టీకా వేయడంతో చిన్నారి మృతి

సేలం: ఈరోడ్‌ జిల్లా భవానీసాగర్‌ సమీపంలోని ఇక్కరైదత్త పల్లి గ్రామానికి చెందిన గౌతమ్‌(27) ఓ ప్రైవేట్‌ కంపెనీలో కూలీగా పనిచేస్తున్నాడు. ఇతని భార్య అసిన్‌(19). వీరికి ఏడాది క్రితం వివాహం కాగా, వారికి గత రెండు నెలల క్రితం ఆడబిడ్డ పుట్టింది. పుంజాయి పులియంబట్టి ప్రాథమిక ఆరోగ్య కేంద్రం ద్వారా ఇక్కరాయి దత్తపల్లి సమీపంలోని వెల్లియం పాళయం పూదూర్‌లోని అంగన్‌ వాడీ కేంద్రంలో చిన్నారులకు టీకాల శిబిరం శుక్రవారం జరిగింది. ఈ శిబిరంలో గౌతమ్‌–అసిన్‌ దంపతుల ఆడబిడ్డకు శుక్రవారం ఉదయం వ్యాక్సిన్‌ వేశారు. దీని తర్వాత, అసిన్‌ తన బిడ్డను ఇంటికి తిరిగి తీసుకువెళ్లారు. అయితే కొద్దిసేపటికే చిన్నారి అపస్మారక స్థితికి చేరుకుందని సమాచారం. వెంటనే అసిన్‌ తన బిడ్డను క్యాంపునకు తీసుకెళ్లింది. అనంతరం మళ్లీ అక్కడి నుంచి చిన్నారిని సత్యమంగళం ప్రభుత్వాసుపత్రికి చికిత్స నిమిత్తం తరలించారు. చిన్నారిని పరీక్షించిన వైద్యులు అప్పటికే మృతి చెందినట్లు తెలిపారు. టీకాలు వేయడంతోనే తమ బిడ్డ చనిపోయి ఉంటాడని అనుమానిస్తూ గౌతం, అసిన్‌ ఇద్దరూ భవానీసాగర్‌ పోలీసులకు ఫిర్యాదు చేశారు. దీంతో భవానీసాగర్‌ పోలీసులు చిన్నారి మృతదేహాన్ని పోస్టుమార్టం నిమిత్తం పెరుందురైలోని డాక్టర్‌ ఆస్పత్రికి తరలించారు. ఈ విషయంపై పుంజై పులియంబట్టి ప్రభుత్వ ప్రాథమిక ఆరోగ్య కేంద్రం వైద్యాధికారి శశికళ మాట్లాడుతూ.. వెల్లియంపాలెంలోని పూడూర్‌ అంగన్‌వాడీ కేంద్రంలో నిన్న జరిగిన టీకా శిబిరంలో ఆరుగురు పిల్లలకు టీకాలు వేశారు. వీరిలో టీకాలు వేసిన ఐదుగురు చిన్నారులు బాగానే ఉన్నారు. చిన్నారుల ఆరోగ్యాన్ని పర్యవేక్షిస్తున్నారు. అందువల్ల వేసిన వ్యాక్సిన్‌లో ఎలాంటి లోపం ఏర్పడే అవకాశం లేదు. అయితే చిన్నారి మృతదేహాన్ని పోస్టుమార్టం నిమిత్తం తరలించారు. పరీక్ష ఫలితాల తర్వాతే మృతికి గల కారణాలు తెలుస్తాయని వివరించారు.