తార్నాక: గణేష్‌ నిమజ్జన ర్యాలీ సందర్బంగా డ్యాన్స్‌ విషయంలో జరిగిన గొడవ రెండు గ్రూపుల మధ్య గ్యాంగ్‌ వార్‌కు దారితీసింది. ఓయూ పోలీసుస్టేషన్‌ పరిధిలోని హబ్సిగూడ స్ట్రీట్‌ నంబర్‌–8లో జరిగిన ఈ సంఘటనతో స్థానికులు భయాందోళనకు గురయ్యారు. ఇరువర్గాలు పరస్పర దాడులకు పాల్పడుతున్న దృశ్యాలు సీసీ కెమెరాల్లో రికార్డు కావడంతో సోషల్‌ మీడియాలో వైరల్‌గా మారాయి. ఈ సంఘటనలో ముగ్గురు నిందితులను ఓయూ పోలీసులు అరెస్టు చేశారు. వివరాలు ఇలా ఉన్నాయి...ఈనెల 14న రాత్రి 1.30గంటల ప్రాంతంలో రామంతాపూర్‌ రహదారిలోని మధురాబార్‌ సమీపంలో వినాయక నిమజ్జన ర్యాలీ కొనసాగుతోంది. ఈ సందర్బంగా అనిల్‌ అనే కారు డ్రైవర్, రామంతాపూర్‌కు చెందిన డిగ్రీ విద్యార్థి సతీష్‌ మధ్య డ్యాన్స్‌ విషయంలో గొడవ జరిగింది. దీంతో వారిరువురు రెండు గ్యాంగులుగా విడిపోయి ఘర్షణ పడ్డారు. స్థానికులు సర్దిచెప్పడంతో వారు శాంతించారు. అనంతరం అక్కడి నుంచి వెళ్లిన సతీష్‌ తన స్నేహితులతో కలిసి హబ్సిగూడ రవీంద్రనగర్‌  ఎస్‌ఆర్‌ అపార్టుమెంట్‌ వద్ద ఉన్నాడు. ఈ విషయం తెలియడంతో అనిల్‌ 15 మందితో కలిసి అక్కడికి వచ్చి సతీష్, అతని స్నేహితులపై దాడికి దిగగా, సతీష్‌ అతని స్నేహితులు ప్రతి దాడి చేశారు. ఇరువర్గా లు రోడ్డుపైనే విచక్షణారహితంగా కొట్టుకున్నారు. అనిల్‌ గ్రూప్‌ వ్యక్తులు సతీష్‌ను కర్రలతో చితకబాదుతున్న దృశ్యాలు సీసీ కెమెరాల్లో రికార్డయ్యాయి. దీంతో స్థానికులు భయందోళనకు గోనయ్యారు. స్థానికుల సమాచారంతో సంఘటనా స్థలానికి చేరుకున్న ఓయూ పోలీసు లు గాయపడిన సతీష్‌ను గాంధీ ఆసుపత్రికి తరలించారు. నిందితులపై కేసు నమోదుచేసి దర్యాప్తు చేస్తున్నారు. సోషల్‌మీడియాతో వెలుగులోకి...? రెండు గ్రూపుల మధ్య జరిగిన గ్యాంగ్‌వార్‌ దృశ్యాలు  సోషల్‌ మీడియాలో వైరల్‌ కావడంతో ఈ కేసు వెలుగులోకివచ్చింది. స్థానికుల ఫిర్యాదుతో కేసు నమోదు చేసిన ఓయూ పోలీసులు వివరాలను మాత్రం గోప్యంగా ఉంచారు. సోషల్‌ మీడియాలో సీసీ ఫుటేజీ వీడియోవైరల్‌గా మారడంతో కేసు నమోదు చేసినట్లు ప్రకటించారు. ముగ్గురు నిందితుల అరెస్టు   ఈ సంఘటనలో ముగ్గురు నిందితులను అరెస్టు చేసినట్లు ఓయూ సబ్‌ ఇన్‌స్పెక్టర్‌ హరీశ్వర్‌రెడ్డి తెలిపారు. రామంతాపూర్‌కు చెందిన అనిల్, హబ్సిగూడకు  చెందిన కరుణాకర్‌తో పాటు అదే ప్రాంతానికి చెందిన మైనర్‌ను అదుపులోకి తీసుకున్నట్లు తెలిపారు.

పుణె: వినాయక నిమజ్జనం సందర్భంగా ఓ అంబులెన్స్‌ రావడంతో భక్తులు నిట్టనిలువుగా చీలిపోయి.. అంబులెన్స్‌కు దారి ఇచ్చిన ఘటన పుణెలో జరిగింది. ఈ ఘటనకు సంబంధించిన వీడియో ప్రస్తుతం వైరల్‌గా మారింది. పుణెలోని లక్ష్మీనగర్‌ రోడ్డులో వినాయక శోభాయాత్ర గురువారం అట్టహాసంగా సాగుతున్న వేళ అదే దారిలో అంబులెన్స్‌ వచ్చింది. అత్యవసర పరిస్థితుల్లో వచ్చిన అంబులెన్స్‌ చూసిన అక్కడి భక్తులు, ప్రజలు వెంటనే మానవతా దృక్పథంతో స్పందించారు. రోడ్డు మీద రద్దీని క్లియర్‌ చేసి.. అంబులెన్స్‌ వెళ్లేందుకు వీలుగా దారి కల్పించారు. వినాయక శోభాయాత్రలో పెద్ద సంఖ్యలో ఉన్న ప్రజలు, భక్తులు రోడ్డుకిరువైపులా నిలువుగా చీలిపోయి.. అంబులెన్స్‌ ముందుకు కదిలేందుకు వీలుగా దారి ఇచ్చారు. కొందరు యువకులు అంబులెన్స్‌ ముందు పరిగెడుతూ.. ఎలాంటి ఇబ్బంది లేకుండా ఆ వాహనం ముందుకు కదిలేలా చూశారు. ఈ వీడియో ప్రస్తుతం నెటిజన్ల హృదయాలను హత్తుకుంటోంది. ఆపత్కాలంలో మానవీయత ఉట్టిపడేలా వ్యవహరించిన పుణె వాసులను నెటిజన్లు కొనియాడారు.

అనంతపురంలో సంచలనం కలిగించిన నేరాల దర్యాప్తులో పురోగతి కనిపించడం లేదు. ఇళ్లల్లో దొంగతనాలు పక్కన పెడితే పోలీసులకే సవాల్‌ విసిరేలా నగర నడిబొడ్డున కో ఆపరేటివ్‌ అర్బన్‌ బ్యాంకు (టౌన్‌బ్యాంకు) రాబరీ కేసులో పురోగతి లేకపోవడం చర్చనీయాంశంగా మారింది. ఇటీవల వినాయక నిమజ్జనం, మొహర్రం వేడుకలు వరుసగా రావడంతో జిల్లాలో ఎక్కడా శాంతిభద్రతలకు విఘాతం కలగకూడదనే ఉద్దేశంతో మొత్తం అధికారులను బందోబస్తుకు నియమించారు. దీంతో జిల్లా కేంద్రంలో ఇటీవల చోటు చేసుకున్న కీలక నేరాల దర్యాప్తులు అటకెక్కాయనే విమర్శలు వ్యక్తమవుతున్నాయి.    అనంతపురం సెంట్రల్‌: జిల్లా కేంద్రంలో వరుస దొంగతనాలు ప్రజలను భయాందోళనలకు గురిచేస్తున్నారు. ఇటీవల శ్రీకంఠం సర్కిల్‌నుంచి ఆర్టీసీ బస్టాండ్‌కు వెళ్లే ప్రధాన రహదారి వెంబడి ఉన్న ఫర్టిలైజర్, ఎరువుల అంగళ్లను టార్గెట్‌గా చేసుకొని దొంగతనాలకు పాల్పడ్డారు. అంతకు ముందుకు జాతీయ రహదారి, ప్రధాన కూడళ్లలోని మెడికల్‌షాపుల్లో చోరీలకు పాల్పడ్డారు. వారం రోజుల క్రితం పాతూరు చెన్నకేశవాలయంలో చోరీ జరిగింది. హుండీలోని రూ. 20వేల నగదును ఎత్తుకెళ్లారు. అంతకుముందు టవర్‌క్లాక్‌ కూతవేటు దూరంలో ఉన్న వాసవీ కన్యకా పరమేశ్వరి అమ్మవారి వెండికిరీటం, ముక్కుపుడక సైతం అపహరణకు గురయ్యాయి. నిత్యం రద్దీతో పాటు సీసీ కెమెరా నిఘా వ్యవస్థ ఉంటున్న ప్రాంతాల్లోనే దొంగలు యథేచ్ఛగా తమ పని కానిచ్చేస్తుండటం ఆందోళన కలిగిస్తోంది. ⇔ అర్బన్‌ బ్యాంకులో దోపిడీ.. పోలీసులకే సవాల్‌ నగర నడిబొడ్డున సుభాష్‌రోడ్డులో కో ఆపరేటివ్‌ అర్బన్‌ బ్యాంకు (టౌన్‌ బ్యాంకు)లో గత నెల 30న సినీ ఫక్కీలో జరిగిన రాబరీ పోలీసులకే సవాల్‌ విసిరింది. దాదాపు 16 సీసీ కెమెరాలతో అలారం వ్యవస్థ, విధుల్లో సెక్యూరిటీ గార్డు ఉన్నప్పటికీ ఎవరికీ అనుమానం రాకుండా బ్యాంకుకు కన్నం వేసి పటిష్ట భద్రత నడుమ ఉండే లాకర్లను ధ్వంసం చేసి కిలో బంగారం, విలువైన వస్తువులను ఎత్తుకెళ్లారు. బ్యాంకు రాబరీ ఘటనలో ఇది రెండవది.   ⇔ ఏడాది క్రితం జేఎన్‌టీయూలోని స్టేట్‌బ్యాంకులో ఇదే తరహాలో దొంగతనం జరిగింది. అయితే ఈ కేసును అప్పటి పోలీసులు ప్రతిష్టాత్మకంగా తీసుకొని వారం లోగానే చేధించారు. అయితే ఇటీవల జరిగిన అర్బన్‌ బ్యాంకు ఘటనలో ఇప్పటి వరకు ఎటువంటి పురోగతి సాధించలేదని సమాచారం. ఇందుకోసం ప్రత్యేక టీంను ఏర్పాటు చేసి రంగంలోకి దింపినా క్లూ కూడా సంపాదించలేనట్లు తెలిసింది. అర్బన్‌ బ్యాంకు ఘటనలోనే కాకండా ఇతర నేరాల్లో కూడా నేరస్తులను పట్టుకోవడంలో విఫలమవుతున్నాయి. ఇంత వరకూ పోలీసులు చూపిస్తున్న అరెస్ట్‌ల్లో ఎక్కువశాతం పాత నేరస్తులే ఉండడం గమనార్హం.   నేరాల నియంత్రణలో విఫలం నగరంలో ఒక్కో పోలీసుస్టేషన్‌కు ఒక సీఐ, ఇద్దరు నుంచి నలుగురు ఎస్‌ఐలు.. నాల్గవ పట్టణానికి అయితే ఏకంగా ఆరుగురు ఎస్‌ఐలు... పదుల సంఖ్యలో సిబ్బంది ఉన్నారు. తిప్పి కొడితే ఒక్కో అధికారికి ఒక కిలోమీటరు దూరం పరిధి కూడా లేదు. అయినా నేరాలకు ‘అనంత’ అడ్డాగా మారుతోంది. గడిచిన రెండు నెలల్లో జిల్లా కేంద్రంలో జరిగిన నేరాలు సంఖ్య జిల్లా వ్యాప్తంగా కూడా చోటు చేసుకోలేదు. అన్ని పోలీసు స్టేషన్‌లకూ మోతాదుకు మించి సిబ్బందిని ఎస్పీ నియమించారు. అయినా నేరాలకు అడ్డుకట్ట వేయలేకపోతున్నారు. ఇక్కడ పనిచేస్తున్న అధికారులకు అంతో ఇంతో ట్రాక్‌ రికార్డు ఉన్న వారే.  కానీ వారి ప్రతాపమంతా చిన్నాచితకవారిపై చూపిస్తున్నారు తప్ప నేరాలను అడ్డుకోవడంలో చూపించలేకపోతున్నారనే విమర్శలు వ్యక్తమవుతున్నాయి.

సాక్షి, హైదారాబాద్‌: వినాయక నిమజ్జనం కారణంగా హైదరాబాద్‌ మహానగరంలో ట్రాఫిక్‌ భారీగా స్తంభించింది. శుక్రవారం నాటికి కూడా నిమజ్జనం పూర్తి కాకపోవడంతో ట్యాంక్‌బండ్‌ చుట్టూ కిలోమీటర్ల పొడవునా వాహనాలు నిలిచిపోయాయి. ట్యాంక్‌బండ్‌, ఖైరతాబాద్, లోయర్ ట్యాంక్ బండ్, తెలుగు తల్లి ఫ్లైఓవర్, రానిగంజ్, సికింద్రాబాద్, సంగీత సర్కిల్, బేగంపేట్, జూబ్లీహిల్స్, మాదాపూర్ ప్రాంతాల్లోవంటి ప్రధాన మార్గాల్లో వాహనాలు నెమ్మదిగా కదలుతున్నాయి. నిమజ్జనం నేపథ్యంలో ట్రాఫిక్‌ డైవర్షన్‌ను ఎత్తివేయడంతో ఈ పరిస్థితి ఏర్పడింది. ఇంకా ఐదు వందలకు పైగా విగ్రహాలు నిమజ్జనం చేయాల్సి ఉన్నట్లు తెలుస్తోంది. దీంతో ట్రాఫిక్‌ సమస్య నేటి సాయంత్ర వరకూ కొనసాగనుంది. దీని కారణంగా నగరంలో వాహనదారులు తీవ్ర ఇబ్బందులను ఎదుర్కొంటున్నారు. కాగా ఇప్పటి వరకు రెండు వేలకు పైగా విగ్రహాలు గంగఒడికి చేరినట్లు అధికారులు తెలిపారు.  

సాక్షి, సిటీబ్యూరో: నగరంలో గణేష్‌ సామూహిక నిమజ్జనాల శోభాయాత్ర గురువారం ఆలస్యంగా ప్రారంభమైంది. రెండు అపశృతుల మినహా ఆద్యంతం ప్రశాంతంగా కొనసాగుతోంది. హుస్సేన్‌సాగర్‌తో పాటు నగరం నలువైపుల ఉన్న చెరువులు, ప్రత్యేకంగా ఏర్పాటు చేసిన కొలనులతో కలిసి పలు ప్రాంతాల్లో నిమజ్జనాల సందడి నెలకొంది. మొత్తమ్మీద సాయంత్రానికి వేల సంఖ్యలో విగ్రహాలు నిమజ్జనమయ్యాయి. శుక్రవారం మధ్యాహ్నం వరకు నిమజ్జనం కొనసాగవచ్చునని అధికారులు భావిస్తున్నారు. ఖైరతాబాద్‌ గణనాథుడి నిమజ్జనం గత ఏడాది కంటే దాదాపు గంట ఆలస్యంగా జరిగిది. నిమజ్జన శోభాయాత్ర మార్గం పొడవునా ఆధ్యాత్మిక సందడి నెలకొంది. అయితే వరుస నిమజ్జనాల నేపథ్యంలో గతంతో పోలిస్తే ఈ ఏడాది సామూహిక నిమజ్జనం రోజు విగ్రహాల సంఖ్య కాస్తా తగ్గింది.  హుస్సేన్‌సాగర్‌ పరిసరాల్లో గురువారం తెల్లవారుజాము నుంచే సందడి నెలకొనగా, సాయంత్రం వరకు కీలక ప్రాంతాలైన చార్మినార్, ఎంజే మార్కెట్‌ ప్రాంతాల్లో సందడి కనిపించలేదు. చార్మినార్‌ వద్ద ఉదయం నుంచి అడపాదడపా ఒక్కో విగ్రహం మినహా ప్రధాన ఊరేగింపు కనిపించలేదు. మధ్యాహ్నం తర్వాత విగ్రహాల సంఖ్య పెరగడంతో ఎనిమిదిన్నర గంటల పాటు ఏకధాటిగా కొనసాగింది. శుక్రవారం సైతం నిమజ్జనం కొనసాగే అవకాశం ఉందని చెబుతున్న అధికారులు అందుకు తగిన ఏర్పాట్లు చేస్తున్నారు. పాతబస్తీ మీదుగా సాగే శోభాయాత్రలు అత్యంత కీలకమైనవి కావడంతో నగర పోలీసులు వీటిపైనే ప్రధానంగా దృష్టి సారించారు.  ప్రతి ఏడాది ఉదయం నుంచి చార్మినార్‌ మీదుగా ఊరేగింపులు సాగుతూ ఉంటాయి. అయితే ఈసారి ఇంకా త్వరగా పూర్తి చేయించాలని పోలీసులు భావించినా అది సాధ్యం కాలేదు. మధ్యాహ్నం 3.30 గంటల వరకు విగ్రహాల ఆటోలు, ర్యాలీల మినహా సందడి కనిపించకపోవడంతో చార్మినార్‌ పరిసరాలు బోసిపోయాయి. ఏటా నిమజ్జనం రోజు మధ్యాహ్నం మక్కా మసీదులో జరిగే ప్రార్థనల ముగింపు కోసం పోలీసులు ఊరేగింపులకు ఆపేవారు. అయితే ఈసారి ఆ సమయానికి ఊరేగింపులు ఆ సమీపంలోకి కూడా చేరుకోలేదు. గణేష్‌ ఉత్సవాలకు కేంద్రమైన బాలాపూర్‌ గణేష్‌ విగ్రహం గత ఏడాది కంటే ఆలస్యంగా చార్మినార్‌ వద్దకు వచ్చింది. సాయంత్రం 4  గంటల తర్వాత చార్మినార్‌ పరిసరాలకు శాలిబండ, సర్దార్‌మహల్, లాడ్‌ బజార్‌ రోడ్ల నుంచి ఒక్కసారిగా విగ్రహాలతో కూడిన లారీలు రావడంతో సందడి నెలకొంది. గతంలో విగ్రహాలతో వచ్చిన లారీల్లో దాదాపు ప్రతి వాహనం చార్మినార్‌ చుట్టూ తిరిగి ముందుకు సాగేది. ఈసారి అనేకం చుట్టూ తిరగకుండా నేరుగా ముందుకు సాగేలా ఏర్పాటు చేశారు. పోలీసు విభాగం పాతబస్తీ నుంచి వచ్చే విగ్రహాలకు ప్రాధాన్యం ఇస్తూ రద్దీ పెరిగిన తర్వాత ఎంజే మార్కెట్‌ దగ్గర వాటికి గ్రీన్‌ఛానల్‌ ఇచ్చింది. హుస్సేన్‌సాగర్‌ వద్ద కూడా ఈ విగ్రహాలకే ప్రాధాన్యం ఇస్తూ నిమజ్జనం చేశారు. అధికారులు చేసిన మార్పు చేర్పులు, కృషి ఫలితంగా ప్రధాన ఊరేగింపు రాత్రికి పాతబస్తీ దాటింది.  మధ్యాహ్నం వరకు పలుచగా ఉన్న ఎంజే మార్కెట్‌  సాయంత్రం 4.00 గంటల తర్వాత కిక్కిరిసింది. చీకటి పడే సమయానికి ఈ ప్రాంతం నుంచి హుస్సేన్‌సాగర్‌ వరకు జనం పోటెత్తారు. ఈ ఏడాది మూడో రోజు నుంచే పెద్ద సంఖ్యలో నిమజ్జనాలు ప్రారంభమయ్యాయి. నగరంలో ఉన్న విగ్రహాల్లో దాదాపు 50 శాతానికి పైగా నిమజ్జనం చేశారు.  సాయంత్రానికి ఎంజే మార్కెట్‌ కూడలికి అన్ని వైపుల నుంచి వాహనాలు రావడంతో సందడి కనిపించింది.  అన్ని విగ్రహాలూ హుస్సేన్‌సాగర్‌లో నిమజ్జనం కావడానికి శుక్రవారం మధ్యాహ్నం వరకు పట్టవచ్చని అధికారులు భావిస్తున్నారు. దీంతో నిర్ణీత సమయం తర్వాత వచ్చే విగ్రహాల లారీలను నెక్లెస్‌రోడ్‌లోకి పంపి, సీరియల్‌ ప్రకారం నిమజ్జనానికి తీసుకురావడానికి సన్నాహాలు చేస్తున్నారు. హుస్సేన్‌సాగర్‌ వద్ద కూడా శుక్రవారం సాధారణ ట్రాఫిక్‌కు ఎలాంటి ఆటంకాలు లేకుండా ఉండేలా ప్రణాళికలు రూపొందించారు.

సాక్షి, సిటీబ్యూరో: హుస్సేన్‌సాగర్‌ తీరం భక్తజనసంద్రమైంది. భక్తుల కేరింతలతో హోరెత్తింది. ‘జైబోలో గణేశ్‌ మహరాజ్‌ కీ’ నినాదాలతో మార్మోగింది. వినాయక నిమజ్జన వేడుకలు గురువారం నగరంలో కనుల పండువగా జరిగాయి. మధ్యాహ్నం ఖైరతాబాద్‌ మహాగణపతి నిమజ్జనోత్సవం ముగిసిన తర్వాత నగరంలోని వివిధ ప్రాంతాల నుంచి వినాయక విగ్రహాలు ట్యాంక్‌బండ్‌కు తరలివచ్చాయి. వేడుకలను తిలకించేందుకు భక్తులు పెద్ద ఎత్తున ట్యాంక్‌బండ్‌కు తరలివచ్చారు. నగరంలోని అన్ని రహదారులు ట్యాంక్‌బండ్‌ వైపునకు దారితీశాయి. ట్యాంక్‌బండ్, ఎన్టీఆర్‌మార్గ్, నెక్లెస్‌రోడ్, ఖైరతాబాద్‌ జనంతో కిక్కిరిసిపోయాయి. భజనలు, కీర్తనలు, కోలాటాలతో నగరమంతా ఆధ్యాత్మిక శోభ సంతరించుకుంది. అటు ట్యాంక్‌బండ్‌ వైపు, ఇటు ఎన్టీఆర్‌ మార్గ్‌ వైపు ఏర్పాటు చేసిన 40 క్రేన్‌ల ద్వారా విగ్రహాలను నిమజ్జనం చేశారు. వైవిధ్యభరితమైన విగ్రహాలతో ట్యాంక్‌బండ్‌ శోభాయమానంగా కనిపించింది. బాలాపూర్‌ లడ్డూ వేలం ఆలస్యంగా మొదలు కావడంతో  పాతబస్తీ నుంచి వచ్చే ప్రధాన యాత్ర కూడా ఆలస్యమైంది. మొత్తంగా ఒకట్రెండు విషాద ఘటనలు మినహా నిమజ్జన వేడుకలు ప్రశాంతంగా ముగిశాయి.   వెల్లివిరిసిన సంస్కృతి   ఖైరతాబాద్‌ ద్వాదశాదిత్య గణపతి నిమజ్జన వేడుకలు ఉదయం 7:13 గంటలకు ఖైరతాబాద్‌ నుంచి మొదలై మధ్యాహ్నం 1:45 గంటలకు ఎన్టీఆర్‌ మార్గ్‌లోని 6వ నంబర్‌ వద్ద పూర్తయ్యాయి. ఖైరతాబాద్, సెన్సేషన్‌ థియేటర్, రాజ్‌దూత్‌ చౌరస్తా, తెలుగుతల్లి చౌరస్తాల మీదుగా సాగిన శోభాయాత్రను తిలకించేందుకు భక్తులు భారీ ఎత్తున తరలివచ్చారు. 61 అడుగుల మహాగణపతి విగ్రహంతో సెల్ఫీ తీసుకొనేందుకు  జనం పోటీ పడ్డారు. ప్రత్యేకంగా ఏర్పాటు చేసిన ఒగ్గుడోలు, బోనాల ప్రదర్శనలు, కళాకారుల ఆటాపాటలతో తెలంగాణ సంస్కృతి  వెల్లివిరిసింది. నిమజ్జనం సందర్భంగా భక్తులు పెద్ద ఎత్తున తరలి రావడంతో తోపులాట జరగింది. రద్దీని నియంత్రించేందుకు ఏర్పాటు చేసిన  బారికేడ్‌లు కూలిపోయాయి. బాలాపూర్‌ లడ్డూ వేలం ఈసారి రెండు గంటలు ఆలస్యం కావడంతో... ప్రతిఏటా మధ్యాహ్నం 2గంటలకే నిమజ్జనం పూర్తవుతుండగా, ఈసారి సాయంత్రం 6 తరువాత జరిగింది. దీంతో మిగతా విగ్రహాల తరలింపు కూడా ఆలస్యమైంది. అబిడ్స్, సుల్తాన్‌బజార్, కోఠి, చోటా బజార్, జియాగూడ, చెప్పల్‌బజార్, లంగర్‌హౌస్, అత్తాపూర్, సికింద్రాబాద్, రామంతాపూర్, అంబర్‌పేట్‌ తదితర ప్రాంతాల నుంచి విగ్రహాలు తరలి వచ్చాయి.  వెరైటీ గణపతులు...   వెరైటీ విగ్రహాలు శోభాయాత్రలో ప్రత్యేక ఆకర్షణగా నిలిచాయి. మూషికవాహనుడై, పద్మనాభుడై, యాదాద్రి ఆలయ ఆకృతి అలంకృతుడై, తిరుపతి వెంకటేశ్వర దేవస్థానం అలంకరణలో ఏర్పాటు చేసిన మండపాలు, విగ్రహాలు విశేషంగా ఆకట్టుకున్నాయి. మరోవైపు పలు విగ్రహాలను కాషాయ జెండాలు, త్రివర్ణ పతాకాలతో అలంకరించారు. వాట్సప్, ఫేస్‌బుక్, ట్విట్టర్, జీమెయిల్‌ వంటి సోషల్‌ మీడియాను ప్రతిబింబించే విధంగా చిన్న విగ్రహాలను ప్రత్యేకంగా అలంకరించి తీసుకొచ్చారు. ట్యాంక్‌బండ్, నెక్లెస్‌రోడ్డు ప్రాంతాల్లో యువత సందడి ఎక్కువగా కనిపించింది. మెట్రో రైళ్లు కిటకిటలాడాయి. ఖైరతాబాద్‌ మెట్రో స్టేషన్‌ ప్రయాణికుల రాకపోకలతో కిక్కిరిసిపోయింది. నిమజ్జనం సందర్భంగా ట్యాంక్‌బండ్, నెక్లెస్‌రోడ్డు, ఎన్టీఆర్‌ మార్గ్‌లో చిరువ్యాపారుల అమ్మకాలు జోరుగా సాగాయి.   ఖైరతాబాద్‌ మహాగణపతి శోభాయాత్ర...‘మహా’ శోభాయాత్ర సాగిందిలా.. ఖైరతాబాద్‌: దాదాపు 11 రోజుల పాటు ఖైరతాబాద్‌లో విశేష పూజలందుకున్నశ్రీ ద్వాదశాదిత్య మహాగణపతి నిమజ్జన ఊరేగింపు గురువారం ఉదయం 7.13 గంటలకు ప్రారంభమై మధ్యాహ్నం 1.45 గంటలకు ముగిసింది. భారీకాయుడుహుస్సేన్‌ సాగర్‌లో ప్రశాంతంగా నిమజ్జనమయ్యాడు. అశేష భక్తజనం వెంట తరలి రాగా 61 అడుగుల ఎత్తులో మహాగణపతి ఊరేగుతూ సాగర తీరానికి తరలివెళ్తున్న దృశ్యాలను భక్తులు సెల్‌ ఫోన్లలో బంధింస్తూ ఆనందం పొందారు. ♦ బుధవారం అర్ధరాత్రి 11 గంటల తర్వాత భక్తుల దర్శనాలు నిలిపివేశారు ♦ 11 గంటలకు చిన్న క్రేన్‌ మహాగణపతి ప్రాంగణానికి రాక   ♦ 12.30కు విష్ణుమూర్తి విగ్రహాన్ని నిమజ్జనానికి మరో వాహనంపై పెట్టి తరలించారు ♦ 12.30కు ఉత్సవ కమిటీ సభ్యులు సందీప్‌రాజ్, శిల్పి రాజేంద్రన్‌ కలశ పూజ ♦ గురువారం 3.30 నిమిషాలకు మహాగణపతిని పైకి తేల్చి 3.40 గంటలకు ఎస్‌టీసీ ట్రాలర్‌ వాహనంపై చేరిక   ♦ ఉదయం 7.13 గంటలకు మహాగణపతి శోభాయాత్ర ప్రారంభం   ♦ 8.30 గంటలకు సెన్షేన్‌ థియేటర్‌ ♦ 8.55కు రాజ్‌దూత్‌ చౌరస్తా ♦ 9.08కు టెలిఫోన్‌ భవన్‌ ♦ 9.30 గంక్కు ఎక్బాల్‌ మినార్‌ చౌరస్తా ♦ 10.43కు తెలుగుతల్లి చౌరస్తా ♦ మధ్యాహ్నం 12.24కు ఎన్టీఆర్‌ మార్గ్‌లోని క్రేన్‌ నెం.6 వద్దకు మహాగణపతి ♦ 12.45లకు మహాగణపతికి చివరి పూజలు.. మంత్రి తలసాని శ్రీనివాస్‌యాదవ్, మేయర్‌ బొంతు రామ్మోహన్, సీపీ అంజనీకుమార్‌ పాల్గొన్నారు.   ♦ 12.52కు వెల్డింగ్‌ తొలగింపు పనులు   ♦ 1.15కు మోడ్రన్‌ క్రేన్‌ అపరేటర్‌ దేవేందర్‌సింగ్‌ పూజలు   ♦ 1.21కి మహాగణపతి విగ్రహాన్ని పైకి లేపి నలువైపులా తిప్పి భక్తులకు కనువిందు చేశారు ♦ 1.45 గంటలకు మహాగణపతినినిమజ్జనం మహాగణపతిని సంపూర్ణ నిమజ్జనం గావిస్తామని చెప్పినా చివరి ఘట్టంలో నిర్దేశించిన ప్రాంతంలో కాకుండా కొంచెం పక్కన నిమజ్జనం చేయడంతో విగ్రహం 80 శాతం మాత్రమే నీటమునింది.

