సాక్షి, తాడేపల్లి: నిజాలంటే సీఎం చంద్రబాబుకి భయమని అన్నారు వైఎస్సార్‌సీపీ అధికార ప్రతినిధి శ్యామల. ఏన్డీయే అధికారం చేపట్టాక టాటా సంస్థ విశాఖలో పెట్టుబడులు పెట్టేందుకు సిద్ధమైందంటూ చంద్రబాబు చేసుకుంటున్న ప్రచారంపై ఆగ్రహం వ్యక్తం చేశారు. ఈ మేరకు శ్యామల ఎక్స్ వేదికగా స్పందించారు.నిజాలంటే చంద్రబాబు భయం. ఆ నిజాల్ని పాతరవేయడానికి ఎంతకైనా దిగజారుతారు. విశాఖలో టీసీఎస్‌ రాబోతోందని నిన్న లోకేష్‌ ట్వీట్‌ చేయగానే.. వైఎస్సార్‌సీపీ అధినేత,మాజీ సీఎం వైఎస్ జగన్‌మోహన్‌రెడ్డి విశాఖలో టీసీఎస్‌ క్యాంపస్‌ కోసం చేసిన ప్రయత్నాలు, 2022లో టాటా సన్స్‌ ఛైర్మన్‌ నటరాజన్‌ చంద్రశేఖరన్‌తో చర్చలు తదితర వివరాలను నెటిజన్లు బయటపెట్టారు. సొమ్ము ఒకరిది, సోకు ఇంకొకరిది అంటూ విమర్శలు సంధించారు. నిజాలంటే @ncbn గారికి భయం. ఆ నిజాల్ని పాతరవేయడానికి ఎంతకైనా దిగజారుతారు. వైజాగ్‌లో టీసీఎస్‌ రాబోతోందని నిన్న లోకేష్‌ ట్వీట్‌ చేయగానే @ysjagan గారు విశాఖలో టీఎస్‌ క్యాంపస్‌ కోసం చేసిన ప్రయత్నాలు, 2022లో టాటా సన్స్‌ ఛైర్మన్‌ నటరాజన్‌ చంద్రశేఖరన్‌తో చర్చలు తదితర వివరాలను నెటిజన్లు… pic.twitter.com/VNfu2gQ1u0— Are Syamala (@AreSyamala) October 10, 2024

సాక్షి, విశాఖపట్నం: భారత్‌ అమ్ముల పొదిలో మరో అణు జలాంతర్గామి ‘అరిఘాత్‌’చేరింది. అరిహంత్‌ క్లాస్‌లో రెండోదైన ఈ అణు జలాంతర్గామి ఐఎన్‌ఎస్‌ అరిఘాత్‌ను విశాఖ నేవల్‌ డాక్‌యార్డులో గురువారం జరిగిన కార్యక్రమంలో రక్షణ మంత్రి రాజ్‌నాథ్‌సింగ్‌ నేవీలోకి ప్రవేశపెట్టారు. ఈ సందర్భంగా మంత్రి మాట్లాడుతూ మన త్రివిధ దళాలు అణుశక్తిని సముపార్జించుకుని మరింత బలోపేతమయ్యాయని తెలిపారు. అణుత్రయాన్ని బలోపేతం చేసుకుంటూ వ్యూహాత్మక సమతుల్యత, శాంతియుత వాతావరణాన్ని నెలకొల్పడంలో భారత్‌ కీలకంగా మారుతోందన్నారు.దేశ భద్రత విషయంలో మోదీ ప్రభుత్వం రాజీలేని పోరాటం చేస్తోందని, సైనికులకు అత్యాధునిక, నాణ్యమైన ఆయుధాలు, మౌలిక సదుపాయాలు, ఇతర పరికరాల్ని సమకూర్చేందుకు మిషన్‌ మోడ్‌లో పనిచేస్తోందని చెప్పారు. దేశాన్ని అగ్ర రాజ్యాలతో సమానంగా నిలబెట్టిన మాజీ ప్రధాని అటల్‌ బిహారీ వాజ్‌పేయి రాజకీయ సంకల్పాన్ని దేశం ఎప్పటికీ మరవదన్నారు. నేటి భౌగోళిక, రాజకీయ పరిస్థితుల నేపథ్యంలో రక్షణ సహా ప్రతి రంగంలోనూ వేగంగా అభివృద్ధి చెందాల్సిన అవసరం ఉందన్నారు.అరిఘాత్ ప్రత్యేకతలు..పొడవు: 111.6 మీటర్లు వెడల్పు: 11 మీటర్లు డ్రాఫ్ట్‌: 9.5 మీటర్లు బరువు: 6,000 టన్నులు సామర్థ్యం: ఉపరితలంలో గంటకు 22–24 కి.మీ. (12–15 నాటికల్‌ మైళ్లు).. సాగర గర్భంలో గంటకు 24 నాటికల్‌ మైళ్లు నిర్మాణం: విశాఖలోని నేవీ షిప్‌ బిల్డింగ్‌ సెంటర్‌ సెన్సార్‌ సిస్టమ్, ఇతర ప్రత్యేకతలు: సోనార్‌ కమ్యూనికేషన్‌ వ్యవస్థ, టార్పెడోలు, సబ్‌మెరైన్‌ లాంచ్డ్‌ బాలిస్టిక్‌ మిసైల్స్, పంచేంద్రియ యూనిఫైడ్‌ సోనార్‌ సబ్‌మెరైన్, సముద్ర జలాల్లోనూ కమ్యూనికేషన్‌ వ్యవస్థ, కంట్రోల్‌ సిస్టమ్‌. మిస్సైల్‌ రేంజ్‌ : 750 కిలోమీటర్లు

సాక్షి, విశాఖపట్నం: విజయవాడ నుంచి విశాఖ వెళ్తున్న రైలులో కామాంధుడు రెచ్చిపోయాడు. గాఢ నిద్రలో ఉన్న విద్యార్థినిపై లైంగిక దాడికి యత్నించాడు..పలు మార్లు తాకడానికి ప్రయత్నించడంతో అలెర్ట్ అయిన బాధితురాలు ప్రతిఘటించింది. దీంతో అప్రమత్తమైన తోటి ప్రయాణికులు నిందితుడిని చితకబాది రైల్వే పోలీసులకు అప్పగించారు. కేసు నమోదు చేసుకున్న పోలీసులు దర్యాప్తు ప్రారంభించారు.వివరాల్లోకి వెళ్తే.. మంగళవారం సాయంత్రం ఓ విద్యార్ధిని విజయవాడ నుంచి వైజాగ్‌ వెళ్లేందుకు ఓ రైలు ఎక్కింది. రాత్రి పూట కావడంతో నిద్రలోకి జారుకుంది. అదే రోజు అర్ధరాత్రి 2 గంటల సమయంలో కదులుతున్న రైల్లో రెచ్చిపోయిన నిందితుడు విద్యార్ధినిని లైంగిక దాడి చేసేందుకు ప్రయత్నించాడు. పలుమార్లు ఆమెను అసభ్యంగా తాకేందుకు యత్నించాడు. దీంతో నిద్రలో ఉన్న విద్యార్ధిని అతడిని నుంచి తప్పించుకుంది. గట్టిగా కేకలు వేయడంతో తోటి ప్రయాణికులు నిందితుడ్ని అదుపులోకి తీసుకుని దేహశుద్ది చేశారు. తెల్లవారుజామున ఐదున్నర గంటలకు నిందితుడ్ని రైల్వే పోలీసులకు అప్పగించారు.

