వేదన

వేదన

రాయగడ: గ్రామానికి సరైన రహదారి లేకపోవడంతో ఒక రోగిని మంచంపై 5 కిలోమీటర్లు మోసుకుంటూ వెళ్లిన ఘటన జిల్లాలోని కాసీపూర్‌ సమితి కొడిపారి పంచాయతీ భెజాపొదొరొ గ్రామంలో శుక్రవారం చోటు చేసుకుంది. వివరాల్లోకి వెళ్తే.. గ్రామంలోని జమ్ము మాఝి భార్య మోర్చి మాఝి గత కొద్ది రోజులుగా జ్వరంతో బాధపడుతోంది. ఈ క్రమంలో శుక్రవారం నాడు పరిస్థితి ఆందోళనకరంగా ఉండడంతో గ్రామస్తులు అంబులెన్స్‌కు సమాచారం అందించారు. అయితే గ్రామానికి వెళ్లేందుకు రహదారి లేకపోవడంతో 5 కిలోమీటర్ల దూరంలో అంబులెన్స్‌ నిలిచిపోయింది. దీంతో గ్రామస్తులు తప్పనిసరి పరిస్థితిలో మంచంపై రోగిని ఉంచి మోసుకుంటూ అంబులెన్స్‌ వరకు తీసుకెళ్లారు. అనంతరం ఆమెను కాసీపూర్‌ ఆస్పత్రిలో చేర్పించారు. రహదారి సౌకర్యాలు లేకపోవడంతో ఇటువంటి ఘటనలు తరచూ చోటు చేసుకుంటుండడం పరిపాటిగా మారింది.