సర్కారు భూమితో వ్యాపారం

సర్కారు భూమితో వ్యాపారం

టాస్క్‌ఫోర్స్‌ : సంబేపల్లె మండల పరిధిలోని దేవపట్ల గ్రామంలో జాతీయ రహదారిని ఆనుకొని ఉన్న పొలం సర్వే నంబర్‌ 290లో 3.73 ఎకరాల భూమి ప్రభుత్వ భూమిగా రికార్డుల్లో నమోదైంది. అయితే కొత్త ప్రభుత్వం కొలువు తీరినప్పటి నుంచి ఆ భూమిలో అధికార పార్టీ నాయకులు విక్రయాలు జరుపుతున్నట్లు సమాచారం. రెవెన్యూ నిబంధనల్లో గ్రామ అవసరాలకు కొంత భూమిని కేటాయించడం మొదటి నుంచి అవలంబిస్తున్న ప్రక్రియ. జాతీయ రహదారి పక్కన ఉన్న కోట్లు విలువజేసే ఈ భూమిని అధికార పార్టీ నాయకులు విక్రయిస్తుండటం విమర్శలకు తావిస్తోంది. మండల కేంద్రానికి 5 కిలోమీటర్ల దూరంలో జాతీయ రహదారి పక్కన జరుగుతున్న ఈ తంతును రెవెన్యూ యంత్రాంగం పట్టించుకోకపోవడాన్ని ప్రజలు తప్పుబడుతున్నారు. ఫ్రీహోల్డ్‌ భూమి అంటూ ఈ భూమి తమదే అంటూ లక్షల్లో విక్రయిస్తూ పెద్ద మొత్తంలో ఆదాయాన్ని గడిస్తున్నట్లు ప్రజల్లో చర్చ జరుగుతోంది. ఈ విషయమై తహసీల్దార్‌ వెంకటేశ్వర్లును వివరణ కోరగా దేవపట్ల గ్రామంలోని పొలం సర్వే నంబర్‌ 290 గురించి సమాచారం అందిందని రికార్డులు పరిశీలించి చర్యలు తీసుకుంటామని తెలిపారు.

ఫ్రీహోల్డ్‌ భూమి అంటూ విక్రయిస్తున్న అధికార పార్టీ నాయకులు

పట్టించుకోని అధికార యంత్రాంగం