ల విలువైన ఈక్విటీని తాజాగా జారీ చేయనుంది. అంతేకాకుండా మరో 3,31,25,000 షేర్లను ప్రమోటర్‌ డేవిడ్‌ దేవసహాయంతోపాటు, పీఈ సంస్థ అసెంట్‌ క్యాపిటల్‌ అడ్వయిజర్స్‌ ఇండియా ఆఫర్‌ చేయనుంది. తద్వారా కంపెనీ రూ. 388 కోట్లు సమీకరించాలని భావిస్తోంది.  2015లో అసెంట్‌ క్యాపిటల్‌ రేడియంట్‌లో 37.2 శాతం వాటాను కొనుగోలు చేసింది. ఈక్విటీ జారీ నిధులను వర్కింగ్‌ క్యాపిటల్, పెట్టుబడి వ్యయాలకు వినియోగించనుంది. ప్రత్యేకంగా రూపొందిన రక్షణాత్మక వ్యాన్లను సొంతం చేసుకునేందుకు వెచ్చించనుంది. రిటైల్‌ ఇన్వెస్టర్లు కనీసం 150 షేర్లకు(ఒక లాట్‌) దరఖాస్తు చెయ్యాలి.  జాగిల్‌ ప్రీపెయిడ్‌ ఓషన్‌ రెడీ  ఫిన్‌టెక్‌ కంపెనీ జాగిల్‌ ప్రీపెయిడ్‌ ఓషన్‌ సర్వీసెస్‌ పబ్లిక్‌ ఇష్యూ బాట పట్టింది. ఇందుకు అనుగుణంగా సెబీకి తాజాగా ప్రాథమిక ప్రాస్పెక్టస్‌ను దాఖలు చేసింది. ఇష్యూలో భాగంగా కంపెనీ రూ. 490 కోట్ల విలువైన ఈక్విటీని కొత్తగా జారీ చేయనుంది. వీటికి జతగా 1.05 కోట్ల షేర్లను ప్రమోటర్లు, ప్రస్తుత ఇన్వెస్టర్లు, ఇతర వాటాదారులు విక్రయానికి ఉంచనున్నారు. 2011లో ప్రారంభమైన కంపెనీ బిజినెస్‌ టు బిజనెస్‌ టు కస్టమర్‌ విభాగంలో పనిచేస్తోంది.

దేశీయ స్టాక్‌ మార్కెట్‌లో వరుస లాభాలకు బ్రేకులు పడ్డాయి. జాతీయ, అంతర్జాతీయ ప్రతికూల అంశాలు దేశీయ సూచీల మీద తీవ్ర ప్రభావం చూపాయి. దీంతో వరుసగా 8 రోజులుగా లాభపడిన స్టాక్‌ మార్కెట్‌లు శుక్రవారం నష్టాలతో కొట్టుమిట్టాడుతున్నాయి.   ఉదయం 10.30గంటల సమయానికి  సెన్సెక్స్‌ 372 పాయింట్ల నష్టంతో  62911 వద్ద  నిఫ్టీ 109 పాయింట్లు నష్టంతో 18703 వద్ద కొనసాగుతుంది. దీంతో ఎథేర్‌ మోటార్స్‌, దివిస్‌ ల్యాబ్స్‌, ఎం అండ్‌ ఎం, టాటా, బజాజ్‌ ఆటో, టీసీఎస్‌, సిప్లా, ఎస్‌బీఐ లైఫ్‌ ఇన్స్యూరెన్స్‌, హెచ్‌యూఎల్‌, ఏసియన్‌ పెయింట్స్‌ షేర్లు నష్టాల్లో కొనసాగుతుండగా.. ఓఎన్‌జీసీ,అపోలో ఆస్పటల్స్‌​, అదానీ పోర్ట్స్‌, బీపీసీఎల్‌, టెక్‌ మహీంద్రా షేర్లు లాభాల్లో కొనసాగుతున్నాయి. 