బంజారాహిల్స్‌:  గణేష్‌ నిమజ్జన శోభాయాత్ర సందర్భంగా అమీర్‌పేట్, పంజగుట్ట, రాజ్‌భవన్‌ రోడ్ల వైపు నుంచి తరలి వచ్చే వాహనాల కారణంగా ఎన్టీఆర్‌ మార్గ్, నెక్లెస్‌ రోడ్డు వైపు ట్రాఫిక్‌ జామ్‌ ఏర్పడకుండా ఖైరతాబాద్‌ ఫ్లై ఓవర్‌ను ట్రాఫిక్‌ పోలీసులు గురువారం ఉదయం నుంచి మూసివేశారు.  మొబైల్‌ బారికేడింగ్‌ సిస్టమ్‌ ఏర్పాటు చేసిన పోలీసులు భక్తుల వాహనాలను అనుమతించలేదు. కేవ లం ట్యాంక్‌బండ్‌లో నిమజ్జన దృశ్యాలు తిలకించేందుకు వెళ్ళే సందర్శకులకు మాత్రమే నడిచి వెళ్ళేందుకు అనుమతించారు. ఈ ఆంక్షలు శుక్రవారం  సాయంత్రం వరకు కొనసాగుతాయని పంజగుట్ట ట్రాఫిక్‌ పోలీసులు తెలిపారు. 

సాక్షి,సిటీబ్యూరో: గతానికి భిన్నంగా ఈసారి గ్రేటర్‌ నగరంలో పర్యావరణ హిత మట్టివిగ్రహాల ఏర్పాటుపై సిటీజనుల్లో అవగాహన పెరిగినప్పటికీ...ఈసారి సుమారు 50 వేల ప్లాస్టర్‌ఆఫ్‌ ప్యారిస్‌ విగ్రహాలను ఆయా జలాశయాల్లో నిమజ్జనం చేసేందుకు ఏర్పాట్లు పూర్తయ్యాయి. ఇళ్లలో పూజలందుకునే చిన్న పరిమాణంలో ఉన్న మట్టి ప్రతిమలను నగరవాసులు ఎక్కువగా ప్రతిష్టించినప్పటికీ..కాలనీలు, బస్తీల కూడళ్లలో ఏర్పాటుచేసిన విగ్రహాల్లో ప్లాస్టర్‌ ఆఫ్‌ ప్యారిస్‌వే అత్యధికంగా ఉన్నాయి. మహానగరం పరిధిలో సుమారు 30 జలాశయాల్లో వినాయకనిమజ్జనం జరగనున్నప్పటికీ..అత్యధిక విగ్రహాలు నిమజ్జనం జరిగే 21 చెరువుల్లో నీటి కాలుష్యంపై పీసీబీ దృష్టిసారించింది. ఇక జలమండలి అధికారులు శోభాయాత్రలో పాల్గొనే భక్తుల సౌకర్యార్థం శోభాయాత్ర జరిగే మార్గంలో 115 తాగునీటి క్యాంపులను ఏర్పాటుచేయనుంది. ఈ క్యాంపుల్లో 32 లక్షల తాగునీటి ప్యాకెట్లను పంపిణీ చేయనున్నారు. భక్తుల దాహార్తిని తీర్చేందుకు అవసరమైతే నీటి ప్యాకెట్ల సంఖ్యను పెంచుతామని ఎండీ దానకిశోర్‌ తెలిపారు.  21 చెరువుల కాలుష్యంపై పీసీబీ నజర్‌..   నవరాత్రి పూజలందుకున్న గణనాథులను నిమజ్జనం చేసే చెరువులు, కొలనుల కాలుష్యంపై పీసీబీ దృష్టిసారించింది. గ్రేటర్‌ పరిధిలో హుస్సేన్‌సాగర్‌ సహా 21 చెరువుల్లో కాలుష్య మోతాదును పీసీబీ నిపుణులు లెక్కించనున్నారు. నిమజ్జనానికి ముందు, నిమజ్జనం జరిగే రోజులు, నిమజ్జనం తరవాత ఆయా జలాశయాల్లో నీటి నమూనాలను సేకరించి వాటి నాణ్యతను పరిశీలించనున్నారు. వీటిలో మీరాలం(బహదూర్‌పురా), లంగర్‌హౌజ్‌ లేక్, సరూర్‌నగర్‌ లేక్, రంగధాముని చెర్వు, సఫిల్‌గూడా చెర్వు, హస్మత్‌పేట్‌లేక్, అంబర్‌చెర్వు(కూకట్‌పల్లి), కాప్రాచెర్వు, దుర్గంచెర్వు, పెద్దచెర్వు, లింగంచెర్వు(సూరారం), ముండ్లకుంట(మూసాపేట్‌), పత్తకుంట(రాజేంద్రనగర్‌), నాగోల్‌చెర్వు, కొత్తచెర్వు(అల్వాల్‌), నల్లచెర్వు(ఉప్పల్‌), కాయిదమ్మకుంట(హఫీజ్‌పేట్‌), గుర్నాథ్‌చెర్వు(మియాపూర్‌), సాఖిట్యాంక్‌(పటాన్‌చెర్వు), రాయసముద్రం (రామచంద్రాపురం), గోపిచెర్వు(లింగంపల్లి) చెర్వులున్నాయి. ఈ చెరువుల్లో నిమజ్జనానికి ముందు ఆగస్టు 26న, నిమజ్జనం జరిగే సెప్టెంబరు 3,5,8,11,12 తేదీలతోపాటు సెప్టెంబరు 20న (నిమజ్జనం అనంతరం)నీటి నమూనాలను సేకరించి ప్రయోగశాలల్లో పరీక్షించనున్నారు. ఈ జలాశయాల నీటిలో కెమికల్‌ ఆక్సిజన్‌ డిమాండ్, బయలాజికల్‌ ఆక్సిజన్‌ డిమాండ్, గాఢత, బ్యాక్టీరియా, ఘన వ్యర్థాలు, కాఠిన్యత, విద్యుత్‌ వాహకత, కోలిఫాం, భారలోహాలు ఇలా అన్ని రకాల కాలుష్యాలను లెక్కించనున్నారు. నిమజ్జనం సందర్భంగా ఆయా జలాశయాల్లోకి సుమారు యాభైవేల వరకు విగ్రహాల నిమజ్జనం జరగనున్నాయి. ఈ నేపథ్యంలో పెద్ద మొత్తంలో ఆయా జలాశయాలు కాలుష్యకాసారంగా మారనున్నాయి. ఈ విషయంపై స్థానికులను అప్రమత్తం చేసేందుకు ఈ చర్యలు తీసుకున్నట్లు పీసీబీ వర్గాలు ‘సాక్షి’కి తెలిపాయి.

హైదరాబాద్‌ : ఖైరతాబాద్‌ ద్వాదశ ఆదిత్య మహాగణపతి నిమజ్జనం ప్రశాంతంగా పూర్తయింది. మధ్యాహ్నం ఒంటి గంటన్నర ప్రాంతంలో ఎన్టీఆర్ మార్గ్‌లోని క్రేన్ నెంబర్ 6 వద్ద ఖైరతాబాద్‌ గణనాథుడు గంగమ్మ ఒడిలోకి చేరాడు. ఈ సారి వినాయకుడు పూర్తిగా మునగటం విశేషం. మహాగణపతిని సాగనంపటానికి పెద్ద సంఖ్యలో భక్తులు ట్యాంక్‌ బండ్‌ వద్దకు చేరుకున్నారు. దీంతో ఆ ప్రాంతం మొత్తం కోలాహలంగా మారింది. ఎటువంటి ఆటంకం లేకుండా మహాగణపతి నిమజ్జనం పూర్తవడంతో భక్తులు ఆనందోత్సాహాలు వ్యక్తం చేశారు. దేశంలో ఎక్కడా లేని విధంగా హైదరాబాద్ ఘనంగా నిమజ్జనం జరిగిందని మంత్రి తలసాని శ్రీనివాస్‌ యాదవ్‌ అన్నారు. ఆయన గురువారం సాయంత్రం మీడియాతో మాట్లాడుతూ....గణేష్‌ నిమజ‍్జనంలో పోలీసులు ప్రధాన పాత్ర పోషించారని ప్రశంసించారు. శాంతి భద్రతలను పోలీసులు సవాల్‌గా తీసుకున్నారన్నారు. అన్ని శాఖల అధికారులు సమన్వయంతో పనిచేశారు. ఖైరతాబాద్ వినాయకుడిని దేశం మొత్తం చూస్తుందని,  లక్షల మంది భక్తులు ఆయనను దర్శించుకున్నారన్నారు. తెలంగాణ డీజీపీ మహేందర్‌ రెడ్డి, హోంమంత్రి మహమూద్‌ అలీ గురువారం సాయంత్రం వినాయక నిమజ్జనం, శోభాయాత్రను హెలికాప్టర్‌లో ఏరియల్‌ వ్యూ ద్వారా పరిశీలించారు. చార్మినార్ చేరుకున్న బాలాపూర్ గణనాధుడు ఎంజే మార్కెట్‌ వద్ద శోభాయాత్రలో పాల్గొన్న ఆర్‌ఎస్‌ఎస్‌ చీఫ్‌ మోహన్‌ భగత్‌ పాతబస్తీలో అపశ్రుతి పాతబస్తీ బహుదూర్‌పురా పోలీస్‌ స్టేషన్‌ పరిధిలో అపశ్రుతి చోటుచేసుకుంది. వినాయక విగ్రహాన్ని క్రేన్‌తో లారీలో పెట్టె సమయంలో రవీందర్‌ అనే పోలీస్‌ కానిస్టేబుల్‌ క్రేన్‌ మీద నుంచి కిందపడ్డాడు. దీంతో తీవ్రగాయాలపాలైన అతడి పరిస్థితి విషమంగా మారింది. అత్యవసర చికిత్స కోసం వెంటనే అతడిని నాంపల్లి కేర్‌ ఆసుపత్రికి తరలించారు. నిమజ్జన కార్యక్రమాల్లో పాల్గొనేవారు అప్రమత్తంగా ఉండాలని పోలీసులు విజ్ఞప్తి చేస్తున్నారు. ఎన్టీఆర్‌ మార్గ్‌ చేరుకున్న ఖైరతాబాద్‌ గణేశ్‌ ఖైరతాబాద్‌ గణేశుని శోభాయాత్ర కొనసాగుతోంది. మరి కొద్దిసేపట్లో ఎన్టీఆర్‌ మార్గ్‌లో గణేశుని నిమజ్జనం జరగనుంది. ఇప్పటికే ఖైరతాబాద్‌ గణేశుడు ఎన్టీఆర్‌ మార్గ్‌ చేరుకున్నాడు. ఖైరతాబాద్‌ గణేశుని మహా నిమజ్జనానికి రెడీగా ప్రత్యేక క్రేన్‌ను ఏర్పాటు చేశారు అధికారులు. ఎన్టీఆర్‌ మార్గ్‌లోని వినాయక విగ్రహాలను ట్యాంక్‌ బండ్‌వైపు మళ్లిస్తున్నారు. ఎన్టీఆర్‌ మార్గ్‌ వద్ద ఖైరతాబాద్‌ గణేశుడు బాలాపూర్ లడ్డు @ రూ. 17.60 లక్షలు బాలాపూర్‌ వినాయకుడి లడ్డు వేలం ముగిసింది. ఈ సారి లడ్డు వేలంలో 28 మంది పాల్గొన్నారు. రూ. 17.60 లక్షలకు కొలను రాంరెడ్డి అనే భక్తుడు లడ్డును సొంతం చేసుకున్నాడు. బాలాపూర్‌ లడ్డు వర్షంలోనే గణనాథుల నిమజ్జనోత్సవం గణనాథుల శోభాయాత్ర కొనసాగుతోంది. ఈ ఉదయం నుంచి నగరంలో పలు చోట్ల చిరుజల్లులు పడుతున్నాయి. వర్షంలోనే గణనాథుల నిమజ్జనోత్సవం కొనసాగుతోంది. భక్తుల కోలాటాలు, నృత్యాల మధ్య వినాయకుల శోభాయాత్ర వైభవోపేతంగా జరుగుతోంది. శోభాయాత్ర సందడితో రహదారులన్ని కొత్త రూపు సంతరించుకున్నాయి. వర్షంలోనే గణనాథుల నిమజ్జనోత్సవం కదిలిన బాలాపూర్‌ గణేశుడు బాలాపూర్‌ గణేశుని శోభాయాత్ర ప్రారంభమైంది. శోభాయాత్ర అనంతరం లడ్డు వేలం పాట జరగనుంది. గతేడాది లడ్డు రూ. 16.60 లక్షలు పలికింది. దీంతో ఈ సంవత్సరం లడ్డు వేలం పాటపై సర్వత్రా ఆసక్తి  నెలకొంది. బాలాపూర్ గణేశుడు ప్రారంభమైన ఖైరతాబాద్‌ గణేశ్‌ శోభాయాత్ర ఖైరతాబాద్‌ ద్వాదశ ఆదిత్య మహాగణపతి శోభాయాత్ర ప్రారంభమైంది. ఖైరతాబాద్‌ గణేశ్‌ నిమజ్జనం కోసం అధికారులు కట్టుదిట్టమైన ఏర్పాట్లు చేస్తున్నారు. ఎన్టీఆర్ మార్గ్‌లో నిమజ్జన ఏర్పాట్లను పర్యవేక్షిస్తున్నారు. క్రేన్ నెంబర్ 6 వద్ద జీహెచ్ఎంసీ అధికారులు భారీ క్రేన్లను ఏర్పాటు చేస్తున్నారు. ఖైరతాబాద్‌ మహాగణపతి సాక్షి, హైదరాబాద్‌ : జంట నగరాల్లో బొజ్జగణపయ్యల నిమజ్జన శోభాయాత్ర ప్రారంభమైంది. గురువారం ఉదయం 6 గంటల నుంచే వినాయక విగ్రహాలు నిమజ్జనానికి ఊరేగింపుగా బయలుదేరాయి. నగరంలోని వీధులన్నీ శోభయాత్ర వెలుగులను సంతరించుకున్నాయి. శుక్రవారం మధ్యాహ్నం వరకు గణేశ్‌ నిమజ్జన కార్యక్రమం జరగనుంది. కాగా, నగరవ్యాప్తంగా దాదాపు 391 కిలోమీటర్ల మేర నిమజ్జనోత్సవం జరగనున్న నేపథ్యంలో ఎలాంటి అవాంఛనీయ సంఘటనలు జరగకుండా  ఉండేందుకు అన్ని శాఖలు అప్రమత్తమయ్యాయి. (ఫొటో గ్యాలరీ కోసం ఇక్కడ క్లిక్ చేయండి)

సిటీలో గణేశ్‌ నిమజ్జన శోభాయాత్రకు సర్వం సిద్ధమైంది. గురువారం ఉదయం నగరవ్యాప్తంగా దాదాపు 391 కిలోమీటర్ల మేర జరగనున్న నిమజ్జనోత్సవం కోసం అన్ని శాఖలు అప్రమత్తమయ్యాయి. జీహెచ్‌ఎంసీ, పోలీస్, జలమండలి, శానిటేషన్, ఫైర్, వైద్యారోగ్య, విపత్తుల నివారణ, విద్యుత్‌ తదితర శాఖల అధికారులు, సిబ్బంది సమన్వయంతో ప్రతి 3 కిలోమీటర్లకు ఒక గణేశ్‌ యాక్షన్‌ టీంను నియమిస్తున్నారు. ఈ టీంలో అన్ని శాఖల సిబ్బంది ఉంటారు. అవసరాన్ని బట్టి వీరు వెంటనే రంగంలోకి దిగి అవసరమైన చర్యలు చేపడతారు. ఆయా చెరువులు, కొలనులు, హుస్సేన్‌సాగర్‌ వద్ద భారీ క్రేన్లు సిద్ధం చేశారు. అటు బందోబస్తు కోసం పోలీసులు..ఇటు ట్రాఫిక్‌ నియంత్రణకు ట్రాఫిక్‌ పోలీసులు రంగంలోకి దిగారు.గూగుల్‌మ్యాప్స్‌లో శోభాయాత్రను అప్‌డేట్‌ చేస్తారు. తద్వారా ఎప్పటికప్పుడు ఆన్‌లైన్‌లో పరిస్థితిని పర్యవేక్షిస్తారు. ♦ శోభాయాత్ర 391 కి.మీ. ♦ వైద్యశిబిరాలు 27 ♦ నిమజ్జనం కోసం వసతులు 32 ప్రాంతాల్లో ♦ స్టాటిక్‌ క్రేన్‌లు 93 ♦ మొబైల్‌ క్రేన్‌లు 134 ♦ ట్రాఫిక్‌ సిబ్బంది 2100 ♦ ప్రత్యేక బస్సులు 550 ♦ ఆంక్షలు 66 ప్రాంతాల్లో ♦ హెల్ప్‌లైన్‌ నంబర్లు: 04027852482 , 9490598985 ,9010203626 సాక్షి, సిటీబ్యూరో: గ్రేటర్‌లో మహా ఘట్టానికి రంగం సిద్ధమైంది. గురువారం జరగనున్న గణేశ్‌ నిమజ్జనానికి జీహెచ్‌ఎంసీ విస్తృత ఏర్పాట్లు చేపట్టింది. నిమజ్జనం సందర్భంగా శోభాయాత్ర మార్గం పొడవునా రహదారులకు మరమ్మతులతోపాటు అవసరమైనంత పారిశుధ్య సిబ్బంది, తాత్కాలిక లైటింగ్‌ ఏర్పాట్లతోపాటు టాయ్‌లెట్లు తదితర సదుపాయాలు కల్పిస్తారు. నిమజ్జనం జరిగే ప్రాంతాల్లో ముఖ్యమైన 32 ప్రదేశాల్లో అవసరమైన అన్ని ఏర్పాట్లు చేశారు. నిమజ్జన ఏర్పాట్లపై మేయర్‌ బొంతు రామ్మోహన అధికారులతో సమీక్ష సమావేశం నిర్వహించారు. దాదాపు రూ.20 కోట్లతో అవసరమైన ఏర్పాట్లు చేసినట్లు  ఆయన పేర్కొన్నారు.   ♦ గణేష్‌ నిమజ్జన శోభాయాత్ర జరిగే 391 కిలోమీటర్ల మార్గంలో ప్రతి మూడు కిలోమీటర్లకు ఒక గణేష్‌ యాక్షన్‌ టీమ్‌ ఏర్పాటు. ఒక్కో టీమ్‌లో ఒక శానిటరీ సూపర్‌వైజర్‌ లేదా శానిటరీ జవాన్, ముగ్గురు ఎస్‌.ఎఫ్‌.ఏలు, 21 మంది పారిశుధ్య కార్మికులు మూడు షిఫ్ట్‌లుగా పనిచేస్తారు. మొత్తం 194 గణేష్‌ యాక్షన్‌టీమ్‌ల ఏర్పాటు . ♦ నిమజ్జన ప్రాంతాల్లో 27 ప్రత్యేక వైద్య శిబిరాలు..92 మొబైల్‌ టాయిలెట్ల ఏర్పాటు. ♦ 32 ప్రాంతాల్లో 93 స్టాటిక్‌ క్రేన్‌లు, 134 మొబైల్‌ క్రేన్‌ల ఏర్పాటు. ఈసారి నీటిపారుదల శాఖ ద్వారా కాకుండా జీహెచ్‌ఎంసీ ద్వారా ఏర్పాటు చేస్తున్నారు.   ♦ 23 గణేశ్‌ నిమజ్జన కొలనుల్లో శుభ్రమైన నీరు నింపి నిమజ్జనానికి ఏర్పాట్లు. ♦ శోభాయాత్ర మార్గంలో రోడ్ల  రీకార్పెటింగ్, మరమ్మత్తులు, పూడ్చివేత తదితరమైన వాటికి సంబంధించి 176 పనులకు రూ. 9.29 కోట్ల ఖర్చు.   ♦ ఎస్సార్‌డీపీ పనులు జరుగుతున్న ప్రాంతాల్లో ఆటంకాలు లేకుండా ప్రయాణం సాపీగా సాగేలా మరమ్మతులు. ♦ నిమజ్జనం జరిగే  చెరువుల వద్ద భద్రత నిమిత్తం గజ ఈతగాళ్లను నియమిస్తారు. ♦ సరూర్‌నగర్, కాప్రా, ప్రగతినగర్‌ చెరువుల వద్ద ప్రత్యేకంగా 3 బోట్ల ఏర్పాటు . ట్యాంక్‌ బండ్, సరూర్‌నగర్‌ వద్ద కేంద్ర విపత్తు నివారణ దళాల సేవలు. పర్యాటక శాఖ ద్వారా హుసేన్‌ సాగర్‌లో 7 బోట్లు, 44 స్పీడ్‌ బోట్లు. హుస్సేన్‌ సాగర్‌లో పదిమంది గజ ఈత గాళ్లు.   ♦ జీహెచ్‌ఎంసీ విద్యుత్‌ విభాగం ద్వారా 36,674 తాత్కాలిక లైట్ల ఏర్పాటు. ఇందుకు రూ.99.41 లక్షల ఖర్చు. ♦ నిమజ్జన శోభాయాత్ర జరిగే మార్గం మొత్తం బ్లీచింగ్‌ పౌడర్‌ చల్లడం, నిమజ్జనం జరిగిన వెంటనే చెరువుల నుండి విగ్రహాలను తొలగించడం చేస్తారు. ♦ రోడ్లు భవనాల శాఖ ద్వారా 12 కిలోమీటర్ల మేర బారికేడింగ్‌ ఏర్పాట్లు. ♦ శోభాయాత్ర మార్గంలో 15 కేంద్రాల్లో వాటర్‌ ప్రూఫ్‌ టెంట్ల ఏర్పాటు. ♦ రోడ్లు, భవనాల శాఖ ఎలక్ట్రిక్‌ విభాగం ఆధ్వర్యంలో 75 జనరేటర్లు ఏర్పాటు. ♦ హెచ్‌ఎండీఏ ఆధ్వర్యంలో హుసేన్‌ సాగర్‌ చెరువులో నిమజ్జనం ద్వారా వెలువడే   వ్యర్ధాలను తొలగించడానికి ప్రత్యేకంగా వెయ్యి మంది నియామకం. ♦ జలమండలి ఆధ్వర్యంలో ప్రత్యేకంగా 115 వాటర్‌ క్యాంప్‌ల ద్వారా 30,52,000 వాటర్‌ ప్యాకెట్‌ల పంపిణీ. ♦ శోభాయాత్ర మార్గంలో 36 ఫైర్‌ ఇంజన్ల ఏర్పాటు. ♦ విద్యుత్‌ శాఖ ద్వారా హుస్సేన్‌ సాగర్‌ చుట్టూ 48 విద్యుత్‌ ట్రాన్స్‌ఫార్మర్‌ల ఏర్పాటు. సరూర్‌నగర్‌ చెరువు వద్ద 5 ట్రాన్స్‌ఫార్మర్‌ల ఏర్పాటు. నగరవ్యాప్తంగా వివిధ ప్రాంతాల్లో నిరంతర విద్యుత్‌ సరఫరాకు మొత్తం 101 అదనపు ట్రాన్స్‌ఫార్మర్‌ల ఏర్పాటు. ♦ శోభాయాత్ర మార్గంలో చెట్ల కొమ్మల నరికివేత.  ప్రతి సర్కిల్‌లో ఒక ఎమర్జెన్సీ హార్టికల్చర్‌ టీమ్‌ నియామకం.   నిమజ్జనోత్సవానికి 550 ప్రత్యేక బస్సులు సాక్షి, సిటీబ్యూరో: ఈ నెల 12వ తేదీన గణేశ్‌ నిమజ్జనం సందర్భంగా తరలి వచ్చే భక్తుల కోసం ఆర్టీసీ గ్రేటర్‌ హైదరాబాద్‌ జోన్‌  ప్రత్యేక ఏర్పాట్లు చేపట్టింది. నగరంలోని వివిధ ప్రాంతాల మధ్య 550  ప్రత్యేక బస్సులు నడుపనున్నట్లు  ఎగ్జిక్యూటివ్‌ డైరెక్టర్‌  వెంకటేశ్వర్లు ఒక ప్రకటనలో తెలిపారు. బషీర్‌బాగ్‌ నుంచి కాచిగూడ, రాంనగర్, ఓల్డ్‌ ఎమ్మెల్యే క్వార్టర్స్‌ నుంచి కొత్తపేట్, ఎల్‌బీనగర్, వనస్థలిపురం, మిధానీ, లిబర్టీనుంచి  ఉప్పల్, ఇందిరాపార్కు నుంచి ఉప్పల్, సికింద్రాబాద్, ఈసీఐఎల్‌ క్రాస్‌రోడ్స్, మల్కాజిగిరి, లకిడికాఫూల్‌ నుంచి బీహెచ్‌ఈఎల్, కొండాపూర్, రాజేంద్రనగర్, ఆల్‌ఇండియారేడియో నుంచి కోఠీ. ఖైరతాబాద్‌ నుంచి జీడిమెట్ల, జగద్గిరిగుట్ట, సనత్‌నగర్, గాజుల రామారం, కూకట్‌పల్లి, పటాన్‌చెరు, బోరబండ, తదితర ప్రాంతాలకు  ప్రత్యేక బస్సులు నడువన్నాయి.  ప్రయాణికుల రద్దీకి అనుగుణంగా  వివిధ రూట్లలో బస్సుల సంఖ్యను పెంచారు. మరోవైపు బస్సుల నిర్వహణ కోసం ఆర్టీసీ  ప్రత్యేక ఏర్పాట్లు చేపట్టింది. బ్రేక్‌డౌన్స్‌కు అవకాశం లేకుండా తగిన జాగ్రత్తలు తీసుకోనున్నట్లు ఈడీ  తెలిపారు. ఒకవేళ ఆకస్మాత్తుగా చెడిపోయినా వెంటనే వాటికి మరమ్మతులు చేసేందుకు, ట్రాఫిక్‌కు అంతరాయం లేకుండా  రోడ్డు పై నుంచి పక్కకు తప్పించేందుకు సిబ్బందిని అదనంగా ఏర్పాటు చేయనున్నారు.  ఖైరతాబాద్‌ గణపతి నిమజ్జనానికి ప్రత్యేక ఏర్పాట్లు ఖైరతాబాద్‌: నగరంలో వినాయక నిమజ్జన మహోత్సవానికి ప్రభుత్వం అన్ని ఏర్పాట్లు  పూర్తిచేసిందని, సాగర తీరంలో క్రేన్‌ నెం.6 వద్ద ప్రత్యేకంగా ఖైరతాబాద్‌ మహాగణపతిని సంపూర్ణ నిమజ్జనం గావించేందుకు 20 ఫీట్లకు పైగా లోతు పెంచామని మంత్రి తలసాని శ్రీనివాస్‌యాదవ్‌ తెలిపారు. మంగళవారం వివిధ శాఖల అధికారులతో కలిసి ఎన్‌టీఆర్‌ మార్గ్‌లోని క్రేన్‌ నెం.6 వద్ద ఏర్పాట్లను పరిశీలించారు. అనంతరం మాట్లాడుతూ సీఎం ఆదేశాల మేరకు అన్ని పండుగల్ని ఘనంగా జరుపుకోవాలని ప్రభుత్వం ఆధ్వర్యంలో ఏర్పాట్లు చేస్తున్నామన్నారు. ఖైరతాబాద్‌ మహాగణపతి నిమజ్జనానికి లక్షలాదిగా భక్తులు తరలివచ్చే అవకాశం ఉండటంతో అన్ని శాఖల అధికారులతో సమన్వయంతో ఏర్పాట్లు పూర్తిచేశామన్నారు. మహాగణపతి నిమజ్జన ఊరేగింపు 12వ తేదీ ఉదయం 7 గంటలకు ప్రారంభమై ఎన్టీఆర్‌ మార్గ్‌లోని క్రేన్‌ నెం.6 వద్దకు 12గంటలకు చేరుకుంటుందని, అన్ని పనులు పూర్తిచేసి ఒంటి గంటలోపు నిమజ్జన కార్యక్రమాన్ని పూర్తిచేస్తామని తెలిపారు.  ఇంటిగ్రేటెడ్‌ కంట్రోల్‌ రూం ఏర్పాటు ఎన్టీఆర్‌ మార్గ్‌లో నిమజ్జనాల సందర్భంగా ఇంటిగ్రేటెడ్‌ కంట్రోల్‌ రూం ఏర్పాటు చేశామని, దీని ద్వారా అధికారులు సమన్వయంతో పనిచేస్తారని మంత్రి తలసాని చెప్పారు. గ్రేటర్‌ పరిధిలో 55 వేలకు పైగా వినాయక విగ్రహాలు ఏర్పాటుచేశారని, ఇప్పటికే చాలా విగ్రహాలు నిమజ్జనం అయ్యాయయని, 12వ తేదీ చివరి రోజు 36 వేల విగ్రహాలు నిమజ్జనానికి తరలివస్తాయని భావిస్తున్నామన్నారు. కార్యక్రమంలో ట్రాఫిక్‌ ఏసీపీ విద్యాసాగర్, హెచ్‌ఎండీఏ ఎస్‌ఈ వరీందర్, ఎలక్ట్రికల్‌ డీఈ వేణుగోపాల్, ఐ అండ్‌ పిఆర్‌ రవికుమార్, మెడికల్‌ అండ్‌ హెల్త్‌ నాగేందర్‌ తదితరులు ఉన్నారు. కాగా ఖైరతాబాద్‌ మహాగణపతి మండపం వద్ద కూడా ఏర్పాట్లను మంత్రి తలసాని పరిశీలించారు. 

