ఓదెల(పెద్దపల్లి): మండలంలోని పొత్కపల్లి పోలీస్ స్టేషన్ పరిధి కొలనూర్లో అద్దెకు ఉంటున్న ఓ యువకుడిని రామగుండం పోలీసులు అదుపులోకి తీసుకున్నారు. మరొకరు పరారయ్యారు. అయితే, అంతర్రాష్ట్ర దొంగల ముఠా రామగుండం పోలీసు ల అదుపులో ఉన్నట్లు విశ్వసనీయ వర్గాల సమాచా రం. ఆ ముఠాకు చెందినవారు చెప్పడం వల్లే వారు కొలనూర్ వచ్చినట్లు తెలిసింది. ప్రత్యక్ష సాక్షుల కథనం ప్రకారం.. కాల్వశ్రీరాంపూర్ మండలంలోని మడిపల్లికి చెందిన శివ ఎవరికీ అనుమానం రాకుండా నాలుగు నెలల క్రితం కొలనూర్లో ఓ గదిని అద్దెకు తీసుకొని, ఉంటున్నాడు. అందులోనే మరో వ్యక్తికి షెల్టర్ ఇచ్చాడు. ఈ నేపథ్యంలో రామగుండం పోలీసులు సోమవారం తెల్లవారుజామున రెండు కార్లలో కొలనూర్కు వచ్చారు. వారి రాకను పసిగట్టిన శివతో ఉన్న వ్యక్తి అక్కడినుంచి పరారయ్యాడు. పోలీసులు శివను అదుపులోకి తీసుకున్నారు. స్థానికులు ఏం జరిగిందోనని భయాందోళనకు గురయ్యారు. ఇన్ని రోజులు ఇక్కడున్నవారు దొంగలేమోనని చర్చించుకుంటున్నారు. ఈ విషయమై సుల్తానాబాద్ సీఐ సుబ్బారెడ్డిని వివరణ కోరగా రామగుండం పోలీసులు కొలనూర్ వచ్చినట్లు తనకు తెలియదని, తెలుసుకుంటానని పేర్కొన్నారు.
కొలనూర్లో ఒకరిని పట్టుకున్న రామగుండం పోలీసులు
పరారీలో మరొకరు
Comments
Please login to add a commentAdd a comment