న్యూఢిల్లీ: రూ. 5.16 లక్షల జరిమానా బకాయిలను రాబట్టుకునే దిశగా వీడియోకాన్‌ గ్రూప్‌ వ్యవస్థాపకుడు వేణుగోపాల్‌ ధూత్‌కు చెందిన బ్యాంక్, డీమాట్, మ్యుచువల్‌ ఫండ్‌ ఖాతాలు, లాకర్లను అటాచ్‌ చేయాల్సిందిగా మార్కెట్ల నియంత్రణ సంస్థ సెబీ ఆదేశించింది. ఆయా ఖాతాల నుంచి డెబిట్‌ లావాదేవీలను అనుమతించరాదంటూ బ్యాంకులు, డిపాజిటరీలు (సీడీఎస్‌ఎల్, ఎన్‌ఎస్‌డీఎల్‌), మ్యుచువల్‌ ఫండ్‌ సంస్థలకు సూచించింది.  అయితే, క్రెడిట్‌ లావాదేవీలకు అనుమతించవచ్చని పేర్కొంది. క్వాలిటీ టెక్నో అడ్వైజర్స్, క్రెడెన్షియల్‌ ఫైనాన్స్, సుప్రీం ఎనర్జీ వంటి సంస్థలతో తనకున్న పెట్టుబడులు, సంబంధం గురించి వెల్లడించకుండా, నిబంధనలను ఉల్లంఘించినందుకు గాను ఈ ఏడాది మార్చిలో ధూత్‌కు సెబీ రూ. 5 లక్షల జరిమానా విధించింది. అయితే, ఆ మొత్తాన్ని చెల్లించడంలో ఆయన విఫలమయ్యారు.  ఇదీ చదవండి ➤ ఫాక్స్ కార్పొరేషన్ స్ట్రీమింగ్ సర్వీస్‌కు సీఈవోగా అంజలీ సూద్ దీంతో అసలుతో పాటు రూ. 15,000 వడ్డీ, రికవరీ వ్యయాల కింద మరో రూ. 1,000 కలిపి మొత్తం రూ. 5.16 లక్షలు బాకీ చెల్లించాలని అటాచ్‌మెంట్‌ నోటీసులో సెబీ ఆదేశించింది. వీడియోకాన్‌ గ్రూప్‌ సంస్థలకు రుణ సదుపాయాలు కల్పించినందుకు ప్రతిగా అప్పట్లో ఐసీఐసీఐ బ్యాంక్‌ సీఈవోగా పనిచేసిన చందా కొచర్, ఆమె భర్తకు ధూత్‌ ప్రయోజనం చేకూర్చారని (క్విడ్‌ ప్రో కో) ఆరోపణలు ఉన్న సంగతి తెలిసిందే.

సాక్షి,ముంబై: ఐసీఐసీఐ-వీడియోకాన్ స్కాం కేసులో ఐసీఐసీఐ బ్యాంకు మాజీ ఎండీ, సీఈవో చందాకొచ్చర్‌కు భారీ షాక్‌ తగిలింది. ఈ  కుంభకోణంలో తాజాగా కీలక పరిణామం చోటు చేసుకుంది. చందా కొచ్చర్‌ తోపాటు, ఆమె భర్త, దీపక్ కొచ్చర్, వీడియోకాన్‌ గ్రూప్‌ వ్యవస్థాపకుడు వేణుగోపాల్ ధూత్‌లపై చార్జిషీట్ దాఖలైంది. ముంబై సిటీ సివిల్ సెషన్స్ కోర్టులో సీబీఐ తాజాగా చార్జిషీట్ దాఖలు చేసింది. రూ.3,250 కోట్ల రుణం మోసం కేసులో చార్జిషీట్‌ దాఖలు చేసినట్లు సీబీఐ అధికారులు శనివారం తెలిపారు. ఐసీఐసీఐ బ్యాంక్ 2009 ,  2011 మధ్య వీడియోకాన్ గ్రూప్‌కు చెందిన ఆరు కంపెనీలకు రూ. 1,875 కోట్ల రూపాయల టర్మ్ రుణాన్ని మంజూరులో అవకతవకలు జరిగాయని  సీబీఐ ప్రధాన ఆరోపణ.  క్విడ్‌ ప్రో కింద వీడియోకాన్ గ్రూప్‌నకు రుణాలు మంజూరైనట్టు, ఇందులో ధూత్ అంతిమ లబ్ధిదారుడని సీబీఐ ఆరోపిస్తోంది. ఇందుకుగాను దీపక్ కొచర్‌కు చెందిన నూపవర్ రెన్యూవబుల్స్ లిమిటెడ్‌కు రూ. 64 కోట్లు, దక్షిణ ముంబైలోని ఫ్లాట్‌కు 2016లో రూ. 11 లక్షలు (విలువ రూ. 5.25 కోట్లు) లంచంగా ముట్టాయని  సీబీఐ పేర్కొంది. ఈ కేసు విచారణ నేపథ్యంలో  చందాకొచ్చర్‌ను ఐసీఐసీఐ బ్యాంకు  తొలగించింది.  ఈ కేసులో సీబీఐ 2019లో ఎఫ్‌ఐఆర్ నమోదు చేసింది. 2019లో, చందా కొచ్చర్ బ్యాంక్ ఎండీగా ఉన్నప్పుడు కంపెనీలకు ఐసీఐసీఐ మంజూరు చేసిన రూ.1,800 కోట్లకు పైగా రుణానికి సంబంధించి ఎఫ్‌ఐఆర్ నమోదైంది. 2022 డిసెంబర్‌లో కొచ్చర్‌ దంపతులను, వేణుగోపాల్ ధూత్‌లను సీబీఐ అరెస్టు చేసింది. అయితే, అరెస్టులు చట్టానికి లోబడి లేవని పేర్కొంటూ జనవరి 9న బాంబే హైకోర్టు కొచ్చర్‌లకు బెయిల్ మంజూరు చేసింది. ఆ తర్వాత ధూత్‌కు బెయిల్ కూడా లభించిన సంగతి తెలిసిందే.  

ఐసీఐసీఐ బ్యాంక్‌ లోన్‌ కుంభకోణంలో వీడియోకాన్‌ గ్రూప్‌ అధినేత వేణుగోపాల్‌ ధూత్‌ను సీబీఐ అధికారులు అరెస్ట్‌ చేసిన విషయం తెలిసిందే. అరెస్ట్‌ అనంతరం ఎన్‌ఫోర్స్‌మెంట్‌ అధికారులు లోన్‌ కేసులో ప్రధాన నిందితులైన చందా కొచ్చర్‌, దీపక్‌ కొచ్చర్‌తో పాటు వేణుగోపాల్‌ ధూత్‌ స్టేట్మెంట్‌ను రికార్డ్‌ చేస్తున్నారు. ఈ సందర్భంగా అధికారులు నిందితుల మధ్య జరిగిన లావాదేవీలను పరిశీలించగా అందులో కొన్ని సంచలన విషయాలు వెలుగులోకి వచ్చాయి.  కొచ్చర్‌ దంపతులకు లంచాలు ఎలా ఇచ్చారంటే? ఐసీఐసీఐ బ్యాంక్‌ సీఈవోగా చందా కొచ్చర్‌ ఆర్‌బీఐ బ్యాంక్‌లకు విధించిన బ్యాంకింగ్‌ రెగ్యూలేషన్‌ యాక్ట్‌, క్రెడిట్‌ పాలసీ (రుణ) నిబంధనలకు విరుద్ధంగా వీడియోకాన్‌ గ్రూప్‌ ప్రమోటర్‌ వేణుగోపాల్‌ ధూత్‌కు రూ.3250 కోట్లలోన్‌ మంజూరు చేశారు. అందుకు గాను ధూత్‌.. కొచ్చర్‌ కుటుంబానికి లంచాలు ఇచ్చినట్లు అధికారుల దర్యాప్తులో తేలినట్లు తెలుస్తోంది.   వడ్డీతో పాటు షేర్‌ కూడా  రుణం మంజూరు తర్వాత భార్య భర్తలైన చందాకొచ్చర్‌, దీపక్‌ కొచ‍్చర్‌కు వేణుగోపాల్‌ ధూత్‌ల మధ్య సన్నిహిత సంబంధాలు ఏర్పడ్డాయి. రుణం విషయంలో అనుకూలంగా వ్యవహరించారనే కారణంగా ధూత్‌ తన వీడియోకాన్‌ గ్రూప్‌లో ఆ సమయంలో ఐసీఐసీఐ బ్యాంక్‌ సీఈవోగా చందాకొచ్చర్‌కు షేర్‌ ఇవ్వడంతో పాటు సంస్థ నుంచి వచ్చిన లాభాల్లో అధిక మొత్తంలో వడ్డీ ఇచ్చారు. పైగా తన ఖరీదైనా ప్లాటులో నివాసం ఉండేలా కొచ్చర్‌ దంపతులు ఇచ్చారు.  అప్పు తీర్చేందుకు అప్పుగా రూ.300 కోట‍్ల రుణం  సీఈవో పదవితో పాటు ఐసీఐసీఐ బ్యాంక్‌ శాంక్షనింగ్ కమిటీ చైర్‌ పర్సన్‌గా ఉన్న చందా కొచ్చర్‌ అధికార దుర్వినియోగానికి పాల్పడ్డారు. ఆ పదవిలో(శాంక్షనింగ్  కమిటీ చైర్ పర్సన్‌ గా) ఉన్న ఆమె బ్యాంక్‌ యాజమాన్యానికి సమాచారం ఇవ్వకుండా వీడియోకాన్ ఇంటర్నేషనల్ ఎలక్ట్రానిక్స్ లిమిటెడ్ (వీఐఎల్)కు రూ.300కోట్ల రుణం మంజూరు చేసింది. ఆ రుణాన్ని వీడియోకాన్‌ గతంలో అదే బ్యాంక్‌ నుంచి తీసుకున్న రుణాన్ని చెల్లించేందుకు.. కొత్తగా వందల కోట్లను రుణాన్ని ఇచ్చింది. ఆ తర్వాత శాక్షనింగ్‌ కమిటీ పదవి నుంచి తప్పుకుంది.   రూ.64కోట్లు ముడుపులు అందుకు ప్రతిఫలంగా వీడియోకాన్‌ అధినేత వేణుగోపాల్‌ ధూత్‌..చందా కొచ్చర్‌ భర్త దీపక్‌ కొచ్చర్‌కు చెందిన న్యూ పవర్‌ రెన్యూవబుల్స్‌ ప్రైవేట్‌ లిమిటెడ్‌ (nrpl) సంస్థ నిర్వహణ ఖర్చుల నిమిత్తం రూ.64 కోట్లు ముడుపులుగా ఇచ‍్చినట్లు సీబీఐ తన ఇన్వెస్టిగేషన్‌లో గుర్తించింది.  ఆ రూ.64 కోట్లతో దీపక్‌ కొచ్చర్‌ 33.15 మెగా వాట‍్ల కెపాసిటీతో  విండ్‌ ఫార్మ్‌ ప్రాజెక్ట్‌ కావాల్సిన భారీ ఎత్తున చిన్న చిన్న విండ్‌ టర్బైన్లను కొనుగోలు చేశారు.  రూ.5.25 కోట్ల ప్లాట్‌ ఖరీదు రూ.11 లక్షలే  చందా కొచ్చర్, ఆమె కుటుంబం వేణుగోపాల్‌ ధూత్‌ నుంచి అన్నీ రకాల లబ్ధి పొందినట్లు దర్యాప్తు అధికారులు విచారణలో స్పష‍్టమైంది. పైన పేర్కొన్నుట్లుగా రూ.64 కోట్లతో పాటు ముంబైలోని సీసీఐ ఛాంబర్స్‌లో ఉన్న రూ.5.25 కోట్ల ఖరీదైన ఫ్లాటును 1996 నుంచి 2016 వరకు ఫ్రీగా వినియోగించుకున్నారు. ఆ తర్వాత అదే ప్రాపర్టీని రూ.11లక్షలకు కొనుగోలు చేసిన వీడియోకాన్‌ గ్రూప్‌ తెలిపింది. ఈ లావాదేవీలు 2016 లో జరిగాయి. కానీ ఈ ప్లాట్‌ కొనుగోలు మాత్రం సంవత్సరాల ముందు నుంచి ఒప్పందం జరిగినట్లు సమాచారం.