సాక్షి, హైదరాబాద్‌: తెలంగాణ ప్రభుత్వం, ముఖ్యమంత్రి కేసీఆర్‌ అన్ని పండుగలకు ప్రాధాన్యమిస్తూ ముందుకు వెళుతున్నారని పశుసంవర్ధక శాఖ మంత్రి తలసాని శ్రీనివాస్‌యాదవ్‌ అన్నారు. మంగళవారం మంత్రి మీడియాతో మాట్లాడుతూ.. ఖైరతాబాద్ వినాయకుడి విగ్రహం బుధవారం ఉదయం 12 గంటల వరకు ఎన్టీఆర్‌ మార్గ్‌ను చేరుతుందన్నారు. మధ్యాహ్నం ఒంటిగంట వరకు ఖైరతాబాద్ వినాయకుడి నిమజ్జనం పూర్తి అవుతుందని తెలిపారు. కాగా మహాగణపతి పూర్తిగా నిమజ్జనం అయ్యేలా హెచ్ఎండీఏ అధికారులు హుస్సేన్‌ సాగర్‌లో పూడిక తీశారని పేర్కొన్నారు. హుస్సేన్ సాగర్ పరిసరాలతో పాటు వివిధ ప్రాంతాల్లో అధికారులు ఏర్పాట్లను పూర్తి చేస్తున్నారన్నారు.  మొదటి రోజు నుంచి కూడా అధికారులు భక్తులకు, సందర్శకులకు అన్ని ఏర్పాట్లను చేస్తున్నారని తెలిపారు. ఇప్పటికే ఖైరతాబాద్‌ వినాయకుడి నిమజ్జనం కోసం నిర్వాహకులు అన్ని ఏర్పాట్లు పూర్తి చేశారని, మేము బలవంతంగా ఈ కార్యక్రమాన్ని చేయడం లేదు స్పష్టం చేశారు. ఒకవైపు ముస్లింల పండుగ మొహర్రం జరుగుతోంది.. మరోవైపు వినాయకచవితి కార్యక్రమాలు జరుగుతున్నాయని తెలిపారు. పోలీసులు అన్ని ఏర్పాట్లుచేసి.. ఎలాంటి ఇబ్బందులు తలెత్తకుండా చర్యలు తీసుకోవాలని మంత్రి ఆదేశించారు. నిమజ్జన ఏర్పాట్లలో జీహెచ్ఎంసీ ప్రధాన భూమిక పోషిస్తోందని చెప్పారు. క్రేన్‌ నెంబర్ 6 వద్ద ఖైరతాబాద్ వినాయకుడి విగ్రహం సాగర్‌లో నిమజ్జనం అవుతుందని తెలిపారు. 

సాక్షి, హైదరాబాద్‌: నవరాత్రులు ఘనంగా పూజలందుకున్న బొజ్జ గణపయ్యను గంగ వద్దకు చేర్చేందుకు చకచకా ఏర్పాట్లు జరగుతున్నాయి. గణనాథుల నిమజ్జనానికి అన్ని ఏర్పాట్లు పూర్తి చేశామని ట్రాఫిక్‌ అడిషనల్‌ కమిషనర్‌ అనిల్‌ కుమార్‌ తెలిపారు. నగరం మొత్తంలో ఇప్పటివరకు 20 వేల విగ్రహాలు నిమజ్జనం అయ్యాయని వెల్లడించారు. మంగళవారం ఆయన మీడియాతో మాట్లాడుతూ.. ‘తొమ్మిదో రోజు 7 నుంచి 8 వేల వరకు గణనాథులు నిమజ్జనమయ్యే అవకాశముంది. 11వ రోజు బాలాపూర్‌ నుంచి ట్యాంక్‌బండ్‌ వరకు 18 కిలోమీటర్ల మేర శోభాయాత్ర కొనసాగుతుంది. ఈ శోభాయాత్ర 17 ప్రధాన రహదారుల్లో కొనసాగగా 10 వేల లారీలు ఈ యాత్రలో పాల్గొనే అవకాశం ఉంది. అలియాబాద్‌, నాగుల్‌చింత, చార్మినార్‌, మదీన, అఫ్జల్‌గంజ్‌, ఎంజే మార్కెట్‌, అబిడ్స్‌, బషీర్‌ బాగ్‌, ఎన్టీఆర్‌ మార్గ్‌ మీదుగా శోభాయాత్ర సాగుతుంది. నిమజ్జనాన్ని వీక్షించేందుకు విదేశాల నుంచి కూడా ప్రజలు తరలి వస్తున్నారు. ఇక నిమజ్జనం సందర్భంగా గురువారం ఉదయం 9 గంటల నుంచి ట్రాఫిక్‌ ఆంక్షలు అమల్లోకి వస్తాయి. ప్రైవేటు వాహనాలకు శోభాయత్రలో అనుమతి ఉండదు. ప్రతి ఒక్కరు పబ్లిక్‌ ట్రాన్స్‌పోర్ట్‌ను ఉపయోగించాలి’ అని సూచించారు. ‘వినాయక నిమజ్జన వేడుకల్లో ప్రజలకు ఇబ్బందులు కలగకుండా 10 పార్కింగ్‌ స్థలాల్ని ఏర్పాటు చేశాం. ఖైరతాబాద్‌, ఆనంద్‌నగర్‌ కాలనీ, గోసేవ సదన్‌, కట్టమైసమ్మ టెంపుల్‌, నిజాం కాలేజ్‌, ఎంఎంటీఎస్‌ ఖైరతాబాద్‌ స్టేషన్‌, బుద్ధభవన్‌ వెనుక, లోయర్‌ ట్యాంక్‌బండ్‌, ఎన్టీఆర్‌ స్టేడియం, పబ్లిక్‌ గార్డెన్‌లో పార్కింగ్‌ సదుపాయాలు కల్పించాం. ఇక నిర్దేశించిన మార్గాల్లో ఉదయం 6 గంటల నుంచి ప్రైవేటు వాహనాలకు అనుమతి ఉండదు. మొత్తం 13 గంటలపాటు ట్రాఫిక్‌ ఆంక్షలు అమలులో ఉంటాయి. శంషాబాద్‌ ఎయిర్‌పోర్టుకు వెళ్లేవారు ప్రత్యామ్నాయ మార్గాల్లో వెళ్లాలి. ఎమర్జెన్సీ వాహనాలు, 108లకు ఎలాంటి ఇబ్బంది కలగకుండా చూసుకుంటాం. చిన్న విగ్రహాలు ట్యాంక్‌బండ్‌ వైపు వెళ్లకుండా చూస్తాం. శుక్రవారం ఉదయానికల్లా ట్రాఫిక్‌ సమస్యలను పరిష్కరిస్తాం. ట్యాంక్‌బండ్‌ పరిసరాల్లో తెలుగు తల్లి ఫ్లైఓవర్‌పై  రాకపోకలకు ఎలాంటి ఇబ్బందులు ఉండవు. ట్యాంక్‌బండ్‌పై వన్‌వేకు అనుమతి ఇస్తాం. ప్రజలు సహకరించాలి’ అని అనిల్‌ కుమార్‌ అన్నారు.

సాక్షి, సిటీబ్యూరో: వినాయక చవితి నేపథ్యంలో రాష్ట్రంలో ఏర్పాటు చేస్తున్న గణేష్‌ మండపాల సంఖ్య ఏటా పెరుగుతోంది. ఈ విగ్రహాలను నిర్ణీత సమయంలో నిమజ్జనం చేయాలనే ఉద్దేశంతో కొంత వరకు క్రేన్ల సంఖ్య పెంచుకుంటూ పోయారు. అయితే వీటి సంఖ్యను పెంచడం కంటే ఉన్న క్రేన్లతోనే వీలైనన్ని ఎక్కువ విగ్రహాలు నిమజ్జనం చేయించాలని ఉన్నతాధికారులు నిర్ణయించారు. ఈ నేపథ్యంలో గతేడాది  ట్యాంక్‌బండ్‌ వద్ద ఏర్పాటు చేసిన వాటిలో కొన్ని క్రేన్లకు ప్రత్యేక డిజైన్‌తో కూడిన కొండీలను (హుక్స్‌) ఏర్పాటు చేశారు. ఈ ప్రయోగం విజయవంతం కావడంతో ఈసారి మరింత అడ్వాన్స్‌డ్‌ హుక్స్‌ అందుబాటులోకి తీసుకురానున్నారు. వీటిని రాష్ట్రంలోని తొమ్మిది ప్రాంతాల్లోని 138 క్రేన్లకు ఏర్పాటు చేస్తున్నారు. ఇప్పటికే పలుమార్లు వీటి పనితీరును పరీక్షించిన పోలీసు ఉన్నతాధికారులు సంతృప్తి వ్యక్తం చేశారు. శ్రీచక్ర ఇంజినీరింగ్‌ సంస్థ నిర్వాహకుడు టి.మురళీధర్‌ రూపొందించిన ఈ క్విక్‌ రిలీజ్‌ డివైజ్‌ (క్యూఆర్డీ) హుక్స్‌ ఈసారి ట్యాంక్‌బండ్, ఎన్టీఆర్‌ మార్గ్‌లో ఉండే 40 క్రేన్లకు వాడుతున్నారు. వీటి వినియోగంపై మురళీధర్‌ గురు–శుక్రవారాల్లో క్రేన్‌ ఆపరేట్లకు శిక్షణ ఇచ్చారు. తొలిసారిగా ఈ క్యూఆర్డీ హుక్స్‌ను గతేడాది వినియోగించారు. హుస్సేన్‌సాగర్‌ చుట్టూ ఉన్న 36 క్రేన్లలో 20 క్రేన్లను వీటిని వాడారు. క్రేన్‌ కొండీ ఉండే ప్రాంతంలో ఈ హుక్స్‌ నాలుగింటిని ఏర్పాటు చేశారు. విగ్రహానికి కింది భాగంలో నలుమూలలా వీటిని ఫిక్స్‌ చేశారు. పైకి ఎత్తినప్పుడు విగ్రహం బరువుకు గట్టిగా పట్టి ఉండే ఈ హుక్స్‌... అది నీటిని తాకిన వెంటనే బరువు తగ్గడంతో వాటంతట అవే రిలీజ్‌ అవుతాయి. గరిష్టంగా 25 సెకన్లలో నిమజ్జనం పూర్తయింది. గతంలో విగ్రహాన్ని నీటిలోకి తీసుకువెళ్ళిన తర్వాత క్రేన్‌పై ఉండే వ్యక్తులు కొండీలను డీలింక్‌ చేయాల్సి ఉండేది. దీనివల్ల కాలయాపనతో పాటు ప్రమాదాలకు ఆస్కారం ఉండేది. పాత కొండీలతో గంటకు ఒక క్రేన్‌ గరిష్టంగా 12 విగ్రహాలను నిమజ్జనం చేస్తే... క్యూఆర్డీ హుక్స్‌ వినియోగించిన క్రేన్‌ ఇదే సమయంలో 25 నుంచి 30 విగ్రహాలను నిమజ్జనం చేసింది. ఈసారి వీటిపై మరింత రీసెర్చ్‌ చేసిన మురళీధర్‌ అడ్వాన్డ్స్‌ వెర్షన్‌ అందుబాటులోకి తీసుకువచ్చారు. పాత హుక్‌ 15 కేజీల వరకు బరువు ఉండి, నిర్వహణ కష్టంగా ఉండేది. దీంతో దీన్ని గరిష్టంగా 5.6 కేజీలకు తగ్గించారు. ఇవి ఉన్న క్రేన్‌ ఓ విగ్రహాన్ని గరిష్టంగా 15 సెకన్లతో నిమజ్జనం చేస్తుంది. నాలుగు హుక్స్‌ పెట్టాల్సిన అవసరం లేదు. రెండింటితోనూ నిమజ్జనం పూర్తి చేయవచ్చు. ఇలాంటివి హుస్సేన్‌సాగర్‌ చుట్టూ 40 క్రేన్లకు ఏర్పాటు చేశారు.   ఆటోమేటిక్‌ రిలీజ్‌ హుక్స్‌ ఈ హుక్స్‌ వినియోగించిన విగ్రహాన్ని నిమజ్జనం చేస్తున్నప్పుడు అవి ఆటోమేటిక్‌గా రిలీవ్‌ అవుతాయి. రాష్ట్ర వ్యాప్తంగా 138 క్రేన్లకు వీటిని వినియోగిస్తున్నాం. ఇప్పటికే ట్రయల్‌ రన్‌ నిర్వహించడంతో పాటు అవసరమైన అన్ని పరీక్షలు పూర్తి చేశాం. క్రేన్‌ ఆపరేటర్లకు శిక్షణ ఇస్తున్నాం. ఒక్కో విగ్రహం నిమజ్జనంలో 4 నుంచి 6 నిమిషాల సమయం ఆదా అవుతుంది. ఫలితంగా గంటకు 10 విగ్రహాలకు బదులుగా 25 నిమజ్జనం చేయవచ్చు. ఈ హుక్స్‌ పనితీరు పట్ల క్రేన్‌ ఆపరేటర్లు సైతం సంతోషం, సంతృప్తి వ్యక్తం చేస్తున్నారు. మూడు కమిషనరేట్లలోని అన్ని క్రేన్లకు వీటిని వాడటంతో పాటు కొన్నింటిని రిజర్వ్‌లో ఉంచుతున్నాం. – టి.మురళీధర్, శ్రీచక్ర ఇంజినీరింగ్‌

ఖైరతాబాద్‌: ఈ ఏడాది వినాయక ఉత్సవాల ఏర్పాట్లు ఘనంగా చేసినట్టు మంత్రి తలసాని శ్రీనివాస్‌యాదవ్‌ తెలిపారు. గత 15 ఏళ్లుగా ఈ వేడుకలు వైభవంగా జరుగుతున్నాయని, ఈసారి అంతకంటే ఘనంగా గ్రేటర్‌ పరిధిలో 55 వేల గణనాథుల విగ్రహాలు వెలిశాయన్నారు. ఈనెల 12న జరిగే వినాయక ప్రతిమల నిమజ్జన వేడుకలను పురస్కరించుకుని వివిధ ప్రభుత్వ శాఖలను సమన్వయం చేస్తూ ఎన్టీఆర్‌ మార్గ్‌లో ఏర్పాటు చేసిన కమాండ్‌ కంట్రోల్‌ సెంటర్‌ను శుక్రవారం మంత్రి తలసాని శ్రీనివాస్‌యాదవ్‌ మేయర్‌ రామ్మోహన్, గ్రేటర్‌ కమిషనర్‌ లోకేష్‌కుమార్‌తో కలిసి ప్రారంభించారు. అనంతరం ఆయన మాట్లాడుతూ.. చవితి మూడో రోజు నుంచి ప్రారంభమైన నిమజ్జనాలు ఈ నెల 12వ తేదీతో ముగుస్తాయన్నారు. ఈ సందర్భంగా అన్ని శాఖల సమన్వయంతో ఎప్పటికప్పుడు పురిస్థితులను సమన్వయం చేసేందుకు వీలుగా కమాండ్‌ కంట్రోల్‌ సెంటర్‌ను ఏర్పాటు చేసినట్లు తెలిపారు. దేశవ్యాప్తంగా గుర్తింపు పొందిన ఖైరతాబాద్‌ మహాగణపతిని ఈ ఏడాది సంపూర్ణ నిమజ్జనం చేసేందుకు సిబ్బంది పనిచేస్తున్నారని మంత్రి తెలిపారు. మహాగణపతి నిమజ్జనం చేసే సాగర్‌ జలాల్లో వ్యర్థాలను తొలగించారని, మరో నాలుగైదు రోజుల్లో 20 అడుగులకు పైగా లోతు వ్యర్థాలను తొలగించి భక్తులు, ఉత్సవ కమిటీ కోరిక మేరకు సంపూర్ణ నిమజ్జనం చేస్తామన్నారు. గతంలో మహాగణపతి నిమజ్జన ప్రక్రియ రెండు రోజులు పట్టేదని, ఈసారి గత సంవత్సరం లాగానే త్వరగా నిమజ్జన ప్రక్రియ పూర్తి చేస్తామన్నారు. ఎన్టీఆర్‌ మార్గ్‌లో కమాండ్‌ కంట్రోల్‌ సెంటర్‌ను ప్రారంభిస్తున్న మంత్రి తలసాని,మేయర్‌ రామ్మోహన్, కమిషనర్‌ లోకేష్‌కుమార్‌ సాగర్‌ చెంత గంగా హారతికి ఏర్పాట్లు ఈ ఏడాది నిమజ్జన వేడుకల్లో ఖైరతాబాద్‌ గణపతికి మొదటిసారిగా హుస్సేన్‌ సాగర్‌ వద్ద గంగా హారతి ఇచ్చేందుకు ఏర్పాట్లు చేస్తున్నట్టు మేయర్‌ బొంతు రామ్మోహన్‌ తెలిపారు. జీహెచ్‌ఎంసీ, శానిటేషన్, వాటర్‌వర్క్స్, ఎలక్ట్రిసిటీ, ఆర్‌ అండ్‌ బి, పోలీస్, ట్రాఫిక్, ఎన్‌ఫోర్స్‌మెంట్‌ శాఖల సమన్వయంతో నిమజ్జన వేడుకలకు హాజరయ్యే భక్తులకు ఎలాంటి ఇబ్బందులు లేకుండా ఏర్పాట్లు చేస్తున్నామన్నారు. అంతకముందు మహాగణపతిని నిమజ్జనం చేయనున్న ప్రాంతంలో చేపట్టిన పనులను మంత్రి, మేయర్, గ్రేటర్‌ కమిషనర్‌ లోకేష్‌ కుమార్, సెంట్రల్‌ జోన్‌ కమిషనర్‌ ముషారఫ్‌ ఫారూఖీ, ఖైరతాబాద్‌ డివిజన్‌ కార్పొరేటర్‌ విజయారెడ్డి, ఎన్‌పోర్స్‌మెంట్‌ డైరెక్టర్‌ విశ్వజిత్‌తో పాటు వివిధ శాఖల అధికారులు పరిశీలించారు.  నిమజ్జనానికి 29 క్రేన్లు    ఎన్టీఆర్‌ మార్గ్, ట్యాంక్‌బండ్‌పై వినాయక నిమజ్జనాల కోసం మొత్తం 29 క్రేన్లను ఏర్పాటు చేస్తున్నట్లు ఎన్‌ఫోర్స్‌మెంట్‌ డైరెక్టర్‌ విశ్వజిత్‌ తెలిపారు. ట్యాంక్‌బండ్‌లో ప్రత్యేకంగా బోట్లతో పాటు, స్మిమ్మర్లను నియమిస్తున్నట్టు చెప్పారు. మహాగణపతిని ప్రతి ఏటా నిమజ్జనం చేసే ప్రాంతంలో అడుగున బండరాయి ఉన్నందున ఆ పక్కనే సాగర్‌లో లోతు పెంచి నమజ్జనం చేసేందుకు ఇప్పటికే 700 మెట్రిక్‌ టన్నుల వ్యర్థాలను తొలగించినట్టు ఆయన వివరించారు. నిమజ్జన సమయానికి 25 అడుగులకు పైగా లోతు పెంచి విగ్రహం సంపూర్ణ నిమజ్జనం చేసేందుకు ఏర్పాట్లు చేస్తున్నామన్నారు. క్రేన్ల వద్ద ఎలాంటి ఇబ్బందులు తలెత్తకుండా షిప్ట్‌ల వారిగా ఆపరేటర్లను అందుబాటులో ఉండేలా చూడటంతో పాటు స్టాండ్‌ బైగా కూడా క్రేన్లను అందుబాటులో ఉంచుతున్నామని తెలిపారు.   162 కి.మీ. మార్గంలో శోభాయాత్ర నగరంలో ఇప్పటికే గణేష్‌ విగ్రహాల నిమజ్జనం ప్రారంభమైందని, ఈ నెల 12న జరిగే ప్రధాన నిమజ్జన యాత్రను విజయవంతం చేసి నగర ఖ్యాతిని మరోసారి చాటాలని మంత్రి తలసాని పిలుపునిచ్చారు. ట్యాంక్‌ బండ్‌ వద్ద సాగర్‌లో దాదాపు 50 వేలకు పైగా విగ్రహాల నిమజ్జనం జరుగుతుందని, ప్రధానంగా 162కిలోమీటర్ల మార్గంలో శోభాయాత్ర సాగుందన్నారు. ఈ మార్గంలో రోడ్ల మరమ్మతులు, ఇతర సౌకర్యాలను, అదనపు లైటింగ్‌ను ఏర్పాటు చేస్తున్నట్టు తెలిపారు.  

అమీర్‌పేట: వినాయక వేడుకల్లో భాగంగా అమీర్‌పేటలో కంప్యూటర్‌ వినాయకుడు భక్తులకు దర్శనమిస్తున్నాడు. సాఫ్ట్‌వేర్‌ ఉద్యోగి రాజశేఖర్‌ కంప్యూటర్‌ పరికరాలను ఉపయోగించి గణనాథుడిని తయారు చేశారు. పాస్‌పోర్టు కార్యాలయం సమీపంలో వెలసిన ఈ వినాయకుడిని దర్శించుకునేందుకు ఆసక్తిని చూపుతున్నారు.

