పంటల్లో బయోయాక్టివ్‌ కాంపౌండ్స్‌ పెంచేలా ప్రయోగాలు

ఆల్కాట్‌తోట (రాజమహేంద్రవరం రూరల్‌): పొగాకు, అశ్వగంధ, మిరప, పసుపు, ఆముదం పంటల్లో బయోయాక్టివ్‌ కాంపౌండ్స్‌, ఆల్కలాయిడ్స్‌ పెంచే దిశగా శాస్త్రవేత్తలు ప్రయోగాలు చేపట్టాలని కేంద్ర పొగాకు పరిశోధన సంస్థ (సీటీఆర్‌ఐ) డైరెక్టర్‌ డాక్టర్‌ మాగంటి శేషుమాధవ్‌ సూచించారు. స్థానిక సీటీఆర్‌ఐ సమావేశ మందిరంలో నాలుగు రోజుల పాటు నిర్వహించిన పరిశోధనా సమావేశాలు గురువారంతో ముగిశాయి. పొగాకు పంటలో అధిక దిగుబడినిచ్చే మేలైన వంగడాలను అభివృద్ధి చేయడం, బయోటిక్‌ మరియు అబయోటిక్‌ ఒత్తిడిని తట్టుకునే వంగడాల అభివృద్ధి, తుపాను సమయంలో ఎదురయ్యే నీటి ముంపును తట్టుకునే వంగడాల పరిశోధనలపై విస్తృత చర్చ జరిగింది. పొగాకులో నికోటిన్‌ శాతం, పసుపులో కర్కుమిన్‌, అశ్వగంధ పంటలో విధనలాయిడ్స్‌, మిరప పంటలో క్యాప్సియాసీన్‌ పెంచే విధంగా వంగడాలను అభివృద్ధి చేయాలని సీటీఆర్‌ఐ డైరెక్టర్‌ డాక్టర్‌ ఎం.శేషుమాధవ్‌, పూర్వపు డైరెక్టర్‌ డాక్టర్‌ టీజీకే మూర్తి, ఐఐఓఆర్‌ పూర్వపు డైరెక్టర్‌ డాక్టర్‌ ఎం.సుజాత శాస్త్రవేత్తలకు సూచించారు. వంగడాల్లో మేలైన గుణాలైన ఆల్కలాయిడ్స్‌, ఫైటో కెమికల్స్‌, బయో ఆక్టివ్‌ కాంపౌండ్స్‌ మొదలైన వాటిని అభివృద్ధి చేసే దిశగా పరిశోధనలు చేపట్టాలని సూచించారు. సమావేశంలో డాక్టర్‌ కె.గంగాధర, డాక్టర్‌ పి.మణివెల్‌, డాక్టర్‌ జేజే రాజప్ప, డాక్టర్‌ కె.ప్రభాకరరావు, డాక్టర్‌ పార్థ సాహా, డాక్టర్‌ రాజశేఖర్‌రెడ్డి తమ పరిశోధన ఫలితాలను వెల్లడించారు. ఈ సాంకేతిక సమావేశాల్లో సంస్థ డైరెక్టర్‌ డాక్టర్‌ శేషుమాధవ్‌ కూడా తమ ప్రయోగాల ఫలితాలను నిపుణులకు వెల్లడించారు. మెంబర్‌ సెక్రటరీ డాక్టర్‌ ఎం.అనురాధ, సీటీఆర్‌ఐ శాస్త్రవేత్తలు పాల్గొన్నారు.