ఢిల్లీ: తనపై అవాస్తవాలు ప్రసారం చేస్తున్న కొన్ని టీవీ ఛానళ్లు, వాటి ముసుగులో చెలామణి అవుతున్న కొన్ని శక్తులకు సంజాయిషీ ఇవ్వాల్సిన అవసరం లేదని వైఎస్సార్‌సీపీ ఎంపీ విజయ సాయి రెడ్డి అన్నారు. ప్రజాప్రతినిధిగా ప్రజలకు వివరణ ఇవ్వాల్సిన అవసరం ఉందని ఆయన ఎక్స్‌ వేదికగా స్పష్టం చేశారు.‘అవాస్తవాలు ప్రసారం చేస్తున్న కొన్ని టీవీ ఛానళ్లు, వాటి ముసుగులో చెలామణి అవుతున్న కొన్ని శక్తులకు సంజాయిషీ ఇవ్వాల్సిన అవసరం లేదు. ప్రజాప్రతినిధిగా ప్రజలకు వివరణ ఇవ్వాల్సిన అవసరం ఉంది. శాంతి కళింగిరిని 2020 సంవత్సరం ఏసీ ఎండోమెంట్స్ ఆఫీసర్‌గా వైజాగ్ సీతమ్మధార ఆఫీస్‌లో మొట్టమొదటగా మీట్ అయినప్పటి నుంచి ఇప్పటివరకు కూతురుగానే భావించాను...ఒక తండ్రిలా ఏ సహాయం కావాలన్నా చేశాను. తనకు కొడుకు పుట్టాడంటే వెళ్లి పరామర్శించాను. మా తాడేపల్లి ఇంటికి తీసుకొస్తే ఆశీర్వదించాను. ఏ పరాయి మహిళతోను అనైతిక/అక్రమ సంబంధాలు లేవు. నేను నమ్మిన దేవ దేవులు శ్రీ శ్రీ వెంకటేశ్వర స్వామి సన్నిధిలో కూడా చెప్తాను’ అని అన్నారు.అవాస్తవాలు ప్రసారం చేస్తున్న కొన్ని టీవీ ఛానళ్లు, వాటి ముసుగులో చెలామణి అవుతున్న కొన్ని శక్తులకు సంజాయిషీ ఇవ్వాల్సిన అవసరం లేదు. ప్రజాప్రతినిధిగా ప్రజలకు వివరణ ఇవ్వాల్సిన అవసరం ఉంది. శాంతి కళింగిరిని 2020 సంవత్సరం ఏసీ ఎండోమెంట్స్ ఆఫీసర్ గా వైజాగ్ సీతమ్మధార ఆఫీస్ లో మొట్టమొదటగా…— Vijayasai Reddy V (@VSReddy_MP) July 20, 2024 ఈ వ్యవహారంలో ఇటీవల మీడియాతో మాట్లాడిన ఎంపీ విజయసాయిరెడ్డి.. కూటమి ప్రభుత్వం అధికారంలోకి వచ్చిన తర్వాత వైఎస్‌ఆర్‌సీపీ నాయకులపై వరుస క్రమంలో బురద జల్లుతున్నారని మండిపడ్డారు. ‘నా ప్రతిష్టను దెబ్బతీసిన వారిని ఎట్టి పరిస్థితుల్లోనూ వదలను. ఒక ఆదివాసీ మహిళా అధికారిని అవమానించారు. ఆమెతో నాకు సంబంధం అంటగట్టారు. ఎలాంటి ఆధారాలు లేని కథనాలు ప్రసారం చేశారు. అసత్య కథనాలు ప్రసారం చేసినవారితో క్షమాపణలు చెప్పిస్తా. చిన్న కుటుంబం నుంచి వచ్చి కష్టపడి ఎదిగాను. బ్లాక్‌​ మెయిల్‌ చేసి డబ్బు వసూల్‌ చేసే వ్యక్తిని కాదు. రాధాకృష్ణ, బీఆర్‌నాయుడు, వంశీకృష్ణ మాదిరి వ్యక్తిని కాదు. అన్ని హక్కుల కమిషన్‌లకు ఫిర్యాదు చేస్తా. మహాన్యూస్‌ వంశీకృష్ణను వదలను. పార్లమెంట్‌లో ప్రైవేట్‌ మెంబర్‌ బిల్లు ప్రవేశపెడతా. ప్రివిలేజ్‌ మోషన్‌ మూవ్‌ చేస్తా’ అని విజయసాయిరెడ్డి ఫైర్‌ అయ్యారు. చదవండి: నా ప్రతిష్ట దెబ్బతీసిన వారిని వదలను: ఎంపీ విజయసాయిరెడ్డి

సాక్షి, విశాఖపట్నం: తాను ఆత్మహత్య చేసుకున్నానంటూ వచ్చిన వదంతులను నమ్మొద్దని పెందుర్తి వైఎస్సార్‌సీపీ మాజీ ఎమ్మెల్యే అదీప్‌రాజ్ పేర్కొన్నారు. తాను ఆత్మహత్య చేసుకున్నట్టు సోషల్‌ మీడియాలో వస్తున్న ఊహాగానాలపై అదీప్ రాజ్ స్పందించారు. అవన్నీ అవాస్తవాలని చెప్పారుఆదివారం సాయంత్రం నేతలతో సమావేశం అనంతరం గ్యాస్టిక్ నొప్పి రావడంతో ఆసుపత్రిలో చేరానని, ఇప్పుడు ఆరోగ్యంగా ఉన్నానని స్పష్టం చేశారు. ఆస్పత్రి నుంచి డిశ్చార్జ్‌ అయ్యానని, రేపటి నుంచి కార్యకర్తలకు అందుబాటులో ఉంటామని వెల్లడించారు. ఈ మేరకు ఆయన ఓ వీడియో విడుదల చేశారు.

సాక్షి, విశాఖపట్నం: నాలుగు ప్రాంతాల్లో నాలుగు సిద్ధం బహిరంగ సభలను ఏర్పాటు చేశామని, సభలకు విశేషమైన స్పందన వచ్చిందని మంత్రి బొత్స సత్యనారాయణ అన్నారు. ఆయన సోమవారం మీడియాతో మాట్లాడారు. ‘నేను మేలు చేస్తేనే ఓటు వేయని సీఎం జగన్ చెపుతున్నారు. లక్షలాది మంది వచ్చి సీఎం జగన్‌కు ఆశీర్వాదం తెలిపారు. పొత్తులు పెట్టుకున్న పార్టీలు గతంలో చాలా తిట్టుకున్నాయి. బీజేపీ, టీడీపీ నేతలు ఎలా తిట్టారో ప్రజలంటా చూశారు. బీజేపీ నేతలు చంద్రబాబును కట్టప్పతో పోల్చారు. ఇప్పుడు మళ్లీ అవే పార్టీలు పొత్తు పెట్టుకున్నాయి. పొత్తుల కోసం చంద్రబాబు పవన్ కల్యాణ్ వెంపర్లాడుతున్నారు. అధికారం ముఖ్యం కాదు.. నైతిక విలువలు ముఖ్యం.  14 ఏళ్లు సీఎంగా పనిచేసిన చంద్రబాబు పోత్తల కోసం అందరి గుమ్మం ఎక్కుతున్నారు. స్టీల్ ప్లాంట్ ప్రైవేటీకరణ  గురించి చంద్రబాబు ఏం చెపుతారు. సీఎం జగన్ మాటలను కొన్ని మీడియా సంస్థలు వక్రికరించారు. 175 స్థాలనాలకు 175 స్థానాలను వైఎస్సార్‌సీపీ గెలుస్తుంది’ అని బొత్స అన్నారు. ఇక.. చంద్రబాబు అంటే కట్టప్ప, చంద్రబాబు అంటే వెన్నుపోటు దారుడు అంటూ చంద్రబాబు గురించి బీజేపీ నేతలు మాట్లాడిన వీడియోను ప్రదర్శించారు మంతి బొత్స సత్యనారాయణ. నేను చీపురుపల్లి నుంచి పోటీ చేస్తా.. ‘సిద్ధం సభకు వచ్చిన లక్షలాది మంది ప్రతిపక్ష పార్టీలకు కనిపించలేదా?. పచ్చ కామెర్లు వారికి లోకం అంతా పచ్చగా కనిపిస్తుంది. కొన్ని పత్రికలు సిద్దం సభలకు వచ్చిన వారు గ్రాఫిక్స్ అనే భ్రమల్లో ఉన్నారు. వారినే అలాగే భ్రమల్లో ఉండమనండి. రాష్ట్రంలో బీజేపీ, జనసేన ఉందా? ఎన్నికలు తరువాత రాష్ట్రంలో టీడీపీ కూడా ఉండదు. ముడు పార్టీలు కలిసిన మాకెందుకు భయం. నేను చీపురుపల్లి నుంచి పోటీ చేస్తా. అక్కడ ప్రజలు నన్ను ఆదరిస్తున్నారు. భీమిలి నుంచి నేను ఎందుకు పోటీ చేస్తాను?’ అని బొత్స అన్నారు.