ముంబై: వీడియోకాన్‌ ప్రమోటర్ల ఆస్తుల స్తంభన, జప్తునకు నేషనల్‌ కంపెనీ లా ట్రిబ్యునల్‌ (ఎన్‌సీఎల్‌టీ), ముంబై బెంచ్‌ ఆదేశాలు జారీ చేసింది. ఈ ఆదేశాల వల్ల ప్రమోటర్లు తమ ఆస్తుల తనఖా, వేలం, అమ్మకంసహా వాటిపై ఎటువంటి లావాదేవీలు నిర్వహించలేరు. కార్పొరేట్‌ వ్యవహారాల శాఖ (ఎంసీఏ) దాఖలు చేసిన పిటిషన్‌పై ఎన్‌సీఎల్‌టీ తాజా ఆదేశాలు ఇచ్చింది. కేసు తదుపరి విచారణను సెప్టెంబర్‌ 22కు వాయిదా వేసింది.  కీలక ఆదేశాల్లో అంశాలను పరిశీలిస్తే... ► సీడీఎస్‌ఎల్, ఎన్‌ఎస్‌డీఎల్‌లకు..:  వీడియోకాన్‌ ప్రమోటర్లకు ఏదైనా కంపెనీ లేదా సొసైటీలో ఉన్న షేర్లను స్తంభింపజేయలని, ఎటువంటి అమ్మకం, బదలాయింపునైనా నిషేధించాలని సెంట్రల్‌ డిపాజిటరీ సర్వీసెస్‌ లిమిటెడ్‌ (సీడీఎస్‌ఎల్‌), నేషనల్‌ సెక్యూరిటీస్‌ డిపాజిటరీ లిమిటెడ్‌ (ఎన్‌ఎస్‌డీఎల్‌)లను ఎన్‌సీఎల్‌టీ ఆదేశించింది. ఆలాగే ఆయా వివరాలను కార్పొరేట్‌ వ్యవహారాల మంత్రిత్వశాఖకు తెలియజేయాలని కూడా సూచించింది.   ► సీబీడీటీకి..: వీడియోకాన్‌ ప్రమోటర్ల ఆస్తులకు సంబంధించి తెలిసిన వివరాలను వెల్లడించాలని ప్రత్యక్ష పన్నుల కేంద్ర బోర్డ్‌ (సీబీడీటీ)ను కూడా ట్రిబ్యునల్‌ ఆదేశించింది. ప్రమోటర్ల బ్యాంక్‌ అకౌంట్లు, లాకర్ల వివరాలను వెల్లడించాలని, తక్షణం ఆయా అకౌంట్లను లాకర్లను స్తంభింపజేయడానికి చర్యలు తీసుకోవాలని ఇండియన్‌ బ్యాంక్స్‌ అసోసియేషన్‌ (ఐబీఏ)కు ఆదేశాలు ఇచ్చింది.   ► పీఎంసీఏకు సూచనలు: వీడియోకాన్‌ ప్రమోటర్లకు ఉన్న చరాస్తుల వివరాలను గుర్తించి తెలియజేయలని రాష్ట్రాలు, కేంద్ర పాలిత ప్రాంత ప్రభుత్వాలకు లేఖలు రాయడానికి కార్పొరేట్‌ వ్యవహారాల శాఖ (ఎంసీఏ)కు ట్రిబ్యునల్‌ అనుమతి ఇచ్చింది.   కేసు వివరాలు ఇవీ... కంపెనీలోఆర్థిక అవకతవకలు, కుంభకోణాల విషయంలో వీడియోకాన్‌ వ్యవస్థాపకుడు, సీఎండీ వేణుగోపాల్‌ ధూత్, ఇతర మాజీ డైరెక్టర్లు, సీనియర్‌ అధికారులను విచారించి తగిన చర్యలు తీసుకోడానికి, అక్రమ సంపాదన రికవరీకి  తగిన అనుమతులు ఇవ్వాలంటూ  కంపెనీల చట్టం సెక్షన్‌ 241, 242 కింద కార్పొరేట్‌ వ్యవహారాల శాఖ ఎన్‌సీఎల్‌టీని ఆశ్రయించింది. వీడియోకాన్‌ లిమిటెడ్‌లో మిగులు, నిల్వలు మొత్తంగా రూ.10,028.09 కోట్లని 2014 ఫైనాన్షియల్‌ రిపోర్ట్‌ పేర్కొంది. కేవలం ఐదేళ్ల కాలంలో (2018–19 నాటికి)  కంపెనీ రూ.2,972.73 కోట్ల నష్టాల్లోకి  వెళ్లిపోవడంపై భాస్కర పంతుల్‌ మహన్,  నారిన్‌ కుమార్‌ భోలాలతో కూడిన  ట్రిబ్యునల్‌ బెంచ్‌ ఆశ్చర్యం వ్యక్తం చేసింది. ఇదే సమయంలో కంపెనీరుణాలు రూ.20,149.23 కోట్ల నుంచి రూ.28,586.87 కోట్లకు పెరిగిపోవడం గమనార్హం. ‘‘మునిగిపోతున్న నౌకకు ఫైనాన్షియల్‌ ఇన్‌స్టిట్యూషన్‌ భారీగా రుణాలను మంజూరు చేయడం, అదే సంస్థ దివాలా కోడ్‌ సెక్షన్‌ 7 కింద పిటిషన్‌ దాఖలు చేయడం అశ్చర్యంగా ఉంది’’ అని బెంచ్‌ వ్యాఖ్యానించింది. ఆయా అంశాలన్నింటిపై సమగ్రంగా విచారించాలని ఎన్‌సీఎల్‌టీ ఆదేశాలు ఇచ్చింది. తీవ్ర మోసపూరితమైన కేసులను విచారించే సీరియస్‌ ఫ్రాడ్‌ ఇన్వెస్టిగేషన్‌ ఆఫీస్‌ (ఎస్‌ఎఫ్‌ఐఓ)కు కూడా తన ఉత్తర్వు ప్రతిని అందించాలని ఆదేశించింది.  

న్యూఢిల్లీ: ఆర్థిక సంక్షోభంతో కుదేలైన వీడియోకాన్‌ గ్రూప్‌లోని 11 అనుబంధ కంపెనీల విలీనంతో ఏర్పడే సంస్థలో ఆర్థిక రుణదాతలకు 8 శాతం వాటా లభించనుంది. వీడియోకాన్‌ కొనుగోలు కోసం  ట్విన్‌ స్టార్‌ టెక్నాలజీస్‌ సమర్పించిన రుణ పరిష్కార ప్రణాళిక ప్రకారం.. లిస్టెడ్‌ కంపెనీలైన వీడియోకాన్‌ ఇండస్ట్రీస్‌ (వీఐఎల్‌), వేల్యూస్‌ ఇండస్ట్రీస్‌ (వీఏఐఎల్‌)ను డీలిస్ట్‌ చేస్తారు. ఆ తర్వాత వీఏఐఎల్‌ సహా గ్రూప్‌లోని 11 సంస్థలను వీడియోకాన్‌ ఇండస్ట్రీస్‌లో విలీనం చేస్తారు. అయితే, వీడియోకాన్‌ టెలికం మాత్రం అనుబంధ సంస్థగా కొనసాగుతుంది. వీఐఎల్‌ మొత్తం షేర్లలో 8 శాతాన్ని రుణదాతలకు నిర్దిష్ట నిష్పత్తి ప్రకారం కేటాయిస్తారు. వీఐఎల్, వీఏఐఎల్‌ డీలిస్టింగ్‌ ప్రక్రియ ఇప్పటికే ప్రారంభమైంది. అయితే, వీడియోకాన్‌ పూర్తిగా ఆర్థిక సంక్షోభంలో కూరుకుపోయిన నేపథ్యంలో డీలిస్టింగ్‌కు సంబంధించి ఈ రెండు సంస్థల షేర్‌హోల్డర్లకు దక్కేదేమీ లేదు. వీడియోకాన్‌ టేకోవర్‌కు మైనింగ్‌ దిగ్గజం అనిల్‌ అగర్వాల్‌కి చెందిన ట్విన్‌ స్టార్‌ టెక్నాలజీస్‌ సమర్పించిన రూ. 2,962 కోట్ల ప్రణాళికకు జూన్‌ 9న నేషనల్‌ కంపెనీ లా ట్రిబ్యునల్‌ ఆమోదముద్ర వేసిన సంగతి తెలిసిందే.   చదవండి: తల్లిదండ్రులారా జాగ్రత్త, మీ పిల్లల ఫోన్లపై కన్నేయండి

న్యూఢిల్లీ: ఆర్థిక సంక్షోభంలో చిక్కుకున్న వీడియోకాన్‌ ఇండస్ట్రీస్‌ను వేలంలో దక్కించుకునేందుకు ట్విన్‌స్టార్‌ టెక్నాలజీస్‌ వేసిన రూ. 3,000 కోట్ల బిడ్‌కు నేషనల్‌ కంపెనీ లా ట్రిబ్యునల్‌ (ఎన్‌సీఎల్‌టీ) ఆమోదముద్ర వేసింది. మైనింగ్‌ దిగ్గజం అనిల్‌ అగర్వాల్‌కు చెందిన వేదాంత గ్రూప్‌లో భాగమైన ట్విన్‌స్టార్‌ సంస్థ 90 రోజుల్లోగా దాదాపు రూ. 500 కోట్లు, ఆ తర్వాత మిగతా మొత్తాన్ని క్రమంగా నాన్‌ కన్వర్టబుల్‌ డిబెంచర్ల రూపంలో చెల్లించనుంది.ఎన్‌సీఎల్‌టీ ఈ మేరకు మౌఖికంగా ఉత్తర్వులు వెలువరించిందని, తీర్పు కాపీ రావాల్సి ఉందని సంబంధిత వర్గాలు తెలిపాయి. కారణం కేజీ బేసిన్‌ బ్యాంకులకు వీడియోకాన్‌ ఇండస్ట్రీస్‌ వడ్డీతో సహా సుమారు రూ. 31,000 కోట్లు చెల్లించాల్సి ఉంది. వీడియోకాన్‌ కొనుగోలు ద్వారా కేజీ బేసిన్‌లోని రవ్వ చమురు క్షేత్రంలో వేదాంతాకు పట్టు చిక్కనున్నట్లు తెలుస్తోంది. ప్రధానంగా రవ్వ క్షేత్రంలో వీడియోకాన్‌కున్న 25 శాతం వాటాయే కంపెనీ కొనుగోలుకి ప్రధాన కారణమని పరిశ్రమ వర్గాలు పేర్కొంటున్నాయి.

న్యూఢిల్లీ: రుణ బాకీలను సెటిల్‌ చేసుకునేందుకు, 13 గ్రూప్‌ కంపెనీలపై దివాలా చర్యలను ఆపివేయించుకునేందుకు వీడియోకాన్‌ గ్రూప్‌ మాజీ ప్రమోటరు వేణుగోపాల్‌ ధూత్‌ కుటుంబం ప్రయత్నాలు ముమ్మరం చేస్తోంది. ఇందులో భాగంగా రుణదాతలకు రూ. 30,000 కోట్లు కడతామంటూ ఆఫర్‌ చేసింది. దీనికి సంబంధించిన ప్రతిపాదనను రుణదాతల కమిటీ (సీవోసీ) ముందు ఉంచినట్లు ధూత్‌ వెల్లడించారు. రుణదాతలు, నేషనల్‌ కంపెనీ లా ట్రిబ్యునల్‌ (ఎన్‌సీఎల్‌టీ) దీనికి అంగీకరించిన పక్షంలో ఈ ఏడాది ఆఖరు నాటికి సెటిల్మెంట్‌పై తుది నిర్ణయం రావచ్చని భావిస్తున్నట్లు వివరించారు. ప్రస్తుతం కార్పొరేట్‌ దివాలా పరిష్కార ప్రక్రియ (సీఐఆర్‌పీ) కింద చర్యలు ఎదుర్కొంటున్న 15 గ్రూప్‌ కంపెనీలకు గాను 13 సంస్థలకు సంబంధించి ఈ ఆఫర్‌ను ప్రతిపాదించినట్లు ధూత్‌ చెప్పారు. కేఏఐఎల్, ట్రెండ్‌ అనే రెండు సంస్థలను ఇందులో చేర్చలేదని వివరించారు.  ‘వచ్చే 30 నుంచి 60 రోజుల్లోగా దీనిపై తుది నిర్ణయం తీసుకోవచ్చని భావిస్తున్నాను‘ అని ధూత్‌ పేర్కొన్నారు. దివాలా పరిష్కార ప్రక్రియను వేగవంతం చేసేందుకు, మరింత మెరుగైన విలువను రాబట్టేందుకు ఎన్‌సీఎల్‌టీ ముంబై బెంచ్‌ మొత్తం 15 గ్రూప్‌ కంపెనీల కేసులను కలిపి విచారణ జరుపుతోంది.