సాక్షి, సిటీబ్యూరో: గణనాథుడి నిమజ్జన ఖర్చు ఘనంగానే ఉంది. క్రేన్ల అద్దె, కార్మికుల వేతనాలు తదితరాల కోసం జీహెచ్‌ఎంసీ రూ.కోట్లలోనే ఖర్చు చేస్తోంది. అధికారుల లెక్కల ప్రకారం నగరంలోని 32 చెరువుల్లో నిమజ్జనాలు చేస్తుండగా... ఇక చిన్నాచితకా కొలనులకు లెక్కే లేదు. హుస్సేన్‌సాగర్‌ సహా జోన్ల పరిధిలోని 32 చెరువుల్లో వినాయక విగ్రహాల నిమజ్జనానికి అవసరమైన క్రేన్లను జీహెచ్‌ఎంసీ ఈవీడీఎం విభాగం సమకూరుస్తోంది. బుధవారం నుంచి ప్రారంభమైన నిమజ్జనాలు ఈ నెల 15 వరకు కొనసాగుతాయని తెలుస్తోంది. ఈ నేపథ్యంలో ఆయా చెరువుల్లో నిమజ్జనమయ్యే విగ్రహాల సంఖ్యకు అనుగుణంగా క్రేన్లు, సిబ్బందిని వినియోగిస్తున్నారు. నిమజ్జనం జరిగే గంటలను పరిగణనలోకి తీసుకొని అవసరమయ్యే కార్మికులను బ్యాచ్‌ల వారీగా వినియోగించనున్నట్లు... వేతనాలనూ గంటల వారీగా చెల్లించనున్నట్లు ఈవీడీఎం డైరెక్టర్‌ విశ్వజిత్‌ కాంపాటి ‘సాక్షి’కి తెలిపారు. క్రేన్ల దగ్గర అవసరాన్ని బట్టి నలుగురు, ఎనిమిది మంది, 12 మంది కార్మికులతో కూడిన బ్యాచ్‌లను ఏర్పాటు చేశారు. ప్రాథమిక అంచనా మేరకు క్రేన్ల  అద్దె, సిబ్బంది వేతనాలకు దాదాపు రూ.8.24 కోట్లు ఖర్చు కానుండగా... ఆయా ప్రాంతాల్లోని నిమజ్జనాల పరిస్థితులు, పోలీసుల నుంచి అందుతున్న సమాచారం తదితర పరిగణనలోకి తీసుకుంటే వ్యయం రూ.9 కోట్లకు చేరే అవకాశముందని పేర్కొన్నారు.  కార్మికులు ఇలా...   8 మంది బ్యాచ్‌లు – 1,300 (10,400 మంది కార్మికులు) 12 మంది బ్యాచ్‌లు – 164 (1,968 మంది కార్మికులు) నలుగురు ఉండే బ్యాచ్‌లు – 776 (3,104 మంది కార్మికులు) మొత్తం బ్యాచ్‌లు – 2,240, మొత్తం కార్మికులు – 15,472 ఖర్చు ఇలా...   క్రేన్ల అద్దె   ♦ 15 టన్నుల క్రేన్లకు గంటకు రూ.5,241 చొప్పున మొత్తం రూ.3,04,39,728.   ♦ 30–70 టన్నుల క్రేన్లకు గంటకు రూ.6,825 చొప్పున మొత్తం రూ.2,03,11,200. ♦ మొబైల్‌ క్రేన్లకు గంటకు రూ.5,241 చొప్పున మొత్తం రూ.2,44,02,096.   కార్మికుల వేతనాలు    ♦ 8 మంది బ్యాచ్‌కు రూ.3,794 చొప్పున రూ.49,32,200 ♦ 12 మంది బ్యాచ్‌కు రూ.5,664.50 చొప్పున రూ.9,28,978 ♦ నలుగురి బ్యాచ్‌కు రూ.1,897 చొప్పున రూ.14,72,072 ♦  మొత్తం ఖర్చు రూ.8,24,86,274 ఏ క్రేన్లు ఎన్ని?   15 టన్నుల క్రేన్లు – 52    30–70 టన్నుల క్రేన్లు – 41 మొబైల్‌ క్రేన్లు – 164    మొత్తం క్రేన్లు – 257 మొత్తం పని గంటలు – 13,440

సాక్షి, సిటీబ్యూరో: గణేష్‌ ఉత్సవాల నేపథ్యంలో వినాయకుడికి నైవేధ్యంగా పెట్టిన లడ్డూల వేలం పాటతో పాటు ఎవరు ఎక్కువ లడ్డూలు తింటారనే పోటీలు కూడా అక్కడక్కడా జరుగుతుంటాయి. చివరి నాలుగైదు రోజులు ఈ పోటీలు జోరుగా జరుగుతాయి. లడ్డూ వేలం పాటల వరకు పర్వాలేదు కానీ... వాటిని తినే పోటీలు మాత్రం ఒక్కోసారి ప్రాణాల మీదికి తెస్తాయని నిపుణులు హెచ్చరిస్తున్నారు. గతంలో వినాయక చవితి ఉత్సవాలను పురస్కరించుకొని సరదా కోసం ఓ ఎఫ్‌ఎం రేడియో సంస్థ తార్నాకలో ఏర్పాటు చేసిన లడూŠుడ్ల తినే పోటీ జోషి అనే వ్యక్తి ప్రాణాలు తీసిందని గుర్తుచేస్తున్నారు. గణేష్‌ ఉత్సవాలు, నిమజ్జనం నేపథ్యంలో కొందరు మండపాల నిర్వాహకులతో పాటు వివిధ ప్రైవేట్‌ సంస్థలూ ప్రచారం కోసం ప్రయత్నిస్తుంటాయి. ఇందులో భాగంగా ఫ్లెక్సీలు ఏర్పాటు చేయడం, వివిధ ఆకృతులతో ఉన్న టోపీలు, టీ–షర్టులు పంపిణీ తదితర కార్యక్రమాలు నిర్వహిస్తారు. ఇంత వరకు బాగానే ఉన్నా... లడ్డూలు తినే పోటీలు వంటివీ నిర్వహిస్తారు. పోటీలో పాల్గొని అందరికంటే ఎక్కువ లడ్డూలు తిన్న వారిని విజేతగా ప్రకటించి, బంగారు నాణాలు, నగదు బహుమతిగా ఇస్తామని ప్రకటిస్తుంటారు. ఇలాంటి పోటీలు ప్రాణాలు తీస్తాయని, ఎవరికి వారు ఇలాంటి వాటికి దూరంగా ఉండటమే ఉత్తమమని స్పష్టం చేస్తున్నారు.   కంగారులో ప్రాణాల మీదికి... ఇలాంటి పోటీల్లో పాల్గొనే వారు విజేతలుగా నిలవాలనే ఉద్దేశంతో తక్కువ సమయంలో ఎక్కువ లడ్డూలు తినే ప్రయత్నం చేస్తారు. దీనికోసం లడ్డూను పూర్తిగా నమలకుండా మింగేయడంతో పాటు ఏమాత్రం విరామం లేకుండా ఒకదాని తర్వాత మరోటి తినాలని చూస్తుంటారు. ఇలాంటి సందర్భాల్లో లడ్డూలు గొంతులో ఇరుక్కుంటాయని, కొన్ని సందర్భాల్లో బాధితుడిని తక్షణం ఆస్పత్రికి తరలించినా... ఇరుక్కున్న వాటిని తొలగించేందుకు వైద్యులు ప్రయత్నించినా ఫలితాలు ఉండవని స్పష్టం చేస్తున్నారు. అలాంటి సమయంలో కనీసం మంచినీళ్లు సైతం తాగలేని పరిస్థితులు ఉంటాయని పేర్కొంటున్నారు. చివరకు గొంతులో ఇరుక్కున్న లడ్డూ కారణంగా శ్వాస తీసుకోవడం కూడా కష్టంగా మారి, బాధితుడు మృత్యు ఒడికి చేరే ప్రమాదం ఉంటుందని హెచ్చరిస్తున్నారు. ట్రేకియాను దెబ్బతీస్తాయి... ఇలాంటి పోటీ నేపథ్యంలో లడ్డూను కంగారుగా తినడంతో అది శ్వాసనాళంలోకి వెళ్లి, ఊపిరాడక బాధితులు మరణిస్తూ ఉంటారని వైద్య నిపుణులు చెబుతున్నారు. కఠంలో ముందు భాగంలో ఉండే శ్వాసనాళం (ట్రేకియా) ఎల్లప్పుడూ తెరిచే ఉంటుంది. దీని ద్వారానే మనిషి శ్వాస తీసుకుంటాడు. దానికి వెనుక వైపు వెన్నుపూసల మధ్య అన్నవాహిక ఉంటుంది. ఆహారం తీసుకునేప్పుడు గొంతులో కొండనాలిక పని తీరు వల్ల ఆ పదార్థం శ్వాసనాళంలోకి కాకుండా అన్నవాహికలోకి వెళ్తుంది. ఈ కొండనాలిక సరిగ్గా పని చేయనప్పుడే పొలమారుతూ మనిషి ఉక్కిరిబిక్కిరి అవుతాడు. లడ్డూ పోటీల నేపథ్యంలో ఒకేసారి ఎక్కువ మొత్తంలో, కంగారుగా లడ్డూలు తినడంతో కొండనాలిక సరిగ్గా పని చేయకపోవచ్చు. ఫలితంగా ఆ ఆహారపదార్థాలు ట్రేకియాలోకి వెళ్లి ఇరుక్కుపోతుంటాయి. ఫలితంగా బాధితుడికి శ్వాసతీసుకోవడం ఇబ్బందిగా మారి కన్ను మూస్తాడు. ఒక్కోసారి స్వరపేటిక పైన ఉండే వేగస్‌ నెర్వ్‌పై ఒత్తిడి పెరగడంతో వేగ ఇగ్విబిషన్‌ అనేది ఏర్పడుతుందని ఫలితంగా గుండె ఆగిపోతుందని వివరిస్తున్నారు. లడ్డూలపై కన్నేసి ఉంచండి: పోలీసులు నగరంలో గణేష్‌ మండపాల నిర్వాహకులు వినాయకుడి విగ్రహానికి ప్రసాదంగా పెట్టే లడ్డూపై ఓ కన్నేసి ఉంచాలని పోలీసులు సూచిస్తున్నారు. ఇలాంటి లడ్డూలకు ఓ విశిష్టత ఉంటుంది. విభిన్న తరహాలో ఏర్పాటు చేయడం, వేలంలో భారీ రేటు పలకడం, ఉచితంగా పంపిణీ చేయడం... తదితర చర్యలతో నిర్వాహకులు భక్తుల్ని ఆకర్షిస్తుంటారు. అయితే ఇలాంటి లడ్డూలు తస్కరిస్తే ‘శుభం’ అనే సెంటిమెంట్‌ సైతం కొందరికి ఉంటుందన్నారు. గతంలో ఇలాంటి నేరం చేసే ఐదుగురు యువకులు కటకటాల్లోకి చేరినట్లు తెలిపారు. అయితే సున్నిత ప్రాంతాల్లో ఏర్పాటు చేసే మండపాల్లోని లడ్డూలు తçస్కరణకు గురైతే కొన్ని సందర్భాల్లో పరిస్థితులు చేయి దాటే ప్రమాదం ఉందని స్పష్టం చేస్తున్నారు. ఈ నేపథ్యంలోనే మండపాల నిర్వాహకులు పక్కాగా సీసీ కెమెరాలు కలిగి ఉండి రాత్రి వేళల్లో తమప్రసాదాలపై ఓ కన్నేసి ఉంచాలని కోరుతున్నారు. అక్కడ కచ్చితంగా ఒక్క వాలెంటీర్‌ అయినా ఉండేలా చర్యలు తీసుకోవాలని సూచించారు. 

సాక్షి, సిటీబ్యూరో: నగరంలో ఏటా జరిగే గణేష్‌ నవరాత్రి ఉత్సవాలు, సామూహిక నిమజ్జనం నగర పోలీసులకు అత్యంత కీలకమైన ఘట్టాలు. మండపం ఏర్పాటుకు అనుమతి మంజూరు చేయడం నుంచి విగ్రహం నిమజ్జనం  వరకు అనునిత్యం అప్రమత్తంగా ఉండాల్సిందే. ఇప్పటి వరకు మాన్యువల్‌గా జరుగుతున్న ఈ తతంగానికి నగర పోలీసులు సాంకేతికత జోడించారు. ప్రతి వినాయక మండపానికీ ఓ ప్రత్యేకమైన క్యూఆర్‌ కోడ్‌ కేటాయించడంతో పాటు దానిని జియో ట్యాగింగ్‌ ద్వారా పోలీసు అధికారిక యాప్‌ ‘టీఎస్‌ కాప్‌’కు అనుసంధానిస్తున్నారు. ఫలితంగా తనిఖీల నుంచి నిమజ్జనం వరకు ప్రతి అంశం జవాబుదారీగా, పారదర్శకంగా, సాంకేతికంగా ఉంటుందని అధికారులు పేర్కొంటున్నారు.  అంతా ఆన్‌లైన్‌లోనే... గణేష్‌ ఉత్సవాలకు సంబంధించి నగర పోలీసు కమిషనరేట్‌ పరిధిలో ఏటా వేల వినాయక మండపాలు ఏర్పాటవుతుంటాయి. ఈ నేపథ్యంలో మండపాల రిజిస్ట్రేషన్‌ను సిటీ కాప్స్‌ ఆన్‌లైన్‌ చేశారు. గత ఏడాది నుంచి ఆన్‌లైన్‌లో రిజిస్ట్రేషన్లను ప్రోత్సహిస్తున్నారు. ఇప్పటి వరకు అధికారిక వెబ్‌సైట్‌ ద్వారా దాదాపు 9 వేల మండపాలు రిజిస్ట్రేషన్‌ చేసుకున్నాయి. ఆన్‌లైన్‌లోనే దాఖలు చేసి దాని ప్రింట్‌ఔట్‌తో పాటు పత్రాలను ఠాణాలో సమర్పిస్తున్నారు.  ఆన్‌లైన్‌లో రిజిస్ట్రేషన్‌ చేసుకోని మండపాల వద్దకు నేరుగా వెళ్తున్న పోలీసులు వాటి వివరాలు నమోదు చేసుకుని వాటి వివరాలను ఆన్‌లైన్‌లో అప్‌లోడ్‌ చేస్తున్నారు.  ప్రత్యేక క్యూఆర్‌ కోడ్‌ కేటాయింపు... ఇలా ఆన్‌లైన్‌లో వచ్చిన దరఖాస్తులు, పోలీసులు ఆన్‌లైన్‌ చేసిన మండపాల వివరాలను పరిశీలించడానికి బషీర్‌బాగ్‌లోని కమిషనరేట్‌లో ప్రత్యేక వింగ్‌ ఏర్పాటు చేశారు. వీరు ఆన్‌లైన్‌ దరఖాస్తులు, ఠాణాల నుంచి వచ్చిన పత్రాలను పరిశీలించి మండపం ఏర్పాటుకు అనుమతి ఇస్తారు. మండపాలన్నీ ఆన్‌లైన్‌లోకి వచ్చిన తర్వాత ఆయా దరఖాస్తులపై ప్రత్యేకంగా క్యూఆర్‌ కోడ్‌ ముద్రిస్తున్నారు. ఒక్కో విగ్రహానికి ఒక్కో కోడ్‌ కేటాయిస్తున్నారు. దీంతో అనుమతి మంజూరులో ఎలాంటి జాప్యం లేకుండా పని సాఫీగా సాగుతుందని అధికారులు చెబుతున్నారు.ఈ అనుమతి పత్రాన్ని మండప నిర్వాహకులు తమ మండపాల్లో నిర్ణీత ప్రాంతంలో అతికించేలా చూస్తున్నారు. ఈ క్యూఆర్‌ కోడ్స్‌ డేటాను పోలీసు అధికారిక యాప్‌ ‘టీఎస్‌ కాప్‌’లోకి లింకు ఇస్తున్నారు. దీంతో ఉన్నతాధికారుల నుంచి క్షేత్రస్థాయిలో ఉండే పోలీసుల వరకు ఎవరైనా సరే తమ ప్రాంతంలో ఎన్ని మండపాలు ఉన్నాయి? ఎక్కడ ఉన్నా యి? ఎప్పుడు ఏర్పాటవుతాయి? నిమజ్జనం ఎప్పుడు? ఏ మార్గంలో వెళ్ళి, ఎక్కడ నిమజ్జనం చేస్తారు? తదితర వివరాలను తమ ట్యాబ్స్, స్పార్ట్‌ఫోన్స్‌లో చూసుకునే అవకాశం ఏర్పడుతోంది. క్యూఆర్‌ కోడ్‌ కేటాయింపులోనే అధికారులు పక్కాగా వ్యవహరిస్తున్న నేపథ్యంలో ఆయా ప్రాంతాల వారీగా వేర్వేరుగా దీని కేటాయింపు జరుగుతోంది.  తనిఖీలపై పర్యవేక్షణ... ఓ ప్రాంతంలో మండపం ఏర్పాటు అయినప్పటి నుంచి అందులోని విగ్రహం నిమజ్జనం అయ్యే వరకు ప్రతి దశలోనూ పోలీసుల పర్యవేక్షణ ఉంటుంది. గస్తీ విధులు నిర్వర్తించే బ్లూకోల్ట్సŠ, పెట్రోలింగ్‌ వాహనాల సిబ్బంది నిత్యం ఆయా మండపాల వద్దకు వెళ్ళి పరిస్థితుల్ని అంచనా వేయడంతో పాటు తనిఖీలు నిర్వహించాలి. ఆయా మండపాల వద్దకు వెళ్ళిన వీరు కోడ్‌ను టీఎస్‌ కాప్‌ యాప్‌లో స్కాన్‌ చేస్తారు. దీంతో ఈ తనిఖీలు ఎలా సాగుతున్నాయన్నది ఉన్నతాధికారులకు ఈ యాప్‌ ద్వారానే తెలుస్తుంది. ఏ మండపానికి ఏ పోలీసును లైజనింగ్‌ అధికారిగా నియమించారు? ఆయా అధికారుల వివరాలు? ఇలా ప్రతి అంశమూ యాప్‌ ద్వారా అన్ని స్థాయిల అధికారులకూ తెలుస్తుంది. నిమజ్జన సమయంలో నిర్ణీత సమయంలో ఊరేగింపు ప్రారంభంకావడం నుంచి నిమజ్జనం పూర్తయ్యే వరకు ప్రతి విగ్రహం కదలికల్నీ గమనిస్తుండాలి. క్యూఆర్‌ కోడ్‌తో కూడిన పత్రంతో వచ్చే విగ్రహాలను క్షేత్రస్థాయి సిబ్బంది ఎక్కడిక్కడ పర్యవేక్షిస్తారు. ఆ కోడ్‌ ను తమ ట్యాబ్స్, ఫోన్లలో స్కానింగ్‌ చేస్తుంటారు. దీంతో ఏ విగ్రహం, ఏ సమయంలో, ఏ ప్రాంతంలో ఉంది? ఎప్పుడు నిమజ్జనం జరిగింది? ఇంకా ఎన్ని విగ్రహాలు నిమజ్జనం కావాల్సి ఉంది? అనే అంశాలు సిబ్బంది, అధికారులకు యాప్‌ ద్వారా తెలుస్తుంటాయి.    మండపాల జియో ట్యాగింగ్‌ గణేష్‌ ఉత్సవాల సందర్భంగా ఎలాంటి అవాంఛనీయ ఘటనలకు తావు లేకుండా బందోబస్తు నిర్వహిస్తున్నారు. గత ఏడాది మాదిరిగానే ఒకే రోజులో నిమజ్జనం పూర్తి చేయాలని భావిస్తున్నారు. ప్రత్యేక క్యూఆర్‌ కోడ్‌ సాయంతో అన్ని మండపాలను మ్యాప్‌ మీది జియో ట్యాగింగ్‌ చేస్తున్నారు. ఏ చిన్న ఘటనకూ ఆస్కారం లేకుండా అన్ని ప్రభుత్వ విభాగాలు, నిర్వాహకులు, గణేష్‌ ఉత్సవ కమిటీలతో సమన్వయంతో పని చేస్తున్నాయి. జియో ట్యాగింగ్‌ చేసిన మండపాలను పోలీసుల అధికారిక యాప్‌ ‘టీఎస్‌ కాప్‌’ ద్వారా గస్తీ సిబ్బంది ట్యాబ్స్, మొబైల్స్‌కు లింకు చేస్తున్నారు. దీంతో మండపం ఏర్పాటు నుంచి నిమజ్జనం జరిగే వరకు ఆ మండపాన్ని ఏఏ పోలీసులు సందర్శించారు? ఏ సమయంలో వచ్చారు? నిర్వాహకులు ఎవరు ఉన్నారు? అనేవి తేలిగ్గా గుర్తించవచ్చు. ఫలితంగా గస్తీపై ఉన్నతాధికారుల నిఘా ఉంటోంది. ఈ ఏడాది సాంకేతిక పరిజ్ఞానం వినియోగిస్తూ చేసే ఏర్పాట్లు భక్తులకు నచ్చేలా, వారు మెచ్చేలా ఉండాలని పోలీసులు ప్రయత్నిస్తున్నారు. నగరంలోని అన్ని ఊరేగింపు మార్గాలు సీసీ కెమెరా నిఘాలోకి తీసుకువస్తున్నారు. క్యూఆర్‌ కోడ్‌తో కూడిన విగ్రహాన్ని తీసుకువస్తున్న వాహనంపై నిమజ్జనం రోజు ప్రత్యేక పర్యవేక్షణ ఉంటుంది. అది ఎక్కడ ఉంది? అక్కడి పరిస్థితులు ఏంటి? అనేవి తెలుసుకోవడంతో ఎక్కడా ఆలస్యం, ఆటంకాలు లేకుండా నిమజ్జనం పూర్తి చేసే అవకాశం ఉంది. 

సాక్షి, సిటీబ్యూరో: నగరంలో చవితి సందడి మొదలైంది. బుధవారం నుంచి నిమజ్జనం ప్రారంభమవుతుంది. ఈ నెల 12న జరిగే ప్రధాన నిమజ్జనంతో ఉత్సవం ముగుస్తుంది. ఈ నేపథ్యంలో నగర పోలీస్‌ విభాగం అప్రమత్తమైంది. భారీ బందోబస్తు ఏర్పాటు చేస్తోంది. అసాంఘిక శక్తులు రెచ్చిపోకుండా అడ్డుకట్ట వేసేందుకు ప్రత్యేకంగా సీసీ కెమెరాలతో నిఘా, రూఫ్‌టాప్‌ వాచ్, ఎక్కడికక్కడ కార్డన్‌ ఏరియాలు, నగర వ్యాప్తంగా 250 ప్రాంతాల్లో వాచ్‌టవర్లు ఏర్పాటు చేసేందుకు ప్రణాళికలు సిద్ధం చేస్తోంది. కమ్యూనల్, సాధారణ రౌడీషీటర్ల బైండోవర్‌ ప్రక్రియ పూర్తి కావచ్చింది. అవసరమైన, అనుమానిత ప్రాంతాల్లో సాయుధ బలగాలు ఫుట్‌ పెట్రోలింగ్‌ నిర్వహించనున్నాయి. మూడు కమిషనరేట్లలోని సిబ్బంది అందరికీ ‘స్టాండ్‌ టు’ ప్రకటించి కచ్చితంగా విధుల్లో ఉండేలా ఉన్నతాధికారులు ఆదేశాలు జారీ చేశారు. పరిస్థితులను బట్టి ఏ ప్రాంతానికైనా తరలించేందుకు వీలుగా కొన్ని ప్రత్యేక బలగాలను రిజర్వ్‌లో ఉంచారు. కమిషనరేట్లలో ప్రస్తుత పరిస్థితులు, అందుబాటులోని సిబ్బంది, ఏర్పాట్లు, తీసుకోవాల్సిన చర్యలపై కమిషనర్లు ఎప్పటిప్పుడు సమీక్షిస్తున్నారు. కేంద్ర, రాష్ట్ర నిఘా వర్గాల, పొరుగు జిల్లాల అధికారులతో సంప్రదింపులు జరుపుతూ భద్రత, బందోబస్తు చర్యల్లో అవసరమైన మార్పుచేర్పులు చేస్తున్నారు. సున్నిత ప్రాంతాలతో పాటు కీలక మండపాలను ప్రతిరోజు బాంబు నిర్వీర్య బృందాలు తనిఖీ చేయనున్నాయి. మండపాల వద్ద ఉండే వలంటీర్లకు అనుమానాస్పద వస్తువులు, వ్యక్తుల్ని గుర్తించడంపై స్థానిక పోలీసుల ద్వారా ప్రాథమిక శిక్షణనివ్వాలని ఉన్నతాధికారులు నిర్ణయించారు. 10న మొహర్రం కావడంతో బీబీకా ఆలం ఊరేగింపు సైతం జరగనుంది. దీన్ని దృష్టిలో పెట్టుకున్న పోలీసులు అదనపు బందోబస్తు ఏర్పాట్లు చేస్తున్నారు. ఈ ఏడాది హైదరాబాద్, సైబరాబాద్, రాచకొండ కమిషనరేట్లలో కలిపి దాదాపు 62వేల మండపాలు ఏర్పాటు చేశారు. ఆదివారం సాయంత్రానికి నగర పోలీసు అధికారిక వెబ్‌సైట్‌ ద్వారా 10,702 మండపాల ఏర్పాటుకు అనుమతి తీసుకున్నారు. ఇవన్నీ ఐదడుగులు అంతకంటే ఎక్కువ ఎత్తయినవే కావడం గమనార్హం. అంతకు తక్కువ ఎత్తుతో కూడిన వాటిని ఏర్పాటు చేçస్తున్న సందర్భంలో సాధారణంగా అనుమతి తీసుకోవట్లేదు.  సాగర్‌ దగ్గర ప్రత్యేక ఏర్పాట్లు... కీలక నిమజ్జనాలు జరిగే హుస్సేన్‌సాగర్, ఖైరతాబాద్‌ గణేశుడి వద్ద ఏర్పాట్లను మధ్య మండల సంయుక్త పోలీసు కమిషనర్‌ ఎన్‌.విశ్వప్రసాద్‌ పర్యవేక్షిస్తున్నారు. ప్రత్యేక అధికారిగా స్పెషల్‌ బ్రాంచ్‌ జాయింట్‌ పోలీసు కమిషనర్‌ తరుణ్‌ జోషికి బాధ్యతలు అప్పగించారు. ఈ ఏడాది సాగర్‌లో 25వేల నుంచి 30వేల విగ్రహాలు నిమజ్జనం అవుతాయని అంచనా వేస్తున్నారు. మూడో రోజైన బుధవారం నుంచి ఈ సందడం ప్రారంభమవుతుందని భావిస్తున్నారు. ఐదు, ఏడు, తొమ్మిదో రోజుల్లో రద్దీ ఎక్కువగా ఉండే అవకాశం ఉండడంతో ఈలోపు ఏర్పాట్లు పూర్తి చేయాలని నిర్ణయించారు. అవసరాన్ని బట్టి సిబ్బంది, క్రేన్లు అక్కడ ఉండేలా చర్యలు తీసుకుంటున్నారు. ఈసారీ ప్రతి క్రేన్‌ వద్ద నిమజ్జనం అవుతున్న విగ్రహాల వివరాలు, సమయాలు తెలుసుకోవడానికి క్యూఆర్‌ కోడ్‌ స్కానింగ్‌ విధానం అవలంభిస్తున్నారు. భవిష్యత్తులో జరిగే ఈ కార్యక్రమంలో ఎలాంటి సమస్యలు తలెత్తకుండా ప్రణాళికలు సిద్ధం చేయడానికి ఇది ఉపకరిస్తుందని పోలీసు ఉన్నతాధికారులు అభిప్రాయపడుతున్నారు. పటిష్ట నిఘా, బందోబస్తు కోసం గతేడాది మాదిరే వినూత్న ప్రయోగాలు చేస్తున్నారు. హుస్సేన్‌సాగర్‌ దగ్గర కొన్ని ప్రత్యేక ఏర్పాట్లు చేస్తున్నారు. పోలీసుల సూచనలివీ... ♦ మండపం వద్ద నిర్వాహకులు వలంటీర్లను ఏర్పాటు చేసుకోవాలి. వారి ద్వారా చుట్టు పక్కల ప్రాంతాలపై నిఘా వేసి ఉంచాలి.   ♦ గుర్తుతెలియని వ్యక్తులు ఇచ్చే వస్తువులను తీసుకోకూడదు. పరిసర ప్రాంతాల్లో అనుమానాస్పద వస్తువులు ఉన్నాయా? అనేది గమనిçస్తుండాలి. ♦ పార్కింగ్‌ ప్రాంతాలు, అక్కడ నిలిపి ఉంటున్న వాహనాలపైనా కన్నేసి ఉంచాలి.   ♦ రాత్రి 10 నుంచి ఉదయం 6గంటల మధ్య లౌడ్‌ స్పీకర్లు వాడకూడదు. ♦ మండపం పైనుంచి వెళ్లే కరెంట్‌ తీగలు, హైటెన్షన్‌ వైర్ల విషయంలో అప్రమత్తంగా ఉండాలి.   ♦ అక్రమ విద్యుత్‌ కనెక్షన్లు నేరమే కాదు... ప్రమాదం కూడా అనేది గుర్తుంచుకోవాలి. ♦ రాత్రి వేళ మండపంలో ఎవరో ఒకరు కాపలా ఉండడం ఉత్తమం. ♦ మండపం దాదాపుగా మండే స్వభావం ఉన్న థర్మకోల్, చెక్క తదితర వస్తువులతో నిర్మితమవుతుంది. ఈ నేపథ్యంలో అక్కడ వెలిగించే దీపాలు, అగరబత్తీలు, హారతి కర్పూరం విషయంలో జాగ్రత్తలు తీసుకోవాలి.   ♦ ఎలాంటి పుకార్లను నమ్మకూడదు. అవి విస్తరించేలా, ప్రచారం చేసేలా ప్రవర్తించడం నేరం. ♦ ఇతరుల మనోభావాలు దెబ్బతినే, రెచ్చగొట్టేలా చేసే చర్యలు, వ్యాఖ్యలు ఉండకూడదు. విగ్రహాలవివరాలివీ...   సంవత్సరం    విగ్రహాలు   2006          15,000 2007          16,500 2008          18,200 2009          19,400 2010          20,600 2011          21,900 2012         25,000   2013         30,000 2014         37,600 2015         42,400 2016         56,000 2017         58,000 2018         60,000 2019         62,000   (దాదాపు) 

మణికొండ:  బ్యాడ్మింటన్‌ ప్రపంచ విజేత, అర్జున అవార్డు గ్రహీత పీవీ సింధు మంగళవారం రాత్రి మణికొండ పంచవటికాలనీలో జరిగిన వినాయక పూజా కార్యక్రమంలో పాల్గొన్నారు. ఆమె తల్లిదండ్రులు పీవీ రమణ, విజయలతో పాటు వచ్చిన ఆమె ప్రత్యేక పూజలు చేశారు. అనంతరం ఆమెకు మణికొండ మున్సిపాలిటీ పరిధిలోని ఆల్‌కాలనీస్‌ ఫెడరేషన్‌ అధ్యక్షుడు డి.సీతారాం, పంచవటి కాలనీ సంక్షేమ సంఘం అధ్యక్షుడు భీంరెడ్డిలతో పాటు నాయకులు వారిని శాలువాతో సత్కరించి మెమోంటోను అందజేశారు. రాబోయే ఒలింపిక్స్‌లో బంగారు పతకాన్ని సాధించాలని వారంతా ఆకాంక్షించారు. ఆమెతో ఫొటోలు, సెల్ఫీలు దిగేందుకు కాలనీ వాసులు పోటీ పడ్డారు.  కార్యక్రమంలో మణికొండ మాజీ సర్పంచ్‌ కె.నరేందర్‌రెడ్డి, మాజీ ఎంపీటీసీ సభ్యుడు ఎం.రాఘవరెడ్డిలు పాల్గొన్నారు.

