ఇంటికి చేరిన పెంపుడు కుక్క

ఇంటికి చేరిన పెంపుడు కుక్క

మంథని: అపహరణకు గురైన పెంపుడు కుక్క(చాకు) 5 రోజుల తర్వాత తిరిగి ఇంటికి చేరింది. ‘పెంపుడు కుక్కను ఎత్తుకెళ్లారు’ శీర్షికన ‘సాక్షి’ దినపత్రికలో ఈ నెల 5న కథనం ప్రచురితమైంది. అలాగే, ‘సాక్షి’ టీవీలో గరం గరం వార్తల్లో సైతం వార్త ప్రసారమైంది. బాధితుల ఆవేదనకు సంబంధించిన ఈ కథనాలు సోషల్‌ మీడియాలో వైరల్‌ అయ్యాయి. దీంతో ఎత్తుకెళ్లినవారు ఏమనుకున్నారో గానీ వారి తరఫువారు సుమారు 10 మంది శుక్రవారం ఆ శునకాన్ని తీసుకొని, మంథని మున్సిపల్‌ పరిధి శ్రీరాంనగర్‌లోని యజమాని అప్పారి నారాయణ ఇంటికి వచ్చారు. పెంపుడు కుక్కను చూడగానే ఆ కుటుంబం ఆనందంలో మునిగిపోయింది. దాన్ని హత్తుకొని సంబురపడ్డారు. ‘సాక్షి’లో వచ్చిన వార్త కారణంగా తాము పడుతున్న బాధను తెలుసుకొని, కుక్కను ఎత్తుకెళ్లినవారు తిరిగి పంపించారని నారాయణ తెలిపారు. అపహరించినవారు రామగిరి మండలం ముల్కలపల్లికి చెందినవారని పేర్కొన్నారు. ఈ సందర్భంగా ‘సాక్షి’కి కృతజ్ఞతలు తెలిపారు.

ఎత్తుకెళ్లినవారే తిరిగి పంపించారు..

‘సాక్షి’కి కృతజ్ఞతలు తెలిపిన బాధితులు