న్యూఢిల్లీ: టెలికం కంపెనీలకు సంబంధించి సవరించిన స్థూల ఆదాయాల (ఏజీఆర్‌) కేసు విచారణ ఈ నెల 24కు వాయిదా పడింది. దివాలా ప్రక్రియకు వెళ్లిన టెలికం కంపెనీలకు సంబంధించి స్పెక్ట్రమ్‌ పంపిణీ వివరాలను (షేరింగ్‌) ఇవ్వాలని శుక్రవారం నాటి విచారణ సందర్భంగా టెలికం శాఖను సుప్రీంకోర్టు ధర్మాసనం ఆదేశించింది. దివాలా ప్రక్రియలో ఉన్న రిలయన్స్‌ కమ్యూనికేషన్స్‌ (ఆర్‌కామ్‌) రిలయన్స్‌ జియో మధ్య స్పెక్ట్రమ్‌ పంపకం జరగ్గా.. ఆర్‌ కామ్‌ స్పెక్ట్రమ్‌ ను వాడుకున్నందుకు, ఆ కంపెనీ స్పెక్ట్రమ్‌ బకాయిలను జియో ఎందుకు చెల్లించకూడదంటూ సుప్రీంకోర్టు ధర్మాసనం లోగడ విచారణలో ప్రశ్నించిన విషయం తెలిసిందే. ప్రస్తుతం ఆర్‌ కామ్‌ తోపాటు, వీడియోకాన్‌ దివాలా చర్యలను ఎదుర్కొంటున్న విషయం గమనార్హం. ‘‘వీడియోకాన్‌ స్పెక్ట్రమ్‌ బదలాయించాలంటే, దాని కంటే ముందు గత బకాయిలను కంపెనీ చెల్లించాలి’’ అంటూ వీడియోకాన్‌ విషయమై ధర్మాసనం పేర్కొంది. ఒకవేళ వీడియోకాన్‌ చెల్లించకపోతే, ఆ స్పెక్ట్రమ్‌ ను సొంతం చేసుకున్న భారతీ ఎయిర్‌ టెల్‌ చెల్లించాల్సి ఉంటుందని స్పష్టం చేసింది. దీనికి  వీడియోకాన్‌ తరఫు న్యాయవాది స్పందిస్తూ.. కార్పొరేట్‌ దివాలా చర్యల ప్రక్రియకు వెలుపల తాము ఎటువంటి బకాయిలను చెల్లించాల్సిన బాధ్యత కలిగిలేమని నివేదించారు. ఏజీఆర్‌ బకాయిలను ఐబీసీ కింద నిర్వహణ బకాయిలుగా పరిష్కరించడం జరుగుతుందని పేర్కొన్నారు. ఆర్‌ కామ్‌ స్పెక్ట్రమ్‌ ను జియో వినియోగించుకున్నందున ఆ మొత్తానికి సంబంధించి జియో చెల్లించాల్సిన బకాయిల వివరాలను అడిగినా ఇవ్వలేదేమంటూ ధర్మాసనం టెలికం శాఖను ప్రశ్నించింది. అనంతరం దివాలా చర్యల పరిధిలో ఉన్న కంపెనీల స్పెక్ట్రమ్‌ పంపిణీకి సంబంధించి ఎంత మేర బకాయిలు రావాలన్న వివరాలను సమర్పించాలని టెలికం శాఖను ఆదేశించింది. 1999 నుంచి ఏ కంపెనీలు స్పెక్ట్రమ్‌ ను వినియోగించుకున్నదీ, వాటి మధ్య వాణిజ్య ఒప్పంద వివరాలను తమ  ముందుంచాలని ధర్మాసనం కోరింది.  ఏజీఆర్‌ బకాయిలను ఏటా కొంత చొప్పున కొన్నేళ్ల పాటు చెల్లించేందుకు అనుమతించాలని భారతీ ఎయిర్‌ టెల్, వొడాఫోన్‌ ఐడియాలు ధర్మాసనాన్ని అభ్యర్థించాయి. ఈ రెండు కంపెనీలు కలసి రూ.లక్ష కోట్లకు పైగా ఏజీఆర్‌ బకాయిలను చెల్లించాల్సి ఉంది. టెలికం శాఖ డిమాండ్‌ ప్రకారం వొడాఫోన్‌ ఐడియా రూ.58,000 కోట్ల బకాయిలు చెల్లించాల్సి ఉండగా, కేవలం రూ.8,000 కోట్లను ఇప్పటి వరకు జమ చేయగలిగింది. భారతీ ఎయిర్‌ టెల్‌ రూ.43,000 కోట్ల బకాయిలకు గాను రూ.18,000 కోట్లను చెల్లించింది. జస్టిస్‌ అరుణ్‌ మిశ్రా అధ్యక్షతన గల సుప్రీం ధర్మాసనం ఈ కేసు తదుపరి విచారణను ఈ నెల 24కు వాయిదా వేసింది.

న్యూఢిల్లీ: వీడియోకాన్‌ గ్రూపు అధినేత వేణుగోపాల్‌ ధూత్‌ మొజాంబిక్‌లోని చమురు, గ్యాస్‌ ఆస్తులకు సంబంధించి రుణాలు తీసుకున్న కేసులో అవినీతికి పాల్పడినట్టు సీబీఐ ఎఫ్‌ఐఆర్‌ నమోదు చేసింది. చమురు మంత్రిత్వ శాఖ ఇచ్చిన ఫిర్యాదు ఆధారంగా ప్రాథమిక విచారణ అనంతరం సీబీఐ కేసు నమోదు చేసింది. వీడియోకాన్‌ సబ్సిడరీ అయిన వీడియోకాన్‌ హైడ్రోకార్బన్స్‌ హోల్డింగ్స్‌ లిమిటెడ్‌ (వీహెచ్‌హెచ్‌ఎల్‌) 2008లో మొజాంబిక్‌లోని రొవుమా ఏరియా 1 బ్లాక్‌లో చమురు, గ్యాస్‌ ఆస్తుల్లో 10 శాతం వాటా కొనుగోలు చేసింది. వీటికి సంబంధించి ఎస్‌బీఐ ఆధ్వర్యంలోని బ్యాంకుల కూటమి 2,773 మిలియన్‌ డాలర్ల రుణాలను అందించాయి. ఇందులో కొంత మేర రీఫైనాన్స్‌ సదుపాయం కూడా ఉంది. తర్వాత ఈ ఆస్తులను వీడియోకాన్‌ ఇండస్ట్రీస్‌ ఓఎన్‌జీసీ విదేశ్, ఆయిల్‌ ఇండియాకు విక్రయించింది. అయితే, ఈ రుణాల విషయంలో వాస్తవాలను దాచిపెట్టి వీడియోకాన్‌ మోసగించినట్టు బయటపడింది.  

సాక్షి, న్యూఢిల్లీ: వీడియోకాన్‌ గ్రూప్‌నకు రుణాల కుంభకోణం కేసులో ఐసీఐసీఐ బ్యాంక్ మాజీ సీఈవో చందా కొచర్, ఆమె భర్త దీపక్ కొచర్‌  మంగళవారం కూడా ఎన్‌ఫోర్స్‌మెంట్ డైరెక్టరేట్ (ఈడీ) విచారణకు హాజరయ్యారు.  సోమవారం దాదాపు ఎనిమిది గంటలపాటు వీరిని  ఈడీ  ప్రశ్నించింది . వాస్తవానికి ఈ నెల ప్రారంభంలోనే వారు  రావాల్సి ఉన్నా కొంత గడువు కోరడంతో ఈడీ అనుమతించింది.   బ్యాంకు రుణాలమంజూరులో మోసం, నగదు బదిలీ కేసుకు సంబంధించి దీపక్ కొచర్ సోదరుడు రాజీవ్ కొచర్‌ను కొద్ది రోజుల క్రితమే ఈడీ విచారణ చేసింది. సీబీఐ కూడా గతంలో ఆయన్ని ప్రశ్నించింది. వీడియోకాన్‌ గ్రూప్ రుణాలను ఐసీఐసీఐ బ్యాంక్ పునర్‌వ్యవస్థీకరించడంలో ఆయన పాత్ర గురించి విచారణ చేసింది. వీడియోకాన్ గ్రూప్‌నకు ఐసీఐసీఐ బ్యాంక్‌ దాదాపు రూ.1,875 కోట్ల మేర రుణాలివ్వడంలో అవకతవకలు చోటుచేసుకున్నాయన్న ఆరోపణలపై చందా కొచర్‌, దీపక్‌ కొచర్‌, వీడియోకాన్ గ్రూప్ అధినేత వేణుగోపాల్ ధూత్ తదితరులపై మనీలాండరింగ్ నిరోధక చట్టం కింద ఈడీ ఏడాది క్రితం క్రిమినల్ కేసు దాఖలు చేసింది. సీబీఐ ఎఫ్‌ఐఆర్‌ ఆధారంగా ఈడీ ఈ నిర్ణయం తీసుకుంది. చందా కొచర్ సహకారంతో ఐసీఐసీఐ నుంచి రుణాలు తీసుకున్న ధూత్‌.. ప్రతిగా ఆమె భర్త దీపక్‌కు చెందిన న్యూపవర్‌ రెన్యూవబుల్స్‌లో ఇన్వెస్ట్ చేశారని ఆరోపణలు ఉన్నాయి.   

న్యూఢిల్లీ : ఐసీఐసీఐ బ్యాంకు మాజీ సీఈవో చందా కొచర్‌ ఇంట్లో ఎన్‌ఫోర్స్‌మెంట్‌ డైరెక్టరేట్‌ సోదాలు నిర్వహించింది. వీడియోకాన్‌కు మంజూరు చేసిన రుణాల వివాదంలో ఆమె అవినీతి ఆరోపణలు ఎదుర్కొంటున్న సంగతి తెలిసిందే. ఇందులో భాగంగా ఇప్పటికే చందా కొచర్‌తో పాటు ఆమె భర్త దీపక్‌ కొచర్, వీడియోకాన్‌ గ్రూప్‌ ఎండీ వేణుగోపాల్‌ ధూత్‌లపై సీబీఐ లుక్‌ అవుట్‌ నోటీసులు జారీ చేసింది. ఈ నేపథ్యంలో శుక్రవారం ఉదయం ఈడీ.. చందా కొచర్‌తో పాటు వేణుగోపాల్‌ ధూత్‌ ఇంటిపై కూడా రైడ్‌ చేసింది. కాగా వీడియోకాన్‌ గ్రూప్‌నకు ఐసీఐసీఐ బ్యాంక్‌ రూ. 1,875 కోట్ల మేర ఆరు రుణాలు మంజూరు చేయడంలో.. అప్పటి సీఈఓ చందా కొచర్‌ కీలక పాత్ర పోషించారని, ఈ క్రమంలో నిబంధనలు ఉల్లంఘించారని ఆరోపణలు ఉన్నాయి. దీనికి ప్రతిఫలంగా వీడియోకాన్‌ గ్రూప్‌ ఎండీ ధూత్‌.. చందా భర్త దీపక్‌ కొచర్‌ సంస్థలో పెట్టుబడులు పెట్టారని, ఇలా క్విడ్‌ ప్రో కో లావాదేవీ ద్వారా ఆమె లబ్ధి పొందారని అభియోగాలు ఉన్నాయి. తొలుత చందా కొచర్‌ను ఐసీఐసీఐ బ్యాంక్‌ బోర్డు వెనకేసుకొచ్చినప్పటికీ, అన్ని వైపుల నుంచి ఒత్తిళ్లు పెరగడంతో జస్టిస్‌ బి.ఎన్‌. శ్రీకృష్ణ సారథ్యంలో స్వతంత్ర కమిటీ వేసింది. ఈ కమిటీ చందా కొచర్‌ని దోషిగా తేల్చింది. అయితే అంతకు ముందే చందా కొచర్‌ తన పదవికి రాజీనామా చేసినప్పటికీ.. కమిటీ నివేదిక నేపథ్యంలో ఆమెను విధుల నుంచి తొలగించినట్లుగా పరిగణించడంతో పాటు అప్పటిదాకా ఇచ్చిన ఇంక్రిమెంట్లు, బోనస్‌లు మొదలైనవన్నీ వెనక్కి తీసుకోనున్నట్లు ఐసీఐసీఐ బ్యాంక్‌ యాజమాన్యం ప్రకటించింది. మరోవైపు, చందా కొచర్, దీపక్‌ కొచర్, ధూత్‌లపై సీబీఐ క్రిమినల్‌ కుట్ర, మోసం అభియోగాలతో ఎఫ్‌ఐఆర్‌ నమోదు చేసింది. వీడియోకాన్‌కు ఇచ్చిన రుణాల్లో చాలా భాగం మొండిబాకీలుగా మారగా, ఐసీఐసీఐకి రూ. 1,730 కోట్ల మేర నష్టం వాటిల్లిందని పేర్కొంది. అప్పట్లో రుణాలు మంజూరు చేసిన కమిటీలో సభ్యులైన పలువురు బ్యాంకింగ్‌ దిగ్గజాల పేర్లను కూడా ఎఫ్‌ఐఆర్‌లో సీబీఐ ప్రస్తావించింది.