పెట్టుబడులకు కొన్ని విధానాలు అంటూ ఉంటాయి. ఆచరణీయ సూత్రాలు ఉంటాయి. ప్రపంచవ్యాప్తంగా ఈక్విటీ మార్కెట్లలో సంపదను సృష్టించుకున్న ప్రతీ ఇన్వెస్టర్‌ విజయం వెనుక కచ్చితంగా వీటి పాత్ర ఉంటుంది. అనుభవం మీద కానీ, వీటి గురించి ఇన్వెస్టర్లకు తెలియదు. ‘డబ్బులతో మార్కెట్లోకి అడుగుపెడితే అనుభవం మిగులుతుంది. అనుభవంతో మార్కెట్లోకి ప్రవేశిస్తే సంపద సృష్టి జరుగుతుంది’ అని చెబుతుంటారు. అందుకని మార్కెట్‌ పండితులు అనుసరించిన విధానాలను ముందే తెలుసుకుంటే, విలువైన సమయం ఆదా చేసుకోవడంతోపాటు, కాంపౌండింగ్‌ ప్రయోజనాన్ని మూటగట్టుకోవచ్చు. అమెరికాకు చెందిన సర్‌ జాన్‌ టెంపుల్‌టన్‌ ప్రపంచంలోని దిగ్గజ ఇన్వెస్టర్లలో ఒకరు. 38 ఏళ్లపాటు ఏటా తన పెట్టుబడులపై 15 శాతం చొప్పున కాంపౌండింగ్‌ రాబడులను ఆయన సంపాదించగలిగారు. ఆయన అనుసరించిన సూత్రాలను, అనుభవ పాఠాలను ఈ ప్రాఫిట్‌ ప్లస్‌ కథనంలో తెలుసుకుందాం. తగినంత కసరత్తు  పెట్టుబడులు పెట్టే ముందు తగినంత పరిశోధన అవసరం. విజయవంతమైన కంపెనీలకు సాయపడిన అంశాలు ఏంటన్నవి తెలుసుకోవాలి. కంపెనీల ఎర్నింగ్స్‌ (లాభాలు), ఆస్తులన్నవి స్టాక్‌ ధరలను ఎక్కువగా ప్రభావితం చేస్తుంటాయి. కంపెనీ ఎర్నింగ్స్‌ భవిష్యత్తులో మరింత పెరుగుతాయనే అంచనాలతో ఎక్కువ మంది ఇన్వెస్ట్‌ చేస్తుంటారు. స్టాక్‌ ధరలు కూడా భవిష్యత్తు లాభాల అంచనాలకు తగ్గట్టే చలిస్తుంటాయి. కనుక, భవిష్యత్తులో ఇవి తారుమారు అయితే? స్టాక్స్‌ ధరలు కూడా పతనమవుతాయి. ఈ రిస్క్‌ను ముందే దృష్టిలో పెట్టుకుని అధ్యయనం తర్వాతే అడుగులు వేయాలి.  కొని, మర్చిపోవద్దు..  బేర్‌ మార్కెట్‌ శాశ్వతం కాదు. అలా అని బుల్‌ మార్కెట్‌ శాశ్వతం కాదు. మార్కెట్‌ పరిస్థితులకు అనుగుణంగా కొన్ని సందర్భాల్లో స్పందించాల్సి వస్తుంది. కొనుగోలు చేసి, మర్చిపోయే స్టాక్స్‌ అన్న వి చాలా అరుదు. ఏ కంపెనీ అయినా కానీ వెలుపలి పరిణామాలకు ప్రభావితం అవుతుంటుంది. అందుకుని పెట్టుబడులను ఎప్పటికప్పుడు పరిశీలించుకుంటూ, అవసరమైతే మార్పులకు వెనుకాడొద్దు. భయపడిపోవద్దు..  అందరూ ఆశావాదంతో ఎగబడి కొంటున్న వేళ విక్రయించాలని చెప్పుకున్నాం. కానీ, ఆ సమయంలో అమ్ముకోకపోయి ఉండొచ్చు. ఆ తర్వాత మార్కెట్లు పడిపోవచ్చు. 2008, 2020లో మన స్టాక్‌ మార్కెట్‌ పతనాలు గుర్తున్నాయి కదా. ఒక్కో స్టాక్‌ ఒక రోజులో 20% వరకు నష్టపోయింది. ఆ సమయంలో భయపడిపోయి వచ్చినంత చాలనే ధోరణితో అమ్ముకో వడం సరికాదు. పతనానికి ముందే విక్రయించాలి. అది చేయలేకపోతే, ఒకసారి పోర్ట్‌ఫోలియోలోని స్టాక్స్‌ను అధ్యయనం చేయాలి. ఏ అంశాల ఆధారంగా వాటిని కొనుగోలు చేశారో, వాటి ల్లో మార్పు రానంత వరకు మార్కెట్‌ పడిపోతుందని విక్రయించాల్సిన పనిలేదు. వేరే స్టాక్స్‌ ఆకర్షణీయంగా కనిపిస్తున్నాయని, ఉన్నవి అమ్మేసుకుని వాటిని కొనుగోలు చేసుకోవడం కూడా సరికాదు. పెట్టుబడుల నిర్ణయాలు తీసుకునే ముందు ద్రవ్యోల్బణం, పన్నులను పరిగణనలోకి తీసుకోవాలి. ఎవరికి వారు తమకు అనుకూలమైన పెట్టుబడుల విధానాన్ని అనుసరించాలి. పెట్టుబడుల తర్వాత ప్రశాంతత కోల్పోయేలా ఉండకూడదు. వాస్తవ రాబడులు అంటే ఇక్కడ.. వచ్చిన రాబడి నుంచి పన్నులు చెల్లించగా మిగిలే మొత్తం. అలాగే, ద్రవ్యోల్బణాన్ని సైతం రాబడి నుంచి మినహాయించి చూడాలి. పన్నులు, ద్రవ్యోల్బణం ప్రభావం పట్టించుకోని ఏ పెట్టుబడి అయినా వైకల్యంతో సమనమేనని టెంపుల్‌టన్‌ అంటారు.  స్పెక్యులేషన్‌ వద్దు..  ఈక్విటీ మార్కెట్లో స్పెక్యులేషన్‌ (అంచనాల ఆధారంగా చేసే ట్రేడింగ్‌) అన్నది వేగంగా నష్టపోయే మార్గం. స్టాక్‌ మార్కెట్‌ క్యాసినో కాదు. తరచూ స్టాక్స్‌ కొని విక్రయిస్తుండడం, ఆప్షన్లను షార్ట్‌ సెల్‌ చేస్తుండడం, ఫ్యూచర్‌ కాంట్రాక్టుల్లో ట్రేడ్‌ చేయడం ఇదంతా క్యాసినోనే అని టెంపుల్‌టన్‌ అంటారు. ఇక్కడ అంతిమంగా ఇన్వెస్టర్‌ సంపాదించేదేమీ ఉండదన్నది ఆయన నమ్మే సిద్ధాంతం. మార్కెట్‌ పెరుగుతుందని, తగ్గుతుందని అంచనాల ఆధారంగా చేసే ట్రేడ్లు ఎప్పుడూ సక్సెస్‌ కావాలని లేదు. వీటిల్లో పెట్టుబడి నష్టానికి అదనంగా.. కమీషన్లు, చార్జీల రూపంలోనూ నష్టపోవాల్సి వస్తుంది.        వాల్‌స్ట్రీట్‌ లెంజెడరీ ఇన్వెస్టర్‌ లూసీన్‌ హూపర్‌ నిర్వచనం ప్రకారం..  స్టాక్స్‌కు దీర్ఘకాల యజమానులుగా ఎంత ప్రశాతంగా ఉంటామన్నదే ముఖ్యం. ఇన్వెస్టర్‌ ఎంత ప్రశాంతంగా ఉంటే కనీస విలువల గురించి మరింతగా అర్థం చేసుకోగలడు. సహనంతో, భావోద్వేగాలకు లోను కాకుండా ఉండగలడు. తక్కువ మూలధన లాభాల పన్ను చెల్లిస్తాడు. అనవసర బ్రోకరేజీ కమీషన్లు చెల్లించే పని ఉండదు. జూదగాళ్ల మాదిరిగా ఆలోచించడు.  మార్పునకు సిద్ధం..  ప్రతి పెట్టుబడుల విధానంలోనూ అనుకూల, ప్రతికూలతలు ఉంటాయి. తనకు అనుకూలమైన విధానాన్ని అనుసరిస్తూ, అవసరమైతే అందులో మార్పులు చేసుకునేందుకు సానుకూల దృక్పథంతో కొనసాగాలి. బ్లూచిప్‌ స్టాక్స్, సైక్లికల్‌ స్టాక్స్, మిడ్‌క్యాప్, స్మాల్‌క్యాప్‌ స్టాక్స్, కార్పొరేట్‌ బాండ్స్‌.. ఇలా ఒక్కో విభాగంలో పెట్టుబడులకు అనుకూల, ప్రతికూల సందర్భాలు ఉంటాయి. అంతేకాదు, అవసరమైతే నగదు రూపంలోనే కొనసాగాల్సిన పరిస్థితులు కూడా ఎదురవుతుంటాయి. ఎందుకంటే నగదు ఉంచుకోవడం వల్ల మంచి అవకాశాలను సొంతం చేసుకోగలరు. అందుకే ఏదో ఒక్క పెట్టుబడి విధానం అన్నది అత్యుత్తమం అని చెప్పలేం. కొన్ని సందర్భాల్లో కొన్ని విభాగాలకు ఎంతో ఆదరణ లభిస్తుంది. అది తాత్కాలికం కావచ్చు. అటువంటప్పుడు లాభాలు దీర్ఘకాలం పాటు కొనసాగలేవు. అందుకని మార్పునకు సదా సిద్ధంగా ఉండాలి. మార్కెట్‌ పెట్టుబడి సూత్రాలకూ ఇది వర్తిస్తుంది. కాలంతోపాటు ఈ విధానాల్లోనూ మార్పులు రావచ్చు. స్మార్ట్‌ ఇన్వెస్టర్‌ అయితే దీన్ని గుర్తిస్తాడు.  కనిష్ట స్థాయి  కనిష్ట స్థాయిల్లో కొనుగోలు చేసి, గరిష్ట స్థాయిల్లో విక్రయించడమన్నది వినడానికి చాలా సులభంగా అనిపిస్తుంది. కానీ, ఆచరణ అంత ఈజీ కాదు. సాధారణంగా స్టాక్స్‌ ధరలు పెరుగుతున్నప్పుడే ఎక్కువ మంది ఇన్వెస్టర్లు ఆకర్షితులై, ఇంకా పెరుగుతుందన్న అంచనాతో కొనుగోలుకు ముందుకు వస్తుంటారు. షేరు ధర పడిపోతుంటే, ధైర్యం చేసి పెట్టుబడులు పెట్టడానికి ముందుకు రారు. ఎందుకంటే తాము ఇన్వెస్ట్‌ చేసిన తర్వాత, అది మరింత పడిపోతుందేమో, ఇక ఎప్పటికీ పెరగదేమో? అన్న భయం వారిని వెనక్కి లాగుతుంటుంది. నిజానికి అమ్మకాల ఒత్తిడి ఉందంటే నిరాశావాదం పెరిగినట్టు. కొనుగోళ్లకు అదే సరైన సమయం. అంతేకానీ, మార్కెట్లు ఇంకా పడిపోతాయని, ఆ తర్వాతే కొనుగోలు చేద్దామని అనుకోవద్దు. నిరాశావాదం ఎక్కువగా ఉన్నప్పుడే స్టాక్స్‌ ఎక్కవ నష్టాలు చూస్తాయి. దాన్నే తెలివైన ఇన్వెస్టర్‌ అనుకూలంగా మలుచుకోవాలి. కానీ, ఎక్కువ మంది దీనికి విరుద్ధంగా అధిక స్థాయిల్లో కొనుగోలు చేసి, తక్కువ ధరల వద్ద విక్రయిస్తుంటారు. మార్కెట్లలో ఆశావా దం పెరిగినప్పుడు విక్రయించి, నిరాశావాదం ఎక్కువగా ఉన్నప్పుడు కొనుగోలు చేయాలని విఖ్యాత ఇన్వెస్టర్‌ వారెన్‌ బఫెట్‌ సైతం చెబుతుంటారు. నాణ్యమైన స్టాక్స్‌  ఒక కంపెనీ వ్యాపారం ఎంత నాణ్యమైనది అనేది రాబడులకు కీలకం అవుతుంది. నాణ్యమైన వ్యాపారమే ఎక్కువ అమ్మకాలను నమోదు చేయగలదు. కస్టమర్‌ విశ్వాసాన్ని గెలుచుకుంటుంది. ఆయా రంగంలో టెక్నాలజీ పరంగా కంపెనీ బలమైన స్థానంలో ఉండాలి. బలమైన యాజమాన్యం, వ్యాపారాన్ని మెరుగ్గా నిర్వహించిన ట్రాక్‌ రికార్డ్‌ ఉండాలి. కంపెనీ వద్ద నిధుల సమస్య ఉండకూడదు. ఒక కంపెనీ తక్కవ ధరకే ఉత్పత్తి చేసినంత మాత్రాన నాణ్యమైనదిగా భావించడం సరికాదు. కానీ, టెక్నాలజీ పరంగా ఆధునికమైన, పటిష్టమైన కంపెనీ అయితే.. మరో కంపెనీ వచ్చి ఆ వ్యాపారాన్ని దెబ్బతీయడం అంత తేలిక కాదు.   మార్కెట్‌ కాదు.. కంపెనీ ముఖ్యం  విడిగా కంపెనీలను, వాటి వ్యాపార బలాలను చూడాలే కానీ, మార్కెట్‌ గమనాన్ని కాదు. ఎలాంటి స్టాక్‌ అయినా బుల్‌ మార్కెట్లలో పరుగులు పెట్టగలదు. కానీ, బేర్‌ మార్కెట్లో పెరిగే స్టాక్స్‌ కూడా ఉంటాయి. బుల్‌ మార్కెట్లో పతనాన్ని చూసేవీ ఉంటాయి. మార్కెట్లు అనేవి ఎన్నో పరిణామాల ఆధారంగా చలిస్తుంటాయి. కానీ, ఇన్వెస్టర్‌ పెట్టుబడులకు నాణ్యమైన కంపెనీలు, బలమైన వ్యాపారా లు, పటష్టమైన యాజమాన్యాలనే సూత్రాలను అనుసరించాలి. మార్కెట్‌ గమనాన్ని కాదు. వైవిధ్యం..  పెట్టుబడులు అన్నింటిని తీసుకెళ్లి ఒకే చోట పెట్టేయరాదు. భవిష్యత్తును ఎవరూ అంచనా వేయలేరు. ఎవరూ నియంత్రించలేరు. అందుకని పెట్టుబడుల పరంగా వైవిధ్యం అవసరం. సరఫరా దారు వైపు సమ్మె ఏర్పడవచ్చు. తుఫాను లేదా భూకంపం.., పోటీ కంపెనీ అసాధారణ స్థాయిలో టెక్నాలజీ పరంగా పై చేయి సాధించొచ్చు. లేదంటే ఓ ఉత్పత్తిని ఉపసంహరించుకోవాలని ప్రభుత్వం ఆదేశించొచ్చు. ఇలాంటి పరిణామాలు కంపెనీలకు పెద్ద ఎత్తున నష్టాన్ని తీసుకొస్తాయి. అలాంటి పరిస్థితుల్లో మెరుగ్గా నడుస్తున్న కంపెనీ సైతం సమస్యల్లోకి కూరుకుపోయే ప్రమాదం ఉంటుంది. అందుకని వివిధ రంగాల మధ్య పెట్టుబడులను వైవిధ్యం చేసుకోవాలి. ఆ తర్వాత అంతర్జాతీయం మార్కెట్లలోనూ గొప్ప పెట్టుబడుల అవకాశాలు కనిపిస్తాయి. వాటిని సైతం పరిశీలించొచ్చు.  తప్పులే పాఠాలు  పెట్టుబడుల పరంగా తప్పులు చేస్తున్నామని, అసలు ఇన్వెస్ట్‌ చేయకపోవడం అన్నది మరింత పెద్ద తప్పిదం అవుతుంది. తప్పులను చూసి నిరుత్సాహపడాల్సిన అవసరం లేనే లేదు. నష్టపోయిన మొత్తాన్ని తిరిగి సంపాదించాలనే ధోరణితో మరింత రిస్క్‌ తీసుకోవద్దు. ప్రతి తప్పు నుంచి అనుభవాన్ని పొందే ప్రయత్నం చేయాలి. ముందు చేసిన పెట్టుబడుల్లో నష్టాలకు దారితీసిన అంశాల గురించి తెలుసుకోవాలి. వాటిని తదుపరి పెట్టుబడుల్లో మళ్లీ చోటు చేసుకోకుండా జాగ్రత్తలు తీసుకోవాలి. అసలు కారణాలకు బదులు, నష్టానికి వేరే వాటిని ఆపాదించుకుంటే, మళ్లీ అదే నష్టమే ఎదురవుతుంది. పెట్టుబడుల్లో విజేతలు, పరాజితుల మధ్య తేడా.. తప్పుల నుంచి పాఠాలను తెలుసుకోవడమే.   మార్కెట్‌ను మించి రాబడులు..  మార్కెట్‌ కంటే మెరుగ్గా పెట్టుబడులపై రాబడులు రావాలంటే అందుకు మిగిలిన వారితో పోలిస్తే భిన్నంగా వ్యవహరించాల్సిందే. ఇందుకు మంచి మార్గదర్శకుడిని ఎంపిక చేసుకోవాలి. తగిన పెట్టుబడుల విధానాన్ని రూపొందించుకోవాలి. నిపుణులైన ఫండ్‌ మేనేజర్ల కంటే మెరుగైన పెట్టుబడుల నిర్ణయాలతోనే, గొప్ప ఫలితాలు సాధించడం సాధ్యపడుతుంది. ఏ ఇన్వెస్ట్‌మెంట్‌ సంస్థ అయినా మార్కెట్‌ కంటే అన్ని సమయాల్లోనూ మెరుగైన ఫలితాలను చూపిస్తుందంటే, అది ఇన్వెస్టర్‌ కంటే గొప్పగా పనిచేస్తున్నట్టే. కనుక అవసరమైతే అలాంటి సంస్థల సాయాన్ని తీసుకునేందుకు వెనుకాడొద్దు.  గుడ్డి విధానం వద్దు  మీకు మొదటిసారి ఉద్యోగం ఇచ్చిన కంపెనీ షేరు, లేదంటే మీరు కొనుగోలు చేసిన మొదటి కారు కంపెనీపై అభిమానంతో షేరులో పెట్టుబడులు పెట్టడం సరైనది అనిపించుకోదు. మీరు ఆ ఉత్పత్తిని కొనుగోలు చేసినంత మాత్రాన అది పెట్టుబడులకు మంచి కంపెనీ అవ్వాలని లేదు. ఆ షేరు అందుబాటు ధరలోనూ లేకపోవచ్చు. ఇక క్రేజీ ఉన్న ఐపీవోల్లో ఇన్వెస్ట్‌ చేయడం కూడా సరికాదు. ఎక్కువ మంది దరఖాస్తు చేసుకుంటున్నారని, లిస్టింగ్‌ రోజు లాభానికి విక్రయిద్దామని ఐపీవోలో దరఖాస్తు చేసుకోవడం అన్నది పెట్టుబడి కాదు, స్పెక్యులేషన్‌ అవుతుంది. కంపెనీకి మంచి భవిష్యత్తు ఉండి, దీర్ఘకాలం పాటు కంపెనీతో కొనసాగుతానని అనుకున్నప్పుడే ఐపీవోకు దరఖాస్తు చేసుకోవాలి. ఒకరి సలహాపై ఆధారపడి ఇన్వెస్ట్‌ చేయడం కూడా సరికాదు. ఎందుకంటే చెప్పిన వారి అనుభవం, పరిశీలన, అధ్యయనం మీకు సాయానికి రావు. సొంత అధ్యయనం తర్వాత, తమ పెట్టుబడుల సూత్రాలకు అనుకూలంగా ఉంటేనే ముందుకు వెళ్లాలి.  ప్రతికూల ధోరణి విడిచి పెట్టాలి  రిస్క్‌ భయంతో తరచూ ప్రతికూల ధోరణితో మార్కెట్‌ను చూడడం సరికాదు. పెట్టుబడికి ఎంపిక చేసుకునే ముందే ప్రతికూల కోణంలోనూ పరిశోధన చేయడం మంచి చర్య అవుతుంది. ఒక్కసారి అన్ని అంశాల్లో స్పష్టత వచ్చి, పెట్టుబడి పెట్టిన తర్వాత.. రంధ్రాన్వేషణ ఫలితమివ్వదు. అప్పుడు చిన్న అంశాలు సైతం పెద్దవిగా అనిపిస్తాయి. ప్రతీ పెట్టుబడి రాబడులనే ఇస్తుందన్న గ్యారంటీ కూడా లేదు. వాస్తవికంగా, సానుకూల ధోరణితో వ్యవహరించడం ద్వారానే దీర్ఘకాలంలో ఈక్విటీల్లో సంపదను సృష్టించుకోగలరు.

న్యూఢిల్లీ: ప్రస్తుత ఆర్థిక సంవత్సరం(2022–23) రెండో త్రైమాసికంలో స్టాక్‌ ఎక్ఛేంజీ దిగ్గజం బీఎస్‌ఈ లిమిటెడ్‌ నిరుత్సాహకర ఫలితాలు ప్రకటించింది. జులై–సెప్టెంబర్‌(క్యూ2)లో నికర లాభం దాదాపు సగానికి క్షీణించి రూ. 34 కోట్లకు పరిమితమైంది. గతేడాది(2021–22) ఇదే కాలంలో రూ. 65 కోట్లు ఆర్జించింది. మొత్తం ఆదాయం మాత్రం 6 శాతం పుంజుకుని రూ. 240 కోట్లకు చేరింది. గత క్యూ2లో రూ. 226 కోట్ల ఆదాయం నమోదైంది. అయితే నిర్వహణ మార్జిన్లు 28 శాతం నుంచి 7 శాతానికి భారీగా పతనమయ్యాయి. ఇందుకు కారణాలను ఎక్ఛేంజీ వెల్లడించలేదు. కాగా.. మొత్తం వ్యయాలు 36 శాతం పెరిగి రూ. 184 కోట్లను దాటాయి. ఎక్సే్ఛంజీలో రిజిస్టరైన మొత్తం ఇన్వెస్టర్ల ఖాతాలు 11.7 కోట్లకు ఎగశాయి. రోజువారీ సగటు టర్నోవర్‌ ఈక్విటీ విభాగంలో 17 శాతం వృద్ధితో రూ. 4,740 కోట్లను తాకగా.. డెరివేటివ్స్‌ నుంచి 88 శాతం అధికంగా రూ. 2.26 లక్షల కోట్లు చొప్పున నమోదైంది. కరెన్సీ డెరివేటివ్స్‌లో సైతం సగటు టర్నోవర్‌ 31 శాతం ఎగసి రూ. 32,161 కోట్లకు చేరింది.    

