90 పోస్టులు.. 270 మంది అభ్యర్థులు

విజయనగరం కలెక్టరేట్, న్యూస్‌లైన్ : జిల్లాలో వీఆర్వో పోస్టుల భర్తీ ప్రక్రియను అధికారులు వేగవంతం చేశారు. ఇప్పటికే మెరిట్ అభ్యర్థులను గుర్తించారు. వారి జాబితాను కలెక్టరేట్ ఆడిటోరియంతోపాటు, వెబ్‌సైట్‌లో అందుబాటులో ఉంచారు. ధ్రువపత్రాల పరిశీలన నిమిత్తం అర్హులైన అభ్యర్థులకు నేరుగా ఫోన్ చేయడంతోపాటు, సంక్షిప్త సందేశాలను (ఎస్‌ఎంఎస్) పంపుతున్నారు. ఈ నెల 27వ తేదీలోగా ధ్రువపత్రాల పరిశీలన పూర్తి చేయాలని సీసీఎల్‌ఏ నుంచి ఆదేశాలు రావడంతో మంగళవారం నుంచే ఈ ప్రక్రియను ప్రారంభించనున్నారు. సమాచారం అందుకున్న అభ్యర్థులు మధ్యాహ్నం 2 గంటలకు కలెక్టరేట్‌కు చేరుకోవాల్సి ఉంటుంది. అభ్యర్థులు గెజిటెడ్ అధికారి సంతకంతో కూడిన మూడు సెట్ల సర్టిఫికెట్ల జిరాక్స్ కాపీలతోపాటు, మూడు ఫొటోలు, ఒరిజినల్ సర్టిఫికెట్లు తీసుకురావాల్సి ఉంటుంది. మొత్తం 90 పోస్టులకు గానూ 270 మందిని ధ్రువపత్రాల పరిశీలనకు ఆహ్వానించారు. ఓపెన్ కేటగిరీలో 95 మార్కులను కటాఫ్‌గా నిర్ణయించారు. జాబితా సిద్ధం చేయడానికి కలెక్టరేట్ ఆధికారులు తీవ్ర కసరత్తు చేశారు. అయితే మార్కులు సమానంగా వస్తే వయస్సు ఎక్కువ ఉన్న వారికే ప్రాధాన్యం ఇస్తారు.