న్యూఢిల్లీ: వీడియోకాన్‌కు రుణాల వివాదంలో అవినీతి ఆరోపణలు ఎదుర్కొంటున్న ఐసీఐసీఐ మాజీ సీఈవో చందా కొచర్‌పై సీబీఐ తాజాగా లుక్‌ అవుట్‌ నోటీసు జారీ చేసింది. దేశం విడిచి విదేశాలకు వెళ్లిపోకుండా చందా కొచర్‌తో పాటు ఆమె భర్త దీపక్‌ కొచర్, వీడియోకాన్‌ గ్రూప్‌ ఎండీ వేణుగోపాల్‌ ధూత్‌లపై కూడా లుక్‌ అవుట్‌ నోటీసులు జారీ అయ్యాయని సంబంధిత అధికారులు తెలిపారు. ఈ ముగ్గురిపై కేసు నమోదైన వారం వ్యవధిలోనే నోటీసులపై నిర్ణయం తీసుకోవడం జరిగిందని వివరించారు. చందా కొచర్‌ స్టేట్‌మెంట్‌ను రికార్డు చేయడానికి ఇప్పటిదాకా ఆమెకు సమన్లేమీ జారీ చేయలేదని అధికారవర్గాలు తెలిపాయి. అభియోగాలు ఎదుర్కొంటున్న వారు విదేశాలకు పారిపోకుండా నిలువరించేందుకు సీబీఐ లుక్‌ అవుట్‌ నోటీసును ఇమిగ్రేషన్‌ అధికారులకు పంపుతుంది. ఒకవేళ నిందితులు అటువంటి ప్రయత్నమేదైనా చేసిన పక్షంలో ఇమిగ్రేషన్‌ అధికారులు వారిని అదుపులోకి తీసుకుని, విచారణ సంస్థలకు అప్పజెప్పాల్సి ఉంటుంది. వీడియోకాన్‌ గ్రూప్‌నకు ఐసీఐసీఐ బ్యాంక్‌ రూ. 1,875 కోట్ల మేర ఆరు రుణాలు మంజూరు చేయడంలో చందా కొచర్‌ కీలక పాత్ర పోషించారని, ఈ క్రమంలో నిబంధనలు ఉల్లంఘించారని ఆరోపణలు ఉన్నాయి. దీనికి ప్రతిఫలంగా వీడియోకాన్‌ గ్రూప్‌ ఎండీ ధూత్‌.. చందా భర్త దీపక్‌ కొచర్‌ సంస్థలో పెట్టుబడులు పెట్టారని, ఇలా క్విడ్‌ ప్రో కో లావాదేవీ ద్వారా ఆమె లబ్ధి పొందారని అభియోగాలు ఉన్నాయి. తొలుత చందా కొచర్‌ను ఐసీఐసీఐ బ్యాంక్‌ బోర్డు వెనకేసుకొచ్చినప్పటికీ, అన్ని వైపుల నుంచి ఒత్తిళ్లు పెరగడంతో జస్టిస్‌ బి.ఎన్‌. శ్రీకృష్ణ సారథ్యంలో స్వతంత్ర కమిటీ వేసింది. ఈ కమిటీ చందా కొచర్‌ని దోషిగా తేల్చింది. అంతకు ముందే చందా కొచర్‌ రాజీనామా చేసినప్పటికీ కమిటీ నివేదిక నేపథ్యంలో ఆమెను విధుల నుంచి తొలగించినట్లుగా పరిగణించడంతో పాటు అప్పటిదాకా ఇచ్చిన ఇంక్రిమెంట్లు, బోనస్‌లు మొదలైనవన్నీ వెనక్కి తీసుకోనున్నట్లు ఐసీఐసీఐ బ్యాంక్‌ యాజమాన్యం ప్రకటించింది. మరోవైపు, చందా కొచర్, దీపక్‌ కొచర్, ధూత్‌లపై సీబీఐ క్రిమినల్‌ కుట్ర, మోసం అభియోగాలతో ఎఫ్‌ఐఆర్‌ నమోదు చేసింది. వీడియోకాన్‌కు ఇచ్చిన రుణాల్లో చాలా భాగం మొండిబాకీలుగా మారగా, ఐసీఐసీఐకి రూ. 1,730 కోట్ల మేర నష్టం వాటిల్లిందని పేర్కొంది. అప్పట్లో రుణాలు మంజూరు చేసిన కమిటీలో సభ్యులైన పలువురు బ్యాంకింగ్‌ దిగ్గజాల పేర్లను కూడా ఎఫ్‌ఐఆర్‌లో సీబీఐ ప్రస్తావించింది. 

ముంబై : ఐసీఐసీఐ బ్యాంక్‌-వీడియాకాన్‌ రుణాల వ్యవహారం కేసులో ఐసీఐసీఐ బ్యాంక్‌ మాజీ చీఫ్‌ చందా కొచర్‌, ఆమె భర్త దీపక్‌ కొచర్‌, వీడియోకాన్‌ గ్రూప్‌ అధినేత వేణుగోపాల్‌ ధూత్‌ ఇతరులపై మనీల్యాండరింగ్‌ ఆరోపణలపై ఈడీ కేసు నమోదు చేసింది. ఐసీఐసీఐ బ్యాంక్‌-వీడియాకాన్‌ రుణం కేసులో రూ 1875 కోట్ల మేర అక్రమాలు జరిగినట్టు దర్యాప్తు సంస్థ ఆరోపిస్తోంది. ఈ కేసుకు సంబంధించి సీబీఐ ఫిర్యాదు ఆధారంగా మనీల్యాండరింగ్‌ చట్టం కింద ఆయా నిందితులను ప్రస్తావిస్తూ ఎన్‌ఫోర్స్‌మెంట్‌ కేస్‌ ఇన్ఫర్మేషన్‌ రిపోర్ట్‌ (ఈసీఐఆర్‌)ను ఈడీ నమోదు చేసింది. కాగా, ఈడీ ఈసీఐఆర్‌ పోలీస్‌ ఎఫ్‌ఐఆర్‌తో సమానం. రుణ వ్యవహారంలో స్వీకరించిన ముడుపులు ఆస్తుల కొనుగోలుకు దారి మళ్లించారా అనే కోణంలో విచారణ సాగుతుందని ఈడీ అధికారులు వెల్లడించారు. ఈసీఐఆర్‌లో నిందితులకు త్వరలోనే ఈడీ సమన్లు జారీ చేయనుంది.  ఇదే కేసులో సీబీఐ ఇప్పటికే చందా కొచర్‌ దంపతులతో పాటు వీడియాకాన్‌ చీఫ్‌ వేణుగోపాల్‌ ధూత్‌ ఇతరులపై చార్జిషీటు నమోదు చేసింది. ఈ కేసుకు సంబంధించి సీబీఐ కీలక సోదాలు, దాడులు చేపట్టింది. ఐసీఐసీఐ బ్యాంక్‌ వీడియోకాన్‌కు రుణాలు జారీ చేయడంలో క్విడ్‌ప్రోకో జరిగినట్టు దర్యాప్తు సంస్థలు ఆరోపిస్తున్న సంగతి తెలిసిందే.

ముంబై: ఎస్సెల్‌ గ్రూప్‌ తీవ్ర సంక్షోభ పరిస్థితులు ఎదుర్కొంటోందంటూ వస్తున్న వార్తలపై గ్రూప్‌ చైర్మన్‌ సుభాష్‌ చంద్ర ఎట్టకేలకు పెదవి విప్పారు. కంపెనీ ఆర్థిక సంక్షోభంలో ఉన్న మాట నిజమేనని అంగీకరించారు. దీన్నుంచి బైటపడే క్రమంలో కీలకమైన జీ ఎంటర్‌టైన్‌మెంట్‌ ఎంటర్‌ప్రైజెస్‌ (జీఈఈఎల్‌)లో వాటాలను విక్రయించి నిధులు సమీకరించేందుకు ప్రయత్నాలు చేస్తున్నా.. కొన్ని శక్తులు పడనివ్వడం లేదని ఆరోపించారు. ఇన్‌ఫ్రా పెట్టుబడులపై ఆశలు పెట్టుకున్నా ఐఎల్‌అండ్‌ఎఫ్‌ఎస్‌ సంక్షోభం కారణంగా పరిస్థితి అదుపు తప్పిందని, వీడియోకాన్‌కి చెందిన డీ2హెచ్‌ వ్యాపారం కొనుగోలు కూడా కలిసి రాలేదని పేర్కొన్నారు. శుక్రవారం రుణదాతలకు రాసిన బహిరంగ లేఖలో సుభాష్‌ చంద్ర ఈ విషయాలు వెల్లడించారు.  తొందరపడితే మీకే నష్టం.. రుణదాతలకు క్షమాపణ చెప్పిన సుభాష్‌ చంద్ర .. జీఈఈఎల్‌లో వాటాల విక్రయం పూర్తయ్యే దాకా ఓపిక పట్టాలని కోరారు. అలా కాకుండా తొందరపాటుతనంతో వ్యవహరిస్తే.. రెండు వర్గాలూ నష్టపోక తప్పదని వ్యాఖ్యానించారు. అయితే, మొత్తం అప్పు ఎంత ఉన్నది, ఎగవేతలేమైనా జరిగాయా లాంటి అంశాలు ఆయన ప్రస్తావించలేదు. ఐఎల్‌అండ్‌ఎఫ్‌ఎస్‌ సంక్షోభం అనంతరం రుణాల రోలోవర్‌ కష్టంగా మారిందని, అయితే డిసెంబర్‌ దాకా చెల్లింపులన్నీ సక్రమంగానే జరపగలిగామని పేర్కొన్నారు. ‘నా ఉద్దేశాలు మంచివే అయినప్పటికీ బ్యాంకర్లు, ఎన్‌బీఎఫ్‌సీలు, మ్యూచువల్‌ ఫండ్స్‌ ఆశించినట్లుగా పనిచేయలేకపోయాయని నేను భావిస్తున్నాను. ఇందుకుగాను క్షమాపణలు  చెబుతున్నాను. ఎవ్వరిదీ ఒక్క పైసా రుణం కూడా ఉంచుకోబోను. జీఈఈఎల్‌లో వాటాల విక్రయం పూర్తయితే అన్ని రుణాలను తీర్చేయగలుగుతాము. అప్పటిదాకా ఓర్పు వహించండి. కానీ ఆందోళనతో, అరాచకంగా స్పందిస్తే దాని వల్ల మీరూ, మేమూ నష్టపోవాల్సి వస్తుంది‘ అని చంద్ర పేర్కొన్నారు.  తప్పులు జరిగాయి.. గతేడాది జూన్‌ నుంచి సమస్యలు వెన్నాడుతున్నాయని, రుణదాతలు.. షేర్‌హోల్డర్లకు గుర్తుతెలియని శక్తులు లేఖలు రాస్తూ గందరగోళపరుస్తున్నాయని సుభాష్‌ చంద్ర చెప్పారు. తన వంతుగా కొన్ని తప్పులు కూడా జరిగాయని ఆయన తెలిపారు. ఎస్సెల్‌ ఇన్‌ఫ్రా కారణగా రూ. 4,000–5,000 కోట్ల మేర నష్టపోవాల్సి వచ్చిందన్నారు. అలాగే 2016 నవంబర్‌లో వీడియోకాన్‌ డీ2హెచ్‌ వ్యాపారం కొనుగోలుతో బోలెడంత నష్టపోయామని చెప్పారు. ఇక కుటుంబ వ్యాపార విభజన సమయంలో గ్రూప్‌ కంపెనీల రుణభారమంతా తమపైనే వేసుకోవడం మరో పెద్ద తప్పిదమని పేర్కొన్నారు. షేర్లు ఢమాల్‌... డీమోనిటైజేషన్‌ తర్వాత భారీ డిపాజిట్లు చేయడంపై  ఎస్‌ఎఫ్‌ఐవో విచారణ ఎదుర్కొంటున్న కంపెనీల జాబితాలో ఎస్సెల్‌ గ్రూప్‌ సంస్థల పేర్లున్నాయని వార్తలు రావడంతో గ్రూప్‌ కంపెనీల షేర్లు భారీగా పడ్డాయి. డిష్‌ టీవీ 33%, జీలెర్న్‌ 19%, ఎస్సెల్‌ ప్యాక్‌ 12% క్షీణించాయి. జీ గ్రూప్‌  మార్కెట్‌ విలువ రూ. 14,000 కోట్లు పడిపోయింది.  జీ ఎంటర్‌టైన్‌మెంట్‌ 26% క్షీణించి రూ. 319కి పడిపోయింది.

