వేర్వేరు ప్రమాదాల్లో ఇద్దరు మృతి

వేర్వేరు ప్రమాదాల్లో ఇద్దరు మృతి

కారు ఢీకొట్టి యువకుడు..

లక్సెట్టిపేట: మండలంలోని వెంకట్రావుపేట గ్రామానికి చెందిన బొమ్మిడి అరుణ్‌కుమార్‌(26) అనే యువకుడు కారు ఢీకొని మృతిచెందినట్లు ఎస్సై సతీశ్‌ తెలిపారు. ఆయన తెలిపిన వివరాల ప్రకారం .. అరుణ్‌కుమార్‌ తన స్నేహితులు దినకర్‌, విష్ణు, మహేశ్‌లతో కలిసి రోజూ మాదిరి శుక్రవారం మార్నింగ్‌ వాక్‌కు వెళ్లాడు. కొత్తూరు గ్రామ స్టేజీ సమీపంలో జన్నారం నుంచి లక్సెట్టిపేటకు వెళ్తున్న కారు యువకుడిని వెనుకనుంచి ఢీకొట్టింది. దీంతో కాలు విరిగి తలకు బలమైన గాయమై అరుణ్‌కుమార్‌ అక్కడికక్కడే మృతిచెందగా, మహేశ్‌కు గాయాలయ్యాయి. అరుణ్‌కుమార్‌ తండ్రి చిన్నతనంలోనే మృతి చెందగా, తమ్ముడు తరుణ్‌ హైదరాబాద్‌లో పీజీ చదువుతున్నాడు. మృతుడి తల్లి మంజులత ఫిర్యాదు మేరకు కేసు నమోదు చేసి దర్యాప్తు జరుపుతున్నట్లు ఎస్సై తెలిపారు.

నేత్రదానం చేసిన కుటుంబ సభ్యులు..

రోడ్డు ప్రమాదంలో యువకుడు మృతి చెందిన విష యం తెలుసుకున్న మంచిర్యాల లైన్స్‌క్లబ్‌ సభ్యులు అరుణ్‌కుమార్‌ కుటుంబ సభ్యులతో మాట్లాడి నేత్రదానం చేయడానికి ఒప్పించారు. వైద్యాధికారి అభిషేక్‌ సహకారంతో నేత్రాలలోని కార్నియాను సేకరించి హైదరాబాద్‌లోని ఎల్వీ ప్రసాద్‌ ఐ బ్యాంకుకు పంపించినట్లు లైన్స్‌క్లబ్‌ నిర్వాహకుడు మధుసూదన్‌ రెడ్డి తెలిపారు.

రోడ్డు ప్రమాదంలో ఒకరు.

రామకృష్ణాపూర్‌: రామకృష్ణాపూర్‌ పోలీస్‌స్టేషన్‌ పరిధిలోని గద్దెరాగిడి హైవేపై శుక్రవారం జరిగిన రోడ్డు ప్రమాదంలో భర్త మృతిచెందగా భార్యకు గాయాలయ్యాయి. పట్టణ ఎస్సై రాజశేఖర్‌ తెలిపిన వివరాల ప్రకారం మందమర్రి మండలం ఎర్రగుంటపల్లెకు చెందిన కోట సాంబశివరావు(66), శివపార్వతి దంపతులు ద్విచక్ర వాహనంపై మంచిర్యాలకు వెళ్తుండగా గద్దెరాగిడి వైన్స్‌ షాపు వద్ద ఓ అంబులెన్స్‌ బైక్‌ను ఢీకొట్టింది. దీంతో ఇద్దరికి తీవ్రగాయాలు కాగా మంచిర్యాల ఆసుపత్రికి తరలించారు. అక్కడి నుంచి మెరుగైన వైద్యం కోసం కరీంనగర్‌కు తరలిస్తుండగా మార్గమధ్యలో సాంబశివరావు మృతిచెందాడు. కేసు నమోదు చేసుకుని దర్యాప్తు చేస్తున్నట్లు ఎస్సై తెలిపారు.