ఎదురెదురుగా బైకులు ఢీ.. ఇద్దరికి గాయాలు

ఎదురెదురుగా బైకులు ఢీ.. ఇద్దరికి గాయాలు

బంట్వారం: రోడ్డు ప్రమాదంలో ఇద్దరు యువకులు తీవ్రంగా గాయపడ్డారు. ఈ సంఘటన బుధవారం కోట్‌పల్లి మండల పరిధిలోని కంకణాలపల్లి గేటు వద్ద చోటు చేసుకుంది. వివరాలిలా ఉన్నాయి. యాలాల మండలం బెన్నూరుకు చెందిన ఇద్దరు యువకులు మోమిన్‌పేట వైపు నుంచి బైక్‌పై వస్తున్నారు. అదే క్రమంలో కోట్‌పల్లి మండల కేంద్రానికి చెందిన మరో ఇద్దరు యువకులు వికారాబాద్‌ వైపు వెళుతున్నారు. రెండు బైక్‌లు ఎదురెదురుగా కంకణాలపల్లి గేటు వద్ద ఢీకొన్నాయి. ఈ ప్రమాదంలో బెన్నూరుకు చెందిన నరేందర్‌(30), కోట్‌పల్లికి చెందిన మహేశ్‌(25) తీవ్రంగా గాయపడ్డారు. మరో ఇద్దరు యువకులకు స్వల్ప గాయాలయ్యాయి. స్థానికులు వెంటనే 108కు సమాచారం అందించి సంగారెడ్డి ప్రభుత్వ ఆసుపత్రికి తరలించారు. ఈ విషయమై కోట్‌పల్లి పోలీసులను సంప్రదించగా తమకు ఎలాంటి ఫిర్యాదు అందలేదని చెప్పారు.