విశాఖపట్నం: డాక్టర్ వైఎస్ రాజశేఖరరెడ్డి ఇంటర్నేషనల్ క్రికెట్ స్టేడియంలో రాష్ట్ర ప్రభుత్వం ప్రతిష్టాత్మకంగా ప్రారంభించిన ‘ఆడుదాం ఆంధ్రా’ పోటీల ముగింపు కార్యక్రమం  ఈ నెల 13న వైజాగ్‌లో జరగనుంది. ఈ ముంగిపు పోటీల కార్యక్రమానికి ముఖ్యమంత్రి వైఎస్‌ జగన్‌మోహన్‌రెడ్డి హాజరుకానున్నారు. వైఎస్సార్ క్రికెట్ స్టేడియంలో జరిగే క్రికెట్ పోటీలను సీఎం జగన్‌ వీక్షించన్నారు. ఇక.. విజేత జట్టుకు రూ. 5 లక్షలు, రన్నరప్‌ జట్టు, మూడో స్థానంలో నిలిచిన జట్టుకు రూ. 2 లక్షలు చొప్పున బహుమతి అందజేస్తారు. రాష్ట్రంలో 50 రోజుల పాటు ఆడుదాం ఆంధ్రా  పోటీలు జరిగాయి. విశాఖలో రాష్ట్ర స్థాయిలో జరిగే ‘ఆడుదాం  ఆంధ్రా’ పోటీల్లో 5 కేటగిరీల్లో 3 వేల మంది క్రీడాకారులు పాల్గొననున్నారు. మరోవైపు.. రేపటి(శుక్రవారం) నుంచి విశాఖ రైల్వే స్టేడియంలో ‘ఆడుదాం ఆంధ్రా’ పోటీలను క్రీడా శాఖా మంత్రి ఆర్కే రోజా ప్రారంభించనున్నారు. స్పోర్ట్స్ అథారిటీ అధ్వర్యంలో క్రీడాకారులకు అన్ని రకాల వసతులు కల్పిస్తారు. ప్రజల కోసం నగరంలో అయిదు చోట్ల పోటీలు జరుగుతాయి. 5 చోట్ల రాష్ట్ర స్థాయి క్రీడా పోటీలకు అన్ని రకాల భద్రతా ఏర్పాట్లు చేస్తున్నామని అదనపు కమిషనర్ పకీరప్ప తెలిపారు. క్రీడాకారుల భద్రతకు దాదాపు 2 వేల మంది పోలీసు బందోబస్తు ఏర్పాటు చేస్తామని పేర్కొన్నారు.

విశాఖపట్నం: విశాఖ నుంచి బ్యాంకాక్, కౌలాలంపూర్ కు ఏప్రిల్ నుంచి ఎయిరేషియా విమాన సేవలు ప్రారంభం కానున్నాయి. ఏప్రిల్ 9 నుంచి విశాఖ-బ్యాంకాక్ విమాన సర్వీసులు మొదలవుతాయి. ఏప్రిల్ 26 నుంచి విశాఖ-కౌలాలంపూర్ కు విమాన సేవలు అందుబాటులోకి రానున్నాయి. ఏప్రిల్ 9 నుంచి విశాఖ-హైదరాబాద్ మధ్య మరో ఎయిరిండియా సర్వీసు నడవనుంది.  మే, జూన్ లో విశాఖ-దుబాయ్ మధ్య మరో ఎయిరిండియా సర్వీసు మొదలవుతుంది. ఈ నేపథ్యంలో విశాఖ ఎయిర్‌పోర్ట్ రన్‌వే నవీకరణ పనులు మార్చి 31 నాటికి పూర్తికానున్నాయి. ఏప్రిల్ నుంచి పూర్తిస్థాయిలో విశాఖ ఎయిర్‌పోర్ట్ నుంచి విమానాల రాకపోకలు ప్రారంభమవుతాయి. ఇదీ చదవండి: Union Budget 2024-25: తెలుగు రాష్ట్రాలకు రైల్వే కేటాయింపులు ఇవే..

ఇంగ్లండ్‌తో టెస్టు సిరీస్‌ను ఓటమితో ఆరంభించిన టీమిండియా.. ఇప్పుడు ఫిబ్రవరి 2 నుంచి విశాఖపట్నం వేదికగా రెండో టెస్టులో తలపడేందుకు సిద్దమైంది. ఈ మ్యాచ్‌లో ఎలాగైనా గెలిచి సిరీస్‌లో బోణీ కొట్టాలని భారత జట్టు కసితో ఉంది. తొలి టెస్టు ఓటమికి బదులు తీర్చుకోవాలని  తమ ఆస్త్రాలను సిద్దం చేసుకుంటుంది. మరోవైపు ఇంగ్లీష్‌ జట్టు మాత్రం తొలి మ్యాచ్‌ ఫలితాన్నే వైజాగ్‌ టెస్టులోనూ రిపీట్‌ చేయాలని ఉవ్విళ్లూరుతోంది. ఈ మ్యాచ్‌  కోసం ఇప్పటికే విశాఖకు చేరుకున్న ఇరు జట్లు బుధవారం నుంచి ప్రాక్టీస్‌ సెషన్స్‌లో పాల్గోనున్నాయి. అయితే అద్భుతమైన ఫామ్‌లో ఉన్న ఇంగ్లండ్‌ను ఓడించడం అంత ఈజీ కాదు. భారత కెప్టెన్‌ రోహిత్‌ శర్మకు తన అమ్మమ్మ ఇలాఖాలో మరోసారి కఠిన పరీక్ష ఎదురుకానుంది. మ్యాచ్‌కు ముందే ఎదురు దెబ్బలు.. ఇక రెండో టెస్టు ఆరంభానికి ముందే భారత జట్టుకు గట్టి ఎదురు దెబ్బలు తగిలాయి. తొలి టెస్టులో గాయపడిన స్టార్‌ ఆటగాళ్లు కేఎల్‌ రాహుల్‌, రవీంద్ర జడేజా.. ఇప్పుడు వైజాగ్‌ టెస్టుకు దూరమయ్యారు. వారి స్ధానంలో సర్ఫరాజ్‌ ఖాన్‌, సౌరభ్‌ కుమార్‌, వాషింగ్టన్‌ సుందర్‌లను బీసీసీఐ సెలక్షన్‌ కమిటీ ఎంపిక చేసింది. వారిద్దరి లేని లోటు తీర్చలేనది. ఎందుకంటే తొలి టెస్టులో జడ్డూ, రాహుల్‌ ఇద్దరూ అద్భుతమైన ప్రదర్శన కనబరిచారు. ముఖ్యంగా జడ్డూ బ్యాట్‌తో పాటు బాల్‌తోనూ సత్తాచాటాడు.  మొదటి టెస్టులో 89 పరుగులతో పాటు 5 వికెట్లు పడగొట్టాడు. ఇప్పుడు రెండో టెస్టుకు జడ్డూ స్ధానాన్ని ఎవరూ భర్తీ చేస్తారన్నది అందరి మొదడలను తొలుస్తున్న ప్రశ్న. తొలి మ్యాచ్‌కు బెంచ్‌కే పరిమితమైన కుల్దీప్‌కు అవకాశమిస్తారో లేదా సౌరభ్‌ కుమార్‌, వాషింగ్టన్‌లో ఎవరైనా జట్టులోకి వస్తారో వేచి చూడాలి. ఒక వేళ కుల్దీప్‌ జట్టులోకి వస్తే కేవలం బౌలింగ్‌ పరంగా మంచి ఎంపికైనప్పటికీ, బ్యాటింగ్‌లో మాత్రం అంతంత మాత్రమే. రజిత్‌ పాటిదార్‌ అరంగేట్రం..? ఇక కేఎల్‌ రాహుల్‌ స్ధానంలో రజిత్‌ పాటిదార్‌ లేదా సర్ఫరాజ్‌ ఖాన్‌లలో ఎవరో ఒకరు టెస్టు క్రికెట్‌ అరంగేట్రం చేసే ఛాన్స్‌ ఉంది. వీరిద్దరూ దేశవాళీ క్రికెట్‌లో అద్బుతంగా రాణిస్తున్నారు. అయితే మేనెజ్‌మెంట్‌ మాత్రం పాటిదార్‌ వైపే మొగ్గు చూపుతున్నట్లు తెలుస్తోంది. ఏదైమనప్పటికీ రాహుల్‌ వంటి సీనియర్‌ ఆటగాడి స్ధానాన్ని పాటిదార్‌ ఎంతవరకు న్యాయం చేస్తాడన్నది ప్రశ్నార్ధకంగా మిగిలింది. ఫస్ట్‌క్లాస్‌ క్రికెట్‌లో ఇప్పటివరకు 55 మ్యాచ్‌లు ఆడిన పాటిదార్‌.. 4000 పరుగులు చేశాడు. అతడి ఇన్నింగ్స్‌లలో 12 సెంచరీలు, 22 హాఫ్‌ సెంచరీలు ఉన్నాయి. విరాట్‌ కోహ్లి వచ్చేది ఎప్పుడు? ఇక తొలి టెస్టులో టీమిండియా స్టార్‌ ఆటగాడు విరాట్‌ కోహ్లి లేని లోటు స్పష్టంగా కన్పించింది. ముఖ్యంగా రెండో ఇన్నింగ్స్‌లో భారత బ్యాటర్లు పెవిలియన్‌కు క్యూ కడుతున్నప్పుడు.. కోహ్లి వంటి ఆటగాడు జట్టులో ఉంటే పరిస్థితి మరో విధంగా ఉండేది. వ్యక్తిగత కారణాలతో తొలి రెండు టెస్టులకు విరాట్‌ దూరమయ్యాడు. అయితే సిరీస్‌ మొత్తానికి కూడా విరాట్‌ దూరం కానున్నట్లు వార్తలు వినిపిస్తున్నాయి. ఒకవేళ కోహ్లి సిరీస్‌ మొత్తానికి దూరమైతే భారత్‌కు కోలుకోలేని ఎదురుదెబ్బ అనే చెప్పాలి. గిల్‌, అయ్యర్‌ ఫామ్‌లోకి వస్తారా? రెండో టెస్టులో అందరి కళ్లు టీమిండియా ఆటగాళ్లు శుబ్‌మన్‌ గిల్‌, శ్రేయస్‌ అయ్యర్‌ పైనే ఉంటాయి. తొలి టెస్టులో దారుణంగా విఫలమైన వీరిద్దరూ వైజాగ్‌ టెస్టులోనైనా తిరిగి వారి రిథమ్‌ను పొందాలని ఫ్యాన్స్‌ ఆశిస్తున్నారు. గత కొంత కాలంగా టెస్టుల్లో శ్రేయస్‌ పర్వాలేదన్పిస్తున్నప్పటికీ.. గిల్‌ మాత్రం దారుణంగా విఫలమవుతున్నాడు. మొదటి టెస్టులో కేవలం 23 పరుగులు మాత్రమే శుబ్‌మన్‌ చేశాడు.  గత 9 ఇన్నింగ్స్‌లలో గిల్‌ ఒక్కసారి కూడా హాఫ్‌ సెంచరీ మార్క్‌ను అందుకోలేకపోయాడు. దీంతో అతడిని జట్టు నుంచి తప్పించాలని పెద్ద ఎత్తున డిమాండ్‌లు వినిపిస్తున్నాయి. గిల్‌ జట్టులో తన స్ధానాన్ని నిలబెట్టుకోవాలంటే కచ్చితంగా బ్యాట్‌కు పనిచెప్పాల్సిందే. రికార్డు మనదే.. ఇక విశాఖలోని డాక్టర్‌ వైఎస్‌ రాజశేఖర్‌ రెడ్డి ఏసీఏ-వీడీసీఏ క్రికెట్‌ స్టేడియంలో టీమిండియాకు ఘనమైన రికార్డు ఉంది. ఈ మైదానంలో టీమిండియా ఓటమనేదే ఎరుగదు. ఇప్పటివరకు ఇక్కడ జరిగిన రెండు టెస్ట్‌ మ్యాచ్‌ల్లోనూ భారత్‌ ఘన విజయం సాధించింది.  2016లో ఇంగ్లండ్‌తో జరిగిన మ్యాచ్‌లో భారత్‌ 246 పరుగుల భారీ తేడాతో విజయం సాధించింది. ఆ మ్యాచ్‌ తొలి ఇన్నింగ్స్‌లో విరాట్‌ కోహ్లి (167), పుజారా (119) సెంచరీలతో . అశ్విన్‌ తొలి ఇన్నింగ్స్‌లో అర్ధసెంచరీ సహా ఎనిమిది వికెట్లతో (మ్యాచ్‌లో) ఇంగ్లండ్‌ పతనాన్ని శాశించాడు. అదే విధంగా 2019లో దక్షిణాఫ్రికాతో జరిగిన మ్యాచ్‌లోనూ 203 పరుగులు తేడాతో టీమిండియా భారీ విజయం అందుకుంది.

