రాష్ట్రపతి పర్యటనకు సర్వం సిద్ధం

రాష్ట్రపతి పర్యటనకు సర్వం సిద్ధం

భువనేశ్వర్‌: డిసెంబర్‌ 4వ తేదీన భారత రాష్ట్రపతి ద్రౌపది ముర్ము రాష్ట్ర పర్యటన పురస్కరించుకుని భారీ ఏర్పాట్లు చేస్తున్నారు. ఈ పర్యటనలో భాగంగా రాష్ట్రపతి శ్రీమందిరం సందర్శించనున్నారు. శ్రీ మందిరంలో రత్న వేదిక ముంగిట ఆమె మూల విరాటులకు పూజార్చనలు చేయనున్నారు. ఈ సందర్భంగా అనుబంధ సేవాయత్‌ల ఆధ్వర్యంలో పూజాదులు సంప్రదాయబద్ధంగా నిర్వహించేందుకు ఛొత్తీషా నియోగుల ప్రతినిధి ప్రముఖులతో ప్రత్యేక సమావేశం నిర్వహించారు. ఈ సమావేశానికి శ్రీ మందిరం ప్రధాన పాలన అధికారి(సీఏవో) డాక్టర్‌ అరవింద కుమార్‌ పాఢి అధ్యక్షత వహించారు. రాష్ట్రపతి శ్రీమందిరం సందర్శన సందర్భంగా పూర్తి సహాయ సహకారాలు అందజేస్తామని ఛొత్తీషా నియోగుల సంఘం ప్రతినిథులు హామీ ఇచ్చినట్లు వివరించారు.