సాక్షి, ముంబై: వీడియోకాన్‌ రుణ వివాదంలో చిక్కుకున్న ఐసీఐసీఐ బ్యాంకు సీఎండీ చందా కొచర్‌కు బోర్డు షాక్‌ ఇవ్వనుందా?  బ్యాంకులో ఆమె భవితవ‍్యం నేడు తేలనుందా? ఈ కుంభకోణంపై విచారణ నేపథ్యంలో  సీఈవో పదవినుంచి ఉద్వాసన పలకనున్నారా?  నేడు జరగనున్న ఐసీఐసీఐ బ్యాంకు బోర్డు సమావేశంలో ఈ కీలక ప్రశ్నలకు  సమాధానం దొరకనుంది. బ్యాంకు మేనేజ్‌మెంట్‌ పునర్వవస్థీకరణపై బోర్డు డైరెక్టర్లు చర్చించనున్నారని విశ్వసనీయ వర్గాల సమాచారం. బ్యాంకుకు చెందిన  లైఫ్ ఇన్సూరెన్స్ వెంచర్ ప్రుడెన్షియల్‌ లైఫ్‌కు సీఈఓ సందీప్ బక్షిని  ఐసీఐసీఐ బ్యాంకు  తాత్కాలిక  సీఈవోగా  ఎంపిక చేయనున్నట్టు  తెలుస్తోంది.  ఆరోపణలపై విచారణ పూర్తయ్యేంత వరకు నిరవధిక సెలవులో వెళ్లమని బోర్డు కోరనుందని భావిస్తున్నారు. అలాగే బీఎన్‌ కృష్ణ విచారణ ప్రతిపాదనకు ఆమోదం, తదుపరి కార్యాచరణపై  సమగ్రంగా ఈ సమావేశం చర్చించనుంది. ఈ వార్తలపై  బ్యాంకు బోర్డు అధికారికంగా స‍్పందించాల్సి ఉంది. 1986లో సందీప్‌ బక్షి ఐసీఐసీఐ బ్యాంకులో చేరారు.  2010 నుంచి ఆగస్టు నుంచి ప్రుడెన్షియల్‌ లైఫ్‌కు సీఈఓగా పనిచేస్తున్నారు. అంతకుముందు 2009-10 మధ్య కాలంలో బ్యాంకుకు చెందిన రిటైల్‌  సంస్థకు డిప్యూటీ ఎండీగా బాధ్యతలు నిర్వహించారు. కాగా బ్యాంకు సీఈవో, మేనేజింగ్ డైరెక్టర్ చందా కొచర్‌పై వచ్చిన ఆర్థిక అభియోగాలకు సంబంధించి సుప్రీంకోర్టు మాజీ న్యాయమూర్తి జస్టిస్ బిఎన్ శ్రీకృష్ణ ఆధ్వర్యంలోని స్వత్రంత  కమిటీ విచారణకు ఆమోదం తెలిపారు.  కొచర్‌ భర‍్త దీపక్‌ కంపెనీకి ఆర్థిక ప్రయోజనాలు కల్పించే విధంగా చందా కొచర్ వ్యవహరించారనే అభియోగాలొచ్చిన విషయం విదితమే.

ముంబై: దివాలా చట్టం (ఐబీసీ) కింద వీడియోకాన్‌ ఇండస్ట్రీస్‌ కేసును జాతీయ కంపెనీ లా ట్రిబ్యునల్‌ (ఎన్‌సీఎల్‌టీ) బుధవారం నమోదు చేసుకుంది. ఈ కేసులో మధ్యంతర పరిష్కార నిపుణుడిగా కేపీఎంజీకి చెందిన అనుజ్‌జైన్‌ను నియమించింది. 180 రోజుల్లోగా కంపెనీని జైన్‌ టర్న్‌ అరౌండ్‌ చేయాల్సి ఉంటుంది. అదనంగా మరో 90 రోజుల కాల వ్యవధి కోరవచ్చు. అప్పటికీ ఫలితం లేకుంటే కంపెనీ ఆస్తుల్ని వేలం వేస్తారు. కంపెనీకి వ్యతిరేకంగా దాఖలైన అన్ని దివాలా కేసులనూ కలిపి విచారించాలని ఎన్‌సీఎల్‌టీ ప్రిన్సిపల్‌ బెంచ్‌ను ఈ ఏడాది ఏప్రిల్‌లో వీడియోకాన్‌ ఆశ్రయించింది. ఇందుకు ఎన్‌సీఎల్‌టీ అంగీకరించిందని వీడియోకాన్‌ చైర్మన్‌ వేణుగోపాల్‌ ధూత్‌ చెప్పారు. మొత్తం రూ.20,000 కోట్ల రుణాల్లో 70– 80 శాతం వరకు బ్యాంకులు వసూలు చేసుకోగలవన్నారు. మొత్తం ప్రక్రియ ఎలాంటి అవాంతరాల్లేకుండా 180 రోజుల్లోపు ముగిసిపోవాలని కోరుకుంటున్నట్టు తెలిపారు. ‘‘ముందుగా మూలధన అవసరాలను పరిష్కరించాలి. రుణదాతలందరి ప్రయోజనాల పరిరక్షణ బాధ్యతను దివాలా పరిష్కార నిపుణుడు తీసుకోవాలి. దీనికి మా సహకారం ఉంటుంది. కంపెనీకి చాలా ఆస్తులున్నాయి. విదేశీ చమురు క్షేత్రాల్లోనూ వాటాలు ఉన్నాయి. పెరుగుతున్న ముడి చమురు ధరలు మా గ్రూపునకు మంచివే’’ అని ధూత్‌ వివరించారు.  

ముంబై: వీడియోకాన్‌ గ్రూప్‌నకు రుణాల విషయంలో ఆరోపణలు ఎదుర్కొంటున్న ఎండీ, సీఈవో చందా కొచర్‌పై విచారణ జరపాలని ప్రైవేట్‌ బ్యాంకింగ్‌ దిగ్గజం ఐసీఐసీఐ బ్యాంక్‌ నిర్ణయించింది. ఆరోపణలపై స్వతంత్ర దర్యాప్తు జరపాలని బ్యాంకు బోర్డు తీర్మానించింది. ఓ అజ్ఞాత వ్యక్తి ఇచ్చిన ఫిర్యాదుపై బోర్డు చర్చించి... స్వతంత్ర ఎంక్వైరీకి ఆదేశించినట్లు బుధవారం స్టాక్‌ ఎక్స్చేంజీలకు ఐసీఐసీఐ బ్యాంకు తెలియజేసింది. ‘స్వతంత్రమైన, విశ్వసనీయమైన వ్యక్తి సారథ్యంలో ఈ విచారణ జరుగుతుంది‘ అని వివరించింది. వాస్తవాలను పరిశీలించి, అవసరమైతే ఫోరెన్సిక్స్‌ దర్యాప్తు, ఈమెయిల్స్‌ను సమీక్షించడం, సంబంధిత వ్యక్తుల స్టేట్‌మెంట్స్‌ను రికార్డు చేయడం మొదలైన అంశాలతో విచారణ సమగ్రంగా ఉంటుందని పేర్కొంది. ఇందుకోసం తగిన వ్యక్తిని ఎంపిక చేసే బాధ్యతను ఆడిట్‌ కమిటీకి బోర్డు అప్పగించింది. కొన్నాళ్ల క్రితమే క్విడ్‌ ప్రో కో ఆరోపణలు వచ్చినప్పుడు కొచర్‌ ఎలాంటి తప్పూ చేయలేదని, ఆమెపై పూర్తి నమ్మకం ఉందని బాసటగా నిల్చిన ఐసీఐసీఐ బ్యాంకు బోర్డు... తాజాగా విచారణకు ఆదేశించడం గమనార్హం. తన కుటుంబీకులకు లబ్ధి చేకూర్చేలా కొందరు ఖాతాదారులకు ప్రయోజనం చేకూరుస్తూ బ్యాంకు సీఈవో హోదాలో చందా కొచర్‌ క్విడ్‌ ప్రో కో లావాదేవీలు జరిపారని, బ్యాంకు నైతిక నియమావళిని  ఉల్లంఘించారని ఆరోపణలు రావడం తెలిసిందే.  వివాదమిదీ..: తన భర్త దీపక్‌ కొచర్‌కి చెందిన న్యూపవర్‌ సంస్థకు లబ్ధి చేకూర్చేలా.. వీడియోకాన్‌ గ్రూప్‌నకు రుణాల మంజూరు విషయంలో చందా కొచర్‌ వ్యవహరించినట్లు ఆరోపణలొచ్చాయి. రుణం లభించినందుకు ప్రతిగా వీడియోకాన్‌ గ్రూప్‌ అధిపతి వేణుగోపాల్‌ ధూత్‌.. న్యూపవర్‌ సంస్థలో పెట్టుబడులు పెట్టారనేది ప్రధాన ఆరోపణ. వీడియోకాన్‌ తీసుకున్న ఈ రుణాలు మొండిబాకీలుగా మారాయి. మరోవైపు, ఎస్సార్‌ గ్రూప్‌ సహ వ్యవస్థాపకుడు రవి రూయా అల్లుడు నిశాంత్‌ కనోడియాకి చెందిన ఫస్ట్‌ల్యాండ్‌ హోల్డింగ్స్‌ నుంచి కూడా 2010లో న్యూపవర్‌లోకి రూ. 325 కోట్లు వచ్చినట్లు తెలుస్తోంది. అదే ఏడాది ఎస్సార్‌ స్టీల్‌ మినెసోటాకి ఐసీఐసీఐ బ్యాంకు సారథ్యంలోని బ్యాంకుల కన్సార్షియం 530 మిలియన్‌ డాలర్ల రుణమిచ్చింది. ఇది కూడా ప్రస్తుతం మొండిబాకీగా మారడం సందేహాలకు తావిస్తోంది.  ఫస్ట్‌ ల్యాండ్‌ హోల్డింగ్‌ కార్యకలాపాలపై 2016లో ఆర్‌బీఐ విచారణ కూడా జరిపింది.  

సాక్షి, ముంబై :  వీడియోకాన్‌-ఐసీఐసీ  స్కాంలో ఎట్టకేలకు ఐసీఐసీఐ బ్యాంకు దిగి వచ్చింది. ఈ కుంభకోణంపై స్వతంత్ర దర్యాప్తు చేపట్టనున్నట్లు బుధవారం వెల్లడించింది. ఈ మేరకు రెగ్యులేటరీ ఫైలింగ్‌ సందర్భంగా ఐసీఐసీఐ పేర్కొంది. రుణాల వ్యవహారంలో ఐసీఐసీఐ బ్యాంక్‌ సీఎండీ చందా కొచర్‌పై ఆరోపణలను మొదట్లో కొట్టిపారేసిన బ్యాంకు,  తాజాగా వాటిపై విచారణ చేపట్టేందుకు అంగీకరించింది.  ఇందుకోసం ఏకసభ్య  కమిటీని నియమించింది. బ్యాంక్ నియమావళిని ఎలా ఉల్లంఘనలు, ఆమె తీసుకున్న నిర్ణయాలుబ్యాంకుపై ఎలాంటి  ప్రభావం చూపిందన్న కోణంలో విచారణ సాగుతుందని బ్యాంక్ ఓ ప్రకటనలో పేర్కొన్నది.  బ్యాంక్ నియమావళిని ఉల్లంఘించిన కేసులో చందా కొచర్‌ను ఐసీఐసీఐ బ్యాంక్ విచారించనున్నది. దీని కోసం బ్యాంక్ బోర్డు.. ప్రత్యేక ప్యానల్‌ను ఏర్పాటు చేసింది. వీడియోకాన్‌ సంస్థకు రూ. 3,800 కోట్ల రుణ వ్యవహారంలో చందాకొచ్చర్‌ సాయం చేసినట్లు అప్పట్లో ఆరోపణలు వచ్చాయి. 2012లో వీడియోకాన్‌కు ఐసీఐసీఐ బ్యాంక్‌ ఈ రుణం ఇచ్చింది. వీడియోకాన్‌ గ్రూప్‌కు చెందిన వేణుగోపాల్‌ ధూత్‌, చందాకొచర్‌ భర్త దీపక్‌ కొచర్‌, మరో ఇద్దరు బంధవులు కలిసి 2008లో ఒక కంపెనీ ఏర్పాటు చేశారు. వీడియోకాన్‌కిచ్చిన వేలకోట్ల రుణం 2017నాటికి మొండి బకాయిగా మారింది. నిబంధనలకు విరుద్ధంగా క్విడ్‌ ప్రోకో ప్రాతిపదికన వీడియోకాన్‌ గ్రూప్‌కు కొచర్‌ రుణాలిచ్చేందుకు తోడ్పాటు అందించారని, ఫలితంగా ఆమె కుటుంబీకులు లబ్ధి పొందారని ఆరోపణలు వెల్లువెత్తాయి. అయితే ఇందులో చందాకొచర్‌ ప్రమేయం ఏమీ లేదని అప్పట్లో ఐసీఐసీఐ బోర్డు తీవ్రంగా ఖండించింది.  ఆ ఆరోపణలన్నీ అవాస్తవమని, చందాకొచ్చర్‌పై తమకు పూర్తి విశ్వాసం ఉందని  గట్టిగా వాదించడం, ఈ విషయంలో ఐసీఐసీఐ బోర్డులో కూడా విభేదాలొచ్చిన సంగతి తెలిసిందే. మరోవైపు ఈ వ్యవహారంలో దర్యాప్తు చేపట్టిన సీబీఐ.. చందాకొచర్ భర్త దీపక్‌, వీడియోకాన్‌ ప్రమోటర్‌ వేణుగోపాల్‌ ధూత్‌లను అనుమానితులుగా చేర్చింది.

