రోడ్డు ప్రమాదంలో వ్యక్తి మృతి

రోడ్డు ప్రమాదంలో వ్యక్తి మృతి

తెనాలిరూరల్‌: రోడ్డు ప్రమాదంలో ఒకరు మృతి చెంద గా ఏడుగురు గాయాలపాలయ్యారు. వీరిలో ఒకరి పరిస్థితి విషమంగా ఉంది. తెనాలి జేఎంజే కళాశాల వద్ద టూ వీలర్‌ను తప్పించే క్రమంలో మరో టూ వీలర్‌ను ఆటో ఢీ కొట్టడంతో గురువారం సాయంత్రం రోడ్డు ప్రమాదం చోటు చేసుకుంది. తెనాలి నుంచి ప్రయాణీకులతో పాటు నిమ్మకాయల బస్తాలతో అంగలకుదురు వైపు వెళ్తున్న ఓ ఆటో అంగలకుదురు వైపు నుంచి తెనాలి వస్తున్న మోటార్‌ బైక్‌ అడ్డురావడంతో ఆటో అదుపుతప్పి పక్కగా వెళ్తున్న మరో బైక్‌ను ఢీకొట్టి బోల్తా పడింది. ఈ ప్రమాదంలో బైక్‌పై వస్తున్న బి. జ్ఞానరాజు (49) తీవ్రంగా గాయపడగా అతడిని తెనాలి ప్రభుత్వాస్పత్రికి తరలించారు. అక్కడ చికిత్స పొందుతూ జ్ఞానరాజు మృతి చెందాడు. అదే విధంగా ఆటోలో ఉన్న డ్రైవర్‌, నలుగురు ప్రయాణీకులతో పాటు ఎదురుగా వచ్చిన బైక్‌పై ఉన్న ఇద్దరు కూడా గాయపడ్డారు. వీరిలో ఒకరికి తీవ్ర గాయాలు కావడంతో గుంటూరు ప్రభుత్వ సమగ్ర వైద్యశాలకు తరలించారు. మిగిలిన వారిని తెనాలి ప్రభుత్వ వైద్యశాలకు తరలించి చికిత్స అందిస్తున్నారు. మృతుడు జ్ఞానరాజుకు భార్య, ఇద్దరు పిల్లలు ఉండగా ప్రస్తుతం వడ్లమూడిలోని అత్తింట్లో ఉంటున్నాడని బంధువులు తెలిపారు. ఎదురుగా వస్తున్న బైక్‌ రాంగ్‌ రూట్‌లో రావడంతోనే ఆటో అదుపు తప్పి ప్రమాదం జరిగిందని స్థానికులు తెలిపారు. రూరల్‌ పోలీసులు ఘటనాస్థలాన్ని పరిశీలించారు. కేసు నమోదు చేసి దర్యాప్తు చేస్తున్నారు.

ఏడుగురికి గాయాలు, ఒకరి పరిస్థితి విషమం