ముంబై: అంతర్జాతీయ మార్కెట్లలో నెలకొన్న సానుకూల సంకేతాలతో దేశీయ స్టాక్‌ సూచీలు రెండోరోజూ లాభపడ్డాయి. డాలర్‌ మారకంలో రూపాయి ర్యాలీ, విదేశీ కొనుగోళ్లు సెంటిమెంట్‌ను మరింత బలపరిచాయి. బ్యాంకింగ్, మెటల్, ఆటో మెటల్‌ షేర్లు కొనుగోళ్ల మద్దతు లభించింది. సెన్సెక్స్‌ ఉదయం 238 పాయింట్ల లాభంతో  61,188 వద్ద ట్రేడింగ్‌ను ప్రారంభించింది. ఇంట్రాడేలో 61,401 – 60,714 మధ్య కదలాడింది. చివరికి 235 పాయింట్లు పెరిగి 61,185 వద్ద ముగిసింది. నిఫ్టీ 95 పాయింట్ల లాభంతో 18,212 వద్ద మొదలైంది. ఇంట్రాడేలో 18,065 వద్ద కనిష్టాన్ని, 18,256 వద్ద గరిష్టాన్ని తాకింది. మార్కెట్‌ ముగిసే సరికి నిఫ్టీ 86 పాయింట్లు బలపడి 18,203 వద్ద నిలిచింది. వెరసి ఇరు సూచీలు పదినెలల గరిష్టంపై స్థిరపడ్డాయి. ఫార్మా, వినిమయ షేర్లు అమ్మకాల ఒత్తిడికి లోనయ్యాయి. బీఎస్‌ఈ మిడ్‌క్యాప్, స్మాల్‌క్యాప్‌ సూచీలు అరశాతానికి పైగా లాభపడ్డాయి. విదేశీ ఇన్వెస్టర్లు రూ.1949 కోట్ల షేర్లను కొన్నారు. దేశీయ ఇన్వెస్టర్లు రూ.844 కోట్ల షేర్లను అమ్మారు. కేంద్ర బ్యాంకులు అంచనాల కంటే ముందుగానే వడ్డీరేట్లను తగ్గించవచ్చనే ఆశలతో అంతర్జాతీయ ఈక్విటీ మార్కెట్లు లాభాల్లో ట్రేడవుతున్నాయి.  గురునానక్‌ జయంతి సందర్భంగా (నేడు)మంగళవారం బీఎస్‌ఈ, ఎన్‌ఎస్‌ఈ ఎక్ఛేంజీలు పనిచేయవు. నెల గరిష్టానికి రూపాయి   దేశీయ కరెన్సీ రూపాయి సోమవారం నెలరోజుల గరిష్టంపై ముగిసింది. డాలర్‌ మారకంలో సోమవారం ఒక్కరోజే 43 పైసలు బలపడి 81.92 వద్ద స్థిరపడింది. ఫారెక్స్‌ మార్కెట్లో ఉదయం 82.14 వద్ద మొదలైంది. ఇంట్రాడేలో 82.32 వద్ద కనిష్టాన్ని తాకింది. అంతర్జాతీయంగా డాలర్‌ బలహీనపడుతుండటం, దేశీయ క్యాపిటల్‌ మార్కెట్లోకి విదేశీ పెట్టుబడులు మళ్లీ పెరుగుతుండటం వంటి అంశాలు రూపాయి బలోపేతానికి దోహదపడ్డాయని ఫారెక్స్‌ విశ్లేషకులు తెలిపారు.

ముంబై: దేశీయంగా నెలకొన్న సానుకూల పరిణామాల దృష్ట్యా ఈ వారంలోనూ స్టాక్‌ సూచీలు లాభాలు ఆర్జించే వీలుందని మార్కెట్‌ నిపుణులు భావిస్తున్నారు. కార్పొరేట్‌ ఆర్థిక ఫలితాలు, ప్రపంచ పరిణామాలు, విదేశీ ఇన్వెస్టర్ల పెట్టుబడుల సరళి ట్రేడింగ్‌పై ప్రభావం చూపొచ్చంటున్నారు. క్రూడాయిల్‌ ధరలు, డాలర్‌ మారకంలో రూపాయి విలువపై దృష్టి సారించవచ్చంటున్నారు. గురునానక్‌ జయంతి సందర్భంగా మంగళవారం(నంబర్‌ 6న) సెలవు కావడంతో ట్రేడింగ్‌ నాలుగురోజులకే పరిమితం కానుంది.    అమెరికా ఫెడ్‌ రిజర్వ్, బ్యాంక్‌ ఇంగ్లాండ్‌లు కఠిన ద్రవ్య విధాన వైఖరికి మొగ్గు చూపినప్పటికీ.., దేశీయ కార్పొరేట్‌ క్యూ2 ఆర్థిక ఫలితాలు మెప్పించడం, భారత ఆర్థిక వ్యవస్థ పనితీరుపై ఆశావహ ధృక్పథంతో గతవారంలో సూచీలు రెండు శాతం ర్యాలీ చేశాయి. సెన్సెక్స్‌ 991 పాయింట్లు, నిఫ్టీ 330 పాయింట్లు బలపడ్డాయి.   ‘‘రెండు వారాల పాటు స్తబ్ధుగా ట్రేడైన బ్యాంకింగ్‌ షేర్లలో తాజాగా కొనుగోళ్లు నెలకొన్నాయి. దీంతో సూచీలు క్రమంగా రికార్డు స్థాయిల దిశగా కదులుతున్నాయి. అన్ని రంగాల్లో మూమెంటమ్‌ కన్పిస్తున్నందున.., స్థిరీకరణలో భాగంగా దిగివచ్చిన నాణ్యమైన షేర్లను గుర్తించి ఎంపిక చేసుకోవాలి. సాంకేతికంగా నిఫ్టీకి 18,200 స్థాయి వద్ద నిరోధం ఎదురుకావచ్చు.  దిగువ స్థాయిలో 17,900–18,000 శ్రేణిలో తక్షణ మద్దతు లభించవచ్చు’’ అని రిలిగేర్‌ బ్రోకింగ్‌ లిమిటెడ్‌ వైస్‌ ప్రెసిడెంట్‌ అజిత్‌ మిశ్రా తెలిపారు.  ప్రపంచ పరిణామాలు  ఉక్రెయిన్‌పై సైనిక చర్యను తీవ్రతరం చేసే ప్రయత్నాల్లో భాగంగా రష్యా అణ్వాయుధాలను ప్రయోగించే వీలుందనే వార్తలు ప్రపంచ మార్కెట్లో ఆందోళనలు కలిగిస్తున్నాయి. చైనా జీరో కోవిడ్‌ విధానంపై డ్రాగన్‌ ప్రభుత్వం తీసుకునే నిర్ణయాలను మార్కెట్‌ వర్గాలను క్షుణ్ణంగా పరిశీలించే వీలుంది. ఇక చైనా అక్టోబర్‌ ద్రవ్యోల్బణ డేటా రేపు(మంగళవారం), అమెరికా అక్టోబర్‌ ద్రవ్యోల్బణం గురువారం విడుదల కానున్నాయి. వారాంతాపు రోజైన శుక్రవారం బ్రిటన్‌ జీడీపీ, యూఎస్‌ కన్జూమర్‌ సెంటిమెంట్‌ డేటా వెల్లడి అవుతాయి.   తొలివారంలో రూ.15,280 కోట్లు పెట్టుబడులు  గడిచిన రెండు నెలల్లో నికర అమ్మందారులుగా నిలిచిన విదేశీ ఇన్వెస్టర్లు నవంబర్‌ తొలి వారంలో దేశీయ మార్కెట్లో రూ.15,280 కోట్ల విలువైన ఈక్విటీలను కొన్నారు. ఇదే సమయంలో డెట్‌ మార్కెట్‌ నుంచి అనూహ్యంగా రూ.2,410 కోట్ల పెట్టుబడులను వెనక్కి తీసుకున్నారు. ఇక ఎఫ్‌పీఐలు అక్టోబర్‌లో రూ.1,586 కోట్లు, సెప్టెంబర్‌లో రూ.7,600 కోట్ల ఈక్విటీలను విక్రయించారు. ఈ ఏడాదిలో నికరంగా 1.53 లక్షల కోట్లు పెట్టుబడులను ఉపసంహరించుకున్నట్లు గణాంకాలు చెబుతున్నాయి.   కార్పొరేట్‌ ఆర్థిక ఫలితాలు   దేశీయ కార్పొరేట్‌ ఆర్థిక ఫలితాల అంకం చివరి దశకు చేరింది. ఈ వారంలో సుమారు 85కి పైగా కంపెనీలు తమ క్యూ2తో గణాంకాలను ప్రకటించనున్నాయి. ముందుగా నేడు మార్కెట్‌ ఎస్‌బీఐ, బ్యాంక్‌ ఆఫ్‌ బరోడా, ఇండియా ఓవర్సీస్‌ బ్యాంక్‌  త్రైమాసిక ఫలితాలకు స్పందించాల్సి ఉంటుంది. కోల్‌ ఇండియా, దివీస్‌ ల్యాబ్స్, టాటా మోటార్స్, ఐషర్‌ మోటార్స్, అపోలో హాస్పిటల్స్, హిందాల్కో, ఎంఅండ్‌ఎం, బీపీసీఎల్, పేటీఎం, గోద్రేజ్‌ కన్జూమర్, పీఐ ఇండస్ట్రీస్, భాష్, పిడిలైట్‌ ఇండస్ట్రీస్, స్టార్‌ హెల్త్, జొమాటో అదానీ పవర్‌ తదితర దిగ్గజ కంపెనీలు ఫలితాలు వెల్లడించే జాబితాలో ఉన్నాయి. ఫలితాల ప్రకటన సందర్భంగా కంపెనీల యాజమాన్యం చేసే అవుట్‌లుక్‌ వ్యాఖ్యలను మార్కెట్‌ వర్గాలు నిశీతంగా పరిశీలించే వీలుంది.   

న్యూఢిల్లీ: నియంత్రణ పరమైన నిబంధనల అమలులో విఫలమైన కేసును స్పందన స్ఫూర్తి ఫైనాన్షియల్‌ పరిష్కరించుకుంది. సెబీకి రూ.25 లక్షలు చెల్లించడం ద్వారా ఈ వివాదానికి ముగింపు పలికింది. ‘‘ప్రతిపాదిత ఉల్లంఘనల ఆరోపణల విషయంలో పరిష్కారానికి స్పందన స్ఫూర్తి ఫైనాన్షియల్‌ లిమిటెడ్‌ సెబీని సంప్రదించింది. సెబీ గుర్తించిన వాస్తవాలను అంగీకరించ లేదు. అలా అని తిరస్కరించ లేదు. నిబంధనల అమలులో వైఫల్యాలకు సంబంధించి పెండింగ్‌లో ఉన్న చర్యలపై దరఖాస్తుదారుతో పరిష్కారం కుదిరింది’’అని సెబీ తన ఆదేశాల్లో పేర్కొంది.  స్పందన స్ఫూర్తి ఫైనాన్షియల్‌ 2015 ఏప్రిల్‌ నుంచి ఆర్‌బీఐ వద్ద నమోదిత సంస్థగా ఉంది. 2019 ఆగస్ట్‌లో బీఎస్‌ఈ, ఎన్‌ఎస్‌ఈల్లో ఐపీవో ద్వారా లిస్ట్‌ అయింది. ఆడిటర్‌ విషయంలో స్పందన స్ఫూర్తి ఫైనాన్షియల్‌ సంస్థ, లిస్టింగ్‌ ఆబ్లిగేషన్స్‌ డిస్‌క్లోజర్‌ నిబంధనల అమలులో విఫలమైందన్నది సెబీ ఆరోపణగా ఉంది.    

న్యూఢిల్లీ: విద్యుత్‌ రంగ సంస్థ టాటా పవర్‌కి సంబంధించిన ఇన్ఫర్మేషన్‌ టెక్నాలజీ (ఐటీ) మౌలిక సదుపాయాలు .. సైబర్‌ దాడికి గురయ్యాయి. దీంతో కొన్ని ఐటీ సిస్టమ్స్‌పై ప్రభావం పడిందని స్టాక్‌ ఎక్సే్చంజీలకు ఇచ్చిన సమాచారంలో కంపెనీ తెలిపింది. సిస్టమ్స్‌ను పునరుద్ధరించడానికి అన్ని చర్యలు తీసుకున్నట్లు వివరించింది. కీలకమైన అన్ని సిస్టమ్‌లు యథాప్రకారం పని చేస్తున్నాయని, అయితే ముందు జాగ్రత్త చర్యగా ఉద్యోగులు, కస్టమర్లు వినియోగించే పోర్టల్స్, టచ్‌ పాయింట్లపై కొన్ని పరిమితులు అమలు చేస్తున్నట్లు పేర్కొంది.  

