ప్రాణం తీసిన గుంతలు

వెంకటాచలం: రోడ్డుపై గుంతల కారణంగా నిండు ప్రాణం పోయింది. ఈ ఘటన మండలంలోని తిక్కవరప్పాడు – గొలగమూడి గ్రామాల మధ్య గురువారం సాయంత్రం జరిగింది. స్థానికులు, పోలీసుల కథనం మేరకు.. కంటేపల్లి పడమర గిరిజన కాలనీకి చెందిన బాణాల శీనయ్య (40) అనే వ్యక్తి పని నిమిత్తం సర్వేపల్లికి స్కూటీపై వెళ్లాడు. తిరిగి కంటేపల్లికి వస్తుండగా దారిలో తిక్కవరప్పాడు – గొలగమూడి మధ్య రోడ్డుపై ఉన్న గుంతల్ని చూసి తప్పించబోయాడు. ఈ సమయంలో స్కూటీ అదుపుతప్పి పడిపోయాడు. ఈ ప్రమాదంలో శీనయ్య తలకు తీవ్రగాయమై అక్కడికక్కడే మృతిచెందాడు. తోటి ప్రయాణికులు పోలీసులకు సమాచారం అందిండంతో వారు ఘటనా స్థలానికి చేరుకుని పరిశీలించారు. మృతదేహాన్ని పోస్టుమార్టం నిమిత్తం జిల్లా ప్రభుత్వాస్పత్రికి తరలించి కేసు నమోదు చేసి దర్యాప్తు చేస్తున్నారు.