విశాఖపట్నం: మహిళ పోగొట్టుకున్న విలువైన బ్యాగును గంటల వ్యవధిలో చేధించి తిరిగి ఆమెకు విశాఖపట్నం నగర పోలీసులు అందించారు. బుధవారం సాయింత్రం సుమారు 04.30 గంటల సమయంలో కే.భారతి అనే మహిళ భీమిలి నగరంపాలెం నుంచి ఎం.వీ.పీ సర్కిల్ వరకు ఒక పాసింజర్ ఆటో ఎక్కింది. సర్కిల్ వద్ద ఆటో దిగే సమయంలో తనతో పాటు తెచ్చిన బ్యాగును తీసుకోవడం మర్చిపోయి , కొంత సమయం తర్వాత ఆమె బ్యాగును మర్చిపోయినట్లు గుర్తించి చుట్టుప్రక్కల ఆటో కోసం వెతుకగా కనపడకపోవడంతో ఎం.వీ.పీ క్రైమ్ పోలీసు స్టేషన్‌కు వెళ్లి ఫిర్యాదు చేశారు. ఆ బ్యాగులో 5 తులాల బంగారు ఆభరణాలు, 50 గ్రాముల వెండి వస్తువులు, 18,000 నగదు ఉన్నాయని తెలిపారు. తక్షణం స్పందించి.. ఆమె తెలిపిన వివరాలు ఆధారంగా కానిస్టేబుల్‌ పీ.హరి, అప్పుఘర్ ఆటో స్టాండ్‌లో ఉండే దూడ సత్యనారాయణ అనే ఒక ఆటో డ్రైవర్ సహాయంతో సదరు ఆటోను కనిపెట్టారు. సదరు ఆటో డ్రైవర్ ఆర్. కొండలరావు అలియాస్‌ రాజు కూడా స్వచ్ఛందంగా బ్యాగ్‌ను అప్పగించడానికి వస్తున్నట్లు తెలిపారు. గురువారం అడిషనల్ డీజీపీ, కమీషనర్ ఆఫ్ పోలీస్ అండ్‌ అడిషనల్ జిల్లా మేజిస్ట్రేట్ డా. ఏ.రవి శంకర్‌ చేతుల మీదుగా బాధితురాలికు ఆమె బ్యాగును అందజేసి , బ్యాగ్ కనిపెట్టడంలో ప్రతిభ కనబర్చిన ఎంవీపీ కానిస్టేబుల్ పి.హరిని మెరిట్ సర్టిఫికెట్ ఇచ్చి అభినందించారు. అదే విధంగా బ్యాగును కనిపెట్టడంలో సహాయం చేసిన సత్యనారాయణ, స్వచ్ఛందంగా బ్యాగును అప్పగించిన రాజును ప్రత్యేకంగా అభినందించి క్యాష్ రివార్డులు అందజేశారు. చదవండి:  ఈనాడు ట్యాబ్‌ కథనంపై మంత్రి బొత్స ఫైర్‌

ఐటి ఎగుమతుల్లో ఆంధ్రప్రదేశ్ గణనీయమైన వృద్ధిని నమోదు చేసిందని కేంద్రం ఐటీ మంత్రిత్వశాఖకు చెందిన సాఫ్ట్‌వేర్ టెక్నాలజీ పార్క్స్ ఆఫ్ ఇండియా (STPI) ఓ నివేదికను విడుదల చేసింది.  ఆ నివేదిక ప్రకారం.. 2018-19 నాటికి ఆంధ్రప్రదేశ్ ఐటి ఎగుమతుల విలువ రూ. 986 కోట్లు ఉండగా.. 2022-23 నాటికి ఎగుమతులు గణనీయంగా పెరిగి రూ. 1867 కోట్లకు చేరుకున్నాయని స్టెపి నివేదిక తెలిపింది. అదే సమయంలో ఆంధ్రప్రదేశ్‌లో ఐటీ ఎగుమతులు 90 శాతం పెరిగినట్లు నివేదికలో పేర్కొంది.  అవకాశాల వెల్లువ ఇక 2018-19 నాటికి ఆంధ్రప్రదేశ్ లో ఐటీ ఉద్యోగులు 14527 మంది ఉండగా.. 2022-23 నాటికి ఆంధ్రప్రదేశ్ లో ఐటీ ఉద్యోగుల 24719 కి పెరిగారు. గత 4 ఏళ్లలో  వేలాది మంది ఉపాధి పొందారు. దీనికి తోడు కొత్తగా ప్రారంభమైన ఇన్ఫోసిస్‌తో పాటు విస్తరిస్తున్న ఐటీ కంపెనీల 2023-24 సంవత్సరంలో ఏపీ ఐటి ఎగుమతులు మరో 20శాతం పెరగనున్నట్లు అంచనా. తద్వారా వేల ఐటీ ఉద్యోగ అవకాశాలు కలగనున్నాయి.     విశాఖ పెట్టుబడలు వరద  విశాఖలో పెట్టుబడులు పెట్టడానికి టీసీఎస్‌,హెచ్‌సీఎల్‌,యాక్సెంచర్‌తో పాటు ఇతర దిగ్గజ కంపెనీలు సిద్ధంగా ఉన్నాయి. ఫలితంగా రానున్న రోజుల్లో విశాఖ ఐటీ హబ్‌గా అవతరించనుంది.   హర్షం వ్యక్తం చేస్తున్న నిపుణులు ఇక రాష్ట్రంలో ఐటీ ఉద్యోగ అవకాశాలు అంతకంతకూ పెరుగుతుండడం విద్యార్ధులకు, నిపుణులు సంతోషం వ్యక్తం చేస్తున్నారు. ఆర్ధిక అనిశ్చితి, తొలగింపులు వంటి క్లిష్ట సమయాల్లో రాష్ట్రంలో ఉపాధి అవకాశాల్లో వృద్ది సాధించడంపై ఐటీ రంగ నిపుణులు హర్షం వ్యక్తం చేస్తున్నారు.

