పాఠశాల బస్సును ఢీకొట్టిన లారీ

పాఠశాల బస్సును ఢీకొట్టిన లారీ

ఐదుగురు విద్యార్థులకు,

ఓ టీచర్‌కు స్వల్ప గాయాలు

కొల్లూరు: అతి వేగంగా దూసుకొచ్చిన లారీ ఓ ప్రైవేటు పాఠశాల బస్సును ఢీకొట్టిన సంఘటన మంగళవారం చోటుచేసుకుంది. స్థానికుల కథనం మేరకు.. కొల్లూరులోని శ్రీ సాయి వాసవి విద్యా సంస్థలకు చెందిన స్కూల్‌ బస్సు మండలంలోని క్రాప నుంచి విద్యార్థులతో కొల్లూరు వస్తుంది. కొల్లూరు శివారు బోసునగర్‌ వద్ద విద్యార్థులను ఎక్కించుకునేందుకు డ్రైవర్‌ బస్సును రోడ్డు పక్కన నిలిపాడు. అదే మార్గంలో తెనాలి నుంచి ఇటుకరాయి కార్మికులను ఎక్కించుకొని వస్తున్న లారీకి ఎదురుగా ట్రాక్టర్‌ రావడంతో డ్రైవర్‌ లారీని నియంత్రించడంలో విఫలమయ్యాడు. లారీ వేగంగా రోడ్డు పక్కన ఆగి ఉన్న స్కూల్‌ బస్సును వెనుక నుంచి ఢీకొంది. స్కూల్‌ బస్సులోని విద్యార్థులు ఎం.కౌషిక్‌, కె.సంపత్‌ నాయక్‌, ఎం.జస్వంత్‌ సాయి, వై.దుర్గ, డి.ప్రేమ్‌కుమార్‌, టీచర్‌ బి.వెంకటపద్మలకు స్వల్ప గాయాలయ్యాయి. సమాచారం తెలుసుకున్న విద్యార్థుల తల్లిదండ్రులు హుటాహుటీన పాఠశాల వద్దకు చేరుకున్నారు. అప్పటికే పాఠశాల యాజమాన్యం విద్యార్థులను ఓ ప్రైవేటు వైద్యశాలకు తరలించి ప్రథమ చికిత్స అందించారు. అనంతరం విద్యార్థులను తల్లిదండ్రులతో తమ గృహాలకు పంపించారు.