అగ్ని ప్రమాదంలో దగ్ధమైన దుకాణాలు

అగ్ని ప్రమాదంలో దగ్ధమైన దుకాణాలు

భామిని: మండల కేంద్రంలో శనివారం రాత్రి జరిగిన అగ్ని ప్రమాదంలో మూడు దుకాణాలు కాలిపోయాయి. ఒక్కసారిగా మంటలు పెద్దెత్తున రావడంతో స్థానికులు భయాందోళనకు గురయ్యారు. కాలనీలో ఉన్న దుకాణ సముదాయంలో ఓ దుకాణంలో వెలిగించిన దీపం అక్కడి డోర్‌కర్టెన్‌కు అంటుకొని మంటలు రేగాయని భావిస్తున్నారు. మంటలు క్షణాల్లోనే పక్క దుకాణాలకు వ్యాపించడంతో స్థానికులు చేరుకొని మంటలను అదుపు చేశారు. పెద్దెత్తున మంటలు చెలరేగడానికి దుకాణాల్లో ఉన్న డీజిల్‌, పెట్రోల్‌ బాటిళ్లు కారణమని భావిస్తున్నారు. ప్రమాదంలో దుకాణాల్లోని ప్లంబింగ్‌ సామగ్రి, స్పేరు పార్టులు కాలిపోయాయి. మూడు దుకాణాల్లో రెండు పూర్తిగా కాలిపోగా, ఒక దుకాణంలో పాక్షికంగా కాలిపోయింది. దుకాణాల ముందున్న వ్యాన్‌ కూడా పాక్షికంగా కాలిపోయింది. సమీపంలోనే విద్యుత్‌ వైర్లు ఉండడంతో షార్ట్‌ సర్క్యూట్‌కు గురై మూడు ఇళ్లల్లోని విలువైన ఎలక్ట్రానిక్‌ పరికరాలు కూడా దగ్ధమయ్యాయి. రూ.లక్షల్లో ఆస్తి నష్టం ఉంటుందని బాధిత కుటుంబాలు వారు విలపిస్తూ చెప్పారు.