టీమ్‌ఇండియా వన్డే ప్రపంచకప్‌ ఫైనల్‌కు దూసుకెళ్లింది. సెమీస్‌లో 70 పరుగుల తేడాతో న్యూజిలాండ్‌పై గెలిచింది. టోర్నీ ప్రారంభం నుంచి అపజయం అనేది లేకుండా వరల్డ్‌ కప్‌-2023లో భారత్‌ జైత్రయాత్ర కొనసాగుతుంది. ఆదివారం  జరిగే ఫైనల్‌ బిగ్‌ఫైట్‌ కోసం భారత్‌ రెడీ అవుతుంది. ఈసారి ప్రపంచ కప్‌ భారత్‌ గెలవడం ఖాయంగా కనిపిస్తుంది. ఇందుకు ప్రధాన కారణం జట్టులో అందరూ మంచి ఫామ్‌లో ఉండటమే.. ఇలాంటి సమయంలో తెలుగు హీరోయిన్, వైజాగ్ బ్యూటీ రేఖాభోజ్ తన సోషల్‌మీడియా ఖాతా నుంచి సంచలన స్టేట్ మెంట్ ఇచ్చింది. 'ఇండియా వరల్డ్ కప్ కొడితే.. వైజాగ్ బీచ్‌లో స్ట్రీకింగ్ చేస్తా' అంటూ పోస్ట్ పెట్టింది. స్ట్రీకింగ్ అంటే ఏంటి..? ఫుట్ బాల్, బ్యాడ్మింటన్, బాక్సింగ్ వంటి ఆటలలో తన జట్టు గెలిచినప్పుడు పట్టరాని ఆనందంలో కొంతమంది దుస్తులు తొలగించి పరుగులు తీస్తుంటారు. అలా  ఒంటిపై బట్టల్లేకుండా పరుగుపెట్టడమే స్ట్రీకింగ్‌​ అంటారు. ఈ కల్చర్‌ ఎక్కువగా పాశ్చాత్య దేశాల్లో మాత్రమే కనిపిస్తుంది. తమ అభిమాన జట్టు గెలిచినప్పుడు పట్టరాని ఆనందంతో వారు ఇలాంటి పని చేస్తుంటారు. ఇప్పుడు రేఖా భోజ్‌ కూడా అలాంటి పని చేయనుంది. ఫైనల్‌ మ్యాచ్‌లో ఇండియా గెలవడం కంటే ఆనందం ఏముంటుందని ఆమె తెలుపుతుంది. ఈ నేపథ్యంలో ఆదివారం జరిగే ఫైనల్‌ మ్యాచ్‌లో భారత్‌ గెలుస్తే...వైజాక్‌ బీచ్‌లో తన దుస్తులు తొలగించి పరుగెడుతానని ఆమె బోల్డ్‌ స్టేట్‌మెంట్‌ ఇచ్చింది. ఈ వ్యాఖ్యలపై నెటిజన్లు ఫైర్‌ అవుతున్నారు. ఇండియా గెలుస్తే... బట్టలు విప్పి పరిగెడతావా ఛీ ఛీ అంటూ కామెంట్స్ చేస్తున్నారు. గుర్తింపు కోసం ఇలాంటి వ్యాఖ్యలు చేయడం సిగ్గుచేటు అంటూ ఫైర్‌ అవుతున్నారు. వాటికి రేఖా భోజ్ కూడా ఇలా  రిప్లై  ఇచ్చింది.  లేదండి.. మనస్ఫూర్తిగా ఇండియన్ క్రికెట్ టీమ్‌పై అభిమానంతో చెబుతున్నా. నాకు ఎలాంటి హైప్ అవసరం లేదు. క్రికెట్ మీద అభిమానంతో ఈ పని చేస్తున్నా తప్పితే.. హైప్ కోసం కాదు.' అని రేఖా బోజ్ తెలిపింది. కానీ కొందరు మాత్రం అంతే బోల్డ్‌గా వైజాగ్‌ వచ్చేస్తామంటూ భిన్నంగా కామెంట్లు చేస్తున్నారు..  రేఖా భోజ్‌ ఎవరు..? బోల్డ్‌ సినిమా అయిన మాంగళ్యం, దామినీ విల్లా, కలాయ తస్మై నమః, కాత్సాయని, స్వాతి చినుకు, రంగీలా వంటి సినిమాల్లో నటించింది ఈ వైజాగ్ బ్యూటీ రేఖా భోజ్‌. కానీ ఆమెకు పెద్దగా సినిమా అవకాశాలు రాకపోవడంతో వైజాగ్‌లో సొంతంగా స్టూడియో పెట్టుకుని కవర్స్‌ సాంగ్స్‌ చేస్తూ యూట్యూబ్‌లో ట్రెండ్‌ అవుతుంది. టాలీవుడ్ క్యాస్టింగ్ కౌచ్‌పైన కూడా ఆమె గతంలో వైరల్‌ కామెంట్స్‌ చేసిన విషయం తెలిసిందే.. విశాఖపట్నంలోని కైలాసపురానికి చెందిన రేఖ సివిల్‌ ఇంజినీరింగ్‌ పూర్తి చేసింది. చదువుతున్నప్పుడే షార్ట్‌ ఫిల్మ్స్‌లో నటించే అవకాశం వచ్చింది. నటనపై మక్కువతో వచ్చిన అవకాశాలను అందిపుచ్చుకుంది. చదువు పూర్తయిన తర్వాత సినిమా హీరోయిన్‌గా ప్రయత్నాలు మొదలుపెట్టింది. సుమారు 50 వరకు ఆడిషన్స్‌కు వెళ్లింది. అందరూ నయనతారలా ఉన్నావ్‌ అని అన్నారే తప్పితే అవకాశాలు మాత్రం ఎవరూ ఇవ్వలేదు. అలాంటి సమయంలో రాకేష్‌రెడ్డి అనే యువ దర్శకుడు ఆమెకు సినిమా అవకాశం కల్పించాడు. కాలాయ తస్మై నమః సినిమాలో మూకీ పాత్రకు ఎంపిక చేశాడు. అలా మొదలైంది రేఖ భోజ్‌ సినీ ప్రస్థానం. 👉: (ఫొటో గ్యాలరీ కోసం ఇక్కడ క్లిక్ చేయండి)

విశాఖ స్పోర్ట్స్‌: ఆంధ్ర ప్రీమియర్‌ లీగ్‌లో బెజవాడ టైగర్స్‌ తొలి విజయాన్ని నమోదు చేసింది. సోమవారం జరిగిన మ్యాచ్‌లో టైగర్స్‌ 7 వికెట్లతో ఉత్తరాంధ్ర లయన్స్‌ను ఓడించింది. లయన్స్‌ 20 ఓవర్లలో 4 వికెట్ల నష్టానికి 159 పరుగులు చేసింది. మహీప్‌ కుమార్‌ (77 నాటౌట్‌; 6 ఫోర్లు, 4 సిక్స్‌లు), రికీ భుయ్‌ (41; 5 ఫోర్లు, 2 సిక్స్‌లు) కలిసి జట్టును గెలిపించారు. వైజాగ్‌ వారియర్స్, రాయలసీమ కింగ్స్‌ మధ్య జరిగిన మ్యాచ్‌ ‘టై’గా ముగిసింది. అయితే సూపర్‌ ఓవర్‌ ద్వారా వారియర్స్‌ విజేతగా నిలిచింది. వారియర్స్‌ 20 ఓవర్లలో 8 వికెట్లకు 171 పరుగులు సాధించింది. ప్రశాంత్‌ (73; 5 ఫోర్లు, 6 సిక్స్‌లు) మెరుపు ఇన్నింగ్స్‌ ఆడాడు. ఆ తర్వాత కింగ్స్‌ 20 ఓవర్లలో 6 వికెట్లకు 171 పరుగులు చేసింది. విహారి (71; 10 ఫోర్లు, 2 సిక్స్‌లు), అభిషేక్‌ రెడ్డి  (58 రిటైర్డ్‌హర్ట్‌; 6 ఫోర్లు, 2 సిక్స్‌లు) రాణించారు. సూపర్‌ ఓవర్‌లో కింగ్స్‌ 2 వికెట్లు కోల్పోయి ఒకే ఒక పరుగు చేయగా, వారియర్స్‌ 2 పరుగులు చేసి గెలిచింది.    

