రోడ్డు ప్రమాదంలో నలుగురికి తీవ్ర గాయాలు

రోడ్డు ప్రమాదంలో నలుగురికి తీవ్ర గాయాలు

తెనాలిరూరల్‌: ఆటో, కారు ఢీకొన్న ఘటనలో నలుగురు గాయాలపాలయ్యారు. తెనాలి మండలం నందివెలుగు–అత్తోట గ్రామాల మధ్య ప్రధాన రహదారిపై ఆదివారం సాయంత్రం కొల్లిపర వైపు నుంచి వస్తున్న ఆటోను ఎదురుగా మితిమీరిన వేగంతో వస్తున్న కారు ఢీ కొట్టడంతో ఒకే కటుంబానికి చెందిన వారు తీవ్రంగా గాయపడ్డారు. బాధితుల కథనం ప్రకారం.. కొల్లిపరకు చెందిన ఎం.ధన కిషోర్‌, భార్య దేవరాణి, కుమారుడు, కుమార్తెతో కలిసి ఆదివారం సాయంత్రం శ్రీకాళహస్తి వెళ్లేందుకు తెనాలి రైల్వేస్టేషన్‌కు ఆటోలో బయలుదేరారు. నందివెలుగు పెట్రోల్‌ బంక్‌ సమీపంలోకి రాగానే ఎదురుగా మితిమీరిన వేగంతో వచ్చిన కారు అదుపుతప్పి వీరి ఆటోను ఢీకొట్టింది. ప్రమాదంలో ఆటో పూర్తిగా ధ్వంసం కావడంతో పాటు ధన కిషోర్‌, దేవరాణి, వీరి కుమారుడు విజయ భాను, ఆటో డ్రైవర్‌ శ్రీధర్‌కు గాయాలయ్యాయి. కిషోర్‌ కుమార్తె క్షేమంగా బయటపడింది. స్థానికులు అక్కడకు చేరుకుని క్షతగాత్రులను అంబులెన్స్‌లో తెనాలి ప్రభుత్వ జిల్లా వైద్యశాలకు తరలించారు. కారు మితిమీరిన వేగంతో వచ్చి తమ ఆటోను ఢీకొట్టడంతో ప్రమాదం జరిగిందని బాధితులు తెలిపారు. రూరల్‌ పోలీసులు కేసు నమోదు చేసి దర్యాప్తు చేస్తున్నారు.