న్యూఢిల్లీ : ప్రైవేట్‌ రంగంలో అతిపెద్ద బ్యాంక్‌ అయిన ఐసీఐసీఐ బ్యాంకు టాప్‌ ఉన్నతాధికారి చందాకొచ్చర్‌కు మార్కెట్‌ రెగ్యులేటరీ సెక్యురిటీస్‌ అండ్‌ ఎక్స్చేంజ్‌ బోర్డు ఆఫ్‌ ఇండియా(సెబీ) నోటీసులు జారీచేసింది. రూ.3250 కోట్ల వీడియోకాన్‌ రుణ కేసులో సంబంధాలు ఉన్నట్టు ఆరోపణలపై సెబీ ఈ నోటీసులు పంపంది. ఈ విషయాన్ని బ్యాంకు శుక్రవారం తెలిపింది. గురువారమే ఐసీఐసీఐ బ్యాంకు ఈ నోటీసులు అందుకుందని, వీడియోకాన్‌ గ్రూప్‌ అండ్‌ న్యూపర్‌ రెన్యువబుల్స్‌ మధ్య డీలింగ్స్‌ విషయంలో ఆరోపణలు వెల్లువెత్తుడటంతో పాటు, ఈ రుణ కేసులో సంబంధం ఉన్నట్టు వస్తున్న ఆరోపణలపై స్పందించాలని ఆమెను సెబీ కోరింది. చందాకొచ్చర్‌ భర్త దీపక్‌ కొచ్చర్‌కు లబ్ది చేకూరేలా క్విడ్‌ ప్రో కో ప్రాతిపదికన వీడియోకాన్‌ గ్రూప్‌కు ఐసీఐసీఐ బ్యాంకు రుణం జారీచేసిట్టు ఆరోపణలు పెద్ద ఎత్తున్న వినిపిస్తున్నాయి. ఈ కేసు విషయంలో సరియైన వివరణను స్టాక్‌ మార్కెట్లకు బ్యాంకు ఇవ్వలేదని మార్కెట్‌ రెగ్యులేటరీ భావిస్తోంది. ఎస్‌సీఆర్‌ రూల్స్‌ 2005, రూల్‌ 4(1) కింద సెబీ ఈ నోటీసును జారీచేసినట్టు ఐసీఐసీఐ బ్యాంకు తెలిపింది. సెబీకి తాము సరియైన వివరణ ఇస్తామని ఐసీఐసీఐ బ్యాంకు రెగ్యులేటరీ ఫైలింగ్‌లో పేర్కొంది. 2008లో వీడియోకాన్‌ గ్రూప్‌కు చెందిన వేణుగోపాల్‌ ధూత్, దీపక్‌ కొచ్చర్‌, మరో ఇద్దరు కలిసి న్యూపవర్‌ రెన్యువబుల్స్‌ సంస్థను ఏర్పాటు చేశారు.  ఐసీఐసీఐ నుంచి రూ.3250 కోట్ల రుణం అందుకున్నఆరు నెలలకే నూపవర్‌లోని రూ.64 కోట్ల విలువ చేసే షేర్లను కేవలం రూ.9 లక్షలకే దీపక్‌కు ఇచ్చేసి, ఆయనకే అన్ని బాధ్యతలను అప్పగించేశారు.    

సాక్షి, ముంబై: ఐసీఐసీఐ-వీడియోకాన్ గ్రూపు‌ రుణ వివాదంలో సీబీఐ చురుకుగా కదులుతోంది. తాజాగా ఐసీఐసీఐ బ్యాంకు సీఎండీ చందాకొచర్‌ భర్త, దీపక్‌ కొచర్‌ సోదరుడు రాజీవ్‌  కొచర్‌ను సీబీఐ అదుపులోకి తీసుకున్నారు. ముంబై  విమానాశ్రయంనుంచి సింగపూర్‌ వెళుతుండగా అతనిని సీబీఐ అధికారులు అదుపులోకి తీసుకుని ప్రశ్నిస్తున్నారు.  కాగా ఈ కేసులో చందాకొచర్‌ కుటుంబానికి  చెందిన సన్నిహితుడిని సీబీఐ ప్రశ్నించడం ఇదే మొదటిసారి.  ఈ నేపథ్యంలో మరింత విచారణ చేపట్టే క్రమంలో రాజీవ్‌ను అదుపులోకి తీసుకుంది. అతణ్నించి మరిన్ని వివరాలు రాబట్టేందుకు  ప్రయత్నిస్తోంది.  ఇప్పటికే ఈ కేసులో చందాకొచర్‌ భర్త దీపక్‌ కొచర్‌, వీడియోకాన్‌ ఎండీ వేణుగోపాల్‌ధూత్‌పై ప్రాథమిక దర్యాప్తు చేపట్టిన సీబీఐ,అనేక పత్రాలను స్వాధీనం చేసుకుంది.  అయితే ఇంతవర​కూ  దీపక్‌ను ప్రశ్నించలేదు. కానీ, దీపక్‌ కొచర్‌కుచెందిన న్యూపవర్‌రెన్యువబుల్స్‌ కంపెనీకి ఐటీ శాఖ నోటీసులు జారీ చేసింది. కాగా 2012లో వీడియోకాన్ గ్రూపునకు రూ.3,250 కోట్ల విలువైన రుణాల మంజూరు సందర్భంగా బ్యాంకు సీఈవో చందా కొచర్‌పై ఆరోపణలు వెలుగులోకి వచ్చాయి. అయితే  ఐసీఐసీఐ బ్యాంకు  బోర్డు ఈ ఆరోపణలను ఖండించింది. అలాగే ఈ  కేసులో స్వతంత్ర దర్యాప్తును వ్యతిరేకించింది. కాగా ఈ రుణ వివాదంలోకి తాజాగా దీపక్‌ సోదరుడు, చందా కొచర్‌ మరిది.. రాజీవ్‌ కొచర్‌కి చెందిన అవిస్టా సంస్థ కూడా చేరింది. ఐసీఐసీఐ బ్యాంక్‌ నుంచి రుణాలు పొందిన పలు కంపెనీలకు అవిస్టా రుణ పునర్‌వ్యవస్థీకరణ సేవలు అందించిందనీ,  అవిస్టా సేవలు పొందిన  వాటిల్లో  జైప్రకాశ్‌ అసోసియేట్స్, జైప్రకాశ్‌ పవర్‌లతో పాటు వీడియోకాన్, జీటీఎల్‌ ఇన్‌ఫ్రాస్ట్రక్చర్, సుజ్లాన్‌ తదితర కంపెనీలు ఉన్నట్టు ఆరోపణలు వచ్చాయి. అయితే వీటిని రాజీవ్‌ కొచర్‌ ఖండించిన సంగతి తెలిసిందే. భారతీయ బ్యాంకులతో  ఎలాంటి సిండికేషన్‌ ఉండకూడదనే ఒక నియమాన్ని తాము పెట్టుకున్నామన్నారు.  ఈక్రమంలో చందా కొచర్‌ సీఈవోగా ఉన్న ఐసీఐసీఐ బ్యాంకుతో తమకు ఎలాంటి సంబంధాలు లేవని స్పష్టం చేశారు. ఇండోనేషియా, దుబాయ్‌లోని కార్యాలయాల ద్వారా ప్రపంచవ్యాప్తంగా  వ్యాపారం నిర్వహిస్తున్నామని ఆయన తెలిపారు. ఇదేదో కావాలని చేస్తున్న దుష్ప్రచారంగా  రాజీవ్‌ కొచర్‌  కొట్టిపారేశారు. 

సాక్షి, ముంబై: దేశీయ ప్రయివేటు రంగ దిగ్గజ బ్యాంకు ఐసీఐసీఐకు వరుస షాక్‌లు తీవ్ర నష్టాన్ని కలిగిస్తున్నాయి.  దేశీయ ఎలక్ట్రానిక్స్‌ సంస్థ వీడియోకాన్‌కు మంజూరు చేసిన రుణాలకు సంబంధించి కేసు నమోదు, సీబీఐ  ప్రాథమిక దర్యాప్తు నేపథ్యంలో  ఇన్వెస్టర్ల సెంటిమెంట్‌  దెబ్బతింది. దీంతో  ఐసీఐసీఐ షేర్లలో అమ్మకాలు ఊపందుకున్నాయి.  దాదాపు  6శాతం (5.6) పతనాన్ని నమోదు చేసింది.  దీనికితోడు సెక్యూరిటీ  విక్రయాల అంశంలో  నియమాలను పాటించని కారణంగా ఆర్‌బీఐ విధించిన 58.9 కోట్ల రూపాయల జరిమానా కూడా ఐసీఐసీఐసీ బ్యాంకు నెత్తిన పిడుగులా పడింది. మరోవైపు  దివాళా బాటలో వీడియోకాన్‌ షేరు సైతం 5 శాతంనష్టపోయి లోయర్‌ సర్క్యూట్‌ను తాకడం గమనార్హం. కాగా వీడియోకాన్‌కు రుణాలు మంజూరు చేసిన అంశంలో ఐసీఐసీఐ బ్యాంక్‌ సీఈవో చందా కొచ్చర్‌ పాత్రపై సీబీఐ విచారణ చేపట్టింది. వీడియోకాన్‌ గ్రూప్‌‌నకు వేలకోట్ల రుణాలిచ్చినందుకు గాను  భారీ లబ్ది పొందారన్న ఆరోపణల నేపథ్యంలో చందా కొచ్చర్‌ భర్త దీపక్ కొచ్చర్‌, వీడియోకాన్ గ్రూపు చైర్మన్ వేణుగోపాల్ ధూతపై  సీబీఐ  ప్రిలిమినరీ ఎంక్వైరీ(పీఈ) చేపట్టింది.  వీడియోకాన్‌కు ఐసీఐసీఐ బ్యాంక్‌ రుణాలు విడుదల చేయడంలో క్విడ్‌ప్రో కో జరిగిందన్న ఆరోపణల నేపథ్యంలో సీబీఐ కేసు నమోదుచేసిన సంగతి తెలిసిందే.

సాక్షి, ముంబై:  ఐసీఐసీఐ బ్యాంకు సీఈఓ చందా కొచ్చర్‌ చుట్టూ మరింత ఉచ్చు బిగిస్తున్నట్టు కనిపిస్తోంది.  వీడియోకాన్‌ గ్రూప్‌‌నకు వేలకోట్ల రుణాలిచ్చినందుకుగాను  భారీ లబ్ది పొందారన్న ఆరోపణల నేపథ్యంలో దర్యాప్తు చేపట్టేందుకు సీబీఐ రంగంలోకి దిగింది. చందా కొచ్చర్‌ భర్త దీపక్ కొచ్చర్‌, వీడియోకాన్ గ్రూపు చైర్మన్ వేణుగోపాల్ ధూతపై  సీబీఐ  ప్రిలిమినరీ ఎంక్వైరీ(పీఈ) చేపట్టింది. ఈ పరిణామాలను ధృవీకరించిన సీబీఐ అధికారులు ఇప్పటికే విచారణ మొదలైందనీ,  కొన్ని కీలక పత్రాలను పరిశీలిస్తున్నామని తెలిపారు. ఆరోపణలు రుజువైతే నిందితులపై ఎఫ్‌ఐఆర్‌ నమోదు చేస్తామన్నారు. ఈ  నేపథ్యంలో త్వరలోనే దీపక్‌ కొచ్చర్‌ను సీబీఐ ప్రశ్నించే అవకాశంఉంది.    భర్త వ్యాపారాన్ని ప్రోత్సహించడానికి ఆమె స్థానాన్ని దుర్వినియోగం చేశారన్న ఆరోపణలపై దర్యాప్తులో భాగంగా చందా కొచ్చర్‌ భర్త దీపక్‌ కొచ్చర్‌, వీడియోకాన్‌ గ్రూప్‌ ప్రమోటర్‌ ఛైర్మన్‌ వేణుగోపాల్‌ ధూత్‌లను అనుమానితులుగా పేర్కొన్న సీబీఐ ప్రాథమిక దర్యాప్తు చేపట్టనుంది. వీడియోకాన్‌ నుంచి చందా కొచ్చర్‌ కుటుంబం లబ్ధి పొందిందా లేదా అన్నదానిపై  విచారించనునుంది. అయితే ఇందులో చందా కొచ్చర్‌ పేరును ప్రస్తావించకపోవడం గమనార్హం. 2012లో ఐసీఐసీఐ బ్యాంక్‌  వీడియోకాన్‌ సంస్థకు రూ.3,250 కోట్ల రుణ వ్యవహారంలో చందా కొచ్చర్‌ సహాయం చేశారనే దుమారం రేగింది.  మరోవైపు  ఈ ఆరోపణలపై  ఐసీఐసీఐ బ్యాంకు డైరక్టర్ల బోర్డు  చందాకొచ్చర్‌కు బాసటగా నిలచిన సంగతి తెలిసిందే. అయినా సీబీఐ ముందుకు  మరో అడుగువేయడం గమనార్హం. కాగా వీడియోకాన్‌‌కు చెందిన వేణుగోపాల్‌ ధూత్‌, చందాకొచ్చర్‌ భర్త దీపక్‌ కొచ్చర్‌, మరో ఇద్దరు బంధవులు కలిసి 2008లో ఒక కంపెనీ ఏర్పాటు చేశారు. తనకు చెందిన ఒక సంస్థ ద్వారా ధూత్‌ ఈ కంపెనీకి రూ.64 కోట్లు రుణం ఇచ్చారు. అనంతరం ఇందులో యాజమాన్య హక్కులను కేవలం రూ.9 లక్షలకే దీపక్‌ కొచ్చర్‌కు చెందిన ట్రస్టుకు ధూత్‌ బదిలీ చేశారు. వీడియోకాన్‌ గ్రూప్‌నకు ఐసీఐసీఐ బ్యాంక్‌ రూ.3,250 కోట్లు రుణం ఇచ్చిన ఆరు నెలల్లోనే ఈ బదిలీ జరిగింది. ఐసీఐసీఐ ఇచ్చిన రుణంలో రూ.2,810 కోట్లు (దాదాపు 86 శాతం)ను వీడియోకాన్‌ తిరిగి చెల్లించలేకపోయింది. 2017లో ఇది మొండి బకాయిగా మారింది. నిబంధనలకు విరుద్ధంగా క్విడ్‌ ప్రోకో ప్రాతిపదికన వీడియోకాన్‌ గ్రూప్‌నకు కొచ్చర్‌ రుణాలిచ్చేందుకు తోడ్పాటు అందించారని, ఫలితంగా ఆమె కుటుంబీకులు లబ్ధి పొందారని ఆరోపణలు వెల్లువెత్తుతున్నాయి.

