రోడ్డు ప్రమాదంలో ఇద్దరు మృతి

రోడ్డు ప్రమాదంలో ఇద్దరు మృతి

సత్తెనపల్లి: రోడ్డు ప్రమాదంలో ఇద్దరు మృతి చెందిన సంఘటన సత్తెనపల్లి మండలం వెన్నాదేవి వద్ద ఆదివారం రాత్రి చోటుచేసుకుంది. వివరాలు .. ఎడ్లపాడు మండలం లింగారావుపాలెం గ్రామానికి చెందిన రాయపూడి రోశయ్య (32) సత్తెనపల్లి మండలం ధూళ్ళిపాళ్ల సమీపంలోని రైతు నేస్తం కోల్డ్‌ స్టోరేజ్‌లో మిషన్‌ ఆపరేటర్‌గా పని చేస్తూ జీవనం వెళ్లదీస్తున్నాడు. రోశయ్య భార్యకు 15 రోజుల క్రితం కుమార్తె పుట్టడంతో ఆమెను చూసేందుకు శనివారం ఉదయం బయలుదేరి లింగారావుపాలెం వెళ్లాడు. ఆదివారం సాయంత్రం తిరిగి ధూళ్ళిపాళ్లకు బయలుదేరాడు. తనతోపాటు లింగారావుపాలెం గ్రామానికి చెందిన బంధువు కట్టా వీరేంద్ర (17)ను కూడా వెంట బెట్టుకుని ద్విచక్ర వాహనంపై ఫ్యాన్‌ పట్టుకుని వస్తున్నాడు. వెన్నాదేవి సమీపంలోకి వెళ్లగానే సత్తెనపల్లి నుంచి పిడుగురాళ్ల వైపు వెళుతున్న ఆటోను తప్పించే క్రమంలో రోడ్డుపై పడ్డారు. ఆ సమయంలో సత్తెనపల్లి నుంచి పిడుగురాళ్ళ వైపు వెళుతున్న గుర్తు తెలియని వాహనం (బస్సు అని భావిస్తున్నారు) వారిపైకి ఎక్కడంతో అక్కడికక్కడే మృతి చెందారు. సత్తెనపల్లి రూరల్‌ ఎస్‌హెచ్‌ఓ పి.శ్రీనివాసరావు సంఘటనా స్థలానికి చేరుకొని మృతదేహాలను పోస్టుమార్టం నిమిత్తం సత్తెనపల్లి ఏరియా వైద్యశాలకు తరలించారు. కేసు నమోదు చేసుకొని దర్యాప్తు చేస్తున్నారు. రోశయ్య, వీరేంద్రలు బంధువులు కావడంతో వారి మృతి వార్త తెలిసి రైతు నేస్తం కోల్డ్‌ స్టోరేజ్‌లో పనిచేస్తున్న వారి బంధువులు, కుటుంబసభ్యులు ఏరియా వైద్యశాలకు చేరుకొని కన్నీరు మున్నీరయ్యారు. రోశయ్యకు భార్య, ఇరువురు కుమార్తెలు ఉన్నారు. పోలీసులు కేసు దర్యాప్తు చేస్తున్నారు.