శ్రీమత్స్యగిరి లక్ష్మీనరసింహస్వామి కల్యాణం

శ్రీమత్స్యగిరి లక్ష్మీనరసింహస్వామి కల్యాణం

వలిగొండ: మండలంలోని వెంకటాపురంలో గల శ్రీ మత్స్యగిరి లక్ష్మీనరసింహ స్వామి ఆలయ వార్షిక బ్రహ్మోత్సవాల్లో భాగంగా బుధవారం స్వామివారికి ఎదుర్కోళ్ల మహోత్సవం నిర్వహించారు. అనంతరం వైభవంగా తిరుకల్యాణం జరిపించారు. కల్యాణ మహోత్సవంలో ఎమ్మెల్యే కుంభం అనిల్‌ కుమార్‌ రెడ్డి దంపతులు పాల్గొన్నారు. స్వామివారి కల్యాణానికి పట్టువస్త్రాలు, తలంబ్రాలు సమర్పించారు. ఎమ్మెల్యే దంపతులకు ఆలయ అర్చకులు పూర్ణ కుంభంతో స్వాగతం పలికారు. కార్యక్రమంలో మాజీ రాజ్యసభ సభ్యుడు రాపోలు ఆనంద భాస్కర్‌, ఆలయ ధర్మకర్తల మండలి చైర్మన్‌ కొమ్మారెడ్డి నరేష్‌ రెడ్డి, ధర్మకర్తలు, భువనగిరి మున్సిపల్‌ చైర్మన్‌ పోతంశెట్టి వెంకటేశ్వర్లు, స్థానిక మార్కెట్‌ కమిటీ చైర్మన్‌ భీమా నాయక్‌ పాల్గొన్నారు.

కారు ఢీకొని వ్యక్తి మృతి

చివ్వెంల(సూర్యాపేట): కారు బైక్‌ను ఢీకొట్టడంతో వ్యక్తి మృతి చెందాడు. ఈ సంఘటన చివ్వెంల మండల పరిధిలోని కాసీంపేట గ్రామ శివారులో బుధవారం చోటుచేసుకుంది. చివ్వెంల మండల కేంద్రానికి చెందిన కత్తుల వీరమల్లు (52) వృత్తి రీత్యా తాపీ మేసీ్త్రగా చేస్తున్నాడు. బుధవారం దురాజ్‌పల్లి గ్రామంలో పనిచేసి తిరిగి బైక్‌పై ఇంటికి వస్తుండగా.. హైదరాబాద్‌ నుంచి విజయవాడ వెళ్తున్న కారు ఇతడి బైక్‌ను వెనుక నుంచి ఢీకొట్టింది. దీంతో వీరమల్లు తలకు తీవ్ర గాయాలై అక్కడికక్కడే మృతి చెందాడు. మృతుడికి భార్య, ఇద్దరు కుమారులు, కుమార్తె ఉన్నారు. కాగా.. ప్రమాద ఘటనపై ఎలాంటి ఫిర్యాదు అందలేదని ఎస్‌ఐ మహేశ్వర్‌ తెలిపారు.