ముంబై: వరుసగా రెండో రోజు దేశీ స్టాక్‌ మార్కెట్లు బలపడ్డాయి. ఇన్వెస్టర్లు ప్రారంభంలోనే కొనుగోళ్లకు ఎగబడటంతో సెన్సెక్స్‌ 513 పాయింట్లు ఎగసి 58,579కు చేరింది. చివరికి 157 పాయింట్ల లాభంతో 58,222 వద్ద ముగిసింది. తొలుత 17,428ను దాటిన నిఫ్టీ సైతం 58 పాయింట్లు జమ చేసుకుని 17,332 వద్ద స్థిరపడింది. ప్రపంచ మార్కెట్లు అటూఇటుగా ఉన్నప్పటికీ విదేశీ ఇన్వెస్టర్లు కొనుగోళ్ల యూటర్న్‌ తీసుకోవడంతో సెంటిమెంటు బలపడినట్లు నిపుణులు పేర్కొన్నారు.  ఈ ఉత్సాహం రెండో రోజూ కొనసాగడంతో మార్కెట్లు రోజంతా లాభాల్లోనే కదిలినట్లు విశ్లేషించారు.  మెటల్స్‌ జోరు..: ఎన్‌ఎస్‌ఈలో ప్రధానంగా మెటల్, మీడియా, రియల్టీ, ఐటీ 3.2–1.6 శాతం మధ్య ఎగశాయి. ఎఫ్‌ఎంసీజీ, ఫార్మా 0.4 శాతం డీలాపడ్డాయి. బ్లూచిప్స్‌లో జేఎస్‌డబ్ల్యూ, సీఐఎల్, హిందాల్కో, టాటా స్టీల్, ఎల్‌అండ్‌టీ, ఐసీఐసీఐ, హెచ్‌సీఎల్‌ టెక్, ఇన్ఫీ, యాక్సిస్, 5–1.5 శాతం మధ్య లాభపడ్డాయి. అయితే ఎయిర్‌టెల్, హెచ్‌యూఎల్, హెచ్‌డీఎఫ్‌సీ ద్వయం, ఇండస్‌ఇండ్, దివీస్, ఎస్‌బీఐ లైఫ్, బజాజ్‌ ఫైనాన్స్, బ్రిటానియా 2.6–1 శాతం మధ్య క్షీణించాయి.  స్టాక్‌ హైలైట్స్‌  ►రూ. 1,000 కోట్ల అదనపు అత్యవసర రుణ సహాయం అందనున్న వార్తలతో చౌక ధరల విమానయాన సంస్థ స్పైస్‌జెట్‌ షేరు 8 శాతం జంప్‌చేసి రూ. 42 వద్ద ముగిసింది.  ►కొన్ని షరతులకులోబడి సోనీ పిక్చర్స్‌తో విలీనానికి సీసీఐ అనుమతించడంతో జీ ఎంటర్‌టైన్‌మెంట్‌  4.6% ఎగసి రూ. 281 వద్ద ముగిసింది.  ►ఉత్తర అమెరికా నుంచి క్లాస్‌8 ట్రక్కుల ఆర్డర్లు పెరగడంతో భారత్‌ ఫోర్జ్‌ షేరు 8 శాతం దూసుకెళ్లి రూ. 763 వద్ద ముగిసింది. రూ‘పాయే’: 82.17  రూపాయి రికార్డుల పతనం ఆగట్లేదు. ఇంటర్‌ బ్యాంక్‌ ఫారెక్స్‌ మార్కెట్‌లో డాలర్‌ మారకంలో రూపాయి విలువ గురువారం మొదటిసారి భారీగా 55 పైసలు నష్టపోయి 82 దిగువన 82.17 వద్ద ముగిసింది. అంతర్జాతీయంగా డాలర్‌ పటిష్టత, క్రూడ్‌  ధరలు స్థిరంగా ఉండడం దీనికి కారణం. రూపాయి మంగళవారం ట్రేడింగ్‌లో 20 పైసలు లాభపడి 81.62 వద్ద ముగిసింది. దసరా సందర్బంగా బుధవారం మార్కెట్‌కు సెలవు. గురువారం కొంత సానుకూలంగా 81.52 వద్ద ప్రారంభమైంది. ఇంట్రాడేలో 81.51ని చూసినా ఆ స్థాయిలో నిలదొక్కుకోలేకపోయింది.  

ముంబై: గత వారం చివర్లో ఒక్కసారిగా జోరందుకున్న స్టాక్‌ ఇండెక్సులు తిరిగి తోకముడిచాయి. ఇన్వెస్టర్లు మళ్లీ అమ్మకాలకే మొగ్గుచూపడంతో నష్టాలతో ముగిశాయి. సెన్సెక్స్‌ 638 పాయింట్లు పతనమై 56,789 వద్దకు చేరగా.. 207 పాయింట్లు కోల్పోయిన నిఫ్టీ 16,887 వద్ద స్థిరపడింది. ప్రపంచవ్యాప్తంగా విస్తరించిన ఆర్థిక మాంద్య ఆందోళనలు సెంటిమెంటును బలహీనపరుస్తున్నట్లు విశ్లేషకులు పేర్కొన్నారు. మరోపక్క వివిధ దేశాల కేంద్ర బ్యాంకులు ద్రవ్యోల్బణ అదుపునకు వడ్డీ రేట్ల పెంపును చేపడుతుండటం స్టాక్స్‌లో అమ్మకాలకు దారితీస్తున్నట్లు తెలియజేశారు. రష్యా– ఉక్రెయిన్‌ యుద్ధ భయాలు, ట్రెజరీ ఈల్డ్స్‌ జోరు సైతం ఇందుకు కారణమవుతున్నట్లు వివరించారు.  ఫార్మా ఎదురీత: ఎన్‌ఎస్‌ఈలో ఫార్మా (1.1%) మినహా అన్ని రంగాలూ నీరసించాయి. ప్రధానంగా మెటల్, ఎఫ్‌ఎంసీజీ, ఆటో, బ్యాంకింగ్‌ 3–1.6 శాతం మధ్య క్షీణించాయి. నిఫ్టీలో అదానీ ఎంటర్, ఐషర్, అదానీ పోర్ట్స్, టాటా కన్జూమర్, మారుతీ, హెచ్‌యూఎల్, ఇండస్‌ఇండ్, హిందాల్కో, బజాజ్‌ ఫైనాన్స్, ఐటీసీ, హెచ్‌డీఎఫ్‌సీ లైఫ్‌ 8.4–2.2% మధ్య పతనమయ్యాయి. అయితే ఓఎన్‌జీసీ 4.6% జంప్‌చేయగా.. డాక్టర్‌ రెడ్డీస్, సిప్లా, బీపీసీఎల్, కోల్‌ ఇండియా 2–1% మధ్య బలపడ్డాయి.    మిడ్‌ క్యాప్స్‌ వీక్‌  మార్కెట్ల బాటలో బీఎస్‌ఈలో మిడ్, స్మాల్‌ క్యాప్స్‌ 1.2–0.5 శాతం డీలా పడ్డాయి. ట్రేడైన షేర్లలో 2,194 నష్టపోగా 1,356 మాత్రమే లాభపడ్డాయి. విదేశీ ఇన్వెస్టర్లు(ఎఫ్‌పీఐలు) తాజాగా అమ్మకాల బాట వీడీ రూ. 591 కోట్లు ఇన్వెస్ట్‌ చేయగా.. దేశీ ఫండ్స్‌ రూ. 423 కోట్ల స్టాక్స్‌ విక్రయించాయి. ఎల్‌ఐసీ పెట్టుబడి: ఓపెన్‌ మార్కెట్‌ లావాదేవీల ద్వారా ఇటీవల కొద్ది రోజులుగా పీఎస్‌యూ దిగ్గజం ఎల్‌ఐసీ మొత్తం 33.86 లక్షలకుపైగా షేర్లను కొనుగోలు చేసినట్లు  డాక్టర్‌ రెడ్డీస్‌ ల్యాబొరేటరీస్‌ పేర్కొంది. దీంతో కంపెనీలో ఎల్‌ఐసీ వాటా తాజాగా 7.7 శాతానికి బలపడినట్లు వెల్లడించింది.

ముంబై: స్టాక్‌ సూచీలు రెండోరోజూ డీలాపడ్డాయి. సెన్సెక్స్‌ 413 పాయింట్లు నష్టపోయి 60 వేల దిగువున 59,866 వద్ద స్థిరపడింది. నిఫ్టీ సైతం 18 వేల స్థాయిని కోల్పోయింది. చివరికి 126 పాయింట్లు పతనమై 17,877 వద్ద నిలిచింది. డెరివేటివ్స్‌ వీక్లీ ఎక్స్‌పైరీ నేపథ్యంలో పలు రంగాల షేర్లు అమ్మకాల ఒత్తిడికి లోనయ్యాయి. అధిక వెయిటేజీ ఇన్ఫోసిస్‌(3%), రిలయన్స్‌(ఒకశాతం) పతనమై సూచీలను ఏదశలోనూ కోలుకోనివ్వలేదు. అయితే ఆటో, మెటల్‌ రంగాలకు చెందిన చిన్న, మధ్య తరహా షేర్లకు కొనుగోళ్ల మద్దతు లభించింది.  డాలర్‌ మారకంలో రూపాయి విలువ 19 పైసలు క్షీణించి రూ.79.71 వద్ద స్థిరపడింది. ఆయిల్‌ కంపెనీల నుంచి డాలర్‌కు డిమాండ్‌ పెరగడంతో రూపాయిపై ఒత్తిడి పడిందని నిపుణులు తెలిపారు.   లాభాల్లోంచి నష్టాల్లోకి...   సెన్సెక్స్‌ 108 పాయింట్ల లాభంతో 60,454 వద్ద, నిఫ్టీ 42 పాయింట్లు పెరిగి 18,046 వద్ద ట్రేడింగ్‌ను ప్రారంభించాయి. ఒక దశలో సెన్సెక్స్‌ 329 పాయింట్లు, నిఫ్టీ 92 పాయింట్లను ఆర్జించాయి. ఇన్వెస్టర్లు లాభాల స్వీకరణకు ప్రాధాన్యం ఇవ్వడంతో సూచీలు నష్టాల బాట పట్టాయి.  మెప్పించని తమిళనాడు మర్కంటైల్‌ బ్యాంక్‌ లిస్టింగ్‌ తమిళనాడు మర్కంటైల్‌ బ్యాంక్‌ షేరు లిస్టింగ్‌ తొలిరోజే నిరాశపరిచింది. బీఎస్‌ఈలో ఇష్యూ ధర రూ.510తో పోలిస్తే ఫ్లాటుగా రూ.510 వద్దే లిస్టయ్యింది. రూ.484.5 వద్ద ఇంట్రాడే కనిష్టాన్ని తాకింది.  కనిష్ట స్థాయిల వద్ద కొనుగోళ్ల మద్దతు లభించడంతో 0.5శాతం స్వల్ప నష్టంతో రూ.508 వద్ద ముగిసింది. పీవీఆర్‌ షేర్ల అమ్మకం మూడు ప్రైవేట్‌ ఇన్వెస్ట్‌మెంట్‌ ఈక్విటీ ఫండ్లు మల్టీప్లెక్స్‌ వ్యాపార సంస్థ పీవీఆర్‌కు చెందిన 40.45 లక్షల ఈక్విటీ షేర్లను ఓపెన్‌ మార్కెట్‌ ద్వారా విక్రయించాయి. ఈ లావాదేవీ విలువ రూ.759.14 కోట్లుగా ఉంది. ఫలితంగా బీఎస్‌ఈలో పీవీఆర్‌ షేరు 4.40 శాతం నష్టపోయి రూ.1,844 వద్ద స్థిరపడింది.  కొనసాగిన ఎస్‌బీఐ రికార్డు  రెండోరోజూ ఎస్‌బీఐ షేరు జీవితకాల గరిష్టాన్ని అందుకుంది. ట్రేడింగ్‌లోనూ ఒకశాతానికి పైగా లాభపడి రూ.579 వద్ద ఆల్‌టైం హై స్థాయిని తాకింది. చివరికి క్రితం ముగింపు(రూ.572)తో పోలిస్తే ఎలాంటి లాభ, నష్టానికి లోనవకుండా రూ.572 వద్ద స్థిరపడింది. హెచ్‌డీఎఫ్‌సీ బ్యాంక్, ఐసీఐసీఐ బ్యాంకుల తర్వాత మార్కెట్‌ విలువ రూ.5 లక్షల కోట్లకు చేరిన మూడో బ్యాంకు, తొలి ప్రభుత్వరంగ బ్యాంకుగా అవతరించింది.  ► ఆటో షేర్లలో భాగంగా మారుతీ సుజుకీ షేరు ట్రేడింగ్‌లో నాలుగు శాతం లాభపడి రూ.9,351 వద్ద ఏడాది గరిష్టాన్ని తాకింది. చివరికి 3% పెరిగి రూ.9,245 వద్ద నిలిచింది. 

