హామీలు అమలు చేయరా..?

హామీలు అమలు చేయరా..?

కేవీపల్లె : సూపర్‌సిక్స్‌ పథకాల పేరుతో అధికారంలోకి వచ్చిన కూటమి ప్రభుత్వం అవి అమలు చేయకుండా ప్రజలను మోసం చేసిందని మాజీ ఎమ్మెల్యే చింతల రామచంద్రారెడ్డి అన్నారు. ఇటీవల రోడ్డు ప్రమాదంలో మృతి చెందిన తీతవగుంటపల్లె పంచాయతీ ఇర్రివాండ్లపల్లెకు చెందిన వైఎస్సార్‌సీపీ నాయకుడు ఇర్రి చిన్నయ్యనాయుడు కుటుంబ సభ్యులను మంగళవారం మాజీ ఎమ్మెల్యే పరామర్శించారు. అలాగే నూతనకాల్వ పంచాయతీ కురవపల్లెలో పార్టీ నాయకుడు చామంచుల నాగరాజ తండ్రి చామంచుల లక్ష్మయ్య మృతి చెందడంతో ఆయన కుటుంబ సభ్యులను పరామర్శించారు. అనంతరం పార్టీ నాయకులు, కార్యకర్తలతో నిర్వహించిన సమావేశంలో మాజీ ఎమ్మెల్యే మాట్లాడుతూ ప్రజలను మభ్యపెట్టి మోసం చేయడంలో ముఖ్యమంత్రి నారా చంద్రబాబుకు మించిన వారు మరెవరూ ఉండరని ఆరోపించారు. ఎన్నికల సందర్భంగా ప్రజలకు ఇచ్చిన హామీల్లో ఇప్పటి వరకు ఒక్కటి కూడా సక్రమంగా అమలు చేయలేదని విమర్శించారు. ప్రభుత్వ వైఫల్యాలను పార్టీ నాయకులు, కార్యకర్తలు ప్రజలకు వివరించాలని పిలుపునిచ్చారు. వైఎస్సార్‌సీపీకి పూర్వవైభవం వస్తుందని ధీమా వ్యక్తం చేశారు. ఈ కార్యక్రమంలో ఎంపీపీ ఈశ్వరమ్మ, పార్టీ మండల కన్వీనర్‌ వెంకటరమణా రెడ్డి, నాయకులు సి.కె. యర్రమరెడ్డి, జయరామచంద్రయ్య, వెంకటసిద్ధులు, రామకొండారెడ్డి, కోర్టు సుబ్బారెడ్డి, ఆనందరెడ్డి, సతీష్‌రెడ్డి, సిద్ధయ్య, రాంప్రసాద్‌నాయుడు, రత్నాకర్‌రెడ్డి, పి. ద్వారకనాథరెడ్డి, ప్రభార్‌రెడ్డి, హరిబాబు, రెడ్డెప్పరెడ్డి, యర్రమరెడ్డి, నాగేశ్వర, గౌస్‌, బాలకృష్ణ, వేణుగోపాల్‌రెడ్డి, అప్పిరెడ్డి తదితరులు పాల్గొన్నారు.