న్యూఢిల్లీ: రుణాల మంజూరు విషయంలో వీడియోకాన్‌ గ్రూప్‌నకు లబ్ధి చేకూర్చేలా వ్యవహరించారని ఆరోపణలు ఎదుర్కొంటున్న ఐసీఐసీఐ బ్యాంక్‌ సీఈవో చందా కొచర్‌కు బ్యాంకు బోర్డు బాసటగా నిల్చింది. ఇవన్నీ దురుద్దేశపూర్వకమైన, నిరాధారమైన వదంతులేనని స్పష్టం చేసింది. కొచర్‌పై తమకు పూర్తి విశ్వాసం, నమ్మకం ఉందని పేర్కొంది. రుణాలను ఆమోదించే విషయంలో తమ బ్యాంకు అంతర్గత వ్యవస్థ పటిష్టంగా ఉందని బోర్డు పేర్కొంది. క్విడ్‌ ప్రో కో ప్రాతిపదికన వీడియోకాన్‌ గ్రూప్‌నకు రుణాలివ్వడం ద్వారా కొచర్, ఆమె కుటుంబీకులు లబ్ధి పొందారంటూ ఒక వెబ్‌సైట్‌లో వార్తలొచ్చిన నేపథ్యంలో ఐసీఐసీఐ బ్యాంకు బోర్డు ఈ మేరకు వివరణనిచ్చింది. ఆరోపణల్లో పేర్కొంటున్నట్లుగా వీడియోకాన్‌ గ్రూప్‌నకు రుణాలిచ్చినందుకు చందా కొచర్‌ ఎటువంటి లబ్ధి పొందలేదని.. ఈ వ్యవహారంలో క్విడ్‌ ప్రో కో గానీ ఆశ్రిత పక్షపాతం గానీ స్వార్థ ప్రయోజనాలు గానీ లేవని స్పష్టం చేసింది. బ్యాంకు, టాప్‌ మేనేజ్‌మెంటును అప్రతిష్ట పాలు చేసేందుకే కొన్ని స్వార్థ శక్తులు వదంతులను వ్యాపింపచేస్తున్నాయని బోర్డు తెలిపింది. 2012 ఏప్రిల్‌లో వీడియోకాన్‌ గ్రూప్‌నకు రుణాలిచ్చిన కన్సార్షియంలో తమది లీడ్‌ బ్యాంక్‌ కూడా కాదని పేర్కొంది. కన్సార్షియంలో భాగంగానే సుమారు రూ.3,250 కోట్లు ఇవ్వడం జరిగిందని, ఇది కన్సార్షియం ఇచ్చిన మొత్తం రుణంలో 10 శాతం కన్నా తక్కువేనని ఐసీఐసీఐ బ్యాంక్‌ తెలిపింది.

న్యూఢిల్లీ: ఎట్టకేలకు డిష్‌ టీవీ ఇండియాలో వీడియోకాన్‌ డీ2హెచ్‌ విలీనం పూర్తయింది. దీంతో డైరెక్ట్‌ టు హోమ్‌(డీటీహెచ్‌) రంగంలో అతి పెద్ద సంస్థగా 2.8 కోట్ల మంది చందాదారులతో జీ గ్రూప్‌కు చెందిన డిష్‌ టీవీ ఇండియా అవతరించనుంది. ఈ విలీనానికి 2016 నవంబర్‌లోనే ఇరు కంపెనీల బోర్డ్‌లూ ఆమోదం తెలిపాయి. కేంద్ర సమాచార, ప్రసార మంత్రిత్వ శాఖ, నేషనల్‌ కంపెనీ లా ట్రిబ్యునల్‌(ఎన్‌సీఎల్‌టీ), కాంపిటీషన్‌ కమిషన్‌ ఆఫ్‌ ఇండియా(సీసీఐ) తదితర సంస్థల నుంచి ఆమోదాలు పొందే ప్రక్రియ కారణంగా విలీనానికి ఇంత సమయం పట్టింది. మరోవైపు వీడియోకాన్‌ గ్రూప్‌ కంపెనీలు దివాలా ప్రక్రియలో ఉండటంతో వీడియోకాన్‌ డీ2హెచ్‌ విలీనంపై ఏమైనా ప్రభావం ఉంటుందేమోనన్న ఉద్దేశంతో డిష్‌ టీవీ తాత్కాలికంగా వెనక్కు తగ్గడం కూడా జాప్యానికి కారణమైంది. మొత్తం మీద గురువారం నుంచి వీడియోకాన్‌ డీ2హెచ్, డిష్‌ టీవీలు  ఒక్క సంస్థగా కలసిపోయాయని డిష్‌ టీవీ ఇండియా సీఎండీ జవహర్‌ గోయల్‌ చెప్పారు. డిష్‌ టీవీకి 1.55  కోట్ల మంది, వీడియోకాన్‌ డీ2హెచ్‌కు 1.22 కోట్ల మంది చందాదారులున్నారు. గత ఆర్థిక సంవత్సరంలో డిష్‌ టీవీ  రూ.6,086 కోట్ల ఇబిటాను, వీడియోకాన్‌ డీ2హెచ్‌ రూ.1,909 కోట్ల ఇబిటాను ఆర్జించాయి. విలీనం పూర్తయిందన్న వార్తల నేపథ్యంలో బీఎస్‌ఈలో డిష్‌ టీవీ 1.6% లాభపడి రూ.67 వద్ద ముగిసింది.  

ముంబై: దివాళా కేసు ఎదుర్కొంటున్న వీడియోకాన్‌ ఇండస్ట్రీస్‌ సాధారణ బీమా వ్యాపారం జాయింట్‌వెంచర్‌లో తన పూర్తి వాటాను  విక్రయించింది. లిబర్టీ వీడియోకాన్‌ జనరల్‌ ఇన్సూరెన్స్‌లో తమ పూర్తి వాటాను డీపీ జిందాల్‌గ్రూప్‌కు, ఈనామ్‌ సెక్యూరిటీస్‌కు విక్రయించామని వీడియోకాన్‌ వెల్లడించింది. అయితే ఈ లావాదేవీకి సంబంధించిన ఆర్థిక వివరాలను వీడియెకాన్‌ వెల్లడించలేదు. వీడియోకాన్‌ వాటా విక్రయానంతరం. ఈ బీమా కంపెనీలో డీపీ జిందాల్‌ గ్రూప్‌కు 26%, ఈనామ్‌ సెక్యూరిటీస్‌కు 25 శాతం చొప్పున వాటాలు ఉంటాయి. విదేశీ భాగస్వామి అమెరికాకు చెందిన లిబర్టీ మ్యూచువల్‌ ఇన్సూరెన్స్‌ గ్రూప్‌కు 49% వాటా ఉంటుంది. గత ఏడాది డిసెంబర్‌లోనే ఈ కంపెనీ తన వాటాను 26% నుంచి 49%కి పెంచుకున్నది. వీడియోకాన్‌ వాటా విక్రయానంతరం లిబర్టీ వీడియోకాన్‌ జనరల్‌ ఇన్సూరెన్స్‌ పేరు లిబర్టీ జనరల్‌ ఇన్సూరెన్స్‌ కంపెనీగా మారుతుందని కంపెనీ చీఫ్‌ ఎగ్జిక్యూటివ్, పూర్తి కాలపు డైరెక్టర్‌ రూపమ్‌ ఆస్థానా తెలిపారు. కాగా కొత్త భాగస్వాముల చేరికతో తమ వ్యాపారాన్ని మరి ంతగా విస్తరిస్తామని, మరింతగా పటిష్టం చేస్తామని  బోస్టన్‌ కేంద్రంగా కార్యకలాపాలు నిర్వహిస్తున్న లిబర్టీ మ్యూచువల్‌ ఇన్సూరెన్స్‌ పేర్కొంది. సాధారణ బీమా రంగంలో మంచి నాణ్యత గల బీమా పాలసీలను, సర్వీసులను అందిస్తామని తెలిపింది. మూడు కొత్త సెగ్మంట్లలో కొత్త పాలసీలు   ప్రస్తుత ఆర్థిక సంవత్సరంలో రూ.800 కోట్ల కొత్త వ్యాపార ప్రీమియమ్‌ను ఆశిస్తున్నామని, గత ఆర్థిక సంవత్సరం కొత్త వ్యాపార ప్రీమియమ్‌ కంటే ఇది 60 శాతం అధికమని  కంపెనీ చీఫ్‌ ఎగ్జిక్యూటివ్, పూర్తి కాలపు డైరెక్టర్‌ రూపమ్‌ ఆస్థానా తెలిపారు. సాధారణ బీమా పరిశ్రమ 17 శాతం వార్షిక వృద్ధిని సాధిస్తోందని, దీనికంటే రెండు–మూడు రెట్ల వృద్ధిని సాధించడం లక్ష్యమని వివరించారు. మూడు కొత్త సెగ్మెంట్లు–విలీనాలు, కొనుగోళ్లు, సైబర్, టైటిల్‌ లోకి ప్రవేశించాలనుకుంటున్నామని వివరించారు. 2913లో ప్రారంభమైన ఈ కంపెనీ ప్రస్తుతం 23 రాష్ట్రాల్లో 58 నగరాల్లో 60 కార్యాలయాలు, 1,100 మంది ఉద్యోగులతో కార్యకలాపాలు నిర్వహిస్తోంది. 