ముంబై: దేశీయ ఈక్విటీ మార్కెట్లో బుల్‌ స్థిరమైన ర్యాలీతో సెన్సెక్స్‌ సూచీ ఏప్రిల్‌ ఐదో తేదీ తర్వాత మరోసారి 60,000 స్థాయిని అధిగమించింది. లాభాల స్వీకరణతో ఆటో షేర్లు మినహా అన్ని రంగాల షేర్లకు కొనుగోళ్ల మద్దతు లభించింది. ఫలితంగా సెన్సెక్స్‌ 418 పాయింట్లు బలపడి 60,260 వద్ద స్థిరపడింది. మొత్తం 30 షేర్లలో ఏడు షేర్లు మాత్రమే నష్టపోయాయి. నిఫ్టీ 119 పాయింట్లు పెరిగి 17,944 వద్ద నిలిచింది. సెన్సెక్స్‌కిది వరుసగా నాలుగో రోజూ, నిఫ్టీకి ఏడోరోజూ లాభాల ముగింపు. బీఎస్‌ఈ మిడ్, స్మాల్‌క్యాప్‌ ఇండెక్సులు అరశాతానికి పైగా లాభపడ్డాయి. విదేశీ ఇన్వెస్టర్లు రూ.2,347 కోట్ల షేర్లను కొనడంతో 13వ రోజూ నికర కొనుగోలుదారులుగా నిలిచారు. దేశీ ఇన్వెస్టర్లు రూ.510 కోట్ల షేర్లను అమ్మారు. ఆసియాలో కొరియా ఇండెక్స్‌ తప్ప మిగిలిన అన్ని దేశాల స్టాక్‌ సూచీలు లాభపడ్డాయి. బ్రిటన్‌ ద్రవ్యోల్బణం నలభై ఏళ్ల గరిష్టస్థాయిలో నమోదవడంతో యూరప్‌ మార్కెట్లు 1–2% నష్టపోయాయి. యూఎస్‌ రిటైల్‌ సేల్స్, ఫెడ్‌ పాలసీ రిజర్వ్‌ జూలై సమావేశపు మినిట్స్‌ వెల్లడికి ముందు అమెరికా మార్కెట్లు అరశాతం స్వల్ప నష్టంతో ట్రేడ్‌ అవుతున్నాయి. కాగా, డాలర్‌ మారకంలో రూపాయి విలువ 29 పైసలు బలపడి 79.45 వద్ద ముగిసింది.    నాలుగురోజుల్లో రూ.7.41 లక్షల కోట్లు   సెన్సెక్స్‌ 4 రోజుల ర్యాలీతో రూ.7.41 లక్షల కోట్ల సంపద సృష్టి జరిగింది. దీంతో ఇన్వెస్టర్లు సంపదగా భావించే బీఎస్‌ఈ కంపెనీల మొత్తం విలువ రూ.279 లక్షల కోట్లకు చేరింది.   మార్కెట్లో మరిన్ని సంగతులు   ►నాలుగేళ్లకు సరిపడా 5జీ స్పెక్ట్రం వేలం సొమ్మును ముందుగానే  చెల్లించడంతో భారతీ ఎయిర్‌టెల్‌ షేరు రెండున్నర శాతం లాభపడి రూ.722 వద్ద స్థిరపడింది.   ►బోర్డు షేర్ల బోనస్‌ ఇష్యూను పరిగణనలోకి తీసుకోవడంతో భారత్‌ గేర్స్‌ షేరు 18% లాభపడి రూ.178 వద్ద నిలిచింది.

స్టాక్‌ మార్కెట్‌ బిగ్‌బుల్‌ రాకేష్‌ ఝున్‌ఝున్‌వాలా హఠాన‍్మరణం చెందిన విషయం తెలిసిందే. ఆయన మరణం తర్వాత తొలిసారి ప్రారంభమైన స్టాక్‌ మార్కెట్‌లో బిగ్‌బుల్‌కు చెందిన అన్నీ షేర్లు కుప్పకూలిపోతున్నాయి.    ♦ ముఖ్యంగా యాప్‌టెక్‌ లిమిటెడ్‌,స్టార్ హెల్త్‌ ఇన్స్యూరెన్స్‌ షేర్లు 5శాతం నష్టపోయాయి. ♦ బిగ్‌ బుల్‌ టైటాన్‌ షేర్లు 1.54శాతం నష్టపోయాయి. గతవారం మార్కెట్‌ ముగిసే సమయానికి ఈ షేర్‌ వ‍్యాల్యూ రూ.2,471.95 ఉండగా.. ఇప్పుడు అదే షేర్‌ ప్రైస్‌ రూ.2,433వద్ద ట్రేడింగ్‌ను కొనసాగిస్తుంది.  ♦ జూన్‌ నెల త్రైమాసికం(వార్షిక ఫలితాలు)లో  టైటాన్‌ కంపెనీలో రాకేష్‌ ఝున్‌ ఝున్‌ వాలా, ఆయన భార్య రేఖ షేర్లు 5.10శాతంతో రూ.11,086.9కోట్లుగా ఉంది.  ♦ తొలి త్రైమాసికంంలో యాప్‌ టెక్‌ లిమిటెడ్‌లో రాకేష్‌ ఝన్‌ఝున్‌వాలా 23.40శాతంతో రూ.225కోట్లను పెట్లుబడులు పెట్టగా.. ఆయన మరణం కారణంగా బీఎస్‌ఈలో ఆ షేర్‌ వ్యాల్యూ క్షీణించింది. 3.67శాతం కంటే తక్కువగా రూ.224.20వద్ద ట్రేడ్‌ అవుతుంది.  ♦ బిగ్‌బుల్‌కు పెద్దమొత్తంలో పెట్టుబడులున్న స్టార్‌ హెల్త్‌ ఇన్స్యూరెన్స్‌ షేర్లు భారీ పతనమవుతున్నాయి. మంగళవారం ట్రేడింగ్‌ కొనసాగే సమయానికి మునుపటి ముగింపు రూ .696.10తో పోలిస్తే 4.79 శాతం క్షీణించి రూ .662.75 వద్ద ట్రేడింగ్‌ను కొనసాగిస్తుంది. జూన్ 2022 త్రైమాసికం నాటికి స్టార్‌ హెల్త్‌ ఇన్స్యూరెన్స్‌లో  ఝున్‌ఝున్‌ వాలాకు 14.39 శాతంతో 8.28 కోట్ల షేర్లు, ఆయన భార్య రేఖా ఝున్‌ఝున్‌వాలాకు 3.10 శాతంతో  1.78 కోట్ల షేర్లు ఉన్నాయి. స్టార్‌ హెల్త్‌లో ఝున్‌ఝున్‌వాటా విలువ రూ.7,017.5 కోట్లుగా ఉంది.  ♦ రాకేష్‌ ఝున్‌ఝున్‌వాలా ఫోర్ట్‌పోలియోకి చెందిన టాటా మోటార్స్ స్టాక్స్‌ 0.68 శాతం క్షీణించి రూ .480.75 వద్ద ట్రేడింగ్‌ కొనసాగిస్తున్నాయి.  జూన్ త్రైమాసికం చివరి నాటికి టాటా మోటార్స్‌లో రూ .1731.1 కోట్ల విలువైన షేర్లున్నాయి.    ♦ బీఎస్‌ఈలో ఝున్‌ఝున్‌వాలా షేర్లున్న క్రిసిల్ లిమిటెడ్ షేరు మునుపటి ముగింపు రూ.3261.60 తో పోలిస్తే 0.56 శాతం క్షీణించి రూ .3243కు పడిపోయింది. జూన్ త్రైమాసికంలో క్రెడిట్ రేటింగ్ సంస్థలో ఆయనకు రూ .1301.9 కోట్ల విలువైన వాటా ఉంది.  ♦ ఫోర్టిస్ హెల్త్‌ కేర్‌ షేర్లు బీఎస్‌ఈలో 0.20 శాతం తగ్గి రూ .281.30 వద్ద ట్రేడవుతుండగా.. ఇలా బిగ్‌బుల్‌ కు చెందిన అన్నీ షేర్లు నష్టాల పాలవ్వడంతో మదుపర్లు ఆందోళన వ్యక్తం చేస్తున్నారు. 

ఆత్మీయులకు ‘భాయ్‌’... మార్కెట్‌కు ‘రాకీ’...  ప్రపంచానికి ‘బిగ్‌ బుల్‌’... స్టాక్‌ మార్కెట్‌కు పర్యాయపదంగా ఇన్వెస్టర్లకు చిరపరిచితమైన మన భారతీయ ‘వారెన్‌ బఫెట్‌’ అర్ధాంతరంగా అల్విదా చెప్పేశారు!! ఒక సాధారణ ఇన్వెస్టర్‌గా  మార్కెట్లోకి అడుగుపెట్టిన రాకేశ్‌  ఝున్‌ఝున్‌వాలా... అట్టడుగు స్థాయి  నుంచి ‘ఆకాశ’మే హద్దుగా దూసుకెళ్లారు. ఆయన మాటే ఒక ఇన్వెస్ట్‌మెంట్‌ పాఠం... నడిచొచ్చే స్టాక్‌ ఎక్సే్ఛంజ్‌... ఇలా ఎన్ని చెప్పినా తక్కువేనేమో ఆయన గురించి! పట్టిందల్లా బంగారమే అనేంతలా, ఆయన పెట్టుబడులు కనక వర్షం కురిపించాయి. ఇప్పటికీ ‘రంకె’లేస్తూనే ఉన్నాయి. ‘ఇన్వెస్ట్‌మెంట్‌ గురు’గా పేరొందడమే కాదు... నవతరం ఇన్వెస్టర్లు స్టాక్‌ మార్కెట్‌ వైపు చూసేలా చేసిన ‘జూమ్‌ జూమ్‌’వాలా..  భారతీయ ఇన్వెస్ట్‌మెంట్‌ రంగంలో చిరస్థాయిగా నిలిచిపోతారు!! అలాంటి ఇన్వెస్టింగ్‌ మాంత్రికుడి హఠాన్మరణంపై పలువురు సంతాపం తెలిపారు.     ఆర్థిక ప్రపంచంలో రాకేశ్‌ ఝున్‌ఝున్‌వాలా చెరగని ముద్ర వేశారు. భారతదేశ పురోగతిపై ఆయనకు ఎంతో ఆశావహంగా ఉండేవారు. ఆయన మరణం బాధాకరం. ఆయన కుటుంబానికి ప్రగాఢ సానుభూతి. ఓం శాంతి’’  – నరేంద్ర మోదీ, ప్రధాన మంత్రి  ‘ఇన్వెస్టరు, రిస్కులు తీసుకునే సాహసి, స్టాక్‌ మార్కెట్లపై అపారమైన పట్టు గల రాకేశ్‌ ఝున్‌ఝున్‌వాలా ఇక లేరు. ఆయనకు భారత సామర్థ్యాలు, సత్తాపై అపార విశ్వాసం ఉండేది.‘ – నిర్మలా సీతారామన్, కేంద్ర ఆర్థిక మంత్రి    దేశీయ స్టాక్‌ ఎక్ఛేంజీలపై రాకేశ్‌కు గల అవగాహన అపారం. సరదా వ్యక్తిత్వం, దయాగుణం, దూరదృష్టికి గాను ఆయన గుర్తుండిపోతారు. ఆయన కుటుంబానికి నా సానుభూతి.  – రతన్‌ టాటా, గౌరవ చైర్మన్, టాటా గ్రూప్‌     భారతదేశ వృద్ధి అవకాశాలపై గట్టి నమ్మకంతో రాకేశ్‌ సాహసోపేత నిర్ణయాలు తీసుకునేవారు. టాటా గ్రూప్‌ అంటే రాకేశ్‌కు ఎంతో గౌరవం. ఆయన లేని లోటు తీర్చలేనిది.   – ఎన్‌ చంద్రశేఖరన్, చైర్మన్, టాటా సన్స్‌    నా స్నేహితుడి మరణం ఎంతో బాధ కలిగించింది. స్టాక్‌ మార్కెట్లపై అవగాహన కల్పించిన వ్యక్తిగా ఆయన అందరికీ గుర్తుండిపోతారు. – అనిల్‌ అగర్వాల్, చైర్మన్, వేదాంత రిసోర్సెస్‌    రాకేశ్‌ నా స్కూల్, కాలేజీ స్నేహితుడు. తను నాకన్నా ఒక ఏడాది జూనియర్‌. భారత్‌ విలువ మరెంతో ఎక్కువగా ఉంటుందని గట్టిగా నమ్మినవాడు. ఆర్థిక మార్కెట్లను అర్థం చేసుకోవడంలో నిష్ణాతుడు. కోవిడ్‌ సమయంలో మేము తరచూ మాట్లాడుకునేవాళ్లం. – ఉదయ్‌ కొటక్, ఎండీ, కొటక్‌ మహీంద్రా బ్యాంక్‌    ప్రఖ్యాత ఇన్వెస్టరు ఝున్‌ఝున్‌వాలా అకాల మరణం ఎంతగానో బాధ కలిగించింది. తన అద్భుతమైన విశ్లేషణలతో మన ఈక్విటీ మార్కెట్ల సత్తాపై ప్రజల్లో నమ్మకం కలిగేలా ఆయన స్ఫూర్తినిచ్చారు. ఆయన్ను ఎన్నటికీ మర్చిపోలేము. – గౌతమ్‌ అదానీ, చైర్మన్, అదానీ గ్రూప్‌ చదవండి👉రాకేష్‌ ఝున్‌ఝున్‌ వాలా విజయ రహస్యం అదే!

వివాహమైన 17 ఏళ్ల సుదీర్ఘ నిరీక్షణ తర్వాత రాకేశ్‌ దంపతులకు 2004లో సంతానం (కుమార్తె) కలిగింది. రాకేశ్‌ ఝున్‌ఝున్‌వాలా భార్య రేఖా ఝున్‌ఝున్‌వాలా కాగా, కుమార్తె పేరు నిష్ఠ. 2009లో ఇద్దరు కుమారులు ఆర్యమాన్‌.. ఆర్యవీర్‌ (కవలలు) పుట్టారు. తన కుమారులిద్దరూ పాతికేళ్ల వారయ్యాకా చూడాలని కోరుకుంటున్నానని 2010లో ఒక ఇంటర్వ్యూ సందర్భంగా రాకేశ్‌ చెప్పారు. కానీ ఆ కోరిక తీరకుండానే ఆయన కన్నుమూశారు. ప్రస్తుతం కుమారులిద్దరికీ దాదాపు పదమూడేళ్లు. మరోవైపు,  2021లో 13 అంతస్తుల భవంతి నిర్మాణాన్ని ప్రారంభించారు. ఆ పనులు ఇంకా కొనసాగుతున్నాయి. చదవండి👉 '1992 స్కాం' వెబ్‌ సిరీస్‌లో రాకేష్‌ ఝున్‌ఝున్‌ వాలా క్యారక్టర్‌ ఎవరిదో తెలుసా?