విశాఖ స్పోర్ట్స్‌: ఆంధ్ర ప్రీమియర్‌ లీగ్‌ టి20 టోర్నమెంట్‌ రెండో సీజన్‌లో రాయలసీమ కింగ్స్‌ జట్టు వరుసగా మూడో విజయంతో ‘హ్యాట్రిక్‌’ నమోదు చేసింది. ఇక్కడి డాక్టర్‌ వైఎస్‌ రాజశేఖర రెడ్డి ఏసీఏ వీడీసీఏ స్టేడియంలో ఆదివారం జరిగిన మ్యాచ్‌లో రాయలసీమ కింగ్స్‌ ఐదు వికెట్ల తేడాతో గోదావరి టైటాన్స్‌ జట్టును ఓడించింది. ఆరు జట్లు పాల్గొంటున్న ఈ లీగ్‌లో రాయలసీమ కింగ్స్‌ 12 పాయింట్లతో టాప్‌ ర్యాంక్‌లో ఉంది. ముందుగా బ్యాటింగ్‌ చేసిన గోదావరి టైటాన్స్‌ 20 ఓవర్లలో 9 వికెట్లకు 150 పరుగులు చేసింది. త్రిపురాణ విజయ్‌ (25 బంతుల్లో 63 నాటౌట్‌; 6 ఫోర్లు, 5 సిక్స్‌లు) మెరుపు ఇన్నింగ్స్‌తో అజేయ అర్ధ సెంచరీ చేశాడు. రాయలసీమ కింగ్స్‌ బౌలర్లలో హరిశంకర్‌ రెడ్డి మూడు వికెట్లు, గిరినాథ్‌ రెడ్డి రెండు వికెట్లు తీశారు. అనంతరం రాయలసీమ కింగ్స్‌ 17.4 ఓవర్లలో 5 వికెట్లకు 153 పరుగులు చేసి గెలిచింది. కెపె్టన్‌ హనుమ విహారి (12 బంతుల్లో 21; 3 ఫోర్లు, 1 సిక్స్‌), అభిషేక్‌ రెడ్డి (37 బంతుల్లో 53; 7 ఫోర్లు, 2 సిక్స్‌లు), తన్నీరు వంశీకృష్ణ (39 నాటౌట్‌; 3 ఫోర్లు, 1 సిక్స్‌) రాణించారు. గోదావరి టైటాన్స్‌ బౌలర్లు ఏకంగా 21 ఎక్స్‌ట్రాలు ఇవ్వడం గమనార్హం.   తపస్వి ఆల్‌రౌండ్‌ ప్రదర్శన  మరో మ్యాచ్‌లో ఉత్తరాంధ్ర లయన్స్‌ 93 పరుగుల తేడాతో వైజాగ్‌ వారియర్స్‌పై ఘనవిజయం సాధించింది. ముందుగా ఉత్తరాంధ్ర లయన్స్‌ 20 ఓవర్లలో 6 వికెట్లకు 206 పరుగులు చేసింది. కెపె్టన్‌ కోన శ్రీకర్‌ భరత్‌ (23 బంతుల్లో 45; 3 ఫోర్లు, 4 సిక్స్‌లు), వెంకట్‌ రాహుల్‌ (36 బంతుల్లో 53; 3 ఫోర్లు, 3 సిక్స్‌లు), పిన్నింటి తపస్వి (23 బంతుల్లో 38; 4 ఫోర్లు, 2 సిక్స్‌లు), సిర్లా శ్రీనివాస్‌ (13 బంతుల్లో 33 నాటౌట్‌; 1 ఫోర్, 4 సిక్స్‌లు) దూకుడుగా ఆడారు. అనంతరం వైజాగ్‌ వారియర్స్‌ 14.4 ఓవర్లలో 113 పరుగులకు ఆలౌటై ఓడిపోయింది. తపస్వి, పృథీ్వరాజ్‌ మూడు వికెట్ల చొప్పున తీశారు.    

విశాఖపట్నం వేదికగా టీమిండియాతో జరిగిన రెండో వన్డేలో 10 వికెట్ల తేడాతో ఆస్ట్రేలియా ఘన విజయం సాధించింది. దీంతో మూడు వన్డేల సిరీస్‌ను ఆసీస్‌ 1-1తో సమం చేసింది. 118 పరుగుల స్వల్ప లక్ష్యంతో బరిలోకి దిగిన ఆసీస్‌.. వికెట్‌ నష్టపోకుండా 11 ఓవర్లలోనే చేదించింది. ఆస్ట్రేలియా ఓపెనర్లు మిచెల్‌ మార్ష్‌(66 నాటౌట్‌), ట్రావిస్‌ హెడ్‌(51 నాటౌట్‌) మ్యాచ్‌ను ఫినిష్‌ చేశారు. మిచెల్‌ మార్ష్‌ అయితే ఇన్నింగ్స్‌ ఆరంభం నుంచే భారత బౌలర్లపై విరుచుకుపడ్డాడు. అతడి ఇన్నింగ్స్‌లో 6 ఫోర్లు, 6 సిక్స్‌లు ఉన్నాయి. ఇక అంతకుముందు బ్యాటింగ్‌ చేసిన టీమిండియా.. ఆసీస్‌ బౌలర్లు నిప్పులు చెరగడంతో కేవలం 117 పరుగులకే కుప్పకూలింది. ఆసీస్‌ స్టార్‌ పేసర్‌ మిచెల్‌ స్టార్క్  5వికెట్లతో టీమిండియా వెన్ను విరచగా.. అబాట్‌ మూడు, నాథన్ ఎల్లిస్ రెండు వికెట్లు సాధించారు. కాగా తొలి ఓవర్‌ నుంచే భారత బ్యాటర్లకు ప్రత్యర్ధి పేసర్లు చుక్కలు చూపించారు. తొలి ఓవర్‌లోనే ఓపెనర్‌ గిల్‌ వికెట్‌ను కోల్పోయిన భారత్‌.. అనంతరం ఏ దశలోనే కోలుకోలేకపోయింది. భారత బ్యాటర్లలో విరాట్‌ కోహ్లి(31) టాప్‌ స్కోరర్‌గా నిలవగా.. ఆఖరిలో అక్షర్‌ పటేల్‌ (29) పరుగులతో రాణించాడు. కాగా ఈ మ్యాచ్‌లో కూడా టీమిండియా స్టార్‌ బ్యాటర్‌ సూర్యకుమార్‌ యాదవ్ గోల్డన్‌ డక్‌గా వెనుదిరిగాడు. ఇక సిరీస్‌ డిసైడ్‌ చేసే మూడో వన్డే మార్చి 22న చెన్నై వేదికగా జరగనుంది. చదవండి: IND vs AUS: గోల్డన్‌ డక్‌లు.. సూర్యను పక్కన పెట్టండి!అతడిని జట్టులోకి తీసుకురండి

విశాఖపట్నం వేదికగా భారత్‌- ఆస్ట్రేలియా మధ్య రెండో వన్డేకు రంగం సిద్దమైంది. ఆదివారం(మార్చి 19)న జరగనున్న ఈ మ్యాచ్‌కు నిర్వహాకులు అన్ని ఏర్పాట్లు చేశారు. ఈ మ్యాచ్‌ వీక్షించేందుకు దాదాపు 25 వేల మంది స్టేడియంకు రానున్నట్లు సమాచారం. ఈ నేపథ్యంలో రెండో వన్డేకు వాఖ్యతగా వ్యవహరించనున్న టీమిండియా దిగ్గజం సునీల్ గావస్కర్ విశాఖకు శనివారం చేరుకున్నారు. అతడికి ఆంధ్ర క్రికెట్ అసోసియేషన్ అధ్యక్షుడు గోపీనాథ్ రెడ్డి ఘన స్వాగతం పలికారు. మ్యాచ్‌కు వర్షం ముప్పు.. అయితే ఈ  మ్యాచ్‌కు వర్షం ముప్పు పొంచి ఉంది.మార్చి 18 నుంచి 20 వరకు మూడు రోజుల పాటు విశాఖలో భారీ వర్షాలు కురిసే అవకాశం ఉంది. ఆదివారం మ్యాచ్‌ జరిగే సమయంలో ఉరుములు, ఈదురు గాలులతో భారీ వర్షం పడే ఛాన్స్‌ ఉంది ఉందని భారత వాతావరణ విభాగం (IMD) ఓ ప్రకటనలో పేర్కొంది.  మరోవైపు వర్షం పడితే ఎదుర్కొనేందుకు సిద్ధంగా ఉన్నట్లు.. స్టేడియం నిర్వాహకులు తెలిపారు. వర్షం నుంచి మైదానాన్ని రక్షించేందుకు అవసరమైన అత్యంత తేలికైన పిచ్‌ కవర్లు తమ వద్ద ఉన్నట్లు ఆంధ్ర క్రికెట్‌ అసోసియేషన్‌ కూడా ఓ ప్రకటనలో  వెల్లడించింది. కాగా ఈ మ్యాచ్‌ మధ్యాహ్నం 1:30 గంటలకు ప్రారంభం కానుంది.  తుది జట్లు(అంచనా) భారత్‌: శుబ్‌మన్ గిల్, రోహిత్‌ శర్మ(కెప్టెన్‌), విరాట్ కోహ్లి, సూర్యకుమార్ యాదవ్, కేఎల్‌ రాహుల్(వికెట్‌ కీపర్‌), హార్దిక్ పాండ్యా (వైస్‌ కెప్టెన్‌), రవీంద్ర జడేజా, కుల్దీప్ యాదవ్, మహ్మద్ షమీ, మహ్మద్ సిరాజ్, శార్దూల్ ఠాకూర్ ఆస్ట్రేలియా: ట్రావిస్ హెడ్, మిచెల్ మార్ష్, స్టీవెన్ స్మిత్(కెప్టెన్‌), మార్నస్ లాబుషేన్‌, జోష్ ఇంగ్లిస్(వికెట్‌ కీపర్‌), కామెరాన్ గ్రీన్, గ్లెన్ మాక్స్‌వెల్, మార్కస్ స్టోయినిస్, సీన్ అబాట్, మిచెల్ స్టార్క్, ఆడమ్ జంపా.

