గాలికొదిలేసిన కూటమి హామీలే అజెండా

గాలికొదిలేసిన కూటమి హామీలే అజెండా

ఫ నేడు వైఎస్సార్‌ సీపీ ఉమ్మడి తూర్పు గోదావరి జిల్లా సమావేశం

ఫ ముఖ్య అతిథిగా పాల్గొంటున్న రీజినల్‌

కో ఆర్డినేటర్‌ బొత్స

సాక్షి ప్రతినిధి, కాకినాడ: వైఎస్సార్‌ సీపీ ఉమ్మడి తూర్పు గోదావరి జిల్లా విస్తృత స్థాయి సమావేశం కాకినాడలో మంగళవారం జరగనుంది. స్థానిక సూర్య కళా మందిరంలో ఉదయం 10 గంటలకు ప్రారంభమయ్యే ఈ సమావేశంలో పార్టీ ఉభయ గోదావరి జిల్లాల ప్రాంతీయ సమన్వయకర్త, ఎమ్మెల్సీ బొత్స సత్యనారాయణ ముఖ్య అతిథిగా పాల్గొంటున్నారు. పార్టీ కాకినాడ జిల్లా అధ్యక్షుడు, మాజీ మంత్రి కురసాల కన్నబాబు సోమవారం ఈ వివరాలు తెలిపారు. సార్వత్రిక ఎన్నికల అనంతరం జరుగుతున్న పార్టీ తొలి సమావేశంలో భవిష్యత్‌ కార్యచరణపై చర్చించనున్నామని చెప్పారు. పార్టీ అధినేత, మాజీ ముఖ్యమంత్రి వైఎస్‌ జగన్‌మోహన్‌రెడ్డి ఆలోచనలకు అనుగుణంగా ప్రజల తరఫున నిర్వహించే పోరాటాలపై ఈ సమావేశంలో చర్చించనున్నామని తెలిపారు. ఈ నెల 13న రైతు సమస్యలపై కలెక్టరేట్ల వద్ద నిరసన, 27న విద్యుత్‌ చార్జీల పెంపుపై ఎస్‌ఈ కార్యాలయాల వద్ద, జనవరి 3న ఫీజు రీయింబర్స్‌మెంట్‌పై మాట తప్పిన కూటమి సర్కార్‌కు వ్యతిరేకంగా నిర్వహించే ఆందోళనలపై ఈ సమావేశంలో చర్చించనున్నామని వివరించారు. వీటితో పాటు సార్వత్రిక ఎన్నికల్లో ఎడాపెడా ఊదరగొట్టి, గాలికొదిలేసిన సూపర్‌సిక్స్‌ హామీలు, భావప్రకటనా స్వేచ్ఛను హరిస్తూ అడ్డగోలుగా సోషల్‌ మీడియా కార్యకర్తలపై ప్రభుత్వం సాగిస్తున్న దమనకాండ, పార్టీ కమిటీల నియామకాలపై కూడా చర్చించనున్నారని తెలిపారు. ఈ సమావేశానికి ఉమ్మడి జిల్లాల పార్టీ అధ్యక్షులు, పార్టీ ఎమ్మెల్సీలు, మాజీ ఎంపీలు, మాజీ ఎమ్మెల్యేలు, నియోజకవర్గ పార్టీ కో ఆర్డినేటర్లు, స్థానిక సంస్థల ప్రజాప్రతినిధులు, నియోజకవర్గ ముఖ్య నేతలు, అనుబంధ సంఘాల నాయకులు హాజరు కావాలని కన్నబాబు విజ్ఞప్తి చేశారు.