సాక్షి, పశ్చిమగోదావరి : వీరవాసరంలో జనసేన కార్యకర్తలు అరాచకం సృష్టిస్తున్నారు. వీరవాసరంలో వినాయకచవితి సందర్భంగా గ్రామానికి చెందిన నూకల కనకారావు, మద్దాల సత్యనారాయణమూర్తి, నూకల కిరణ్, కందుల సురేష్‌ తదితరులు భీమవరం ఎమ్మెల్యే గ్రంధిశ్రీనివాస్, ముఖ్యమంత్రి జగన్‌మోహన్‌రెడ్డి తదితరులతో కూడిన ఫ్లెక్సీలు ఏర్పాటు చేశారు. వీరవాసరం ఎస్‌బీహెచ్‌ సమీపంలో ఉన్న ఫ్లెక్సీని జనసేన కార్యకర్తలు బ్లేడ్లతో కోసి ధ్వంసం చేశారు. ఎన్నికల సమయంలోనూ జనసేన కార్యకర్తలు ఇస్టానుసారంగా వ్యవహరిస్తూ ఓటర్లను భయభ్రాంతులకు గురిచేశారు. పవన్‌  కల్యాణ్‌ పుట్టిన రోజు వేడుకలను పురస్కరించుకుని మోటార్‌ సైకిళ్ల సైలెన్సర్లు తీసి గట్టిగా కేకలు వేస్తూ, మనుషులపైకి దూసుకెళ్తూ ర్యాలీలు నిర్వహించారు. జన సైనికులు,  కార్యకర్తలు చేస్తున్న ధ్వనికాలుష్యం, ఫ్లెక్సీ ధ్వంసం వంటి కార్యక్రమాలపై మండల ప్రజలు తీవ్ర ఆగ్రహం వ్యక్తం చేస్తున్నారు. ఫ్లెక్సీని బ్లేడ్లతో కోసి ధ్వంసం చేయడంపై మండల వైఎస్సార్‌సీపీ శ్రేణులు వీరవాసరం పోలీస్‌ స్టేషన్‌లో ఫిర్యాదు చేశాయి. బాధ్యులను గుర్తించి విచారణ చేపడతామని వీరవాసరం ఎస్సై బి.మహేశ్వరరావు తెలిపారు.   

భైంసా (ముథోల్‌): దేశంలో ఆంగ్లేయుల పాలన కొనసాగుతున్నకాలమది. స్వాతంత్రం కోసం జాతీయ నాయకులు పోరాడుతున్నారు. బాలగంగాధర్‌ తిలక్‌ సైతం అదేబాటలో నడిచాడు. అందరినీ సమైక్యంగా కలుపుకుపోవాలన్న ఆలోచనతో ముందుకు కదిలాడు. ఆ రోజుల్లో ఆంగ్లేయులు సభలు, సమావేశాలు నిర్వహించుకునేందుకు అనుమతి ఇచ్చేవారు కాదు. నలుగురు ఒక చోట కలుసుకునే అవకాశంలేదు. ఆ రోజుల్లో ఇళ్లలోనే గణపతి పూజలు జరిగేవి. అలాకాకుండా ఏటా గణేశ్‌ విగ్రహాలను ప్రతిష్టిస్తే అంతా కలిసి ఒకేచోట ఉత్సవాలు జరుపుకుంటారని అనుకుని ఆ దిశగా అడుగులు వేశాడు. 1893లో బాలగంగాధర్‌ తిలక్‌ మహారాష్ట్రలోని పుణేలో శ్రీ కస్బ గణపతిని ప్రతిష్టించి ఉత్సవాలను ప్రారంభించాడు. అప్పటి నుంచి 127 ఏళ్లుగా ఉత్సవాలు కొనసాగుతున్నాయి.   కుభీర్‌కు వచ్చి... ఆ సమయంలో ముథోల్‌ ప్రాంతం నైజాం పరిపాలనలో ఉండేది. ముథోల్‌ ప్రాంతమంతా నాందేడ్‌ జిల్లా పరిధిలోకి వచ్చేది. బాలగంగాధర్‌ తిలక్‌ దేశమంతా పర్యటిస్తూ ఇప్పటి నిర్మల్‌  జిల్లాలోని ముథోల్‌ నియోజకవర్గ పరిధిలో గల కుభీర్‌కు చేరుకున్నారు. అప్పుడు కుభీర్‌ను పాలించే యశ్వంత్‌రావుదేశ్‌ముఖ్‌కు బాలగంగాధర్‌తిలక్‌ దగ్గరి బంధువు. 1905లోనే భైంసాకు వచ్చిన బాలగంగాధర్‌తిలక్‌ పట్టణానికి చెందిన నారాయణ్‌వాగ్‌తో సమావేశమయ్యారు. అప్పుడే కుభీర్‌లో ఉత్సవాలు ప్రారంభమయ్యాయి. అప్పట్లో కుభీర్‌నుపాలించే యశ్వంత్‌రావుదేశ్‌ముఖ్‌ గణేశ్‌ ఉత్సవాలను నిర్వహించేవారు. 1950 నుంచి 40ఏళ్లపాటు కుభీర్‌కు చెందిన వైద్యనాథ్‌ ఉత్సవాల నిర్వాహణను చూసుకున్నారు. నేడు గ్రామస్తులు ఈ ఉత్సవాలను కొనసాగిస్తున్నారు. భైంసా పట్టణంలో 101 ఏళ్లుగా.. భైంసాలో 1919లో సార్వజనిక్‌ గణేశ్‌ మండలి ఆధ్వర్యంలో గోపాలకృష్ణ మందిరంలో మొదటిసారిగా నారాయణ వాగ్‌ సమక్షంలో ఉత్సవాలు ప్రారంభించారు.101 ఏళ్ళుగా గోపా లకృష్ణ మందిరంలో గణేశ్‌ ఉత్సవాలు ఇంకా కొనసాగుతున్నాయి. నిమజ్జనం రోజున ఇక్కడే పూజలు చేసి శోభాయాత్ర ప్రారంభిస్తారు. 1921లో హతిగణేశ్‌ మండలి ఉత్సవాలను ప్రారంభించింది. నేడు భైంసా పట్టణంలో 100కు పైగా మండళ్లు గణేశ్‌ ఉత్సవాలను జరుపుకుంటున్నాయి. అప్పట్లో అంతా కలిసి భజనలు చేస్తూ ఒకేచోట ఉత్సవాలు చేసుకునేవారు. నేడు గణేశ్‌ మండళ్ల సంఖ్య 100కు పైగానే చేరింది. ఫోటోలు ‘సాక్షి’కి పంపండి... నవరాత్రుల పాటు ఆ దేవదేవుడిని కొలవడానికి మీరు ఏర్పాటు చేసే అపురూపమైన మట్టి ప్రతిమల ఫోటోలను  ‘సాక్షి’ పంపించండి. మీ సామాజిక కర్తవ్యాన్ని నలుగురికి తెలియజేసి అందరికీ స్పూర్తిగా నిలవండి. మీ నగరంలో, మీ ఊరిలో, మీ వీధిలో, మీ గల్లీలో, మీ ఇంట్లో ఎక్కడైనా సరే వినాయకుడి మట్టి ప్రతిమల ఫోటోలను మొబైల్ ద్వారా మాకు పంపించండి. ఫోటోతో పాటు ఎక్కడ నెలకొల్పిందీ, పేరు, ఊరు, వీధి, ఫోన్ నంబర్ వంటి పూర్తి వివరాలతో lordganapati@sakshi.comకు మెయిల్ ద్వారా పంపించండి. వాటిని మేము www.sakshi.com వెబ్‌సైట్‌లో ప్రచురిస్తాం. ఇంకెందుకు ఆలస్యం... ప్రకృతిని కాపాడుకుందాం. నలుగురికి ఆదర్శంగా నిలుద్దాం.

సాక్షి, దర్శి: మా షాపునకు వస్తే మట్టి గణపతి ఇస్తామని వినూత్న రీతిలో దర్శికి చెందిన సాగర్‌ ఫ్యాన్సీ అధినేత కల్లూరి విద్యాసాగర్‌ రెడ్డి మట్టి గణపతి విగ్రహాలు పంపిణీ చేస్తున్నారు. అయితే కొనుగోలు చేసేందుకు షాపుకు వచ్చిన అందరికీ విగ్రహాలు పంపిణీ చేస్తున్నారు. పర్యావరణ పరిరక్షణలో భాగంగా కొనుగోలు చేసినా చేయక పోయినా తమ షాపుకు వచ్చిన ప్రతి ఒక్కరికీ విగ్రహాలు ఇస్తున్నామని సాగర్‌ తెలి పారు. స్నేహితులు, బంధువులకు ఫోన్‌ చేసి మరీ విగ్రహాలు తీసుకు వెళ్లమని కోరడం గమనార్హం. గతంలో సాగర్‌ లయన్స్‌ క్లబ్‌ ప్రెసిడెంట్‌గా పని చేశారు. అప్పట్లో పర్యావరణ పరి రక్షణకు ప్రత్యేక కార్యక్రమాలు కూడా నిర్వహించారు.

సాక్షి, హైదరాబాద్‌ : వినాయక చవితి సందర్భంగా ఖైరతాబాద్‌ భారీ గణనాథుడిని గవర్నర్‌ నరసింహన్‌ దంపతులు సోమవారం దర్శించుకున్నారు. ఈ ఏడాది ద్వాదశాదిత్య రూపుడిగా దర్శనమిచ్చిన మహాగణపతికి తొలి పూజ నిర్వహించారు. ఈ సందర్భంగా నరసింహన్‌ మాట్లాడుతూ...తాను గవర్నర్ అయినప్పటి నుంచి ఖైరతాబాద్ గణేశ్‌ను దర్శించుకొని తొలి పూజ చేస్తున్నానని తెలిపారు. ఖైరతాబాద్ మహాగణపతిని దర్శించేవారికి సకల శుభాలు కలుగుతాయన్నారు. వినాయకుడి ఆశీస్సులతో బంగారు తెలంగాణ... రత్నాల తెలంగాణ అవుతుందని ఆకాంక్షించారు. మరోవైపు ఖైరతాబాద్‌ విఘ్నేశ్వరుడిని దర్శించుకునేందుకు పలువురు వీఐపీలతో పాటు సామాన్య భక్తులు కూడా భారీ సంఖ్యలో గణనాథుడి చెంతకు చేరుకుంటున్నారు. మంత్రి తలసాని శ్రీనివాస్ యాదవ్, హిమాచల్ ప్రదేశ్ నూతన గవర్నర్ బండారు దత్తాత్రేయ, నగర మేయర్ బొంతు రామ్మోహన్, ఖైరతాబాద్ ఎమ్మెల్యే దానం నాగేందర్, కార్పొరేటర్ విజయా రెడ్డి తదితరులు స్వామిని దర్శించుకున్నారు. ఈ సందర్భంగా ఎమ్మెల్యే దానం నాగేందర్ సతీమణి అనితా నాగేందర్ స్వామి వారికి వెండితో తయారు చేసిన 75 అడుగుల జంధ్యాన్ని సమర్పించారు. అదే విధంగా లంగర్‌హౌస్‌కు చెందిన భక్తులు 750 కిలోల లడ్డూను మహాగణపతికి నివేదించారు. పద్మశాలి సంఘం ఖైరతాబాద్ నియోజకవర్గ ఆధ్వర్యంలో 75 అడుగుల జంధ్యం, కండువా, గరిక మాలను స్వామి వారికి అలంకరించారు.

సాక్షి, మంచిర్యాల: ప్రకృతిని పరిరక్షించుకోవాలని చాటే అతి పెద్ద పండుగలలో వినాయక చవితి ఒకటి. వినాయక చవితి రోజున వినాయకుడిని 21 పత్రాలతో పూజించడం సంప్రదాయం. వాటి విశిష్టత...పూజ సందర్భంలో పఠించాల్సిన మంత్రాలను ఓసారి పరిశీలిద్దాం. ఓం సముఖాయ నమః  మాచీపత్రం: తెలుగులో దీనిని మాచపత్రి అంటారు. చామంతి జాతికి చెందిన ఈ ఆకులు సువాసన వెదజల్లుతాయి. ఇవి దద్దుర్లు, తలనొప్పి, వాత నొప్పులు, కంటి, చర్మ సంబంధ వ్యాధులను తగ్గిస్తాయి.  ఓం గణాధిపాయనమః  బృహతీ పత్రం: దీనిని ములక, వాకుడాకు అంటారు. ఇది దగ్గు, జలుబు, జ్వరం, అజీర్ణం, మూత్ర, నేత్ర, వ్యాధశులను నయంచేస్తుంది. దంతధావనానికి కూడా ఉపయోగిస్తారు. ఓం ఉమాపుత్రాయ నమః  బిల్వపత్రం: బిల్వపత్రం అంటే మారెడు ఆకు. ఇవి శివుడికి, మహాలక్ష్మికి కూడా ఇష్టమైనవిగా వేద పండితులు చెబుతుంటారు. ఇది జిగట విరేచనాలు, జ్వరం, మధుమేహం, కామెర్లు, నేత్ర వ్యాధులు, శరీర దుర్గంధాన్ని తగ్గిస్తుంది. ఓం గజాననాయ నమః  దూర్వాయుగ్మం: దూర్వాయుగ్మం అంటే గరిక. ఇది వినాయకుడికి అత్యంత ప్రీతిపాత్రమైనది. చర్మ వ్యాధులు, దద్దుర్లు, మూత్రంలో మంట, ముక్కు, ఉదర సంబంధ వ్యాధులు, అర్శ మొలలను నివారిస్తుంది. ఓం హరసూనవే నమః  దత్తూరపత్రం: దత్తూర అంటే ఉమ్మెత్త మొక్క. ఇది సెగ గడ్డలు, స్తనవాపు, చర్మ, శ్వాసకోశ వ్యాధులు, పెనుకొరుకుడు, నొప్పులు, రుతు వ్యాధుల నివారణకు ఉపయోగపడుతుంది.   ఓం లంబోదరాయ నమః  బదరీపత్రం: బదరీ పత్రం అంటే రేగు ఆకు. జీర్ణకోశ, రక్త సంబంధ వ్యాధులు, చిన్న పిల్లలకు వచ్చే వ్యాధుల నివారణకు ఉపయోగపడుతోంది. రోగ నిరోదక శక్తిని పెంపొందిస్తుంది.  ఓం గుహాగ్రజాయనమః  అపామార్గపత్రం: తెలుగులో ఉత్తరేణి అంటారు. ఇది దంత ధావనానికి, పిప్పి పన్పు, చెవి పోటు, రక్తం కారుట, అర్శ మొలలు, ఆణెలు, గడ్డలు, అతి ఆకలి, జ్వరం, మూత్ర పిండాల్లో రాళ్ళను నివారిస్తాయి. ఓం గజకర్ణాయనమః  తులసీపత్రం: హిందువులు దేవతార్చనలో వీటిని విధిగా వాడతారు. ఇది దగ్గు, జలుబు, జ్వరం, చెవిపోటు, పన్నునొప్పి, తుమ్ములు, చుండ్రు, అతిసారం, గాయాలను తగ్గిస్తుంది. వ్యాధి నిరోధక శక్తిని పెంపొందిస్తుంది. ఓం ఏకదంతాయ నమః  చూతపత్రం: చూతపత్రం అంటే మా మిడిఆకు. ఈ ఆకులకు శుభకార్యాల్లో విశిష్టస్థానం ఉంది.  ఇది రక్త విరేచనాలు, చర్మవ్యాధులు, ఇంట్లోని క్రిమికీటకాల నివారణకు ఉపయోగపడుతోంది. ఓం వికటాయ నమః  కరవీరపత్రం: దీనినే గన్నెరు అంటారు. దీని పువ్వులు తెలుపు, పసుపు, ఎరుపు రంగుల్లో ఉంటాయి.  ఇది కణుతులు, తేలుకాట్లు, విషకీటకాల కాట్లు, దురద, కంటి, చర్మ సంబంద వ్యాధులను తగ్గిస్తుంది.  ఓం భిన్నదంతాయనమః  విష్ణుక్రాంత పత్రం: ఇది నీలం, తెలుపు పువ్వులుండే చిన్న మొక్క. నీలం రం గు పువ్వులుండే మొక్కను విష్ణుక్రాంత అని పిలుస్తారు. ఇది జ్వరం, కఫం, పడిశం, దగ్గు, ఉబ్బసం వంటి వ్యాధులను తగ్గిస్తుంది. ఓం వటవే నమః  దాడిమీ పత్రం: దాడిమీ అంటే దానిమ్మ మొక్క. శక్తి స్వరూపిణి అంబకు దాడిమీ ఫల నైవెద్యం ఎంతో ఇష్టం. అతిసారం, విరేచనాలు, దగ్గు కామెర్లు, అర్శ మొలలు, ముక్కు నుంచి రక్తం కారటం వ్యాధుల్ని తగ్గిస్తుంది. ఓం సర్వేశ్వరాయ నమః  దేవదారుపత్రం: దేవతలకు అత్యంత ఇష్టమైన ఆకు దేవదారు. దీని మానుతో చెక్కే విగ్రహాలకు సహజత్వం ఉంటుంది. ఇది అజీర్తి, పొట్ట సంబందిత వ్యాధులు, చర్మవ్యాధులు, కంటి వ్యాధులను తగ్గిస్తుంది.  ఓం పాలచంద్రాయ నమః  మరువక పత్రం: దవనం, మరువం అంటారు. ఆకులు ఎండినా సువాసన వెదజల్లడం దీని ప్రత్యేకత. జీర్ణశక్తిని పెంపొందిస్తుంది, జుట్టు రాలడం, చర్మవ్యాధులను తగ్గిస్తుంది. ఓం హేరంభాయ నమః  సింధువారపత్రం: వీటినే వావిలి అంటారు. ఇవి జ్వరం, తలనొప్పి, కీళ్లనొప్పులు, గాయాలు, చెవిపోటు, చర్మ వ్యాధులు, మూర్ఛవ్యాధి, ప్రసవం అనంతరం వచ్చే ఇబ్బందులను తగ్గిస్తాయి.   ఓం సురాగ్రజాయ నమః  గండకీపత్రం: దీనిని లతా దూర్వా, దేవ కాంచనం అంటారు. మూర్ఛ, కఫం, పొట్ట సంబందిత వ్యాధులు, నులిపురుగులను నివారిస్తుంది. దీని ఆకులను ఆహారంగా కూడా వినియోగిస్తారు. ఓం ఇభవక్రాయ నమః  శమీపత్రం: జమ్మిచెట్టు ఆకులను శమీ పత్రాలంటారు. ఇది కఫం, మూల వ్యాధి, కుష్టు వ్యాధి, అతిసారం, దంత వ్యాధులను నివారించేందుకు ఉపయోగపడుతుంది.  ఓం వినాయక నమః  అశ్వత్థపత్రం: రావి ఆకులను అశ్వత్థ పత్రాలంటారు. ఇవి మలబద్దకం, కామెర్లు, వాంతులు, మూత్ర వ్యాధులు, నోటి పూత, చర్మవ్యాధులను నివారిస్తుంది. జీర్ణశక్తిని, జ్ఞాపకశక్తిని పెంపొందిస్తుంది.  ఓం సురసేవితాయ నమః  అర్జునపత్రం: తెల్లమద్ది ఆకులను అర్జున పత్రాలంటారు. ఇవి మర్రి ఆకులను పోలి ఉంటాయి. ఇది అడవుల్లో  పెరిగే పెద్ద వృక్షం. చర్మ వ్యాధులు, కీళ్లనొప్పులు, మలాశయ దోషాలు, గుండె జబ్బుల నివారణకు బాగా పనిచేస్తుంది.  ఓం కపిలాయ నమః  అర్కపత్రం: జిల్లేడు ఆకులను అర్క పత్రాలంటారు. శివుడికి ప్రీతిపాత్రమైనవి. ఇవి చర్మవ్యాధులు, సెగగడ్డలు, కీళ్ల నొప్పులు, చెవి పోటు, కోరింత దగ్గు, దంతశూరి, విరేచనాలు, తిమ్మిర్లు, బోదకాలు వ్రణాలను తగ్గిస్తాయి.

సాక్షి, కవిటి: శ్రీకాకుళం జిల్లా కవిటి మండల కేంద్రంగా బొరివంకలో శ్రీబాలగణపతి ఉద్దానం యూత్‌ క్లబ్‌ పర్యావరణ పరిరక్షణలో భాగంగా లేఖినీరూప కాణిపాక గణపతిని రూపొందించారు. గత ఏడేళ్లుగా పర్యావరణానికి హాని చేయని రీతిలో గణనాథుని విగ్రహాల తయారీలో అందివేసిన చెయ్యిగా పేరు తెచ్చుకున్న ఉద్దానం యూత్‌ క్లబ్‌ సభ్యుడు, శిల్పి భైరి తిరుపతిరావు ఈ విగ్రహాన్ని రూపొందించారు. 3,500 సుద్దముక్కలను తీసుకుని ప్రతీ సుద్ద ముక్కపై గణనాథుడిని చెక్కాడు. వీటిని మట్టితో చేసిన గణనాథుడి శరీర ఉపరితలంపై అందంగా అలంకరించాడు. వాటికి ప్రకృతి సిద్ధమైన రంగులను అద్ది ఆకర్షణీయంగా సిద్ధం చేశాడు. పర్యావరణ హితాన్ని కాంక్షిస్తూ వరి నారు, నారికేళ, నలుగుపిండి, వనమూలిక, గోధుమ నారు, కొబ్బరిపూలతో వివిధ రూపాల్లో గణేశుని విగ్రహాలను తయారు చేశారు. వీటికి లిమ్కా బుక్‌ ఆఫ్‌ రికార్డ్స్‌లో స్థానం దక్కడం విశేషం.  ఫోటోలు ‘సాక్షి’కి పంపండి... నవరాత్రుల పాటు ఆ దేవదేవుడిని కొలవడానికి మీరు ఏర్పాటు చేసే అపురూపమైన మట్టి ప్రతిమల ఫోటోలను  ‘సాక్షి’ పంపించండి. మీ సామాజిక కర్తవ్యాన్ని నలుగురికి తెలియజేసి అందరికీ స్పూర్తిగా నిలవండి. మీ నగరంలో, మీ ఊరిలో, మీ వీధిలో, మీ గల్లీలో, మీ ఇంట్లో ఎక్కడైనా సరే వినాయకుడి మట్టి ప్రతిమల ఫోటోలను మొబైల్ ద్వారా మాకు పంపించండి. ఫోటోతో పాటు ఎక్కడ నెలకొల్పిందీ, పేరు, ఊరు, వీధి, ఫోన్ నంబర్ వంటి పూర్తి వివరాలతో lordganapati@sakshi.comకు మెయిల్ ద్వారా పంపించండి. వాటిని మేము  www.sakshi.com వెబ్ సైట్‌లో ప్రచురిస్తాం. ఇంకెందుకు ఆలస్యం... ప్రకృతిని కాపాడుకుందాం. నలుగురికి ఆదర్శంగా నిలుద్దాం.