ప్రపంచంలోనే అతిపెద్ద వరల్డ్‌ ట్రేడ్‌ సెంటర్‌ నిర్మాణానికి హైదరాబాద్‌ వేదిక కానుంది. నగరానికి చెందిన ఓ ప్రముఖ సంస్థ శంషాబాద్‌ సమీపంలో సుమారు 50 నుంచి 60 ఎకరాల విస్తీర్ణంలో ఈ వరల్డ్‌ ట్రేడ్‌ సెంటర్‌ (డబ్ల్యూటీసీ) నిర్మాణం జరగనుంది. మొదటి దశ పనులు 2025లో ప్రారంభం కానున్నాయి. విస్తీర్ణం పరంగా ఇప్పటి వరకు నేషనల్‌ క్యాపిటల్‌ రీజియన్‌ ఢిల్లీ పరిధిలోని నోయిడాలో వరల్డ్‌ ట్రేడ్‌ సెంటర్‌ 44 ఎకరాల్లో విస్తరించింది. ఇదే ప్రపంచంలో అతది పెద్దది. రెండో స్థానంలో 43 ఎకరాల్లో విస్తరించిన బీజింగ్‌ డబ్ల్యూటీసీ నిలిచింది. శంషాబాద్‌లో నిర్మించబోయే వరల్డ్‌ ట్రేడ్‌ సెంటర్‌ భవనాలు ఎత్తులో 12 అంతస్థులకే పరిమితం కానున్నాయి. ఎయిర్‌పోర్ట్‌కి దగ్గరగా ఉండటం వల్ల ఇక్కడ స్కైస్క్రాపర్లకు అనుమతి లేదు.  ఈ వరల్డ్‌ ట్రేడ్‌ సెంటర్‌ నిర్మాణం కోసం రూ.4000 కోట్ల వరకు వెచ్చించనున్నారు. ఈ డబ్ల్యూటీసీకి అనుబంధంగా సర్వీస్‌ అపార్ట్‌మెంట్లతో పాటు 225 గదుల హోటల్‌ నిర్మాణం కూడా చేపడుతున్నారు. మొత్తంగా వివిధ దశల్లో కలిపి 2035 నాటికి డబ్ల్యూటీసీ పనులు పూర్తి కావచ్చని అంచనా. డబ్ల్యూటీసీ సెంటర్‌ కోసం ఇప్పటికే 15 ఎకరాల స్థల సేకరణ పూర్తవగా నిర్మాణ పనులు తొలి దశలో ఉన్నాయి. మిగిలిన భూసేకణ పనులు జరుగుతున్నాయి. శంషాబాద్‌తో డబ్ల్యూటీసీ పనులు చేపడుతున్న సంస్థనే విశాఖపట్నంలోనూ వరల్డ్‌ ట్రేడ్‌ సెంటర్‌ నిర్మాణానికి రంగం సిద్ధం చేస్తోంది. రిషికొండ సమీపంలో 20 లక్షల చదరపు అడుగుల సామర్థ్యంతో వరల్డ్‌ ట్రేడ్‌ సెంటర్‌ నిర్మాణానికి ప్లాన్‌ రెడీ చేశారు.  చదవండి: ముందుంది పెను ముప్పు తట్టుకోలేరు: యూఎన్‌ చీఫ్‌ సంచలన హెచ్చరిక 

కరోనా సంక్షోభం కారణంగా దాదాపు 18 నెలలుగా వాయిదా పడిన అంతర్జతీయ విమాణ సర్వీసులు విశాఖపట్నం నుంచి తిరిగి మొదలుకాన్నాయి. అంతర్జాతీయ విమానాలు ప్రారంభం కానుండటంతో ఎయిర్‌ పోర్ట్‌ అధికారులు అందుకు తగ్గట్టుగా ఏర్పాట్లు చేయడంలో నిమగ్నమయ్యారు. 18 నెలలుగా  కోవిడ్‌ కారణంగా 2020 మార్చి 23న దేశవ్యాప్తంగా విధించిన లాక్‌డౌన్‌తో విశాఖపట్నం ఎయిర్‌పోర్టు నుంచి అన్ని రకాల విమాన సర్వీసులు ఆగిపోయాయి. ఆ తర్వాత విదేశాల్లో చిక్కుకున్న భారతీయులను ఇండియాకు తెచ్చేందుకు ప్రారంభించిన వందేభారత్‌తో తిరిగి విమానాశ్రయం ప్రారంభమైంది. అటు తర్వాత దేశీ సర్వీసులు కూడా మొదలయ్యాయి. అయితే గడిచిన పద్దెనిమిది నెలలుగా ఇంటర్నేషనల్‌ ఫ్లైట్స్‌ ప్రారంభం కాలేదు. డిసెంబరు 29 నుంచి తాజాగా విశాఖ నుంచి ఇంటర్నేనల్‌ ప్రారంభించేందుకు సివిల్‌ ఏవియేషన్‌ శాఖ అన్ని అనుమతులు జారీ చేసింది. డిసెంబరు 15 నుంచి సర్వీసులు పునరుద్ధరించేందుకు ఏర్పాట్లు చేశారు. అయితే ఇంతలో ఒమిక్రాన్‌ వేరియంట్‌ భయాలు చుట్టుముట్టడంతో ఆ నిర్ణయం వాయిదా పడింది. ప్రస్తుతం పరిస్థితులను అంచనా వేసి డిసెంబరు 29 నుంచి ఇంటర్నేషనల్‌ విమానాలు ప్రారంభించాలని నిర్ణయించారు 4 గంటల 10 నిమిషాలు అంతర్జాతీయ విమాన సర్వీసుల పునరుద్ధరణలో భాగంగా తొలి విమానం డిసెంబరు 29న విశాఖపట్నం నుంచి సింగపూర్‌ బయల్దేరనుంది. స్కూట్‌ కంపెనీ తొలి అంతర్జాతీయ విమాన సర్వీసులు అందుబాటులోకి తేస్తోంది. వారానికి మూడు సార్లు ఈ సర్వీసు ఉంటుందని స్కూట్‌ తెలిపింది. విశాఖపట్నంలో రాత్రి 11 గంటలకు బయల్దేరి ఉదయం 5 గంటల 45 నిమిషాలకు సింగపూర్‌ చేరుతుంది. ప్రయాణ సమయం 4 గంటల 10 నిమిషాలుగా ఉంది. రెండే దేశాలవి వేర్వేరు టైమ్‌లైన్లు ఉన్నాయి. టిక్కెట్‌ చార్జీ ఒక్కరికి రూ. 8645గా ఉంది కోవిడ్‌ ఏర్పాట్లు విశాఖ నుంచి విదేశాలకు వెళ్లే ప్రయాణికులకు బబుల్‌ నిబంధనలు వర్తిస్తాయి. విదేశాలకు చేరుకున్న ప్రయాణికులు ఆయా దేశాల్లో కరోనా నిబంధనలు పాటించాల్సి ఉంటుంది. విశాఖ నుంచి వెళ్లే వారికి వ్యాక్సినేషన్‌ తప్పనిసరి అనే నిబంధన వర్తింంప చేయడం లేదు. మరోవైపు విదేశాల నుంచి విశాఖకు వచ్చే ప్రయాణికులను పరీక్షించేందుకు ఎయిర్‌పోర్టులో కోవిడ్‌ పరీక్షా కేంద్రం ఏర్పాటు చేయనున్నారు. హెచ్‌ఎల్‌ఎల్‌ లైఫ్‌ సైన్సెస్‌ సంస్థ ఈ పనులు చేపడుతోంది. చదవండి: రైల్వే ప్రయాణికుల కోసం, కేంద్రం కీలక నిర్ణయం

