హ్యాండ్‌బాల్‌ విజేత వైజాగ్‌ జట్టు

హ్యాండ్‌బాల్‌ విజేత వైజాగ్‌ జట్టు

చాగలమర్రి: స్థానిక జిల్లా పరిషత్‌ బాలుర ఉన్నత పాఠశాల క్రీడా మైదానంలో రెండు రోజుల పాటు నిర్వహించిన 53వ సీనియర్‌ మెన్స్‌ హ్యాండ్‌బాల్‌ రాష్ట్రస్థాయి పోటీల్లో వైజాగ్‌ జట్టు విజేతగా నిలిచింది. ఈ టోర్నీలో రాష్ట్రంలోని 13 జిల్లాలకు చెందిన జట్లు పాల్గొన్నాయి. గురువారం జరిగిన ఫైనల్‌లో వైజాగ్‌ జట్టు గెలుపొందగా వెస్ట్‌ గోదావరి జట్టు రన్నరప్‌గా, సత్యసాయి, అనంతపురం జిల్లా జట్లు సంయుక్తంగా మూడో స్థానంలో నిలిచాయి. హోరాహోరీగా జరిగిన ఫైనల్‌లో వెస్ట్‌ గోదావరి జట్టుపై వైజాగ్‌ జట్టు 3–7 పాయింట్ల తేడాతో గెలుపొందింది. విజేతలకు వైఎస్సార్‌సీపీ నాయకులు, వ్యాపారవేత్తలు చక్రం ముల్లా షబ్బీర్‌ ఆహ్మద్‌, షేక్‌ ఖీజర్‌, ఎన్‌ఎండీ ఇంతియాజ్‌ ట్రోఫీ, మెడల్స్‌తో పాటు సర్టిఫికెట్లను అందజేశారు. టోర్నీ నిర్వహణకు సహకరించిన దాతలను అసోసియేషన్‌ తరఫున రాష్ట్ర కార్యదర్శి రామాంజనేయులు దుశ్శాలువా, పూలమాలతో ఘనంగా సన్మానించి, కృతజ్ఞతలు తెలిపారు. ఉప సర్పంచ్‌ షేక్‌ మహమ్మద్‌ సోహెల్‌, వైఎస్సార్‌సీపీ మండల ఉపాధ్యక్షుడు ముల్లా ఖాదర్‌బాషా, ప్రచార కార్యదర్శి రఫీ తదితరులు పాల్గొన్నారు.