సాక్షి, సిటీబ్యూరో: గణేష్‌ ఉత్పవాల్లో భాగంగా ఇంట్లోనే కాకుండా వీధుల్లోనూ, అపార్ట్‌మెంట్లలోనూ వినాయకుని విగ్రహాన్ని ప్రతిష్టించి పూజలు చేయడం అనవాయితీ. నిర్వాహకులు వీధుల్లో పెద్దపెద్ద మండపాలతో పాటు భారీ విగ్రహాలను ఏర్పాటు చేస్తుంటారు. మండపాన్ని వివిధ లైట్లతో అందంగా అలంకరిస్తుంటారు. అపార్ట్‌మెంట్, కాలనీవాసులంతా ప్రతిరోజూ సాయంత్రం తమ కుటుంబ సభ్యులతో కలిసి మండపాల వద్దకు చేరుకుని భక్తిశ్రద్ధలతో పూజలు నిర్వహిస్తుంటారు. లైటింగ్‌ కోసం తాత్కాలికంగా విద్యుత్‌ కనెక్షన్లను తీసుకుంటారు. తాత్కాలికంగా మండపాల్లో స్విచ్‌బోర్డులు ఏర్పాటు చేసి, ఒకే ప్లగ్‌ నుంచి లైటింగ్, సౌండింగ్‌ కోసం కనెక్షన్లు ఏర్పాటు చేస్తారు. ఈ విద్యుత్‌ కనెక్షన్ల పట్ల మరింత అప్రమత్తంగా ఉండాలి. ఏమాత్రం నిర్లక్ష్యంగా వ్యవహరించినా..విద్యుత్‌షాక్‌ తగిలి.. మృత్యువాతపడే ప్రమాదం లేకపోలేదని తెలంగాణ విద్యుత్‌ తనిఖీ విభాగం ప్రధాన అధికారి బి.సత్యనారాయణరాజు స్పష్టం చేశారు. ఈ మేరకు ఆయన మండప నిర్వాహకులకు పలు సూచనలు చేశారు. విద్యుత్‌ ప్రమాదాలు జరగకుండా ఉండాలంటే... ♦ మండపాలకు గుర్తింపు ఉన్న ఎలక్ట్రీషియన్‌తోనే విద్యుత్‌ పనులు చేయించుకోవాలి. ♦ మండపంలో ఐఎస్‌ఐ గుర్తింపు పొందిన స్విచ్‌ బోర్డులు, ప్లగ్‌లు, కేబుళ్లను మాత్రమే వాడాలి. ♦ ఎర్త్‌ లీకేజ్‌ సర్క్యూట్‌ బ్రేకర్‌(ఈఎల్‌సీబీ)లను ఏర్పాటు చేసుకోవాలి. ♦ లోడును బట్టి..2.5 స్వై్కర్‌ ఎంఎం వైర్‌ను వాడాలి. ♦ దేనికి ఎంత విద్యుత్‌ ఖర్చు అవుతుందో ముందే ఒక అంచనాకు వచ్చి ఆ సామర్థ్యం గల వైర్లను ఏర్పాటు చేసుకోవాలి. ఉదాహరణకు 10 ఏఎంపీఎస్‌ విద్యుత్‌ ఉపయోగించే చోట 20 ఏఎంపీఎస్‌ విద్యుత్‌ భారం పడే లైట్లు ఉపయోగిస్తే అధిక ఒత్తిడి వల్ల వైర్లు కాలిపోయే ప్రమాదం ఉంది.   ♦ ఒకే స్విచ్‌బోర్డుకు ఎక్కువ ప్లగ్‌లు ఉపయోగించడం వల్ల షార్ట్‌సర్క్యూట్‌లు జరిగే ప్రమాదం ఉంది.   ♦ విద్యుత్‌ కనెక్షన్లను తొమ్మిది ఫీట్ల కంటే ఎక్కువ ఎత్తులో ఏర్పాటు చేసుకోవాలి.   ♦ సాధ్యమైనంత వరకు వైర్లకు జాయింట్స్‌ లేకుండా చూసుకోవాలి. ఒక వేళ ఉంటే వాటిని టేప్‌తో అతికించి కాళ్లు, చేతులకు తాకకుండా జాగ్రత్తపడాలి.   ♦ ప్రతి మండపంలోనూ విధిగా ఐదు కేజీల కార్బన్‌డైయాక్సైజ్‌ ఫైర్‌సేఫ్టీ పరికరాలను ఏర్పాటు చేయాలి. బకెట్లో ఇసుక నింపి ఉంచుకోవాలి. 

సాక్షి, హైదరాబాద్‌ : వినాయక చవితి సందర్భంగా ఆంధ్రప్రదేశ్‌ ముఖ్యమంత్రి వైఎస్‌ జగన్‌మోహన్‌రెడ్డి రాష్ట్ర ప్రజలకు శుభాకాంక్షలు తెలియజేశారు. గణనాథుని ఆశీస్సులతో ఆంధ్రప్రదేశ్‌ రాష్ట్రం.. అదే విధంగా ప్రతీ వ్యక్తి జీవితం శాంతి, సౌఖ్యాలతో వర్ధిల్లాలని సీఎం జగన్‌ ఆకాంక్షించారు. ఈ మేరకు ఆయన ట్వీట్‌ చేశారు. Warm wishes to all on the auspicious occasion of #VinayakaChavithi ! May the divine blessings of Lord Ganesha be bestowed upon our State & enrich everyone's lives with wisdom, peace & prosperity. — YS Jagan Mohan Reddy (@ysjagan) September 2, 2019 కాగా నేడు మహానేత వైఎస్సార్‌ పదవ వర్ధంతి సందర్భంగా సీఎం జగన్‌మోహన్‌రెడ్డి కుటుంబ సభ్యులతో కలిసి ఇడుపులపాయలో నివాళులు అర్పించారు. సీఎంతో పాటు వైఎస్సార్‌సీపీ గౌరవాధ్యక్షురాలు వైఎస్‌ విజయమ్మ, వైఎస్‌ భారతి, వైఎస్‌ షర్మిల వైఎస్సార్‌ ఘాట్‌ వద్ద అంజలి ఘటించారు. వారితో పాటు వైఎస్సార్‌సీపీ నాయకులు టీటీడీ చైర్మన్‌ వైవీ సుబ్బారెడ్డి, ప్రభుత్వ చీఫ్‌ విప్‌ గడికోట శ్రీకాంత్‌డ్డి, వైఎస్సార్‌ అభిమానులు నివాళులర్పించారు. ఇక ఇడుపులపాయ నుంచి బయల్దేరిన అనంతరం పులివెందుల నియోజకవర్గంలో నిర్వహించే వైఎస్సార్‌ వర్ధంతి కార్యక్రమాల్లో సీఎం జగన్‌ పాల్గొంటారు. భాకరాపురంలో వైఎస్‌ వివేకానందరెడ్డి విగ్రహాన్ని ఆవిష్కరిస్తారు. మధ్యాహ్నం 12 గంటలకు పులివెందుల అభివృద్ధిపై సీఎం సమీక్ష నిర్వహిస్తారు. సాయంత్రం 4 గంటలకు విజయవాడలోని పోలీస్‌ కంట్రోల్‌ రూమ్‌ వద్ద వైఎస్సార్‌ విగ్రహాన్ని ఆవిష్కరించనున్నారు.

ఖైరతాబాద్‌:  గణేశ్‌ నవరాత్రి వేడుకలకు నగరం సిద్ధమైంది. సోమవారం నుంచి 9 రోజులపాటు సందడి చేయనున్న గణనాథులు అందమైన మండపాల్లో కొలువుదీరారు.ఇక ఈసారి ఖైరతాబాద్‌ మహాగణపతి శ్రీ ద్వాదశాదిత్య రూపుడిగా దర్శనమివ్వనున్నాడు. చరిత్రలోనే మొదటిసారిగా 61అడుగుల ఎత్తులో....12 ముఖాలు...24 చేతులతో సూర్యభగవానుడి రథంపైనిలబడిన ఆకారంలో భక్తులకుదర్శనమిచ్చేందుకు మహాగణపతిసిద్ధమయ్యాడు. 65వ సంవత్సరంసందర్భంగా అత్యంత అద్భుతంగా..శిల్పి చిన్నస్వామి రాజేంద్రన్‌ రూపొందించినఖైరతాబాద్‌ మహాగణపతికి వినాయక చవితి సందర్భంగా తొలిరోజు సోమవారం పూజా విశేషాలు ఇవీ... ♦ ఉదయం 5 గంటలకు గణపతి హోమం ♦ ఉదయం 6 గంటలకు75 అడుగుల కండువా, 75 అడుగుల జంధ్యం, 75 అడుగుల గరికమాల ఊరేగింపుగా ఖైరతాబాద్‌ మండపానికి రాక.   ♦ ఉదయం 7–8 గంటల మధ్య మహాగణపతికి పూజా కార్యక్రమం...కండువా, జంధ్యం, గరికమాల అలంకరణ.   ♦ ఉదయం 10–11 గంటల మధ్య లంగర్‌హౌస్‌ నుంచి ప్రత్యేకంగా తయారుచేసిన 750 కిలోల లడ్డూ సమర్పణ.   ♦ మధ్యాహ్నం 12 గంటలకు శ్రీ ద్వాదశాదిత్య మహాగణపతికి గవర్నర్‌ నరసింహన్‌దంపతుల తొలిపూజ. ♦ సాయంత్రం 6 గంటలకు కేంద్ర సహాయమంత్రి కిషన్‌రెడ్డి, మంత్రి ఈటలరాజేందర్‌ రాక.  ప్రత్యేక పూల అలంకరణ..... ఖైరతాబాద్‌ మహాగణపతికి తొలిపూజకోసం ప్రత్యేక పూల అలంకరణ చేపట్టారు. ఇందుకోసం ప్రత్యేకంగా 300 కిలోల పసుపు బంతి, 300 కిలోల ఎరుపు బంతి, 100 కిలోల చామంతి, 30 అరటి చెట్లు ఉపయోగించి మాలలు తయారు చేశారు. ఒక్కో మాల 80 అడుగుల పొడవు ఉంటుంది.

వినాయక చవితి రోజున గణేశుడిని సభక్తితోపూజిస్తారు జమున. వినాయకుడి చరిత్ర మీద వచ్చిన తొలి సినిమాలో ఆమె సత్యభామ. అప్పటి నుంచి ఇప్పటివరకూ తెలుగువాళ్లకు... సత్యభామ అంటే జమునే. ఆమె శ్రీకృష్ణుడి భక్తురాలు. రోజూ కృష్ణుడిని కొలుస్తారు. ఆమె కోరుకున్నవన్నీ ఆ కృష్ణుడు ఇచ్చాడు. సహస్ర చంద్రదర్శనం చేసిన జమున ఇప్పుడు... కృష్ణుడిని ఏం కోరుకుంటున్నారు? కుడుములు తింటూ.. జమున ఇంటర్వ్యూ చదవండి. ♦ ఆగస్ట్‌ 30తో 83 ఏళ్లు పూర్తి చేసుకుని, 84లోకి అడుగుపెట్టారు. 83 ఏళ్లు దాటిన వారిని సహస్రచంద్ర దర్శనం (జీవితకాలంలో వెయ్యి పున్నములను చూస్తారని ఆ లెక్క) చేశారంటారు. బర్త్‌డే నాడు తులాభారం ఇచ్చినట్లున్నారు.. అవును. నా బరువంత బియ్యం, బెల్లం, నెయ్యి ఇచ్చాం. వంశీ రామరాజుగారి ఆధ్వర్యంలో వాటి పంపిణీ జరిగింది. ఇన్నేళ్ల జీవితం ఆనందంగా గడిచినందుకు ఆ కృష్ణుడికే కృతజ్ఞతలు చెప్పాలి. ♦ పుట్టిన రోజు నాడు చక్కగా పట్టుచీర కట్టుకుని, వడ్డాణం పెట్టుకుని భలేగా ఉన్నారు.. సినిమా తారలు పబ్లిక్‌లోకి వచ్చినప్పుడు అందంగా, హుందాగా కనపడాలి. ఎందుకంటే ప్రేక్షకుల హృదయాల్లో మా అందమైన రూపం నిలిచిపోతుంది. అందుకే నేను పట్టుచీరలే కట్టుకుంటాను. నగలు కూడా బాగానే పెట్టుకుంటాను. అయితే మొన్న పుట్టినరోజుకి అమ్మాయి పెట్టుకోమంటే వడ్డాణం కూడా పెట్టుకున్నాను. అరవంకీలు ఉన్నాయి కానీ, బరువు అనిపించి పెట్టుకోలేదు. ♦ ఈ రోజు వినాయక చవితి. చిన్నప్పుడు ఈ పండగను ఎలా చేసుకునేవారు? మేం దుగ్గిరాలలో ఉండేవాళ్లం. ఉదయం నిద్రలేచి, తలస్నానం చేసి పత్రి అవీ తీసుకురావడానికి కాలువ దగ్గరికెళ్లేవాళ్లం. ఎవరైనా ముందుకు తోస్తే చెట్టెక్కేదాన్ని. పత్రి కోసేదాన్ని. చంద్రుడిని చూడక ముందే కథ చదవాలి...లేకపోతే  నిందలకు గురవుతాం అంటారు... అవును.. ఈ రోజు గణేశుడిని పూజించ కుండా చంద్రుడ్ని చూస్తే నీలాపనిందలకు గురవుతాం అంటారు. కానీ ఇప్పుడు ఏం నీలాపనిందలు వస్తాయో చూద్దామని కథ వినడానికి కుదరకపోయినా కావాలని చంద్రుడ్ని చూస్తున్నాను (నవ్వుతూ). ♦ అంటే.. ఇలాంటి వాటి మీద నమ్మకం లేదా? నమ్మకం లేక కాదు. ఏదో సరదాగా అన్నాను. అయితే నాకు మూఢనమ్మకాలు లేవు. దెయ్యాలున్నాయని పూజల చేయడం వంటి వాటిని నమ్మను. ఒకప్పుడు నేను షూటింగ్‌ పూర్తి చేసుకుని, ఇంటికి వచ్చిన వెంటనే.. అది రాత్రి పది అవ్వనివ్వండి... అర్ధరాత్రి అవ్వనివ్వండి.. మా అమ్మగారు దిష్టి తీశాకే లోపలికి రానిచ్చేవారు. మొన్న బర్త్‌డేని నా కూతురు స్రవంతి బాగా గ్రాండ్‌గా చేసింది. ఈ వేడుకలో ‘మీర జాలగలడా..’ పాటకు డ్యాన్స్‌ చేశాను. ఆ వీడియో వైరల్‌ అయింది. ఎక్కడెక్కడినుంచో ఫోన్లు చేశారు. చాలా చురుకుగా ఉన్నారని చెప్పారు. నేనేమీ దిష్టి తగులుతుందనుకోలేదు. కాంప్లిమెంట్స్‌ని బాగా ఎంజాయ్‌ చేశాను. ♦ ఇప్పుడు మీ లైఫ్‌ స్టైల్‌ ఎలా ఉంది? ప్రతి రోజూ ఉదయం 6 గంటలకు నిద్ర లేస్తాను. బ్రష్‌ చేసుకుని కాఫీ తాగుతాను. తర్వాత స్నానం చేసి, పూజ చేసుకుంటాను. ఇంతకుముందు అయితే పూజ చేశాకే టిఫిన్‌ తినేదాన్ని. ఇప్పుడు ఆకలికి ఆగలేకపోతున్నాను. పైగా ఆకలితో పూజ చేస్తే ఏకాగ్రత కుదరదు. దేవుడు కూడా ఆకలితో పూజ చేయమని చెప్పలేదు. అందుకే ఇప్పుడు టిఫిన్‌ తిన్నాకే పూజ చేస్తున్నా. పేపర్లు చదవడం, టీవీ చూడటం, ఇంటికొచ్చేవాళ్లతో మాట్లాడటం... రోజంతా బాగా గడిచిపోతుంది. ♦ ఆహారం విషయంలో నియమాలేమైనా? నేను ప్యూర్‌ వెజిటేరియన్‌. శాకాహారంలో అన్నీ తింటాను. ఒకప్పుడు నెయ్యి బాగా తినేదాన్ని. ఇప్పుడు తగ్గించేశాను. మా అమ్మగారు చిన్నప్పుడు కృష్ణుడి దగ్గర ‘కృష్ణా... రాత్రంతా చల్లగా కాపాడావు. పగలంతా కూడా చల్లగా కాపాడు’ అని పూజించమనేవారు. ఇప్పుడు రోజూ అలానే చేస్తున్నా. ♦ మీ చీరల ఎంపిక బాగుంటుంది.. షాపింగ్‌ ఎవరు చేస్తారు? స్వయంగా వెళ్లి కొనుక్కోను. చెప్పాలంటే నాకు పెట్టుడు చీరలు ఎక్కువ. పట్టు చీరలు, కాటన్‌ చీరలు అవీ పెడుతుంటారు. ఎవరు పెట్టినా కట్టుకుంటాను. అది కాటన్‌ చీర అయినా సరే కట్టుకుని ఓ గంట సేపు ఉంటాను. అప్పుడే ఇచ్చినవాళ్లకు కూడా తృప్తిగా ఉంటుంది. నాకు మొదట్నుంచీ నైలాన్‌ చీరలు పెద్దగా నచ్చవు. అవి జారిపోతూ అసౌకర్యంగా ఉంటాయి. అందుకే పట్టు చీరలకు లేదా మంచి కాటన్‌ చీరలకు ప్రాధాన్యం ఇస్తాను. ♦ మీకు కుడుములు చేయడం వచ్చా? అస్సలు రాదు. మా అమ్మగారు చేసేవారు. ఇప్పుడు ఎవరో ఒకరు చేసి పెడతారు. పండగ రోజంతా కుడుములు తింటూ ఉంటాను. ముఖ్యంగా కొబ్బరి లౌజు పెట్టి కుడుములు చేస్తారు కదా.. అవి చాలా ఇష్టం. వినాయకుడి పేరు చెప్పి ఫుల్లుగా తింటాను (నవ్వులు). ♦ వినాయక వ్రత కల్పములో నిజమేంటో తెలుసుకుని సత్రాజిత్తు తన కుమార్తె సత్యభామను శ్రీకృష్ణుడికిచ్చి పెళ్లి చేయడం అనేది ముఖ్యమైన అంశం. 1957లో విడుదలైన ‘వినాయక చవితి’ సినిమాలో మీరు సత్యభామగా చేశారు. ఆ సినిమాని గుర్తు చేసుకుంటారా? ఆ సినిమాకి సముద్రాల రాఘవచార్యగారు దర్శకులు. గొప్ప దర్శకుడాయన. అందులో పాటలన్నీ బాగుంటాయి. బోలెడన్ని శ్లోకాలు, పద్యాలు, పాటలు ఉంటాయి. నేను ఫస్ట్‌ సత్యభామగా చేసింది ఆ సినిమాలోనే. ఆ తర్వాత ‘శ్రీకృష్ణ తులాభారం’లో సత్యభామ పాత్ర చేశాను. ‘శ్రీకృష్ణ విజయం’లోనూ ఆ పాత్ర చేశాను. మొత్తం మూడుసార్లు సత్యభామగా కనిపించాను. ♦ సత్యభామ పాత్ర అంటే మీరే చేయాలనేంతగా పేరు తెచ్చుకున్నారు. దాని గురించి? ‘వినాయక చవితి’ సినిమాలో అమాయకత్వం నిండిన సత్యభామగా చేశాను. నాకు పెళ్లి అవ్వక ముందు చేసిన సినిమా అది. ఆ తర్వాత పెళ్లయిన కొత్తలో ‘శ్రీకృష్ణ తులాభారం’లో సత్యభామగా చేసే అవకాశం వచ్చింది. ‘పెళ్లయింది కదా. లావయ్యుంటుంది. ఏం బాగుంటుంది’ అని కొంతమంది అన్నారు. ‘ఏం పెళ్లయితే లావైపోతామా?’ అనుకున్నాను. చెప్పాలంటే పెళ్లి తర్వాత ఇంకా పరిణతి వచ్చి, నా అందం రెట్టింపు అయింది. అప్పుడు సత్యభామగా నన్ను చూసి, అందరూ భేష్‌ అన్నారు. మూడోసారి ‘శ్రీకృష్ణ విజయం’లో ఆ పాత్ర చేసినప్పుడు బిడ్డల తల్లిని. అయినా నా అందం, ఆహార్యం చెక్కు చెదరలేదు. అలా సత్యభామగా నేనే కరెక్ట్‌ అనే పేరు తెచ్చుకోగలిగాను. కుమార్తె స్రవంతి, మనవడు అవిష్‌తో... ♦ కృష్ణుడి పత్నిగా సినిమాల్లో నటించారు. నిజజీవితంలో మీరు కృష్ణుడి భక్తురాలేనా? ఏ దైవాన్ని ఎక్కువగా పూజిస్తారు? నా చిన్నప్పుడు మా ఇంట్లో ఓ కృష్ణుడి ఫొటో ఉండేది. చేత్తో రామచిలక, నెమలి íపింఛం పట్టుకుని చక్కగా నవ్వుతూ కనిపించే ఫొటో అది. నాకా ఫోటో అంటే ఇష్టం. ప్రతిరోజూ ఉదయం, సాయంత్రం మా అమ్మగారు పూజలు చేసేవారు. నేను మాత్రం స్కూల్‌కి వెళ్లే ముందో, సాయంత్రం వచ్చాకో అగరబత్తీలు వెలిగించి, కృష్ణుడి పటానికి గుచ్చేదాన్ని. ఆ అద్దం అంతా నల్లగా అయిపోయిందనుకోండి (నవ్వుతూ). ‘కృష్ణా.. నన్ను పెద్ద ఫిలిం స్టార్‌ని చెయ్యి’ అని కోరుకునేదాన్ని. నా కోరికను మన్నించాడు. ♦ మరి.. హీరోయిన్‌ అయ్యాక కృష్ణుడ్ని ఏం కోరుకున్నారు? నేను నా జీవితాంతం ఆ కృష్ణ భగవానుడిని ఏదో ఒకటి అడుగుతూనే ఉన్నాను. హీరోయిన్‌ అయ్యాక ‘గౌరవమర్యాదలతో ఉండేలా చెయ్యి కృష్ణా. నా ప్రతిష్టకు ఏ భంగం రాకూడదు’ అని కోరుకున్నాను. అలాగే నిందలు వచ్చినప్పుడు ‘కృష్ణా.. ఇవన్నీ తట్టుకుని స్వాభిమానంతో నిలబడే శక్తిని ఇవ్వు’ అని దండం పెట్టుకున్నా. అలానే దీవించాడు. ♦ ఇప్పుడు ఏం కోరుకుంటున్నారు? ‘కృష్ణా.. ఇంత అద్భుతమైన జీవితం ఇచ్చావు. మంచి అమ్మానాన్న, దేవుడిలాంటి భర్త, వరాల్లాంటి ఇద్దరు (కుమార్తె స్రవంతి, కుమారుడు వంశీకృష్ణ) పిల్లలను ఇచ్చావు. మళ్లీ జన్మ అంటూ ఉంటే.. ఇలాగే గౌరవంగా, హుందాగా బతికే వరం ఇవ్వు. లేకపోతే నీలో ఐక్యం చేసుకో’ అని కోరుకుంటున్నాను. ఇప్పటివరకూ కృష్ణుడు నేను ఏం కోరుకుంటే అది ఇచ్చాడు. మళ్లీ జన్మంటూ ఉంటే ఈ జన్మలో బతికినంత హుందాగా బతికిస్తాడని నమ్ముతున్నాను. ఒకప్పుడు శక్తి కోసం కోరుకున్నాను. ఇప్పుడు ముక్తి కోసం ప్రార్థిస్తున్నాను.– డి.జి. భవాని

సాక్షి, సిటీబ్యూరో: గణేష్‌ విగ్రహాల నిమజ్జనం సోమవారం నుంచి ప్రారంభం కానుంది. ఈ నేపథ్యంలో హుస్సేన్‌సాగర్‌ చుట్టుపక్కల ప్రాంతాల్లో ట్రాఫిక్‌ ఆంక్షలు విధిస్తూ కొత్వాల్‌ అంజనీకుమార్‌ ఆదివారం ఉత్తర్వులు జారీ చేశారు. ఈ నెల 11 వరకు ప్రతి రోజూ మధ్యాహ్నం 3 నుంచి రాత్రి వరకు ఇవి అమలులో ఉంటాయని ఆయన పేర్కొన్నారు.   ♦ కర్బాలామైదాన్‌ వైపు నుంచి వచ్చే సాధారణ వాహనాలను అప్పర్‌ ట్యాంక్‌బండ్‌ మీదికి అనుమతించరు. వీటిని కవాడిగూడ చౌరస్తా వైపు పంపిస్తారు. లిబర్టీ వైపు వెళ్ళాల్సిన వారు కవాడిగూడ చౌరస్తా, గాంధీనగర్‌ టి జంక్షన్, డీబీఆర్‌ మిల్స్, ఇందిరాపార్క్, దోమలగూడ మీదుగా వెళ్ళాలి. ఖైరతాబాద్, పంజగుట్ట వైపు వెళ్ళాల్సిన వారు రాణిగంజ్, నల్లగుట్ట, సంజీవయ్యపార్క్, నెక్లెస్‌రోడ్, ఖైరతాబాద్‌ ఫ్లైవర్‌ మార్గాన్ని అనుసరించాలి. ♦ ఖైరతాబాద్‌ ఫ్లైఓవర్‌ వైపు నుంచి వచ్చే సాధారణ వాహనాలను ఎన్టీఆర్‌ మార్గ్‌లోకి అనుమతించరు. వీటిని నెక్లెస్‌రోడ్‌ లేదా మింట్‌ కాంపౌండ్‌ వైపు పంపిస్తారు. ♦ తెలుగుతల్లి విగ్రహం జంక్షన్‌ నుంచి సాధారణ వాహనాలను ఎన్టీఆర్‌ మార్గ్‌లోకి అనుమతించరు. వీటిని ఇక్బాల్‌ మీనార్‌ వైపు పంపిస్తారు. సికింద్రాబాద్‌ వైపు వెళ్లే ట్రాఫిక్‌ను తెలుగుతల్లి ఫ్లైఓవర్, కట్టమైసమ్మ దేవాలయం, డీబీఆర్‌ మిల్స్, చిల్డ్రన్స్‌ పార్క్, సెయిలింగ్‌ క్లబ్, కర్బాలా మైదాన్‌ మీదుగా మళ్లిస్తారు. ♦ గోశాల వైపు నుంచి అప్పర్‌ ట్యాంక్‌బండ్‌ వైపు వెళ్ళే వాహనాలను డీబీఆర్‌ మిల్స్, లోయర్‌ ట్యాంక్‌బండ్‌ మీదుగా పంపిస్తారు.