రాజస్తానీ మార్వాడీల కుటుంబానికి చెందిన రాకేశ్‌ ఝున్‌ఝున్‌వాలా.. ముంబైలో పుట్టి పెరిగారు. ఆయన తండ్రి ముంబైలో ఆదాయపు పన్ను శాఖ కమిషనర్‌గా పనిచేసేవారు. స్టాక్‌మార్కెట్లలో తండ్రి ఇన్వెస్ట్‌ చేస్తుండటం,  వాటి గురించి స్నేహితులతో చర్చిస్తుండటం వంటి వాతావరణంలో పెరగడంతో తనకు చిన్నతనం నుంచే పెట్టుబడులపై ఆసక్తి ఏర్పడినట్లు రాకేశ్‌ ఒక ఇంటర్వ్యూలో చెప్పారు. వార్తల్లో ఉన్న తీరును బట్టి కంపెనీలు పెరుగుతూ, తగ్గుతూ ఉంటాయని తండ్రి వివరించడంతో 15 ఏళ్ల ప్రాయం నుంచే మార్కెట్‌ వార్తల్ని, షేర్లను పరిశీలించడం ప్రారంభించారు. డిగ్రీ తర్వాత స్టాక్‌ మార్కెట్ల వైపు వెళ్తానంటూ తండ్రికి చెప్పారు. కానీ సీఏ చేసి ఆర్థికంగా కాస్త నిలదొక్కుకున్న తర్వాతే ఆ విషయాన్ని ఆలోచించాలని తండ్రి సూచించారు. ఆయన మాట ప్రకారమే సీఏ చదివిన తర్వాత మార్కెట్లోకి అడుగుపెట్టారు.  తొలి పెట్టుబడి బంపర్‌ హిట్‌..!  1985లో సోదరుడు రాజేశ్‌ దగ్గర రూ. 5,000 తీసుకుని రాకేశ్‌ మార్కెట్లో ట్రేడింగ్‌ మొదలుపెట్టారు. అప్పట్లో రూ. 5,000తో కొన్న టాటా టీ షేర్లు భారీ లాభాలు తెచ్చి పెట్టాయి. రూ. 43కి కొన్న షేరు మూడు నెలల్లోనే రూ. 143కి ఎగిశాయి. మూడు రెట్లు లాభాలు తెచ్చిపెట్టింది. ఇక ఆ తర్వాత నుంచి సెసా గోవా, టైటాన్‌ వంటి కంపెనీల్లో ఇన్వెస్ట్‌ చేస్తూ ముందుకెళ్లారు. మార్కెట్లోకి రాకేశ్‌ అడుగుపెట్టినప్పుడు సెన్సెక్స్‌ 150 పాయింట్లుగా ఉండేది. ప్రస్తుతం అది 60,000 పాయింట్ల వద్ద ఉంది. ఈ మూడున్నర దశాబ్దాల కాలంలో రాకేశ్‌ సంపద కూడా రాకెట్లా దూసుకెళ్లి సుమారు రూ. 46,000 కోట్ల స్థాయికి చేరింది.  2017లో టైటాన్‌ షేరు జోరు మీద ఉన్నప్పుడు 1 రోజులోనే ఏకంగా రూ. 900 కోట్లు ఆర్జించారు. రాకేశ్‌ కొన్న కంపెనీ షేరు పెరుగుతుంది.. అమ్మితే పడిపోతుంది అనే సెంటిమెంటుతో అసంఖ్యాకంగా ఇన్వెస్టర్లు ఆయన్ను ఫాలో అవుతున్నారు.   వైఫల్యాలూ ఉన్నాయి..  రాకేశ్‌కు నష్టాలు తెచ్చిపెట్టిన సందర్భాలూ ఉన్నాయి. ప్రధానంగా ఇన్‌ఫ్రా విభాగంలో పెట్టుబడులు ఆయనకు కలిసిరాలేదు. రియల్టీ భవిష్యత్‌ బాగుంటుందనే అంచనాలతో 2013లో దివాన్‌ హౌసింగ్‌ ఫైనాన్స్‌లో రూ. 34 కోట్లు పెట్టి 25 లక్షల షేర్లు కొన్నారు. 2018లో కంపెనీ దెబ్బతిన్నప్పటికీ మరికాస్త కొన్నారు. కానీ చివరికి ఆ కంపెనీ దివాలా తీసింది. మంధన రిటైల్‌లోనూ అలాంటి పరిస్థితే ఎదురైంది. 2016లో సంస్థ షేరు రూ. 247గా ఉన్నప్పుడు 12.7% వాటా కొన్నారు. 2021లో రూ. 16కి అమ్మేశారు. అలాగే డీబీ రియల్టీలోనూ, ప్రైవేట్‌ ఈక్విటీ కింద చేసిన పెట్టుబడుల్లో కొన్ని ఇన్వెస్ట్‌మెంట్లూ నష్టాలు తెచ్చిపెట్టాయి.   వివాదాలూ ఉన్నాయి..  బిగ్‌ బుల్‌గా పేరొందినప్పటికీ ఆయన బేర్‌ పాత్ర పోషించిన సందర్భాలు కూడా ఉన్నాయి. 1992 హర్షద్‌ మెహతా స్కామ్‌ సందర్భంలో షార్ట్‌ సెల్లింగ్‌ ద్వారా భారీగా లాభాలు గడించారు. సాధారణంగా షేర్లంటేనే స్కాములనే దురభిప్రాయం కొంత ఉండే మార్కెట్లో హర్షద్‌ మెహతా, కేతన్‌ పరేఖ్‌ లాంటి వారికి భిన్నంగా రాకేశ్‌కి కాస్త క్లీన్‌ ఇమేజే ఉంది. అయినప్పటికీ ఆయనపైనా ఆరోపణలు ఉన్నాయి. ఆప్‌టెక్‌లో ఇన్‌సైడర్‌ ట్రేడింగ్‌ కేసును 2021లో ఆయనతో పాటు మరికొందరు రూ. 37 కోట్లతో సెటిల్‌ చేసుకున్నారు. అలాగే సోనీ పిక్చర్స్‌లో విలీనం కావాలని జీ ఎంటర్‌ప్రైజెస్‌ నిర్ణయం తీసుకోవడానికి కొద్ది రోజుల ముందే.. జీ ఎంటర్‌ప్రైజెస్‌లో రాకేశ్‌ ఇన్వెస్ట్‌ చేయడం, స్వల్ప వ్యవధిలోనే రూ. 70 కోట్లు లాభాలు పొందడం, ఆయన వ్యవహారాలపై సందేహాలు రేకెత్తించాయి. కంపెనీల పోర్ట్‌ఫోలియో..  రాకేశ్‌కు 40 పైచిలుకు కంపెనీల్లో పెట్టుబడులు ఉన్నాయి. టాటా గ్రూప్‌లో భాగమైన టైటాన్‌ వీటన్నింటిలోకెల్లా ప్రత్యేకమైనది. వేల కోట్ల లాభాలు తెచ్చిపెట్టింది. టైటాన్‌లో ఆయనకున్న 5.05% వాటాల విలువే రూ. 11,000 కోట్ల మేర ఉంటుంది. స్టార్‌ హెల్త్, ర్యాలీస్, ఎస్కార్ట్స్, కెనరా బ్యాంక్, ఇండియన్‌ హోటల్స్‌ కంపెనీ, టాటా మోటర్స్‌ మొదలైన సంస్థలలోనూ ఆయన ఇన్వెస్ట్‌ చేశారు. హంగామా మీడియా, ఆప్‌టెక్‌ సంస్థలకు చైర్మన్‌గా వ్యవహరించారు. వైస్‌రాయ్‌ హోటల్స్, నాగార్జున కన్‌స్ట్రక్షన్‌ కంపెనీ, కాంకర్డ్‌ బయోటెక్, ప్రొవోగ్‌ ఇండియా, జియోజిత్‌ ఫైనాన్షియల్‌ సర్వీసెస్‌ మొదలైన వాటిల్లో డైరెక్టరుగా ఉన్నారు. భార్య రేఖ, తన పేరు కలిసి వచ్చేలా రేర్‌ (RARE) ఎంటర్‌ప్రైజెస్‌  ఏర్పాటు చేసి, కార్యకలాపాలు సాగించేవారు. ఇటీవలే ప్రారంభమైన ఆకాశ ఎయిర్‌లైన్స్‌లో రాకేశ్, ఆయన భార్య రేఖకు 40% వాటాలు ఉన్నాయి. 

