24న మైసూర్‌లో రామయ్య కల్యాణం

24న మైసూర్‌లో రామయ్య కల్యాణం

భద్రాచలం: భద్రాచలం శ్రీ సీతారామ చంద్రస్వామివారి కల్యాణం కర్ణాటక రాష్ట్రంలోని మైసూర్‌లో ఈ నెల 24న నిర్వహించనున్నారు. ఈ మేరకు ఆలయ ఈఓ రమాదేవి వివరాలను గురువారం ఒక ప్రకటనలో తెలిపారు. భక్తుల కోరిక మేరకు ఆలయ నియమ నిబంధనల ప్రకారం వివిధ రాష్ట్రాల్లో స్వామివారి కల్యాణం నిర్వహిస్తున్నట్లు పేర్కొన్నారు. మైసూర్‌కు చెందిన శ్రీ ధాత్రి హవన సమారాధన కమిటీ ఆధ్వర్యంలో 24న జరగనుందని వెల్లడించారు. ప్రచారరథం ద్వారా స్వామి వారి ఉత్సవ మూర్తులను తరలిస్తున్నట్లు తెలిపారు.

కమనీయంగా నిత్యకల్యాణం

దేవస్థానంలో గురువారం స్వామివారికి నిత్యకల్యాణం కమనీయంగా జరిగింది. తొలుత తెల్లవారుజామున గర్భగుడిలో స్వామివారికి సుప్రభాత సేవ, సేవాకాలం, ఆరాధన తదితర పూజలు చేశారు. అనంతరం నిత్యకల్యాణానికి బేడా మండపంలో కొలువుదీరిన స్వామి వారికి విశ్వక్సేన పూజ, పుణ్యావాచనం చేశారు. స్వామివారికి కంకణధారణ, యజ్ఞోపవీత ధారణ, అమ్మవారికి కంకణధారణ, యోక్త్రధారణ గావించి నిత్యకల్యాణ ఘట్టాన్ని ఆలయ అర్చకులు శాస్త్రోక్తంగా జరిపారు.