వినాయకుడు విఘ్నాలను తొలగిస్తాడని ప్రతీతి. అందుకే ఆయనను విఘ్నేశ్వరుడని అంటారు. ప్రమథగణాలకు అధిపతి గనుక గణపతి అంటారు. పెద్ద ఉదరంతో అలరారుతుంటాడు గనుక లంబోదరుడని అంటారు. మూషికాన్ని వాహనంగా చేసుకున్నందున మూషికవాహనుడని అంటారు. ఏనుగు తల కలిగి ఉండటం వల్ల గజాననుడని, ఒక దంతం విరిగి ఉండటం వల్ల ఏకదంతుడని అంటారు.  వినాయకుడు ఎందరికో ఇష్టదైవం. దేశదేశాల్లో వినాయకుడి ఆలయాలు ఉన్నాయి, ఆరాధకులూ ఉన్నారు. సనాతన సంప్రదాయంలో వినాయకుడికి ప్రత్యేకమైన మతం కూడా ఉంది. వినాయకుడే ప్రధాన దైవంగా ఆరాధించే మతాన్ని గాణపత్యం అంటారు. వినాయకుడికి ఎన్నో నామాలు ఉన్నట్లే, ఎన్నో రూపాలు కూడా ఉన్నాయి. వినాయకుడి కథ, వినాయక చవితి పూజావిధానం దాదాపు అందరికీ తెలిసినదే. వినాయకుడికి గల అరుదైన ఆలయాల గురించి తక్కువ మందికి తెలుసు. వినాయక చవితి సందర్భంగా వినాయకుడికి గల కొన్ని అరుదైన ఆలయాల విశేషాలు మీ కోసం... వరసిద్ధి వినాయక ఆలయం, కాణిపాకం, ఆంధ్రప్రదేశ్‌ శ్రీవరసిద్ధి వినాయక ఆలయం ఆంధ్రప్రదేశ్‌లోని చిత్తూరు జిల్లా కాణిపాకం గ్రామంలో ఉంది. కాణిపాకం వినాయక ఆలయం ఇటీవలి కాలంలో బాగా ప్రాచుర్యం పొందింది. కాణి అంటే పావుఎకరా మాగాణి భూమి అనే అర్థం ఉంది. వరసిద్ధి వినాయకుడు ఇక్కడ స్వయంభువుగా వెలిశాడు. కాణిపాకం స్థలపురాణం ప్రకారం వెనుకటి కాలంలో ఇక్కడ ముగ్గరు అన్నదమ్ములు ఉండేవారు. ముగ్గరిలో ఒకరు గుడ్డి, ఒకరు మూగ, ఒకరు చెవిటి. అవిటితనాలతో బాధపడుతూనే ఆ అన్నదమ్ములు ఉన్న కొద్దిపాటి భూమిని సాగు చేసుకుంటూ జీవితం గడిపేవారు. వారి పొలంలో ఒక బావి ఉండేది. బావిలోని నీరు ఏతంతో తోడి పొలానికి నీరు పట్టేవారు. ఒకసారి బావిలో నీరు పూర్తిగా ఇంకిపోయింది. మరింత లోతుగా తవ్వితే నీరు పడుతుందేమోననే ఆశతో అన్న దమ్ములు బావిలోకి దిగి తవ్వుతుండగా, గునపానికి గట్టిగా రాతిలాంటిదేదో తగిలింది. గునపం బయటకు తీసి చూడగా, దానికి నెత్తురు అంటుకుని ఉంది. కొద్దిసేపట్లోనే బావిలోని నీరు నెత్తుటి రంగులోకి మారింది. ముగ్గురు అన్నదమ్ముల అవిటితనం కూడా మాయమైంది. బావిని మరింత లోతుగా తవ్వడానికి ప్రయత్నించారు. వారి ప్రయత్నం పూర్తికాకుండానే బావిలోని నీటి నుంచి వినాయకుడి శిలావిగ్రహం బయటపడింది. ఈ మహిమ చూసిన జనాలు కొబ్బరినీళ్లతో విగ్రహానికి అభిషేకాలు చేశారు. అలా అభిషేకించిన కొబ్బరినీరు ఎకరంపావు దూరం కాలువలా ప్రవహించింది. అందువల్ల దీనిని తమిళంలో ‘కాణిపరకం’ అని పిలిచేవారు. రానురాను ఇది కాణిపాకంగా మారింది. ఈ ఆలయంలో వినాయకుని విగ్రహం నేటికీ బావిలోనే కనిపిస్తుంది. ఈ ఆలయాన్ని దర్శించుకున్న భక్తులు తమకు ఇష్టమైన పదార్థాన్ని స్వామివారికి వదిలిపెడితే కోరికలు తీరుతాయని నమ్మకం. అలాగే, కాణిపాకం వినాయకుడు సత్యప్రమాణాల వినాయకుడిగా కూడా ప్రసిద్ధుడు. ఇక్కడ వినాయకుని ఎదుట ప్రమాణం చేసిన వారు సత్యమే పలకాలని, అసత్యం పలికిన వారికి అనర్థాలు తప్పవని కూడా భక్తులు నమ్ముతారు. చోళుల కాలంలో పదకొండో శతాబ్దిలో ఇక్కడ వినాయకునికి ఆలయం నిర్మించారు. పదమూడో శతాబ్దిలో కులోత్తుంగ చోళుడు ఇప్పుడు ఉన్న రీతిలో ఆలయాన్ని మరింత విశాలంగా నిర్మించాడు. మధుర మహాగణపతి, కేరళ కేరళలోని మధుర మహాగణపతి ఆలయం ఒకప్పుడు శివాలయం. పరమశివుడు మదరనాథేశ్వరునిగా ఇక్కడ వెలశాడు. అప్పట్లో ఇది తుళునాడు రాజ్యంలో ఉండేది. స్వయంభువుగా వెలసిన శివలింగానికి తుళురాజులు ఆలయం నిర్మించారు. మదరు అనే వృద్ధురాలు ఈ శివలింగాన్ని కనుగొనడంతో ఆమె పేరిట ఇక్కడి శివుడు మదరనాథేశ్వరునిగా ప్రసిద్ధి పొందాడని ప్రతీతి. ఒకనాడు స్థానిక తుళు బాలుడు ఒకడు ఆలయంలో ఆడుకుంటూ, గర్భగుడిలోని దక్షిణ గోడపై వినాయకుడి బొమ్మ గీశాడు. గోడలపై ఆ బాలుడు గీసిన వినాయకుడి బొమ్మ పరిమాణం నానాటికీ పెరగసాగింది. చూస్తుండగానే కొద్దిరోజుల వ్యవ«ధిలోనే భారీ స్థాయికి పెరిగింది. ఆలయంలోనే ఆటలాడుకునే ఆ బాలుడు ‘బొడ్డ గణేశ‘ (పెద్ద గణపతి) అనేవాడు. నాటి నుంచి ఇది మహాగణపతి ఆలయంగా ప్రసిద్ధి పొందింది. మూడంతస్తులతో నిర్మించిన ఈ ఆలయ వాస్తు, శిల్పకళా కౌశలం చాలా ప్రత్యేకంగా ఉంటుంది. బయటి నుంచి చూస్తే ఏనుగు వీపు ఆకారంలో కనిపిస్తుంది. ఆలయం లోపలి భాగంలో కలపపై చెక్కిన రామాయణ దృశ్యాలు కనువిందు చేస్తాయి. మైసూరు రాజ్యాన్ని పరిపాలించిన టిప్పు సుల్తాను చాలా ఆలయాలపై దాడులు చేసినట్లుగానే ఈ ఆలయంపైనా దాడి చేయడానికి వచ్చాడట. ఆలయ ప్రాంగణంలోని బావినీళ్లు తాగిన తర్వాత మనసు మార్చుకుని ఆలయాన్ని ధ్వంసం చేయకుండానే వెనుదిరిగాడట. తన వెంట ఉన్న సేనలను తృప్తిపరచడానికి ఆలయంపై దాడి చేసినట్లుగా లాంఛనప్రాయంగా బయటి వైపు గోడపై కత్తితో వేటు వేసి, వెనుదిరిగాడట. టిప్పు సుల్తాన్‌ గోడపై వేసిన వేటు గుర్తు ఇప్పటికీ కనిపిస్తుంది. మయూరేశ్వర ఆలయం, మహారాష్ట్ర మూషిక వాహనుడైన వినాయకుడు నెమలి వాహనంపై కనిపించే అరుదైన ఆలయం ఇది. అందుకే ఇక్కడ వెలసిన వినాయకుడు మయూరేశ్వరుడిగా ప్రసిద్ధి చెందాడు. స్థానికులు ‘మోరేశ్వర్‌’ అని కూడా అంటారు. మయూరేశ్వరుడు వెలసినందున ఈ క్షేత్రానికి ‘మోర్గాంవ్‌’ అనే పేరు వచ్చింది. ఇది మహారాష్ట్రలోని పుణె జిల్లాలో ఉంది. గాణపత్య మతం ప్రాచుర్యంలో ఉన్న కాలంలో మోర్గాంవ్‌ ఆ మతానికి ప్రధాన కేంద్రంగా ఉండేది. ఈ ఆలయాన్ని ఎవరు ఎప్పుడు నిర్మించారో తెలియదు. ఇందుకు కచ్చితమైన ఆధారాలేవీ లేవు. మోరయ గోసావి అనే గాణపత్య సాధువు కారణంగా ఈ ఆలయం ప్రసిద్ధిలోకి వచ్చింది. ఆయన శిష్యులైన పీష్వా ప్రభువుల హయాంలో ఈ ఆలయం వైభవాన్ని సంతరించుకుంది. మహారాష్ట్రలో ప్రాచీన వినాయక క్షేత్రాలు ఎనిమిది ఉన్నాయి. వీటిని అష్ట వినాయక క్షేత్రాలని అంటారు. అష్ట వినాయక క్షేత్రాలకు తీర్థయాత్రగా వెళ్లేవారు మోర్గాంవ్‌లోని మయూరేశ్వరుడి దర్శనంతో యాత్రను ప్రారంభించడం ఆనవాయితీ. మయూరేశ్వరుడిని దర్శించుకోకుంటే, అష్టవినాయక యాత్ర పూర్తి కానట్లేనని అంటారు. ‘సింధు’ అనే రాక్షసుడిని చంపడానికి త్రేతాయుగంలో వినాయకుడు ఇక్కడ మయూరవాహనుడిగా షడ్భుజాలతో అవతరించాడని ‘గణేశ పురాణం’ చెబుతోంది. పీష్వాల కాలంలో ఈ ఆలయాన్ని దర్శించుకున్న సమర్థ రామదాసు ఆశువుగా ‘సుఖకర్తా దుఃఖహర్తా’ అనే కీర్తనను ఆలపించాడు. మయూరేశ్వరుడికి హారతి ఇచ్చేటప్పుడు ఈ గీతాన్ని ఆలపించడం అప్పటి నుంచి ఆనవాయితీగా వస్తోంది. గణపతిపులే, మహారాష్ట్ర మహారాష్ట్రలోని రత్నగిరి జిల్లాలో ఉన్న ఆలయం ఇది. రత్నగిరి పట్టణానికి పాతిక కిలోమీటర్ల దూరంలో కొంకణతీరంలో ఉన్న గణపతిపులే గ్రామంలో లంబోదరుడు పడమటి కనుమల దిగువన స్వయంభువుగా వెలశాడు. మిగిలిన ఆలయాల్లోని దేవతామూర్తులు తూర్పుదిక్కుగా ఉంటే, ఇక్కడి వినాయకుడు మాత్రం పశ్చిమాభిముఖుడై కనిపిస్తాడు. పశ్చిమాభిముఖుడైన స్వామి పడమటి కనుమలకు నిరంతరం రక్షణ కల్పిస్తూ ఉంటాడని భక్తులు విశ్వసిస్తారు. గణపతిపులే గ్రామంలో స్వయంభువుగా వినాయకుడు ఆవిర్భవించడం వెనుక ఒక స్థలపురాణం ఉంది. గతంలో బలభిత్‌ భిడే అనే బ్రాహ్మణుడు గ్రామకరణంగా ఉండేవాడు. ఒకసారి అతను గడ్డు సమస్యల్లో చిక్కుకున్నాడు. సమస్యల నుంచి బయటపడటానికి గ్రామం వెలుపల ఉన్న మొగలివనంలో కూర్చుని తన ఇష్టదైవమైన వినాయకుని ధ్యానిస్తూ తపస్సు చేయడం ప్రారంభించాడు. నాయకుడు కరుణించి, అతనికి కలలో కనిపించి, ఇక్కడ తాను స్వయంభువుగా ఆవిర్భవిస్తానని, తనకు ఆలయం నిర్మిస్తే అన్ని సమస్యలూ తీరిపోతాయని చెప్పాడు. ఇది జరిగిన తర్వాత భిడేకు చెందిన పశువుల మందలోని ఆవులు పాలివ్వడం మానేశాయి. పశువులకు కాపలాగా వెళ్లే మహిళ వాటిని నిశితంగా గమనించగా, మొగలివనంలోని ఒక పుట్ట వద్ద ఆవులన్నీ పాలను ధారగా కార్చేస్తుండటం కనిపించింది. ఇదే విషయాన్ని భిడేకు చెప్పడంతో, మనుషులతో చేరుకుని పుట్టగా పేరుకుపోయిన మట్టిని తొలగించగా, వినాయకుని విగ్రహం కనిపించింది. దాంతో ఆయన ఇక్కడ చిన్న ఆలయం నిర్మించి, గణపతిని పూజించడం ప్రారంభించాడు. అయితే, ఇప్పుడున్న ఆలయాన్ని పీష్వా ప్రభువులు నిర్మంచారు. త్రినేత్ర గణేశ ఆలయం, రాజస్థాన్‌ త్రినేత్ర గణేశయ ఆలయంలో వినాయకుడు మూడు కన్నులతో భక్తులకు కనువిందు చేస్తాడు. రాజస్థాన్‌లోని రణ్‌థాంబోర్‌ కోటలో ఉన్న ఈ ఆలయంలోని వినాయకుడిని ‘ప్రథమ గణేశ’ అని కూడా అంటారు. దేశంలో ఇదే మొట్టమొదటి వినాయక ఆలయంగా భావిస్తారు. ఈ ఆలయంలో వెలసిన త్రినేత్ర గణేశ విగ్రహం దాదాపు ఆరున్నర వేల ఏళ్ల కిందటిదని అంచనా. రుక్మిణీ కృష్ణుల వివాహం జరిగినప్పుడు వారు తొలి ఆహ్వాన పత్రికను ఇక్కడి ప్రథమ గణేశునికే పంపారని స్థలపురాణ కథనం. ఇప్పుడు ఈ ఆలయం వెలసిన కోట రణ్‌థాంబోర్‌ జాతీయ పార్కు పరిధిలో ఉంది. ప్రస్తుతం ఉన్న ఆలయాన్ని పదమూడో శతాబ్దిలో ఈ ప్రాంతాన్ని పరిపాలించిన రాజు హమీర్‌ నిర్మించినట్లు చెబుతారు. హమీర్‌ వినాయకుడికి పరమభక్తుడు. హమీర్‌ ఇక్కడ ఆలయం నిర్మించడం వెనుక కూడా ఒక గాథ ప్రచారంలో ఉంది. అప్పట్లో రణ్‌థాంబోర్‌ కోటపై అల్లాఉద్దీన్‌ ఖల్జీ దాడి చేశాడు. యుద్ధం ఏళ్ల తరబడి కొనసాగింది. యుద్ధానికి సిద్ధపడి ముందుగా కోటలోని గోదాముల్లో నిల్వచేసిన తిండి గింజలు, ఇతర నిత్యావసరాలు నిండుకున్నాయి. దిక్కుతోచని స్థితిలో ఉన్న రాజు తనను, తన రాజ్యాన్నీ, ప్రజలనూ కాపాడాలంటూ గణపతిని ప్రార్థించాడు. రాజు హమీర్‌కు గణపతి కలలో కనిపించాడు. ‘రేపటి నుంచి నీ సమస్యలన్నీ మటుమాయమైపోతాయి’ అని పలికాడు. మర్నాటికల్లా ఖిల్జీ సేనలు వెనక్కు మళ్లడంతో యుద్ధం ముగిసిపోయింది. గోదాముల్లో తిండి గింజలు వచ్చి చేరాయి. కోట గోడ నుంచి త్రినేత్ర గణపతి విగ్రహం ఆశ్చర్యకరంగా బయటపడింది. ఈ అద్భుత సంఘటనతో గణపతిపై రాజు హమీర్‌ భక్తివిశ్వాసాలు రెట్టింపయ్యాయి. గణపతిని వృద్ధి సిద్ధి సమేతంగా, గణపతి కొడకులైన శుభ లాభాల విగ్రహాలను, గణపతి వాహనమైన మూషిక విగ్రహాన్ని ప్రతిష్ఠించి ఆలయాన్ని నిర్మించాడు. ఇప్పటికీ చాలామంది ఇళ్లల్లో శుభకార్యాలు జరిపేటప్పుడు ఇక్కడి ప్రథమ గణపతికి తొలి ఆహ్వాన పత్రికలు పంపిస్తూ ఉంటారు. ప్రథమ గణపతికి తొలి ఆహ్వానం పంపితే, శుభకార్యాలు నిర్విఘ్నంగా జరుగుతాయని నమ్ముతారు. కర్పక వినాయక ఆలయం, తమిళనాడు వినాయకుని అరుదైన ఆలయాల్లో తమిళనాడులోని కర్పక వినాయక ఆలయం ఒకటి. శివగంగై జిల్లాలోని పిళ్లయ్యార్‌పట్టి గ్రామంలో ఉంది ఈ పురాతన ఆలయం. దీనిని స్థానికులు పిళ్లయ్యార్‌ ఆలయం అని కూడా అంటారు. ఇది గుహాలయం. గుహలో దేవతామూర్తుల పురాతన శిలా విగ్రహాలు కనిపిస్తాయి. ఈ ఆలయం గర్భగుడిలోని గుహలో కనిపించే పద్నాలుగు శిల్పాలు పదో శతాబ్ది నుంచి పదమూడో శతాబ్ది మధ్య కాలానికి చెందినవని అంటారు. పిళ్లయ్యార్‌పట్టి కొండల నడుమ గుహలో వెలసిన కందర్ప వినాయకునికి పాండ్య రాజులు ఆలయాన్ని నిర్మించారు. ఇందులోని మూలవిరాట్టుగా ఉన్న పిళ్లయ్యార్‌– కందర్ప వినాయకుడి విగ్రహం నాలుగో శతాబ్దికి చెందనదిగా చరిత్రకారుల అంచనా. మిగిలిన చోట్ల వినాయకుడి విగ్రహాలకు తొండం ఎడమ వైపు తిరిగి ఉంటే, ఇక్కడ మాత్రం కుడి వైపు తిరిగి ఉండటం విశేషం. ఈ ఆలయంలోని కాత్యాయనిని, పశుపతీశ్వరుడిని, నాగలింగాన్ని కూడా భక్తులు పూజిస్తారు. ప్రస్తుతం చెట్టియార్లలోని నాగరదర్‌ వంశీయులు ఈ ఆలయాన్ని నిర్వహిస్తున్నారు. ఈ ఆలయంలో ఏటా వినాయక నవరాత్రి వేడుకలు అంగరంగ వైభవంగా జరుగుతాయి. చింతామన్‌ గణపతి, మధ్యప్రదేశ్‌ మధ్యప్రదేశ్‌లోని పురాతన నగరమైన ఉజ్జయినిలో వెలసిన గణపతి ఆలయం ఇది. శైవక్షేత్రంగా, శక్తిపీఠంగా పేరుపొందిన ఉజ్జయినిలో వెలసిన ఈ గణపతి భక్తుల చింతలను తీర్చుతాడని, అందుకే ఇక్కడి గణపతిని చింతాహరణ గణపతి అని, చింతామణి గణపతి అని కూడా అంటారు. ఈ ఆలయంలోని గణపతి స్వయంభువుగా వెలిశాడు. వృద్ధి, సిద్ధి సమేతంగా భక్తులకు దర్శనమిస్తాడు. ఇక్కడ వినాయకుడు స్వయంభువుగా ఎప్పుడు వెలశాడో తెలిపే కచ్చితమైన ఆధారాలేవీ లేవు. అయితే చరిత్రపూర్వయుగం నుంచే ఇక్కడ స్వయంభూ గణపతి వెలసి ఉండవచ్చని కొందరి అంచనా. మాల్వా రాజ్యాన్ని పాలించిన పరమార్‌ రాజులు పదకొండు–పన్నెండు శతాబ్దాల కాలంలో ఈ ఆలయాన్ని నిర్మించినట్లు చెబుతారు. ఉజ్జయినిలోని మహాకాలేశ్వరుడిని, మహాకాళిని దర్శించుకోవడానికి వచ్చే భక్తులు మహాకాళేశ్వర ఆలయానికి ఆరు కిలోమీటర్ల దూరంలో ఉన్న  చింతామన్‌ గణపతి ఆలయాన్ని కూడా తప్పనిసరిగా దర్శించుకుంటారు. ఈ ఆలయంలో గణపతి ఎదుటనే మహావిష్ణువు విగ్రహం కూడా ఉంటుంది. విష్ణువుకు గల సహస్రనామాలలో ‘చింతామణి’ కూడా ఒకటి. అందువల్ల కూడా ఇక్కడ వెలసిన గణపతిని చింతామణి గణపతి అంటారని చెబుతారు. ఇక్కడకు వచ్చే భక్తులు గణపతితో పాటు విష్ణువుకు కూడా పూజలు చేసి వెళుతుంటారు. మహావినాయక ఆలయం, ఒడిశా ఐదుగురు దేవతలను ఏక దైవంగా పూజించే అరుదైన ఈ ఆలయం ఒడిశాలోని జాజ్‌పూర్‌ జిల్లా చండిఖోల్‌లో ఉంది. శివుడు, విష్ణువు, దుర్గ, సూర్యుడు, వినాయకుడు– ఈ ఐదుగురినీ వినాయకుడి రూపంలోనే ఇక్కడ ఆరాధిస్తారు. ఇంకో విశేషమేమిటంటే, ఈ ఆలయంలో పవళింపు సేవ ఉండదు. సాధారణంగా అన్ని ఆలయాల్లోనూ ఆలయాలను మూసివేసే ముందు పవళింపు సేవ చేస్తారు. ఐదుగురు దేవతలూ ఏకరూపంలో కొలువుదీరడం వల్లనే ఇక్కడ పవళింపు సేవ చేయరని చెబుతారు. ఐదుగురు దేవతల్లో శివ కేశవులు ఉండటం వల్ల ప్రసాదంలో బిల్వపత్రిని, తులసి ఆకులను రెండింటినీ ఉపయోగిస్తారు. అలాగే, ఈ ఆలయంలో అన్న ప్రసాదాన్ని నైవేద్యంగా పెడతారు. చండిఖోల్‌ పట్టణం రెండు కొండల నడుమ వెలసింది. మొదటి కొండ దిగువన చండీ ఆలయం, రెండో కొండ దిగువన మహావినాయక ఆలయం వెలశాయి. రెండు ఆలయాల వద్ద రెండు విశాలమైన తటాకాలు కనిపిస్తాయి. కళింగ రాజ్యాన్ని తొమ్మిదో శతాబ్ది నుంచి పన్నెండో శతాబ్ది వరకు పరిపాలించిన కేసరి వంశ రాజులు ఇక్కడి మహాగణపతి ఆలయాన్ని నిర్మించారు. ఇక్కడి కొండలను వరుణుడి కొండలు అంటారు. ధర్మరాజు వరుణుడి కొండల ప్రాంతాన్ని రాజధానిగా చేసుకుని కొంతకాలం పాలించాడనే కథనాన్ని కూడా స్థానికులు చెబుతుంటారు. ఇక్కడి ధర్మరాజు కోటను ‘తెలిగఢ్‌’కోట అంటారు. మహా వినాయకుడి ఆలయానికి చేరువలో కనిపించే కోట శిథిలాలు ధర్మరాజుకి చెందినవేనని చెబుతారు. కురుక్షేత్ర యుద్ధంలో పాండవులు విజయం సాధించిన తర్వాత కుంతీదేవి ఈ కోట నుంచే బంగారు సంపెంగను శివునికి కానుకగా సమర్పించిందని చెబుతారు.

సాక్షి, విజయవాడ : పర్యావరణ హిత వినాయకుడిని పూజించి పర్యావరణ పరిరక్షణకు అందరూ తోడ్పడాలని ఏపీ కాలుష్య నియంత్రణ మండలి చైర్మన్‌ ఎస్‌ఎస్ ప్రసాద్‌ అన్నారు. విజయవాడలోని మెఘల్‌ రాజపురం సిద్ధార్థ కాలేజీ ఆడిటోరియంలో ‘చిన్నారుల చేతుల్లో మట్టి గణేశుడు’ శిక్షణా శిబిరం కార్యక్రమాన్నిశనివారం సాక్షి ఆధ్వర్యంలో నిర్వహించారు. ఈ కార్యక్రమానికి ముఖ్య అతిథులుగా కాలుష్య నియంత్రణ మండలి చైర్మన్‌ ఎస్‌ఎస్ ప్రసాద్‌, బోర్డు కార్యదర్శి వివేక్‌ యాదవ్‌ హజరయ్యారు. ఈ సందర్భంగా చైర్మన్‌ ఎస్‌ఎస్‌ ప్రసాద్‌ మాట్లాడుతూ...రసాయన రంగులతో కూడిన గణపతి విగ్రహాలు వినియోగించడం వల్ల పర్యావరణానికి హానికరం అన్నారు. విగ్రహాల తయారిలో రసాయన రంగులను వాడి మంచి నీటి జలాశయాలను కలుషితం చెయవద్దని విఙ్ఞప్తి చేశారు. రంగు రంగుల పెద్ద విగ్రహాలను వాడి నిమజ్జనం చేసి కాలుష్యానికి కారకులు కాకుండా, మట్టి విగ్రహాలను వాడాలని సూచించారు. అదే విధంగా  నిమజ్జనానికి ముందు ప్లాస్టిక్‌, ఇతర కరగని ఆభరణాలను తొలగించాలని పేర్కొన్నారు. బోర్టు సెక్రెటరీ వివేక్‌ యాదవ్‌ మాట్లాడుతూ..చిన్నపిల్లలకు కాలుష్యంపై అవగాహన కల్పించడానికి ‘చిన్నారుల చేతుల్లో మట్టి గణేశుడు’ శిక్షణ శిబిరాన్ని ఏర్పాటు చేశామన్నారు. భావి తరాల బంగారు భవిత వీరిదే కాబట్టి మట్టి వినాయకుల వల్ల కలిగే ప్రయోజనాలపై అవగాహన కల్పిస్తున్నామన్నారు.

