రోడ్డు ప్రమాదంలో ఇద్దరి మృతి

రోడ్డు ప్రమాదంలో ఇద్దరి మృతి

● గాయాలపాలైన డ్రైవర్‌

● ముందు వెళ్తున్న లారీ సడన్‌గా

● స్లో కావడంతో ఢీకొన్న తుఫాన్‌

రాజానగరం: జాతీయ రహదారిపై తూర్పుగానుగూడెం వద్ద గురువారం జరిగిన ప్రమాదంలో ఇద్దరు వ్యక్తులు మృతి చెందారు. ఈ సంఘటనకు సంబంధించి స్థానిక పోలీసులు తెలిపిన వివరాలు ఇలా వున్నాయి. హైదరాబాద్‌లోని పటాన్‌ చెరువు నుంచి విశాఖపట్టణానికి నేవీకి చెందిన మెటల్‌ మెటీరియల్‌ లోడుతో వెళ్తున్న తుఫాన్‌ వాహనం అతివేగంతో ముందు వెళ్తున్న లారీని ఢీ కొనడంతో ఈ ప్రమాదం జరిగింది. ముందు వెళ్తున్న వాహనాన్ని అకస్మాత్తుగా నెమ్మదించడంతో తుఫాను వాహనాన్ని ఆ డ్రైవర్‌ నియంత్రించలేక ఢీ కొట్టాడు. దీంతో తుఫాను వాహనం ముందు భాగం నుజ్జయ్యింది. డ్రైవర్‌ పక్కన కూర్చున్న ఇద్దరు వ్యక్తులు అందులో కూరుకుపోయి ప్రాణాలు కోల్పోయారు. వారి వద్ద ఉన్న ఆధార్‌, డ్రైవింగ్‌ లైసెన్సుల ఆధారంగా ఆశిష్‌కుమార్‌ త్రిపాఠి (32), షేక్‌ షాయిబజ్‌ (23)లుగా గుర్తించారు. ఈ ప్రమాదంలో డ్రైవర్‌ మాత్రం గాయాలతో సురక్షితంగా బయటపడ్డాడు. అతనిని చికిత్స నిమిత్తం రాజమహేంద్రవరం ప్రభుత్వాస్పత్రికి తరలించారు. ఈ మేరకు కేసు నమోదు చేసి దర్యాప్తు చేస్తున్నామని ఎస్సై మనోహర్‌ తెలిపారు.