ఒరేయ్‌ బావా.. గుర్తుందా! ఇసుక బొరియలోంచి బయటకి బుర్రపెట్టి చిన్న అలికిడైతే తుర్రున పారిపోయే ఎండ్రపీతలా నువ్వు క్యాంపస్‌లోకి అడుగుపెట్టిన రోజు గుర్తుందా! సముద్రం సీరియస్‌గా  పాఠం చెప్పుకుపోతుంటే ఉద్యోగాలను కలగంటూ ఒడ్డున ఇసుకపై బతుకు పాఠాలను రాసుకుంటున్న పీతల్లా బుద్ధిగా క్లాసులో కూర్చున్న రోజు గుర్తుందా! క్లాసు ఎగ్గొట్టి క్యాంటీన్‌ దగ్గరున్న బాదం చెట్టుకింద కూర్చొని ‘బాతాఖానీ’ టీ తాగుతుంటే మన తలను అమ్మలా అప్యాయంగా నిమిరే బాదం ఆకు గుర్తుందా! మన పక్క రూమ్మేట్‌ పాడే బాత్రూం పాటలకు విసుగెత్తి ఎండ ఎర్రగా కాస్తుంటే ఎఫ్‌.ఎం. పాటల ఒడిలో పడుకున్న మధ్యాహ్నం గుర్తుందా! సీతాకోకచిలుకలను చూడటానికి సాయంత్రం సముద్రానికి పోయి ఉడకపెట్టిన పల్లీలను నాలుగు మాటలుగా నమిలి హాస్టలకు తిరిగొస్తుంటే నా కంట్లో పడిన ఇసుకను ఒడుపుగా నువ్వు నాలుకతో తీసిన సంఘటన గుర్తుందా! ఫస్టు షో సినిమా చూసొచ్చినాక హాస్టల్‌ మెస్‌లో మిగిలిన ఫుడ్‌ కోసం ఖాళీ పళ్లేల్లా కొట్టుకునేవాళ్లం గుర్తుందా! రాత్రికి టెర్రస్‌పై చీకటి దుప్పటిని మన వీపుల కింద పరచుకొని చుక్కలను లెక్కపెట్టుకుంటూ మనం మనసుపడ్డ చందమామను ఊహించుకుంటూ నిదరపోయిన రోజు గుర్తుందా! ఏమి రోజులరా అవి...! సముద్రపు అలలను కట్టకట్టి మూటగా భుజాన వేసుకొని కలల చేపలను పట్టే రోజులవి. ఇప్పుడు చూడు క్షణం తీరిక లేక ఉద్యోగాల వలకు చిక్కిన చేపలమై కార్పొరేట్‌ గద్దల నోటికి చిక్కిన పీతలమై గిలగిల కొట్టుకుంటున్నాం గుప్పిట్లోంచి ఇసుకలా  ఆ రోజులు జారిపోయినప్పటికీ బీచ్‌ నుండి తిరిగొచ్చినాక ప్యాంటు జేబులో మూలకు నక్కిన ఇసుకలాంటి మిగిలిన జ్ఞాపకాలను ఈరోజు నీతో పంచుకుంటున్నాను. (ఏ.యు. క్యాంపస్‌ రోజులను గుర్తుకు తెచ్చుకొని....)  ఒక రోజు      ∙ఆర్‌ యస్‌ రాజకుమార్‌ శుభోదయం... మళ్లీ తెల్లకాగితంలా.... మనోభావాల ఆవేదనలు పెకలించి... అక్షరంలా ఘనీభవిస్తోంది... నిర్వేద ఘటనలు.... నవ్వులూ, కన్నీళ్లూ, కొత్త మిళాయింపులూ... ఆకారం లేని వికారంలా... యథాలాపంగా కరిగే రసగుళికలు... మితంగా పరిణితైన ఓ కొత్త పేజీ... పండుటాకులా గలగలా రాలింది. మాయా జలతారు దారాలు.... ఈ లోయ అంచువరకూ..... నిబిడీకృతమయ్యాయి..... సూర్యకాంతికి తెప్పరిల్లితే.... మళ్ళీ గాల్లో తేలుతూ...... మరో తెల్ల కాగితం....  ∙మేలిమి పద్యం ప్రతి పాటకు; ప్రతి మాటకు శ్రుతి యొక్కటి మంద్రమగుచు సోకును చెవులన్‌ గతి తప్పదు; మధురస సం గతి విప్పుచు నీడవోలె కదలును వెంటన్‌. (కొంపెల్ల రామకృష్ణమూర్తి ‘కచ్ఛపీనాదము’  ఖండిక నుంచి) ∙∙  ఆ కఠోర మృత్యంగణమా కరాళ దేవతా శూన్యదృక్కులు, ఆ వికార రూపిణీ మహోగ్రభయద రూక్షరేఖ లలవి కాలేదు చూడగ, నిలువలేదు. (సంపత్‌ ‘మృత్యంగణము’ ఖండిక నుంచి) ∙∙  బ్రతికి శల్యావశిష్టులై వసుధ తిరుగు తోడి వారల కన్నెత్తి చూడకున్న, చచ్చి బూదియౌ వారి ప్రసంగమింక మాసిపోవునటంచు నమ్మంగ రాదొ? (జంపన చంద్రశేఖరరావు ‘తమోగీతి’ నుంచి)                                                                           ∙మొయిద శ్రీనివాసరావు 

విశాఖ స్పోర్ట్స్‌: జాతీయ సమైక్యతను కాపాడాల్సిన బాధ్యత యువత చేతుల్లోనే ఉందని రాష్ట్ర గవర్నర్‌ విశ్వభూషణ్‌ హరిచందన్‌ అన్నారు. విశాఖ సాగర తీరంలోని వుడా పార్క్‌ రింక్‌లో ఏర్పాటు చేసిన 57వ నేషనల్‌ రోలర్‌ స్పోర్ట్స్‌ చాంపియన్‌షిప్‌ను గురువారం ఆయన ప్రారంభించారు. ఈ సందర్భంగా పోటీల్లో పాల్గొంటున్న స్కేటర్లను ఉద్దేశించి మాట్లాడుతూ క్రమశిక్షణ అనేది క్రీడల ద్వారా వస్తుందన్నారు. యువత తమ చుట్టూ ఉండే సమాజం పట్ల అవగాహన కలిగిఉండాలని ఉద్భోద చేశారు. ఇప్పటికే కాడెట్‌ నేషనల్స్‌ పూర్తి కాగా గురువారం నుంచి జూనియర్‌ నుంచి సీనియర్స్‌ కేటగిరీల్లో స్పీడ్, ఆర్టిస్టిక్, రోలర్‌హాకీ, ఇన్‌లైన్‌ హాకీ, ఇన్‌లైన్‌ ఫ్రీస్టయిల్, స్కేట్‌బోర్డ్, రోలర్‌ ఫ్రీస్టయిల్‌ తదితర అంశాల్లో పోటీలను ప్రారంభించారు. ఈ కార్యక్రమంలో తొలుత రాష్ట్ర యువజన సర్వీసులు, పర్యాటక శాఖ మంత్రి ముత్తంశెట్టి శ్రీనివాసరావు మాట్లాడుతూ రాష్ట్ర ప్రభుత్వం గత ఆరు నెలల్లోనే రూ. రెండు కోట్లు క్రీడాకారులకు నజరానాగా ఇచ్చిందన్నారు. రాష్ట్ర ముఖ్యమంత్రి స్వతహాగా క్రీడాకారుడు కావడంతో క్రీడల అభివృద్ధికి ఇతోధికంగా కృషిచేస్తున్నారన్నారు. వీఎంఆర్‌డీఏ చైర్మన్‌ ద్రోణంరాజు శ్రీనివాసరావు, స్కేటింగ్‌ సమాఖ్య ప్రతినిధులు తులసీరామ్, నరేష్‌కుమార్, టోర్నీ నిర్వాహక కమిటీ ప్రతినిధులు పాల్గొన్నారు. పోలీస్‌ టెన్నిస్‌ పోటీలు ప్రారంభం   విశాఖ వేదికగా 20వ ఆలిండియా పోలీస్‌ టెన్నిస్‌ చాంపియన్‌షిప్‌ను రాష్ట్ర గవర్నర్‌ విశ్వభూషణ్‌ హరిచందన్‌ గురువారం ప్రారంభించారు. ఈ సందర్భంగా ఆయన మాట్లాడుతూ లా అండ్‌ ఆర్డర్‌ కాపాడటంలోనే కాకుండా విశాఖ నగరాన్ని అందంగా ఉంచేందుకు పోలీసులు చేస్తున్న కృషిని అభినందించారు. తొలుత నగర సీపీ ఆర్‌కే మీనా మాట్లాడుతూ దేశంలోని 18 జట్లు ఈ టోర్నీలో పాల్గొంటున్నాయన్నారు. కార్యక్రమంలో ఏపీ డీజీపీ దామోదర్‌ గౌతమ్‌ సవాంగ్, అదనపు డీజీపీ ఎన్‌.శ్రీధర్‌రావు పలువురు పోలీస్‌ ఉన్నతాధికారులు పాల్గొన్నారు.