రోడ్డు ప్రమాదంలో వ్యక్తి మృతి

చాగలమర్రి: మండలంలోని మద్దూరు మెట్ట సమీపంలో జాతీయ రహదారిపై రామయ్య డాబా సమీపంలో జరిగిన రోడ్డు ప్రమాదంలో ఒకరు మృతి చెందగా, మరొకరు గాయపడ్డారు. పోలీసులు తెలిపిన వివరాలు.. చిన్న బోధనం గ్రామానికి చెందిన చాకలి రాముడు(33), పెద్ద బోధనం గ్రామానికి చెందిన అంజి బైక్‌పై మద్దూరు గ్రామానికి ఓ శుభకార్యం నిమిత్తం వెళ్లారు. కార్యక్రమం పూర్తయిన తర్వాత స్వగ్రామానికి బయలుదేరారు. మార్గమధ్యలో రామయ్య డాబా వద్ద ద్విచక్ర వాహనం అదుపు తప్పి డివైడర్‌ను ఢీకొంది. ప్రమాదంలో రాముడు అక్కడికక్కడే మృతి చెందగా, అంజి తీవ్రంగా గాయపడ్డాడు. క్షతగాత్రుడిని ఆళ్లగడ్డ ప్రభుత్వ ఆసుపత్రికి తరలించగా పరిస్థితి విషమంగా ఉండటంతో కర్నూలుకు తరలించారు. పోలీసులు ఘటనా స్థలానికి చేరుకుని కేసు నమోదు చేసి, దర్యాప్తు చేపట్టారు.