పట్టుదలతో లక్ష్యాన్ని సాధించాలి

పట్టుదలతో లక్ష్యాన్ని సాధించాలి

● కలెక్టర్‌ వెంకటేశ్‌ దోత్రే ● పోటీ పరీక్షలపై యువతకు అవగాహన

ఆసిఫాబాద్‌: యువత పట్టుదలతో లక్ష్యాన్ని సాధించి భవిష్యత్‌ను బంగారుమయం చేసుకోవాలని కలెక్టర్‌ వెంకటేశ్‌ దోత్రే సూచించారు. కలెక్టరేట్‌ సమావేశమందిరంలో పోటీ పరీక్షలకు సన్నద్ధమవుతున్న యువతకు నిర్వహించిన అవగాహన కార్యక్రమంలో ధర్మసేవ స్వచ్ఛంద సంస్థ హైదరాబాద్‌ ప్రతి నిధులు రిషాంత్‌రెడ్డి, శ్రీనివాస్‌తో కలిసి పాల్గొని మాట్లాడారు. కెరీర్‌ను సరైన మార్గంలో ఎంచుకుని మంచి భవిష్యత్‌కు బాటలు వేసుకోవాలన్నారు. సమాజంలో ఉన్నత స్థానాన్ని సంపాదించుకోవా లని చెప్పారు. ఇందుకు ప్రతి ఒక్కరూ ప్రణాళికతో పోటీ పరీక్షలకు సిద్ధం కావాలని సూచించారు. మాదకద్రవ్యాలకు బానిసలు కాకుండా మంచి లక్షణాలతో ఎదిగా సమాజంలో ఆదర్శంగా ఉండాలని పేర్కొన్నారు. ఉన్నత ఉద్యోగాలు సాధించి అభివృద్ధికి కృషి చేయాలని సూచించారు. ఈ సందర్భంగా ధర్మసేవ స్వచ్ఛంద సంస్థ ప్రతినిధులు పోటీ పరీక్షలకు సన్నద్ధమవుతున్న అభ్యర్థులకు కెరీర్‌ గైడెన్స్‌పై అవగాహన కల్పించారు.