28 నుంచి అండర్‌–14 క్రికెట్‌ టోర్నమెంట్‌

28 నుంచి అండర్‌–14 క్రికెట్‌ టోర్నమెంట్‌

అమలాపురం టౌన్‌: స్కూల్‌ గేమ్స్‌ ఫెడరేషన్‌ ఆధ్వర్యంలో అమలాపురంలో ఈ నెల 28, 29, 30 తేదీల్లో మూడు రోజుల పాటు అండర్‌–14 బాలుర రాష్ట్ర స్థాయి క్రికెట్‌ టోర్నమెంట్‌ జరుగుతుందని ఆ ఫెడరేషన్‌ జిల్లా సెక్రటరీ ఏవీ శ్రీనివాస్‌, ఆ గేమ్స్‌ ఆర్గనైజింగ్‌ సెక్రటరీ తోట రవి తెలిపారు. అమలాపురంలోని జిల్లా పరిషత్‌ బాలుర ఉన్నత పాఠశాల క్రీడా స్థలం, బాలయోగి స్టేడియం, కిమ్స్‌ వైద్య కళాశాల క్రీడా స్థలాల్లో ఏక కాలంలో క్రికెట్‌ పోటీలను నిర్వహిస్తారన్నారు. రాష్ట్రంలోని 13 ఉమ్మడి జిల్లాల నుంచి ఒక్కో క్రికెట్‌ టీమ్‌ ఈ పోటీలకు హాజరవుతుందని గేమ్స్‌ ఆర్గనైజింగ్‌ సెక్రటరీ రవి తెలిపారు. అమలాపురం జెడ్పీ బాలుర ఉన్నత పాఠశాల క్రీడా స్థలాన్ని చదును చేసే పనులు గురువారం నుంచి మొదలయ్యాయి. ఉమ్మడి జిల్లా స్థాయిలో ఎంపిక చేసిన టీమ్‌లు ఈ పోటీల్లో తలపడనున్నాయి. దాదాపు 150 మంది అండర్‌–14 క్రికెట్‌ క్రీడాకారులు ప్రతిభ చాటనున్నారు. వీరికి వసతి, ఇతర సౌకర్యాలను స్కూల్‌ గేమ్స్‌ ఫెడరేషన్‌ పర్యవేక్షిస్తోంది.