చిత్రకూట మండపంలో రాపత్తు సేవ

చిత్రకూట మండపంలో రాపత్తు సేవ

భద్రాచలం: శ్రీ సీతారామ చంద్రస్వామి దేవస్థానంలో అధ్యయనోత్సవాల్లో భాగంగా ఆదివారం ఆలయ ప్రాంగణంలోని చిత్రకూట మండపంలో రాపత్తు సేవ నిర్వహించారు. చినజీయర్‌ మఠం ఆధ్వర్యంలో ఈ వేడుకను కమనీయంగా నిర్వహించారు. పల్లకీలో స్వామివారిని మేళతాళాలు, భజనలు, కోలాటాల నడుమ ఊరేగింపుగా తీసుకొచ్చి వేదికపై కొలువుదీర్చారు. అర్చకులు స్వామివారికి ప్రత్యేక పూజలు చేసి హారతిని సమర్పించారు. అనంతరం దేవనాథ రామానుజ జీయర్‌ స్వామి ప్రవచనాలు చేశారు. కాగా ఈ రాపత్తు ఉత్సవాలు సోమవారంతో ముగుస్తాయి.

రామయ్యకు అభిషేకం, సువర్ణ పుష్పార్చన

దేవస్థానంలో రామయ్య స్వామి మూలమూర్తులకు ఆదివారం అభిషేకం, సువర్ణ పుష్పార్చన జరిపారు. తెల్లవారుజామున గర్భగుడిలో స్వామివారికి సుప్రభాత సేవ, సేవాకాలం, ఆరాధన తదితర పూజలు చేశారు. అనంతరం బేడా మండపంలో విశ్వక్సేన పూజ, పుణ్యావాచనం చేశారు. స్వామివారికి కంకణధారణ, యజ్ఞోపవీత ధారణ, అమ్మవారికి కంకణధారణ, యోక్త్రధారణ గావించి నిత్యకల్యాణ ఘట్టాన్ని అర్చకులు శాస్త్రోక్తంగా జరిపారు.