కంపెనీల ఎంపిక...  ఝున్‌ఝున్‌వాలా ఒక కంపెనీలో పెట్టుబడి పెట్టారంటే స్టాక్‌ మార్కెట్లో ఎంతో మంది ఇన్వెస్టర్లకు అది అనుసరణీయంగా మారుతుందనడంలో అతిశయోక్తి కాదు. మరో ఆలోచన లేకుండా అవే కంపెనీల్లో పెట్టుబడి పెట్టి గుడ్డిగా అనుసరించే వారూ ఉన్నారు. కానీ, ఎవరైనా స్వీయ అధ్యయనంతో పెట్టుబడి పెట్టినప్పుడే దాన్ని కొనసాగించగలరు. పెట్టుబడికి ముందు ఒక కంపెనీకి సంబంధించి ఎన్నింటినో ఝున్‌ఝున్‌వాలా చూస్తారు. ఎదుగూ, బొదుగూ లేని వ్యాపారంతో కూడిన క్రిసిల్‌లో ఎందుకు ఇన్వెస్ట్‌ చేశారు? అన్నది అప్పట్లో చాలా మంది నిపుణులు, ఇన్వెస్టర్లకు అర్థం కాలేదు. భారత ఆర్థిక వ్యవస్థ ఎంతో వేగంగా వృద్ధి సాధిస్తుంటే, విశ్వసనీయమైన క్రెడిట్‌ రేటింగ్‌ ఏజెన్సీల సేవలకు డిమాండ్‌ భారీగా పెరుగుతుందని ఆయన అంచనా వేశారు. అదే నిజమైంది. రేటింగ్‌ ఏజెన్సీ మార్కెట్లో ఇప్పటికీ క్రిసిల్‌ లీడర్‌. 2002లో రూ.200 పెట్టి ఒక్కో క్రిసిల్‌ షేరు కొంటే, దాని విలువ ఇప్పుడు రూ.3,250. అన్ని సందర్భాల్లో ‘రైట్‌’ కానక్కర్లేదు  విజయవంతమైన ఇన్వెస్టర్లు ఆచితూచి, సరైన స్టాక్స్‌ ఎంపిక చేసుకుంటారని ఎక్కువ మంది భావిస్తుంటారు. కానీ, ఎంతో తలపండిన వారెన్‌ బఫెట్‌ దగ్గర్నుంచి ఝున్‌ఝున్‌వాలా వరకు స్టాక్స్‌ పెట్టుబడుల్లో ఎదురుదెబ్బలు సహజం. కనుక వైఫల్యాలను ఆమోదించి, పాఠాన్ని నేర్వడమే ఇన్వెస్టర్‌ చేయాల్సింది. ఝున్‌ఝున్‌వాలా ట్రాక్‌ రికార్డును పరిశీలిస్తే డిష్‌ టీవీ, డీహెచ్‌ఎఫ్‌ఎల్, మంధన రిటైల్‌ వెంచర్స్‌ ఇవన్నీ పెట్టుబడులను హరించివేసినవి. ఆయన పెట్టుబడులకు ఎంపిక చేసుకున్న జియోజిత్‌ ఫైనాన్షియల్, బిల్‌కేర్, ఆటోలైన్‌ ఇండస్ట్రీస్‌ ఇలా చాలా కంపెనీలు విజయాన్ని ఇవ్వలేకపోయాయి. కానీ, అదే సమయంలో ఝున్‌ఝున్‌వాలా పెట్టుబడులకు ఎంపిక చేసుకున్న కంపెనీల్లో మిగిలినవి గొప్ప రాబడులను ఇచ్చాయి. అందుకే ఆయన నష్టపోయిదానికంటే కూడబెట్టుకున్నది ఎక్కువ. టైటాన్‌ ఒక్కో షేరును రూ.5 కొనుగోలు చేశారు. నేడు అదే షేరు ధర రూ.2,472. ఈ ఒక్క పెట్టుబడి రాకేశ్‌ ఝున్‌ఝున్‌వాలా మొత్తం స్టాక్‌ మార్కెట్‌ జర్నీలో నష్టాలను పూడ్చేసి, అదనపు సంపదను తెచ్చిపెట్టింది. కనుక తప్పిదాలను గుర్తించి, అవసరమైతే ఆ కంపెనీల నుంచి తప్పుకోవడం, రానున్న రోజుల్లో సంపద సృష్టికి అవకాశం ఉన్న వాటిని గుర్తించి పెట్టుబడులు పెట్టడం కీలకం.  ట్రేడింగ్‌/ఇన్వెస్టింగ్‌...  చాలా మంది రిటైల్‌ ఇన్వెస్టర్లు ట్రేడింగ్, ఇన్వెస్టింగ్‌ వేర్వేరు అని భావించరు. నిజానికి ఈ రెండూ విరుద్ధమైనవి. వీటికి అనుసరించే సూత్రాలూ భిన్నమైనవే. రాకేశ్‌ రూ.5,000తోనే ఇంతటి సంపద సాధించగలిగారా..? కాదు. పెట్టుబడికి నిధి కావాలి. ఆ విషయం ఝున్‌ఝున్‌వాలా త్వరగానే గుర్తించారు. మంచి పెట్టుబడి నిధి కోసం ఆయన ఆరంభంలో దశాబ్దం పాటు ట్రేడింగ్‌ను వృత్తిగా మలుచుకున్నారు.ఎదురుదెబ్బలు తగిలినా, కిటుకులు పట్టుకున్నారు. భారీ నిధితో పాటు, మార్కెట్‌ గురించి మంచి విజ్ఞానాన్నీ సంపాదించారు. ట్రేడింగ్‌  స్వల్పకాల రాబడిని ఇస్తుందని.. స్టాక్స్‌లో పెట్టుబడి పెడితే, దీర్ఘకాల సంపదగా మారుతుందని ఆయన చెప్పేవారు. అధ్యయనం/ప్యాషన్‌...  జీవితం అంటే పశ్చాత్తాపాలు కాదు.. ప్రతి తప్పిదం నుంచి నేర్చుకునే మజిలీ అని ఝున్‌ఝున్‌వాలా చెబుతారు. తప్పులే తనను మెరుగైన ఇన్వెస్టర్‌గా మార్చాయని ఆయన స్వయంగా చెప్పారు. వేరే వారిని గుడ్డిగా అనుసరించి ఇన్వెస్ట్‌ చేయడం విజయాన్ని ఇవ్వదు. ఎవరికి వారు మార్కెట్‌ను అధ్యయనం చేయాలి. ప్రముఖ ఇన్వెస్టర్లు చేసిన తప్పులు, వారి విజయానికి దోహదం చేసిన అంశాలను నేర్చుకోవాలి. దీనివల్ల మరింత పరిణతితో లాభాలు పెంచుకోవడం సాధ్యం. రాకేశ్‌కు స్టాక్స్‌లో పెట్టుబడి అంటే ఓ ప్యాషన్‌. ఆయన సంపదలో 99 శాతం స్టాక్స్‌లోనే ఉందంటే ఈక్విటీల పట్ల ఆయనకున్న విశ్వాసం ఏంటో అర్థం చేసుకోవచ్చు. ‘మార్కెట్లో సంపద కూడబెట్టుకోవాలంటే సొంతంగా పరిశోధన చేయాలి. నేర్చుకోవడాన్ని అభిరుచిగా మార్చుకోవాలి’ అని ఆయన సూచిస్తారు. నమ్మకం ఉంచాలి..  సరైన అవకాశం అని భావించినప్పుడు భారీగా పెట్టుబడి పెట్టడం ఝున్‌ఝున్‌వాలా విధానం. 1980ల్లో సెసాగోవా (ఇప్పుడు వేదాంతలో భాగం) అనే ఐరన్‌ఓర్‌ కంపెనీ షేరు రూ.24–25లో ఉన్న సందర్భంలో రాకేశ్‌ ఝున్‌ఝున్‌వాలా రూ.కోటి ఇన్వెస్ట్‌ చేశారు. ఐరన్‌ఓర్‌ పరిశ్రమ తీవ్ర నష్టాల్లో ఉన్న రోజులవి. కానీ, ఆ కంపెనీలో ఎంతో విలువ దాగుందని ఆయన భావించి పెట్టుబడి పెట్టారు. ఆ తర్వాత నష్టాలు వచ్చినా పట్టించుకోలేదు. కానీ, అదే షేరు తర్వాతి కాలంలో ఎన్నో రెట్ల లాభాలను తెచ్చిపెట్టింది. టైటాన్‌లోనూ అంతే.  కంపెనీ అంతర్గత విలువ కంటే తక్కువలో ట్రేడ్‌ అవుతుంటే అలాంటి కంపెనీలను ఝున్‌ఝున్‌వాలా విస్మరించరు. 2020 మార్కెట్‌ పతనంలో టాటా మోటార్స్‌ షేరు రూ.65కు పడిపోయింది. మార్కెట్‌ విలువ రూ.24,000 కోట్లకు దిగొచ్చింది. జాగ్వార్‌ ల్యాండ్‌ రోవర్‌ వంటి అంతర్జాతీయ బ్రాండ్‌తోపాటు, రూ.2,00,000 కోట్ల అమ్మకాలు కలిగిన కంపెనీ ఇంత తక్కువలో ట్రేడ్‌ అవ్వడం చాలా చౌక అని భావించి ఎక్స్‌పోజర్‌ తీసుకున్నారు. అక్కడి నుంచి టాటా మోటార్స్‌ ఏడు రెట్లకు పైగా పెరిగింది. సహనం ఓర్పు అన్నది ఈక్విటీ మార్కెట్లో రెండువైపులా పదునైన కత్తి వంటిది. మంచి యాజమాన్యం, ఆర్థిక బలం, కంపెనీ ఉత్పత్తి లేదా సేవల పట్ల ప్రజల్లో మంచి గుర్తింపు, ఆదరణ ఇలాంటి ఎన్నో బలాలున్న కంపెనీని ఎంపిక చేసుకుని పెట్టుబడి పెట్టామంటే.. మంచి లాభాలు ఇవ్వడానికి ఎక్కువ అవకాశాలు ఉంటాయి. కానీ, అంచనాలు నిజమై మంచి రాబడినిచ్చే వరకు ఆగే ఓపిక కూడా ఉండాలి. ‘స్టాక్‌ మార్కెట్‌ ఓపిక లేని వాడి పెట్టుబడిని తీసుకెళ్లి ఓపిక వహించిన వాడికి రాబడిగా ఇస్తుంది’అన్నది వారెన్‌ బఫెట్‌ చెప్పేమాట. ఇన్వెస్ట్‌ చేసిన తర్వాత కొద్ది రాబడికే విక్రయించడం, బాగా నష్టం వచ్చిందని వెంటనే విక్రయించి బయటపడడం సక్సెస్‌ను ఇవ్వదు. రాకేశ్‌ ఝున్‌ఝున్‌వాలా పెట్టుబడుల ప్రయాణాన్ని గమనిస్తే చాలా స్టాక్స్‌లో ఆయన దీర్ఘకాలం పాటు పెట్టుబడులు కొనసాగించినట్టు తెలుస్తుంది. తాను కొనుగోలు చేసింది వ్యాపారాన్నే కానీ, స్టాక్‌ను కాదని ఆయన నమ్ముతారు. కంపెనీ పనితీరు బాగుండి, ఆర్థిక మూలాలు బలంగా ఉన్నంత కాలం.. భవిష్యత్తు బాగుంటుందన్న విశ్వాసం ఉన్నంత కాలం ఆ పెట్టుబడులను ఓపిగ్గా కొనసాగిస్తారు. అదే రూ.5లో కొన్న టైటాన్‌ స్టాక్‌ రూ.2,500 అయినా అమ్మకుండా ఆయన్ను కొనసాగించేలా చేసింది. చదవండి👉 ఈ టిప్స్‌ పాటిస్తే స్టాక్‌ మార్కెట్‌లో మీరే మెగాస్టార్లు : రాకేశ్‌ ఝున్‌ఝున్‌వాలా

దేశీయ స్టాక్‌ మార్కెట్‌లపై జాతీయ, అంతర్జాతీయ మార్కెట్‌ ప్రభావం చూపుతున్నాయి. క్రూడ్ ఆయిల్‌  6 నెలల కనిష్టానికి పడిపోవడం, ఆశాజనకంగా త్రైమాసిక ఫలితాలు, ఫారెన్‌ ఇనిస్టిట్యూషనల్‌ ఇన్వెస్టర్ల కొనుగోలు ఆసక్తిని ప్రోత్సహిస్తుండడం, గ్లోబల్ మార్కెట్లు లాభా పడ్డాయి. దీంతో సోమవారం ఉదయం దేశీయ స్టాక్‌ మార్కెట్‌లు స్తబ్ధుగా ప్రారంభమయ్యాయి.  ఇక సోమవారం ఉదయం 10.30గంటల సమయానికి  సెన్సెక్స్‌ 218 పాయింట్లు నష్టపోయి 58617 వద్ద ట్రేడ్‌ అవుతుండగా నిఫ్టీ సైతం 57 పాయింట్లు నష్టపోయి 17454 పాయింట్ల వద్ద ట్రేడింగ్‌ కొనసాగిస్తుంది. ఎం అండ్‌ ఎం,ఇండస్‌ ఇండ్‌ బ్యాంక్‌,హెచ్‌డీఎఫ్‌సీ, ఎన్‌టీపీసీ, హిందాల్కో, బజాజ్‌ ఫిన్‌సర్వ్‌, రిలయన్స్‌, యాక్సిస్‌ బ్యాంక్‌,అపోలో హాస్పిటల్‌, లార్సెన్‌,హెచ్‌డీఎఫ్‌సీ షేర్లు లాభాల్లో కొనసాగుతున్నాయి.  బీపీసీఎల్‌,ఎస్‌బీఐ, బ్రిటానియా,కిప్లా,ఇన్ఫోసిస్‌, ఆల్ట్రాటెక్‌ సిమెంట్‌, ఏసియన్‌ పెయింట్స్‌, దివిస్‌ ల్యాబ్స్‌ షేర్లు నష్టాల్లో కొనసాగుతున్నాయి.   

ముంబై: అంతర్జాతీయ మార్కెట్లలో ప్రతికూలతలు నెలకొన్నప్పటికీ.., దలాల్‌ స్ట్రీట్‌లో అయిదోరోజూ కొనుగోళ్లు కొనసాగాయి. విదేశీ ఇన్వెస్టర్లు తిరిగి కొనుగోళ్లు చేపట్టడంతో పాటు డాలర్‌ మారకంలో రూపాయి రికవరీ అంశాలు దేశీయ మార్కెట్లో సెంటిమెంట్‌ బలపరిచాయి. ఫార్మా మినహా అన్ని రంగాల షేర్లకు డిమాండ్‌ నెలకొంది. ఫలితంగా గురువారం సెన్సెక్స్‌ 284 పాయింట్లు పెరిగి 55,682 వద్ద స్థిరపడింది. నిఫ్టీ 84 పాయింట్లు బలపడి 16,605 వద్ద నిలిచింది. ముగింపు స్థాయిలు ఇరు సూచీలకు ఏడువారాల గరిష్టం కావడం విశేషం. ఇన్వెస్టర్లు ఎక్కువగా ఆర్థిక, బ్యాంకింగ్, ఇంధన ఐటీ షేర్లను కొనేందుకు ఆసక్తి చూపారు. విస్తృత స్థాయి మార్కెట్లో బీఎస్‌ఈ మిడ్‌ క్యాప్‌ ఇండెక్స్‌ 1.25%, స్మాల్‌క్యాప్‌ సూచీ ఒకశాతం ర్యాలీ చేశాయి. విదేశీ ఇన్వెస్టర్లు రూ.1,799 కోట్ల విలువ షేర్లను కొన్నారు. దేశీ ఇన్వెస్టర్లు రూ.313 కోట్ల విలువ షేర్లను అమ్మేశారు. డాలర్‌ మారకంలో రూపాయి విలువ జీవితకాల కనిష్టం(80.06) నుంచి కోలుకొని 20 పైసలు బలపడి 79.85 స్థాయి వద్ద స్థిరపడింది. ప్రపంచ ఈక్విటీ మార్కెట్లు స్వల్ప నష్టాల్లో ట్రేడ్‌ అవుతున్నాయి.   ఇంట్రాడే ట్రేడింగ్‌ ఇలా..!  సెన్సెక్స్‌ ఉదయం ఐదు పాయింట్లు పతనమై 55,392 వద్ద, నిఫ్టీ నాలుగు పాయింట్ల నష్టపోయి 16,524 వద్ద ట్రేడింగ్‌ను ప్రారంభించాయి. తొలి దశలో పరిమితి శ్రేణిలో స్తబ్ధుగా కదలాడిన  సూచీలు క్రమంగా పుంజుకొని ట్రేడింగ్‌ చివర్లో అనూహ్యరీతిలో లాభాలను ఆర్జించాయి.  5 రోజులు : రూ.10 లక్షల కోట్లు  సెన్సెక్స్‌ అయిదు రోజుల్లో 2,266 పాయింట్లు దూసుకెళ్లిన బీఎస్‌ఈలో రూ.10 లక్షల కోట్ల సంపద సృష్టి జరిగింది. బీఎస్‌ఈ నమోదిత కంపెనీల మొత్తం విలువ రూ.260 లక్షల కోట్లకు ఎగసింది. ఇదే ఐదు ట్రేడింగ్‌ సెషన్లలో నిఫ్టీ 556 పాయింట్లు పెరిగింది. ‘‘చమురు ధరలు దిగివచ్చాయి. యూఎస్‌ ఫెడ్‌  రేట్ల పెంపు దూకుడుగా ఉండకపోవచ్చనే ఆశలు చిగురించాయి. విదేశీ ఇన్వెస్టర్లు తిరిగి కొంటున్నారు. మెరుగైన వర్షపాతం నమోదు కావచ్చని వాతావరణశాఖ అంచనా వేసింది. ఈ అంశాలతో భారత మార్కెట్‌ 5 ట్రేడింగ్‌ సెషన్లలో 4% ర్యాలీ చేసింది’’ అని మెహతా ఈక్విటీస్‌ వైస్‌ ప్రెసిడెంట్‌ ప్రశాంత్‌ తాప్సీ తెలిపారు. మార్కెట్లో మరిన్ని సంగతులు  ♦జూన్‌ త్రైమాసికంలో చక్కటి పనితీరు కనబరచడంతో ఇండస్‌ఇండ్‌ బ్యాంకు షేరు 8% లాభపడి రూ.948 వద్ద స్థిరపడింది. ట్రేడింగ్‌లో తొమ్మిది శాతానికి పైగా ర్యాలీ చేసి రూ.961 వద్ద ఇంట్రాడే గరిష్టాన్ని తాకింది. సెన్సెక్స్, నిఫ్టీ సూచీల్లో అత్యధికంగా లాభపడిన ఈ షేరు ఇదే.  ♦ఐటీసీ షేరు బీఎస్‌ఈలో అరశాతం లాభపడి రూ.299.50 వద్ద స్థిరపడింది. ఇంట్రాడేలో 1.5% లాభపడి మూడేళ్ల తర్వాత రూ.300 స్థాయిని అధిగమించి రూ.302.20 వద్ద ఏడాది గరిష్టాన్ని తాకింది. వార్షిక సమావేశంలో హోటల్‌ వ్యాపార విభజనతో పాటు తన అనుబంధ సంస్థ టెక్నాలజీ వెంచర్‌ను లిస్టింగ్‌ చేసే అంశాలపై చర్చించడం షేరు ర్యాలీకి కారణమైంది. మార్కెట్లో మరిన్ని సంగతులు  ♦జూన్‌ త్రైమాసికంలో చక్కటి పనితీరు కనబరచడంతో ఇండస్‌ఇండ్‌ బ్యాంకు షేరు 8% లాభపడి రూ.948 వద్ద స్థిరపడింది. ట్రేడింగ్‌లో తొమ్మిది శాతానికి పైగా ర్యాలీ చేసి రూ.961 వద్ద ఇంట్రాడే గరిష్టాన్ని తాకింది. సెన్సెక్స్, నిఫ్టీ సూచీల్లో అత్యధికంగా లాభపడిన ఈ షేరు ఇదే.  ♦ఐటీసీ షేరు బీఎస్‌ఈలో అరశాతం లాభపడి రూ.299.50 వద్ద స్థిరపడింది. ఇంట్రాడేలో 1.5% లాభపడి మూడేళ్ల తర్వాత రూ.300 స్థాయిని అధిగమించి రూ.302.20 వద్ద ఏడాది గరిష్టాన్ని తాకింది. వార్షిక సమావేశంలో హోటల్‌ వ్యాపార విభజనతో పాటు తన అనుబంధ సంస్థ టెక్నాలజీ వెంచర్‌ను లిస్టింగ్‌ చేసే అంశాలపై చర్చించడం షేరు ర్యాలీకి కారణమైంది.

