ఉత్సాహంగా ‘విజయవాడ మారథాన్‌’

ఉత్సాహంగా ‘విజయవాడ మారథాన్‌’

లబ్బీపేట(విజయవాడతూర్పు)/గాంధీనగర్‌(విజయ వాడసెంట్రల్‌): విజయవాడ రన్నర్స్‌ ఆధ్వర్యంలో ఆదివారం నిర్వహించిన విజయవాడ మారథాన్‌ ఉత్సాహంగా సాగింది. మూడు విభాగాలు(5కే, 10కే, 21కే)గా మారథాన్‌ను నిర్వహించగా, సుమారు 1800 మంది నగరానికి చెందిన యువత ఉత్సాహంగా పాల్గొన్నారు. తొలుత మారథాన్‌ను జింఖానా గ్రౌండ్స్‌ లో జీఎస్‌టీ అండ్‌ కస్టమ్స్‌ కమిషనర్‌ ఎస్‌. నరసింహారెడ్డి జెండా ఊపి ప్రారంభించారు. అనంతరం ఆయన మాట్లాడుతూ ప్రతి ఒక్కరూ ఉదయాన్నే వాకింగ్‌ చేయడం వల్ల ఆరోగ్యంగా ఉంటారన్నారు. శ్రీరామ్‌ ఫైనాన్స్‌ జనరల్‌ మేనేజర్‌ ఈ. ఫణికుమార్‌ మాట్లాడుతూ మారథాన్‌ నిర్వహణకు తమ పూర్తి సహాయ సహకారాలు ఎల్లప్పుడూ ఉంటాయన్నారు. ఆప్కాబ్‌ మేనేజింగ్‌ డైరెక్టర్‌ ఆర్‌ఎస్‌ రెడ్డి మాట్లాడుతూ విజయవాడ మారథాన్‌లో పెద్ద ఎత్తున్న ప్రజలు పాల్గొనడం ఆనందంగా ఉందన్నారు. మారథాన్‌ ఆర్గనైజర్‌ మణిదీపక్‌ మాట్లాడుతూ ఈ మారథాన్‌లో కళాశాలల నుంచి విద్యార్థులు, నగర వాసులు పాల్గొన్నట్లు తెలిపారు. మూడు కేటగిరీలో విజేతలుగా నిలిచిన వారికి బహుమతులు అందజేశారు.