కిక్కిరిసిన అయినవిల్లి

కిక్కిరిసిన అయినవిల్లి

అయినవిల్లి: అయినవిల్లి విఘ్నేశ్వర స్వామివారి ఆలయం ఆదివారం భక్తులతో సందడిగా మారింది. స్వామివారిని అధిక సంఖ్యలో భక్తులు దర్శించుకుని ప్రత్యేక పూజలు చేశారు. ఆలయ ప్రధానార్చకుడు అయినవిల్లి సూర్యనారాయణ మూర్తి ఆధ్వర్యంలో స్వామికి మేలుకొలుపు సేవ, పంచామృతాభిషేకాలు, ఏకాదశ, లఘున్యాస రుద్రాభిషేకాలు, వివిధ ప్రత్యేక పూజలు చేశారు. మహానివేదన అనంతరం స్వామివారిని వివిధ పుష్పాలతో సర్వాంగ సుందరంగా అలంకరించారు. స్వామివారి లఘున్యాస, ఏకాదశ రుద్రాభిషేకాల్లో 25 మంది, లక్ష్మీగణపతి హోమంలో 21 మంది, పంచామృతాభిషేకాల్లో ఇరువురు దంపతులు పాల్గొన్నారు. 15 మంది చిన్నారులకు నామకరణ, అక్షరాభ్యాసాలు, తులాభారం జరిపారు. 26 మంది నూతన వాహన పూజ చేయించుకున్నారు. అన్నదాన పథకంలో 2,150 మంది అన్నప్రసాదం స్వీకరించారు. ఆలయానికి వివిధ పూజలు, అన్నదాన విరాళాలుగా రూ.2,10,185 ఆదాయం లభించిందని ఆలయ ఈఓ, అసిస్టెంట్‌ కమిషనర్‌ ముదునూరి సత్యనారాయణరాజు తెలిపారు.