సాక్షి,సిటీబ్యూరో: మట్టికి, మనిషికి విడదీయరాని అనుబంధం ఉంది. మానవ మనుగడ ప్రకృతితో ముడిపడి ఉంది. ప్రకృతి ఆరాధనతో మొదలైన పూజలు ఇప్పుడు విగ్రహారాధన దాకా వచ్చాయి. అయితే, ఇప్పుడు ఈ మహోన్నతమైన అనుబంధాన్ని, ఆధ్మాత్మిక సంబంధాన్ని తిరిగి మట్టితో ముడిపెట్టి సమున్నతంగా ఆవిష్కరిస్తున్నారు నగరవాసులు. పర్యావరణంపై చైతన్యవంతులైన సిటీ ప్రజలు ఇప్పుడు వినాయక చవితికి ‘ప్లాంట్‌ గణేశుడి’ని మొక్కుతున్నారు. కుండీల్లో నిమజ్జనం చేసి మొక్కై మొలచి పుడమిని పులకింపజేసే గణనాథుడిని పూజిస్తున్నారు. ఇప్పుడిది నగరంలో సరికొత్త ట్రెండ్‌. పర్యావరణ ప్రియులైన భక్తులను విశేషంగా ఆకట్టుకుంటున్న ‘ప్లాంట్‌ గణేశుడు’ తొలుత నవరాత్రులు మట్టి ప్రతిమగా పూజలందుకొని నిమజ్జనంతో భూమిలో కలిసిపోతాడు. మొక్కలో జీవం పోసుకుని పైకి లేస్తాడు. ఇప్పటికే నగరంలో మట్టి విగ్రహాలపై అవగాహన ఉద్యమ స్థాయిలో కొనసాగుతోంది. కాలుష్య నియంత్రణ మండలి, హెచ్‌ఎండీఏ వంటి సంస్థలతో పాటు అనేక స్వచ్ఛంద సంస్థలు, సాంస్కృతిక, ఆధ్యాత్మిక వేదికలు మట్టి విగ్రహాలను అందజేస్తున్నాయి. ప్రజలు సైతం అలాంటి విగ్రహాలనే  ఎక్కువగా పూజించేందుకు ఆసక్తి చూపుతున్నారు. ఈ క్రమంలో మట్టి విగ్రహాలను చెరువుల్లో నిమజ్జనం చేసి వాటిలో పూడిక భారాన్ని పెంచకుండా ఇంట్లోనే మొక్కలుగా పెంచాలనే లక్ష్యంతో నగరానికి చెందిన ‘ప్లాన్‌ ఏ ప్లాంట్‌ ’ సంస్థ ఈ విగ్రహాలను అందజేస్తోంది. హైదరాబాద్‌తో పాటు దేశ విదేశాలకు విగ్రహాలను పంపిణీ చేస్తోంది. ఈ ఏడాది ఇప్పటి వరకు 12 వేల ప్లాంట్‌ గణేశ విగ్రహాలను భక్తులకు చేరవేశారు. మరో రెండు రోజుల పాటు భక్తులకు విక్రయించేందుకు అనుగుణంగా నగరంలోని వివిధ ప్రాంతాల్లో అందుబాటులో ఉంచారు. వివిధ రకాల నాణ్యమైన కూరగాయల విత్తనాలతో తయారు చేసిన ప్లాంట్‌ గణేశ విగ్రహాలు నిమజ్జనం అనంతరం ఏడు రోజుల్లో చక్కగా మొలకెత్తుతాయి. ఇంటి పరిసరాల్లో పచ్చగా వికసిస్తాయి. ఆలోచన ఇలా మొలకెత్తింది.. మూడేళ్ల క్రితం గణేశ్‌ అమర్‌నాథ్, దివ్యాంజలి దంపతుల మదిలో ఈ ఆలోచన రూపుదిద్దుకుంది. ప్లాన్‌ ఏ ప్లాంట్‌ సంస్థ ద్వారా అప్పటికే వివిధ రకాల ఇండోర్‌ మొక్కలను పెంచి విక్రయిస్తున్న ఈ దంపతులు.. వినాయక చవితి వేడుకలను కూడా ప్రజలు అత్యంత భక్తి శ్రద్ధలతో పర్యావరణహితంగా జరుపుకొనేందుకు ప్లాంట్‌ గణేశ (మొక్క ప్రతిమ) విగ్రహాలకు రూపమిచ్చారు. సారవంతమైన మట్టితో విగ్రహాలను తయారు చేసి వాటిలోనే వివిధ జాతుల కూరగాయల విత్తనాలను ఉంచుతున్నారు. ఒక కుండలో కొకోపిట్, వర్మి కంపోస్టుతో నింపి దానిపై ఈ ప్రతిమను అలంకరిస్తారు. నేషనల్‌ సీడ్స్‌ కార్పొరేషన్‌ గుర్తించిన నాణ్యమైన హైజర్మినేషన్‌ సీడ్స్‌ను మాత్రమే ఇందుకోసం ఎంపిక చేస్తున్నారు. ‘విగ్రహంలో ఉంచిన ప్రతి విత్తనం కచ్చితంగా మొలకెత్తి, పెరిగి పెద్దయ్యేలా అత్యంత నాణ్యమైనవి తీసుకున్నాం. ఏడు రోజుల్లో విత్తనాలు కచ్చితంగా మొలకెత్తుతాయి’ అని చెబుతున్నారు గణేశ్‌ అమర్‌నాథ్‌. ‘చెరువులను పరిరక్షించుకోవాలంటే మట్టి విగ్రహాలు కూడా వాటికి భారం కాకుండా చూసుకోవాలి. అందుకే ఇంటి వద్దే నిమజ్జనం చేసుకోవడంతో పాటు, చక్కటి కూరగాయలను ఇచ్చేలా ప్లాంట్‌ గణేశులను తయారు చేశాం’ అని చెప్పారు. రూ.499 విలువ చేసే ఈ ప్రతిమలను ఇప్పటికే పూణె, ముంబై, ఢిల్లీ, కోల్‌కత్తా తదితర నగరాలకు, దుబాయ్, షార్జా, బ్రిటన్, అమెరికా, జర్మనీ వంటి దేశాల్లోని భక్తులకు పంపించారు. విగ్రహాల తయారీపై వర్క్‌షాప్‌ మరోవైపు మట్టి ప్రతిమల తయారీ కోసం సికింద్రాబాద్‌లోని అవర్‌ సాక్రెడ్‌ స్పేస్‌లో సెప్టెంబర్‌ 1న పిల్లల కోసం ప్రత్యేక వర్క్‌షాపు ఏర్పాటు చేయనున్నారు. నిజామాబాద్‌ నుంచి ఇందుకోసం ప్రత్యేకంగా బంకమట్టిని తెప్పిస్తున్నట్లు నివ్వాహకులు తెలిపారు. ఆదివారం ఉదయం 10.30 నుంచి 12 వరకు ఈ మట్టి విగ్రహాల వర్క్‌షాపు ఉంటుంది.   ఎక్కడ లభిస్తాయంటే.. బంజారాహిల్స్‌ రోడ్‌ నెంబర్‌2లోని నృత్య ఫోరం ఫర్‌ పర్ఫార్మెన్స్‌ ఆర్ట్స్, మణికొండలోని హోమ్‌క్రాప్,కూకట్‌పల్లి వివేకానందనగర్‌లోని హిమట్రి రెస్టారెంట్, సైనిక్‌పురి ప్రాంతాల్లో భక్తులకు అందుబాటులో ఉంచారు. కూకట్‌పల్లిలోని ప్లాన్‌ఏ ప్లాంట్‌ కార్యాలయంలోనూసంప్రదించవచ్చు.

బెంగళూరు : ఎక్కడైనా మట్టి, పీఓపీలతో వినాయక విగ్రహాలను తయారు చేయడం చూశాం. అయితే మణిపాల్‌కు చెందిన స్కాండ్‌ కళకారుడు శ్రీనాథ్‌ మణిపాల, వెంకి పలిమారు, రవి హిరేబెట్టులు 21 దేశాల కరెన్సీ నోట్లతో   వినాయక ప్రతిమ తయారు చేశారు. ఉడిపిలోని విద్యా సముద్ర రోడ్డులోని సాయిరాధ మోటార్స్‌ సంస్థలో ఆ సంస్థ సహకారంతో ఈ కరెన్సీ విగ్రహాన్ని రూపొందించారు.  శ్రీలంక, బంగ్లా దేశ్, చైనా, భూటాన్, అప్ఘానిస్థాన్, బహరైన్, యుఏఇ, అమెరికా తదితర 21 దేశాల కరెన్సీ నోట్లను విగ్రహం తయారీలో ఉపయోగించారు. 

అంత పెద్ద బొజ్జ! ఒకటే దంతం!! ‘అరిగింపు’ సరే.. ఆరగింపు ఎలా! ఏం పర్లేదు. గణపయ్యకు దంతపుష్టి ఉంది. మనకే.. భక్తిపుష్టి ఉండాలి. స్వామికి దండిగా పెట్టండి. స్వామిని సంతుష్టి పరచండి.అధినాయకా అందుకో..అష్టవిధ ఉండ్రాళ్లు ఇవిగో.. బెల్లంకుడుములు కావలసినవి బియ్యప్పిండి – ఒక కప్పు నీళ్లు – ముప్పావు కప్పు ఏలకుల పొడి – అర టీ స్పూను బెల్లం తరుగు – ఒక కప్పు నెయ్యి – ఒక టీ స్పూను పచ్చికొబ్బరి తురుము – పావు కప్పు తయారీ స్టౌ మీద బాణలిలో బెల్లం తరుగు, నీళ్లు వేసి బాగా కలుపుతూ బెల్లం కరిగించి దింపేయాలి ∙బియ్యప్పిండి వేస్తూ ఆపకుండా కలుపుతుండాలి               ∙ఏలకుల పొడి, కొబ్బరితురుము జత చేయాలి ∙అన్నీ బాగా కలపాలి (మిశ్రమం గట్టిగా ఉంటే ఉండ్రాళ్లు గట్టిగా వస్తాయి) నెయ్యి జత చేసి, కలియబెట్టి, చల్లారనివ్వాలి ∙కుకర్‌లో రెండు కప్పుల నీళ్లు పోసి మరిగించాలి ∙తయారు చేసి ఉంచుకున్న మిశ్రమాన్ని కొద్దికొద్దిగా చేతిలోకి తీసుకుని ఉండలు చేసి, ఒక పాత్రలో ఉంచాలి ∙మరుగుతున్న నీళ్లలో ఈ పాత్ర ఉంచాలి ∙మూత పెట్టి, సుమారు పది నిమిషాల పాటు ఉడికించి దింపేయాలి ∙భగవంతుడికి నివేదన చేసి ఆరగించాలి. జొన్నకుడుములు కావలసినవి జొన్నరవ్వ – ఒక కప్పు; పచ్చి సెనగ పప్పు – పావు కప్పు; జీలకర్ర – ఒక టీ స్పూను; కరివేపాకు – 2 రెమ్మలు; నీళ్లు – తగినన్ని; ఉప్పు – కొద్దిగా తయారీ స్టౌ మీద మందపాటి పాత్రలో నూనె కాగాక, జీలకర్ర వేసి వేయించాలి ∙కరివేపాకు వేసి మరోమారు వేయించాలి ∙నీళ్లు, ఉప్పు వేసి మరిగించాలి ∙మంట తగ్గించి, నీళ్లలో జొన్నరవ్వ వేస్తూ కలపాలి ∙మూత పెట్టి పదినిమిషాల తరవాత దింపేయాలి ∙చల్లారాక ఈ మిశ్రమాన్ని కొద్దికొద్దిగా చేతిలోకి తీసుకుని కుడుములు తయారు చేయాలి ∙వినాయకుడికి నైవేద్యం పెట్టి, ప్రసాదంలా తినాలి. ఫ్రైడ్‌మోదకాలు కావలసినవి గోధుమ పిండి – 2 కప్పులు; ఉప్పు – అర టీ స్పూను; గోరు వెచ్చని నూనె – 2 టీ స్పూన్లు; నీళ్లు – తగినన్ని ఫిల్లింగ్‌ కోసం బెల్లం తరుగు – ఒకటిన్నర కప్పులు; పచ్చి కొబ్బరి తురుము – ఒకటిన్నర కప్పులువేయించిన నువ్వులు – 2 టేబుల్‌ స్పూన్లు; ఏలకుల పొడి – అర టీ స్పూను; నీళ్లు – ముప్పావు కప్పు పైభాగం తయారీ ఒక పాత్రలో గోధుమ పిండి, గోరు వెచ్చని నూనె, ఉప్పు, నీళ్లు వేసి చపాతీ పిండిలా కలిపి, సుమారు అరగంట సేపు పక్కన ఉంచాలి. ఫిల్లింగ్‌ తయారీ ఫిల్లింగ్‌ కోసం చెప్పిన పదార్థాలను ఒక మందపాటి పాత్రలో వేసి బాగా కలిపి, స్టౌ మీద ఉంచి ఉడికించి, దింపి పక్కన ఉంచాలి. మోదకాల తయారీ గోధుమపిండి మిశ్రమాన్ని కొద్దిగా తీసుకుని చపాతీ కర్రతో చపాతీలా ఒత్తి చేతిలోకి తీసుకోవాలి ∙ఫిల్లింగ్‌ మిశ్రమాన్ని కొద్దిగా తీసుకుని, ఒత్తిన చపాతీ మధ్యలో ఉంచి, అన్ని పక్కలా కొద్దికొద్దిగా దగ్గరకు తీసుకుంటూ (బొమ్మలో చూపిన విధంగా) మూసేయాలి ∙ఈ విధంగా అన్నీ  తయారుచేసి పక్కన ఉంచుకోవాలి ∙బాణలిలో నూనె పోసి స్టౌ మీద ఉంచి, కాగిన తరవాత, తయారుచేసి ఉంచుకున్న మోదకాలను నూనెలో వేసి బంగారు రంగులోకి వచ్చేవరకు వేయించి కిచెన్‌ టవల్‌ మీదకు తీసుకోవాలి. పల్లీమోదకాలు కావలసినవి పల్లీలు – ఒక కప్పు; బెల్లం తరుగు – ముప్పావు కప్పు; ఏలకుల పొడి – అర టీ స్పూను; నీళ్లు – 4 టేబుల్‌ స్పూన్లు; కొబ్బరి తురుము – పావు కప్పు పైభాగం కోసం బియ్యప్పిండి – ఒకటిన్నర కప్పులు; నీళ్లు – ఒకటిన్నర కప్పులు; పిండి కలపడం కోసం నీళ్లు – 3 టేబుల్‌ స్పూన్లు; ఉప్పు – చిటికెడు; నెయ్యి – ఒక టీ స్పూను. తయారీ ∙స్టౌ మీద బాణలిలో నూనె లేకుండా పల్లీలను వేయించాలి                ∙చల్లారాక పొట్టు తీసేయాలి ∙మిక్సీలో వేసి కొద్దిగా రవ్వలా ఉండేలా మిక్సీ పట్టాలి ∙బెల్లం తరుగు, ఏలకుల పొడి జత చేసి మరోమారు మిక్సీ పట్టాలి. పైభాగం తయారీ ∙స్టౌ మీద బాణలిలో నీళ్లు పోసి మరిగించాలి ∙ఒక టీ స్పూను నెయ్యి, చిటికెడు ఉప్పు జత చేయాలి ∙బియ్యప్పిండి జత చేసి, స్టౌ ఆర్పేయాలి ∙కిందకు దింపి గరిటెతో బాగా కలపాలి ∙కొద్దికొద్దిగా పిండి చేతిలోకి తీసుకుని, చెయ్యి తడి చేసుకుంటూ చిన్న పూరీలా ఒత్తాలి ∙పల్లీ మిశ్రమాన్ని చిన్న ఉండలా చేసుకుని, మధ్యలో ఉంచి అంచులు మూసేయాలి ∙మోదకాల మౌల్డ్‌లో ఉంచి కొద్దిగా ఒత్తి, జాగ్రత్తగా బయటకు తీయాలి ∙ కుకర్‌లో రెండు కప్పుల నీళ్లు పోసి, తయారుచేసి ఉంచుకున్న మోదకాలను ఇడ్లీ రేకులలో ఉంచి, ఇడ్లీ స్టాండును కుకర్‌లో ఉంచి మూత పెట్టాలి (విజిల్‌ పెట్టకూడదు) ∙స్టౌ మీద ఉంచి పావు గంట తరవాత దింపేయాలి. మలై మోదక్‌ కావలసినవి: పాలు – రెండు లీటర్లు; పంచదార – అర కప్పు; నిమ్మ రసం – 2 టేబుల్‌ స్పూన్లు; ఏలకుల పొడి – పావు టీ స్పూను; డ్రై ఫ్రూట్స్‌ – అలంకరించడానికి తగినన్ని; కుంకుమ పువ్వు – చిటికెడు. తయారీ: పాలను స్టౌ మీద ఉంచి మీగడ కట్టే వరకు కాచాలి ∙మీగడను పక్కను జరిపి మరోసారి కాచిన తరవాత, రెండు కప్పుల పాలను విడిగా గిన్నెలోకి తీసి పక్కన ఉంచాలి ∙నిమ్మ రసం జత చేయగానే పాలు విరుగుతాయి ∙విరిగిన పాలను పల్చటి వస్త్రంలో వేసి నీళ్లు పోస్తూ బాగా కడిగి వడకట్టాలి ∙పక్కన ఉంచిన రెండు కప్పుల పాలలో పంచదార వేసి స్టౌ మీద ఉంచి, పాలు సగం అయ్యేవరకు మరిగించాలి ∙వడకట్టిన పనీర్‌ జత చేసి బాగా కలపాలి ∙మిశ్రమం బాగా చిక్కబడ్డాక ఏలకుల పొడి జత చేసి కలిపి దింపి చల్లారబెట్టాలి ∙మోదక్‌ మౌల్డ్స్‌కి నెయ్యి పూసి, అందులో తగినంత మిశ్రమం స్టఫ్‌ చేయాలి (విరగకూడదు) ∙గట్టిగా ప్రెస్‌ చేసి, మౌల్డ్‌ మూత తీసి మోదకాలను బయటకు తీయాలి (చేతితో కూడా గుండ్రంగా చేసుకోవచ్చు) రాగి మోదక్‌ కావలసినవి: రాగి పిండి – ఒక కప్పు; బెల్లం తరుగు – 4 టేబుల్‌ స్పూన్లు; నీళ్లు – 4 టేబుల్‌ స్పూన్లు; కప్పు – ఒక కప్పు; నీళ్లు – ఒకటిన్నర కప్పులు; ఏలకుల పొడి – పావు టీ స్పూను; నెయ్యి – 3 టేబుల్‌ స్పూన్లు; స్టఫింగ్‌ కోసం.. కొబ్బరి తురుము – ఒక కప్పు; వేయించిన నువ్వులు – 2 టేబుల్‌ స్పూన్లు; బెల్లం తరుగు – పావు కప్పు; ఏలకుల పొడి – పావు టీ స్పూను. తయారీ: ఒక పాత్రలో బెల్లానికి కొద్దిగా నీళ్లు జత చేసి స్టౌ మీద ఉంచి, బెల్లం కరిగేవరకు కలిపి పక్కన ఉంచాలి ∙ఒక బాణలిలో రెండు టేబుల్‌ స్పూన్ల నెయ్యి వేసి కరిగించాలి ∙రాగి పిండి వేసి దోరగా అయ్యేవరకు కలుపుతూ, మూడు నాలుగు నిమిషాల పాటు వేయించి దింపేయాలి ∙పాలు, నీళ్లు పోసి ఉండలు కట్టకుండా జాగ్రత్తగా కలుపుతుండాలి ∙ఏలకుల పొడి జత చేసి, మరోమారు స్టౌ మీద ఉంచి, నీరంతా ఇంకిపోయేవరకు ఉడికించాలి ∙పిండి బాగా ఉడికిన తరవాత ఒక టేబుల్‌ స్పూను నెయ్యి వేసి, అంచులు విడేవరకు ఉడికించి దింపేయాలి ∙గోరు వెచ్చగా ఉన్నప్పుడే మెత్తగా చపాతీ పిండిలా కలిపి పక్కన ఉంచాలి ∙ఒక పాత్రలో బెల్లం, తగినన్ని నీళ్లు పోసి స్టౌ మీద ఉంచి, బెల్లం కరిగేవరకు కలిపి, మూత పెట్టి, మంట ఆర్పేయాలి ∙కరిగించిన బెల్లాన్ని వడ కట్టాలి ∙కొబ్బరి తురుము, ఏలకుల పొడి జత చేసి స్టౌ మీద ఉంచాలి ∙పాకం కొద్దిగా దగ్గర పడుతుండగా నువ్వులు వేసి కలిపి, దింపి పక్కన ఉంచాలి ∙చేతికి కొద్దిగా నెయ్యి పూసి, రాగి పిండిని కొద్దికొద్దిగా తీసుకుని చేతితో వెడల్పుగా ఒత్తాలి ∙కొబ్బరి మిశ్రమాన్ని చిన్న ఉండలా చేసి ఇందులో ఉంచి అంచులు మూసేయాలి ∙ఇలా అన్నిటినీ తయారుచేసుకోవాలి ∙వీటిని ఇడ్లీ రేకులలో ఉంచాలి ∙కుకర్‌లో కొద్దిగా నీళ్లు పోసి, ఇడ్లీ రేకులను అందులో ఉంచి మూత పెట్టి, స్టౌ మీద ఉంచాలి (విజిల్‌ పెట్టకూడదు) ∙పది నిమిషాల తరవాత దింపేసి, గణనాయకునికి సమర్పించి ప్రసాదం స్వీకరించాలి.  డ్రై ఫ్రూట్స్‌ మోదక్‌ కావలసినవి: అంజీర్‌ – 6; గింజలు లేని ఖర్జూరాలు – 8; బాదం పప్పులు – 15; వాల్నట్స్‌ – ఒక టీ స్పూను; పల్లీలు – రెండు టేబుల్‌ స్పూన్లు; పిస్తా పప్పులు – 10; జీడి పప్పులు – 10; నువ్వులు – ఒక టీ స్పూను; చిరోంజీ – ఒక టీ స్పూను; గసగసాలు – ఒక టీ స్పూను; కొబ్బరి తురుము – ఒక టీ స్పూను; నెయ్యి – ఒక టేబుల్‌ స్పూను; కిస్‌మిస్‌ – 10; ఏలకుల పొడి – అర టీ స్పూను తయారీ: అంజీర్, ఖర్జూరాలను విడివిడిగా రెండు గంటలసేపు నానబెట్టాలి ∙బాదం పప్పులు, పల్లీలు, వాల్నట్స్, పిస్తాలు, జీడిపప్పులను మిక్సీలో వేసి పొడి చేయాలి (మరీ మెత్తగా చేయకూడదు) ∙స్టౌ మీద బాణలిలో ఈ పొడి వేసి కలియబెట్టాలి ∙మరొక బాణలిలో నువ్వులు, చిరోంజీ, గసగసాలు వేసి దోరగా వేయించాలి ∙నానబెట్టిన అక్రోట్, ఖర్జూరాలను మిక్సీలో వేసి మెత్తగా చేయాలి ∙స్టౌ మీద బాణలిలో నెయ్యి వేసి కరిగాక మెత్తగా చేసిన ఖర్జూరాల మిశ్రమం వేసి కలపాలి ∙సన్నగా తరిగిన కిస్‌మిస్, ఆప్రికాట్స్‌లను జత చేసి మరోమారు కలపాలి ∙మిక్సీ పట్టిన డ్రై ఫ్రూట్స్‌ను జత చేసి మరోమారు కలపాలి ∙కొబ్బరి తురుము, ఏలకుల పొడి జత చేసి మరోమారు బాగా కలపాలి ∙మోదక్‌ మౌల్డ్స్‌లో కొద్దికొద్దిగా ఈ మిశ్రమాన్ని ఉంచాలి ∙మౌల్డ్‌ నొక్కి, మళ్లీ మూత తీసి, మోదకాలను జాగ్రత్తగా బయటకు తీసి పళ్లెంలో ఉంచి, వినాయకుడిని నివేదన చేసి, ప్రసాదంగా స్వీకరించాలి. బియ్యపు రవ్వ ఉండ్రాళ్లు కావలసినవి: బియ్యపు రవ్వ – ఒక కప్పు; పచ్చి సెనగ పప్పు – పావు కప్పు; జీలకర్ర – ఒక టీ స్పూను; నెయ్యి – 2 టేబుల్‌ స్పూన్లు; ఉప్పు – కొద్దిగా; పచ్చి కొబ్బరి తురుము – ఒక టేబుల్‌ స్పూను; కరివేపాకు – ఒక రెమ్మ తయారీ: స్టౌ మీద మందపాటి పాత్ర ఉంచి వేడయ్యాక నెయ్యి వేసి కరిగించాలి ∙జీలకర్ర వేసి వేగాక, కరివేపాకు వేసి వేయించాలి ∙తగినన్ని నీళ్లు, ఉప్పు జత చేసి బాగా కలపాలి ∙పచ్చి సెనగ పప్పు జత చేసి కలిపి నీళ్లు మరిగించాలి ∙మంట తగ్గించి, బియ్యం రవ్వ కొద్దికొద్దిగా వేస్తూ ఉండకట్టకుండా కలుపుతుండాలి ∙మూత ఉంచి పది నిమిషాలయ్యాక దింపేయాలి ∙ చల్లారిన తరవాత ఈ పిండిని కొద్దికొద్దిగా చేతిలోకి తీసుకుంటూ, ఉండ్రాళ్లు తయారుచేసుకోవాలి ∙వినాయకుడి పూజ చేసి, ఉండ్రాళ్లను బొజ్జ గణపయ్యకు నివేదించి, ప్రసాదంగా తినాలి.

సాక్షి, సిటీబ్యూరో: మట్టి గణపతిని పూజిద్దాం...పర్యావరణాన్ని రక్షిద్దామంటూ హైదరాబాద్‌ మహానగరాభివృద్ధి సంస్థ (హెచ్‌ఎండీఏ) మట్టి గణపతులు పంపిణీ చేస్తూ ప్రజల్లో అవగాహన కల్పించడంలో ముందుందని మునిసిల్‌ అడ్మినిస్ట్రేషన్‌ అండ్‌ అర్బన్‌ డెవలప్‌మెంట్‌ ప్రధాన కార్యదర్శి అరవింద్‌కుమార్‌ అన్నారు. గురువారం మైహోం నవదీపలో హెచ్‌ఎండీఏ ఆధ్వర్యంలో  నిర్వహించిన మట్టి గణపతుల కార్యక్రమంలో తన కుమార్తెతో కలిసి మట్టివిగ్రహలు పంపిణీ చేశారు.  ఉద్యోగులందరికీ మట్టి విగ్రహాలు హెచ్‌ఎండీఏ ఉద్యోగులందరికీ హెచ్‌ఎండీఏ అర్బన్‌ ఫారెస్ట్రీ డిపార్ట్‌మెంట్‌ డైరెక్టర్‌ శ్రీనివాస్‌ మట్టి గణేష విగ్రహాలను  పంపిణీ చేశారు. చీఫ్‌ అకౌంట్‌ ఆఫీసర్‌  శరత్‌ చంద్ర, సూపరింటెండెంట్‌ పరంజ్యోతి, పీఆర్‌ఓ లలిత ప్రతి ఉద్యోగికి మట్టి గణపతి తో పాటు తులసి మొక్కను అందజేశారు.  ఈ సందర్భంగా ప్రతి ఒక్కరు పర్యావరణ హితానికి అనుగుణంగా వ్యవహరించాలని, రాష్ట్ర ప్రభుత్వం చేపట్టిన హరితహారం కార్యక్రమంలో భాగంగా మొక్కలను విరివిగా పెంచాలని కోరారు.

జైజై గణేశా.. జై బోలో గణేశా! మళ్లీ వినాయక చవితి వస్తోంది. సెప్టెంబర్ 2 నుంచి 12 వరకు గణనాధుడి మహాపర్వదినం సందర్భంగా ఊరూ-వాడా మంటపాలతో ముస్తాబవుతున్నాయి. ప్రతి గల్లీలోని మంటపాల్లో గజాననుడు కొలువుదీరబోతున్నాడు. అయితే, ప్రకృతికి హాని కలిగించే ప్లాస్టర్‌ ఆఫ్‌ ప్యారిస్‌, ఇతర రసాయనాలతో చేసే విగ్రహాలకు స్వస్తి పలుకుదాం. సర్వ విఘ్నాలను మాపే విగ్నేషుడి విగ్రహాలు ప్రకృతికి విఘాతం కలిగించరాదన్న లక్ష‍్యం కోసం అందరూ నడుం బిగించాల్సిన సమయమిది. గణనాధుడి మట్టి విగ్రహాలనే ప్రతిష్ఠిద్దాం. ప్రకృతిని ఆరాదించే ఆ దేవదేవుడి ఆశీర్వచనాల కోసం నిండు మనసుతో కొలుద్దాం. నవరాత్రి ఉత్సవాల సందర్భంగా ప్రకృతిహితమైన గణనాథులను ఏర్పాటు చేసి మనవంతు సామాజిక కర్తవ్యాన్ని నెరవేర్చుదాం. నవరాత్రుల పాటు ఆ దేవదేవుడిని కొలవడానికి మీరు ఏర్పాటు చేసే అపురూపమైన మట్టి ప్రతిమల ఫోటోలను  ‘సాక్షి’ పంపించండి. మీ సామాజిక కర్తవ్యాన్ని నలుగురికి తెలియజేసి అందరికీ స్పూర్తిగా నిలవండి.  మీ నగరంలో, మీ ఊరిలో, మీ వీధిలో, మీ గల్లీలో, మీ ఇంట్లో ఎక్కడైనా సరే వినాయకుడి మట్టి ప్రతిమల ఫోటోలను మొబైల్ ద్వారా మాకు పంపించండి. ఫోటోతో పాటు ఎక్కడ నెలకొల్పిందీ, పేరు, ఊరు, వీధి, ఫోన్ నంబర్ వంటి పూర్తి వివరాలతో lordganapati@sakshi.comకు మెయిల్ ద్వారా పంపించండి. వాటిని మేము  www.sakshi.com వెబ్ సైట్‌లో ప్రచురిస్తాం. ఇంకెందుకు ఆలస్యం... ప్రకృతిని కాపాడుకుందాం. నలుగురికి ఆదర్శంగా నిలుద్దాం.