ముంబై: స్టాక్‌ సూచీలు ఈ వారంలో పరిమితి శ్రేణిలో తీవ్ర ఒడిదుడుకులకు లోనవుతూ స్థిరీకరణ దిశగా సాగొచ్చని నిపుణులు భావిస్తున్నారు. దేశీయంగా ట్రేడింగ్‌ ప్రభావితం చేసే కీలకాంశాలేవీ లేకపోవడంతో ప్రపంచ పరిణామాలు, కార్పొరేట్‌ ఫలితాలు సూచీలకు దిశానిర్దేశం చేయోచ్చంటున్నారు. డాలర్‌ మారకంలో రూపాయి విలువ, విదేశీ ఇన్వెస్టర్ల పెట్టుబడుల నుంచి సంకేతాలు అందిపుచ్చుకోవచ్చు. వీటితో పాటు క్రూడాయిల్, కమోడిటీ ధరలు, పార్లమెంట్‌వర్షాకాల సమావేశాలపై మార్కెట్‌ వర్గాలు దృష్టి సారించవచ్చు.    ‘‘ఇటీవల క్రూడాయిల్‌తో పాటు కమోడిటీ ధరలు దిగివచ్చాయి. దేశీయ మార్కెట్లో విదేశీ ఇన్వెస్టర్ల విక్రయాల ఉధృతి తగ్గింది. మరోవైపు ద్రవ్యోల్బణ ఆందోళనలు, ఆర్థిక మాంద్య భయాలు వెంటాడుతున్నాయి. ఈ పరిణామాల నేపథ్యంలో స్టాక్‌ సూచీలు మరికొంత పాటు పరిమితి శ్రేణిలో తీవ్ర ఒడిదుడుకులకు లోనవుతూ స్థిరీకరణ దిశగా సాగొచ్చు. చివరి ట్రేడింగ్‌ సెషన్‌లో నిఫ్టీ సాంకేతికంగా కీలకమైన మద్దతు 16,00 స్థాయిపైన ముగిసింది. కొనుగోళ్లు కొనసాగితే జూన్‌ నెల గరిష్టం 16,275 స్థాయి వద్ద నిరోధం ఎదుర్కోనుంది. అటు పిదప 16,400–16,500 శ్రేణిలో మరో కీలక నిరోధాన్ని చేధించాల్సి ఉంటుంది. అమ్మకాలు నెలకొంటే  నిఫ్టీకి 15,858 పాయింట్ల వద్ద తక్షణ మద్దతు, ఆ తర్వాత 15,700–15,500 రేంజ్‌లో మద్దతు లభించొచ్చు’’ రిలిగేర్‌ బ్రోకింగ్‌ లిమిటెడ్‌ రీసెర్చ్‌ వైస్‌ ప్రెసిడెంట్‌ అజిత్‌ మిశ్రా తెలిపారు.  ఫారెక్స్‌ మార్కెట్లో రూపాయి జీవితకాల కనిష్టానికి దిగిరావడం, ఇప్పటి వరకు విడుదలైన కార్పొరేట్‌ క్యూ1 ఆర్థిక ఫలితాలు నిరాశపరచడం, ద్రవ్యోల్బణ పెరగడంతో ఫెడ్‌ రిజర్వ్‌ అంచనాలకు మించి వడ్డీరేట్లను పెంచవచ్చనే భయాలతో గతవారం స్టాక్‌ సూచీలు ఒకటిన్నర శాతం నష్టపోయాయి. సెన్సెక్స్‌ 721 పాయింట్లు, నిఫ్టీ 171 పాయింట్లు చొప్పున క్షీణించాయి.  మార్కెట్‌ను ప్రభావితం చేసే అంశాలను విశ్లేషిస్తే..,   కీలక దశలో కార్పొరేట్‌ ఆర్థిక ఫలితాలు   ముందుగా నేడు మార్కెట్‌ హెచ్‌డీఎఫ్‌సీ బ్యాంక్‌ త్రైమాసిక ఫలితాలకు స్పందించాల్సి ఉంటుంది.  ఇక వారంలో సుమారు 200కి పైగా కంపెనీలు తమ క్యూ4తో పాటు గత ఆర్థిక సంవత్సరపు పూర్తి స్థాయి గణాంకాలను ప్రకటించనున్నాయి. రిలయన్స్‌ ఇండస్ట్రీస్, హెచ్‌యూఎల్, ఐసీఐసీఐ బ్యాంక్, కోటక్‌ మహీంద్రా బ్యాంక్, బంధన్‌ బ్యాంక్, విప్రో, ఆల్ట్రాటెక్‌ సిమెంట్, అంబుజా సిమెంట్స్, హెచ్‌డీఎఫ్‌సీ లైఫ్‌ ఇన్సూరెన్స్, హావెల్స్‌ ఇండియా, ఇండస్‌ఇండ్‌ బ్యాంక్, సీఎస్‌బీ బ్యాంక్, ఐడీబీఐ బ్యాంక్, జేఎస్‌డబ్ల్యూ ఎనర్జీ, ఆర్‌బీఎల్‌ బ్యాంక్,  జేఎస్‌డబ్ల్యూ స్టీల్‌ తదితర కంపెనీలు ఫలితాలు వెల్లడించే జాబితాలో ఉన్నాయి. ఫలితాల ప్రకటన సందర్భంగా కంపెనీల యాజమాన్యం చేసే అవుట్‌లుక్‌ వ్యాఖ్యలను మార్కెట్‌ వర్గాలు నిశీతంగా పరిశీలించే వీలుంది.  ప్రపంచ పరిణామాలు  అంతర్జాతీయ పరిణామాలను గమనిస్తే.., యూరోపియన్‌ సెంట్రల్‌ బ్యాంక్‌ రేపు ద్రవ్య విధానాన్ని వెల్లడించనుంది. వడ్డీరేట్ల పెంపుకే మొగ్గు చూపవచ్చని ఆర్థికవేత్తలు అంచనా వేస్తున్నాయి. యూరో కరెన్సీ పదేళ్ల కనిష్టానికి దిగివచ్చని నేపథ్యంలో ఈసీబీ కఠినతర వైఖరి అనుసరించే వీలుందంటున్నారు. ప్రపంచంలో మూడో అతిపెద్ద ఆర్థిక వ్యవస్థ జపాన్‌ కేంద్ర బ్యాంక్‌ గురువారం ద్రవ్య పాలసీ నిర్ణయాన్ని ప్రకటించనుంది. వీటి నుంచి ప్రపంచ ఈక్విటీ మార్కెట్లను ప్రభావితం చేసే ద్రవ్యోల్బణం, వడ్డీరేట్ల పెంపు, ఆర్థిక స్థితిగతులు అంశాలపై ఒక అంచనాకు రావచ్చు.     విదేశీ ఇన్వెస్టర్ల అమ్మకాలు  భారత ఈక్విటీ మార్కెట్ల నుంచి ఈ జూలై తొలి భాగంలో విదేశీ ఇన్వెస్టర్లు రూ.7,432 కోట్లను ఉపసంహరించుకున్నారు. ప్రస్తుత నెలలో సైతం అమెరికా డాలర్‌ బలపడటం, అమెరికా మాంద్యంపై పెరుగుతున్న ఆందోళనలు ఇందుకు కారణమైనట్లు నిపుణులు తెలిపారు. ఈ ఏడాది ప్రారంభం నుంచి ఇప్పటివరకు ఈక్విటీల నుంచి ఎఫ్‌పీఐలు దాదాపు రూ. 2.25 లక్షల కోట్లను వెనక్కి తీసుకెళ్లారు. కాగా  గత నెల జూన్‌లో రూ. 50,203 కోట్లను ఉపసంహరించుకున్నారు. ఎఫ్‌పీఐ అమ్మకాలు తక్కువగా ఉన్నప్పటికీ.., కొనుగోలు చేసే ప్రత్యేక పరిస్థితులేవీ లేకపోవడంతో అమ్మకాల ధోరణి కొనసాగే అవకాశాలు ఉన్నాయని మార్నింగ్‌ స్టార్‌ ఇండియా రీసెర్చ్‌ మేనేజర్‌ హిమాన్షు శ్రీవాస్తవ అన్నారు.

అంతర్జాతీయ ప్రతి కూలతలు దేశీయ మార్కెట్‌లపై ఏమాత్రం ప్రభావం చూపలేదు. దీంతో గురువారం స్టాక్‌ మార్కెట్‌లు లాభాల్లో కొనసాగుతున్నాయి. సెన్సెక్స్‌ 230 పాయింట్ల లాభంతో 53,744 వద్ద నిఫ్టీ 69 పాయింట్లు లాభపడి 16,036 వద్ద ట్రేడింగ్‌ కొనసాగిస్తుంది.  నేషనల్‌ స్టాక్‌ ఎక్ఛేంజ్‌లోని 15 సెక్టార్‌లలోని 12 రంగాలకు చెందిన షేర్లు లాభాల వైపు పయనమవుతుండగా.. నిఫ్టీ ఫార్మా, నిఫ్టీ హెల్త్‌ కేర్‌ షేర్లు ఊహించని విధంగా 1.07 శాతం నుంచి 1.21శాతం లాభంతో ట్రేడ్‌ అవుతున్నాయి.    నిఫ్టీలో అపోలో హాస్పిటల్‌ షేర్లు  2.13శాతంతో రూ.3,950 వద్ద ట్రేడ్‌ కంటిన్యూ చేస్తుంది. టాటా కన్జ్యూమర్‌ ప్రొడక్ట్‌, సన్‌ ఫార్మా, డాక్టర్‌ రెడ్డిస్‌, బ్రిటానియా, ఆల్ట్రా టెక​ సిమెంట్‌, హిందుస్తాన్‌ యూనిలివర్‌, మారుతి, హెచ్‌డీఎఫ్‌సీ, బజాజ్‌ ఫిన్‌ సర్వ్‌, ఇండస్‌ ఇండ్‌ బ్యాంక్‌, పవర్‌ గ్రిడ్‌,నెస్లే,రిలయన్స్‌ షేర్లు టాప్‌ గెయినర్స్‌ జాబితాలో నిలిచాయి. యాక్సిస్‌ బ్యాంక్‌,టెక్‌ మహీంద్రా,టాటా స్టీల్‌,టీసీఎస్‌,ఎస్‌బీఐ,ఇన్ఫోసిస్‌,హెచ్‌సీఎల్‌ టెక్‌, ఎం అండ్‌ ఎం, విప్రో షేర్లు నష్టాల్లో కొనసాగుతున్నాయి.