‘కే7ఐ’ను ఆవిష్కరించిన ఎల్‌జీ   న్యూఢిల్లీ: దోమలను తరమడానికి జెట్‌ కాయిల్స్‌ను, బాడ్మింటన్‌ రాకెట్స్‌ను ఉపయోగించి ఉంటాం. కానీ ఇప్పుడు దోమలకు తరిమేసే స్మార్ట్‌ఫోన్లు కూడా మార్కెట్‌లోకి వచ్చేశాయి. ప్రముఖ మొబైల్‌ హ్యాడ్‌సెట్స్‌ తయారీ కంపెనీ ఎల్‌జీ తాజాగా ఇలాంటి ఫీచర్‌తో ‘కే7ఐ’ అనే స్మార్ట్‌ఫోన్‌ను మార్కెట్‌లోకి తీసుకువచ్చింది. దీని ధర రూ.7,990. మస్కిటో అవే టెక్నాలజీతో ఈ ఫోన్‌ను రూపొందించినట్లు కంపెనీ తెలిపింది. ఇందులో 5 అంగుళాల డిస్‌ప్లే,  2,500 ఎంఏహెచ్‌ బ్యాటరీ వంటి పలు ప్రత్యేకతలున్నాయని వివరించింది. కాగా కంపెనీ ఇప్పటికే పలు టీవీలు, ఏసీలలో ఈ టెక్నాలజీని పొందుపరిచింది. మార్కెట్‌లోకి 4జీ సీసీటీవీలు వొడాఫోన్‌తో  వీడియోకాన్‌ వాల్‌కామ్‌ జట్టు హైదరాబాద్, బిజినెస్‌ బ్యూరో: సెక్యూరిటీ, నిఘా సొల్యూషన్‌ ప్రొవైడర్‌ సంస్థ వీడియోకాన్‌ వాల్‌కామ్‌.. వొడాఫోన్‌తో జట్టుకట్టింది. విపణిలోకి తొలిసారిగా 4జీ అనుసంధానమైన సీసీటీవీ కెమెరాలను విడుదల చేసింది. ఇందులో 4జీ సిమ్‌తో పాటూ మొబైల్‌ వాహన కిట్, 4జీ అవుట్‌డోర్, ఇన్‌డోర్‌ సీసీటీవీ కెమెరాలు అనుసంధానమై ఉంటాయని కంపెనీ ఒక ప్రకటనలో తెలిపింది. 4జీ మొబైల్‌ వాహన కిట్‌ను బస్సులు, కార్లు, రైళ్లు, ట్రక్కుల వంటి అన్ని రకాల వాహనాలకు బిగించుకునే విధంగా 1.3, 2 మెగా పిక్సల్‌ రిజల్యూషన్‌ను కలిగి ఉంటుందని పేర్కొంది. ఆసుస్‌ ‘వివోబుక్‌ ఎస్‌15’ @ రూ.59,990 న్యూఢిల్లీ:  ‘ఆసుస్‌’ తాజాగా కొత్త నోట్‌బుక్‌ ‘వివోబుక్‌ ఎస్‌15’ని మార్కెట్‌లోకి తీసుకువచ్చింది. దీని ధర రూ.59,990. ఇందులో 8వ జనరేషన్‌ ఇంటెల్‌ కోర్‌–ఐ7 ప్రాసెసర్, 15.6 అంగుళాల ఫుల్‌ హెచ్‌డీ నానో ఎడ్జ్‌ డిస్‌ప్లే వంటి పలు ప్రత్యేకతలున్నాయి.


 న్యూఢిల్లీ: వీడియోకాన్ మొబైల్స్ సరికొత్త స్మార్ట్‌ఫోన్‌ను లాంచ్‌  చేసింది.  సరసమైన ధరలో  ‘మెటల్‌ ప్రో 2’  పేరుతో  ఈ డివైస్‌ను  ప్రవేశపెట్టింది. ఆండ్రాయిడ్ 7.0 నౌగాట్ ఆపరేటింగ్ సిస్టమ్‌ ఆధారంగా పనిచేసే ఈ స్మార్ట్‌ఫోన్‌ ధరను  రూ.6,999గా నిర్ణయించింది. ఎస్‌ఓఎస్‌-బీ సేఫ్‌  ఫీచర్‌తోపాటు  ప్రభుత్వం తప‍్పనిసరి చేసిన పానిక్‌ బటన్‌తో అందుబాటులో వస్తోంది.  అంతేకాదు ‘ఈరోస్‌ నౌ’  సంవత్సరం చందా, గేమ్‌ లాట్‌ అనే పెయిడ్‌ గేమ్‌ను ఉచితంగా అందిస్తోంది.  గోల్డ్‌, స్పేస్‌ గ్రే కలర్స్‌లో  అన్ని రీటైల్‌ స్టోర్లలో ఈ నెల చివరినుంచి  కస్టమర్లకు అందుబాటులో ఉంటుందని కంపెనీ ప్రకటించింది.
 మెటల్ ప్రో 2 ఫీచర్లు
 5.0 అంగుళాల డిస్‌ప్లే
 720x1280  రిజల్యూషన్‌
 2 జీబి ర్యామ్
 16జీబీ స్టోరేజ్‌
 128జీబీ దాకా విస్తరించుకునే సదుపాయం
 13ఎంపీ వెనుక కెమెరా
  3.2 ఎంపీ సెల్ఫీ కెమెరా విత్‌ఎల్‌ఈడీ  ఫ్లాష్
 2000ఎంఏహెచ్‌ బ్యాటరీ
 అర్ధవంతమైన ఆవిష్కరణల పట్ల తాము కట్టుబడి ఉన్నామనీ, మెటల్ ప్రో 2 అనేది మెరుగైన మరియు అద్భుతమైన పరికరంగా చెప్పవచ్చనీ వీడియోకాన్ మొబైల్స్ సీఈవో అక్షయ్ దూత్ ఒక ప్రకటనలో తెలిపారు. వినియోగదారుల అవసరాలను దృష్టిలో  ఉంచుకొని దీన్ని రూపొందించామన్నారు. మిరా విజన్‌ అనే కొత్త  టెక్నాలజీతో వస్తుందని తెలిపారు.
  


 ప్రముఖ కన్సూమర్‌ ఎలక్ట్రానిక్స్‌ అండ్‌ హోమ్‌ అప్లయెన్సెస్‌ కంపెనీ ‘వీడియోకాన్‌’ తాజాగా అసోచామ్, పానాసోనిక్‌లతో కలిసి హైదరాబాద్‌లో జీఎస్‌టీ సదస్సును నిర్వహించింది. కన్సూమర్‌ ఎలక్ట్రానిక్‌ వర్తకుల్లో వస్తు సేవల పన్ను (జీఎస్‌టీ)కు సంబంధించి నెలకొని ఉన్న సందేహాలను, సవాళ్లను నివృత్తి చేయడమే ఈ సమిట్‌ ఉద్దేశం.
 
 ఈ జీఎస్‌టీ సదస్సులో  కమర్షియల్‌ ట్యాక్స్‌ (ఎన్‌ఫోర్స్‌మెంట్‌) అసిస్టెంట్‌ కమీషనర్లు జి.రాజేశ్‌ కుమార్, ఆర్‌.ఏడుకొండలు సహా పలువురు ప్రముఖులు పాల్గొన్నారు. వీడియోకాన్‌ తాజా సమిట్‌లో ‘ఎSఖీఃఠిజఝ్చజీl.జీn’ అనే డిజిటల్‌ హెల్ప్‌లైన్‌ను కూడా ఆవిష్కరించింది. దీని ద్వారా రిటైలర్లు వారి సందేహాలను ఈ–మెయిల్‌ చేసి పరిష్కరించుకోవచ్చు. కాగా సంస్థ దేశవ్యాప్తంగా 200కుపైగా సదస్సులను నిర్వహించనుంది.


 వీడియోకాన్‌ కంపెనీ సౌర శక్తితో పనిచేసే హైబ్రిడ్‌ సోలార్‌ ఎయిర్‌కండీషనర్లను మార్కెట్లోకి తెచ్చింది. సౌరశక్తితో పనిచేసే ఈ హైబ్రిడ్‌ సోలార్‌ ఏసీలను రెండు మోడళ్లలలో అందిస్తున్నామని, వీటి వల్ల వంద శాతం విద్యుత్‌  ఆదా అవడమే కాకుండా పర్యావరణానికి మేలు కలుగుతుందని వీడియోకాన్‌ ఒక ప్రకటనలో తెలిపింది. 
 
 అవసరమైనప్పుడు విద్యుత్‌ను కూడా వినియోగించుకుంటుందని వీడియోకాన్‌ హెడ్‌( టెక్నాలజీ, ఇన్నోవేషన్‌ విభాగం) అక్షయ్‌ ధూత్‌  పేర్కొన్నారు. 1 టన్ను ఏసీలధర రూ.99,000, 1.5 టన్నుల ఏసీ ధర రూ.1,39,000 రేంజ్‌లో ఉన్నాయని తెలిపారు.


 ముంబయి: ప్రముఖ వ్యాపార సంస్థ వీడియోకాన్ మహారాష్ట్రలోని శివసేన పార్టీకి రూ.85కోట్లు విరాళంగా ఇచ్చింది. ఈ మేరకు ఎన్నికల కమిషన్కు సమర్పించిన అఫిడవిట్లో శివసేన పేర్కొంది. దీని ప్రకారం శివసేనకు పెద్ద మొత్తంలో విరాళం ఇచ్చే సంస్థగా వీడియోకాన్ ఉండటం కూడా గమనార్హం. 2015-16 సంవత్సరానికిగాను, కార్పొరేట్ సంస్థలు, కార్పొరేటరేతర సంస్థల నుంచి మొత్తం రూ.86.84కోట్ల మొత్తం విరాళ రూపంలో వచ్చిందని పేర్కొనగా అందులో రూ.85కోట్లు వీడియోకాన్ ఇచ్చిందట.
 
 ఇక ఇదే సంస్థ శరద్ పవార్ కు చెందిన నేషనల్ కాంగ్రెస్ పార్టీకి మాత్రం రూ.25లక్షలు మాత్రమే విరాళంగా ఇచ్చింది. ఆదాయ పన్నుకు సంబంధించిన 139వ సెక్షన్ ప్రకారం 2016, సెప్టెంబర్ 27న శివసేన పార్టీకి చెందిన రాజ్యసభ సభ్యుడు అనిల్ దేశాయ్ ఈ వివరాలు ఎన్నికల కమిషన్కు సమర్పించారు. ఈ వివరాలు కమిషన్ వెబ్ సైట్లో కూడా అందుబాటులో ఉన్నాయి. కాంగ్రెస్, ఎన్సీపీ కూడా ఈ వివరాలు అందించగా బీజేపీ మాత్రం ఇంకా సమర్పించలేదు.


 న్యూఢిల్లీ: ప్రముఖ మొబైల్ హ్యాండ్‌సెట్స్ తయారీ కంపెనీ ‘వీడియోకాన్ స్మార్ట్‌ఫోన్’ తాజాగా ‘క్యూబ్ 3’ అనే స్మార్ట్‌ఫోన్‌ను మార్కెట్‌లోకి తె చ్చింది. దీని ధర రూ.8,490గా ఉంది. కంపెనీ ఇందులో తొలిసారిగా పానిక్ బటన్ ఫీచర్‌ను పొందుపరిచింది. క్యూబ్ 3 స్మార్ట్‌ఫోన్‌లో 3 జీబీ ర్యామ్, 13 ఎంపీ రియర్ కెమెరా, 4జీ, 5 అంగుళాల హెచ్‌డీ స్క్రీన్, 3,000 ఎంఏహెచ్ బ్యాటరీ వంటి ప్రత్యేకతలు ఉన్నాయని కంపెనీ పేర్కొంది.


 6 సర్కిళ్లలో కొనుగోలు  డీల్ విలువ రూ. 4,428
 న్యూఢిల్లీ: వీడియోకాన్ టెలికమ్యూనికేషన్స్‌కి(వీటీఎల్) 6 సర్కిళ్లలో ఉన్న 1800 మెగాహెట్జ్ బ్యాండ్ స్పెక్ట్రంను భారతీ ఎయిర్‌టెల్ కొనుగోలు చేయనుంది. ఇందుకోసం రూ. 4,428 కోట్లు వెచ్చించనుంది. దీనికి సంబంధించి వీటీఎల్‌తో ఒప్పందం కుదుర్చుకున్నట్లు ఎయిర్‌టెల్ తెలిపింది. బీహార్, హర్యానా, మధ్యప్రదేశ్, ఉత్తర్‌ప్రదేశ్ (ఈస్ట్), ఉత్తర్‌ప్రదేశ్ (వెస్ట్), గుజరాత్ సర్కిళ్లు ఈ జాబితాలో ఉన్నాయి. స్పెక్ట్రం కాలావధి 2032 డిసెంబర్ 18 దాకా ఉంది. డీల్‌కు సంబంధించి ఎయిర్‌టెల్ రూ. 642 కోట్లు సేవా పన్ను కింద ప్రభుత్వానికి చెల్లించనుంది.
 తాజా స్పెక్ట్రం కొనుగోలుతో ఎయిర్‌టెల్ 4జీ సర్వీసులు ప్రస్తుత మున్న 15 సర్కిళ్ల నుంచి 19 సర్కిళ్లకు విస్తరిస్తాయి. పారిశ్రామిక దిగ్గజం ముకేశ్ అంబానీకి చెందిన రిలయన్స్ జియో త్వరలో దేశవ్యాప్తంగా 4జీ సర్వీసులు ప్రారంభించనున్న నేపథ్యంలో ఇది ప్రాధాన్యం సంతరించుకుంది. వాస్తవానికి గుజరాత్, యూపీ (వెస్ట్)సర్కిళ్లలో స్పెక్ట్రంను వీడియోకాన్ నుంచి కొనుగోలు చేసేందుకు ఐడియా సెల్యులార్ గత నవంబర్‌లో ఒప్పందం కుదుర్చుకుంది. ఇందుకోసం రూ. 3,310 కోట్లు చెల్లించేందుకు కూడా సిద్ధపడింది. అయితే, పలు కారణాల రీత్యా ఈ ఒప్పందాన్ని ఇరు కంపెనీలు ఇటీవలే రద్దు చేసుకున్నాయి.


 హైదరాబాద్: దేశీ ప్రముఖ కన్సూమర్ డ్యూరబుల్, హోమ్ అప్లయెన్సెస్ బ్రాండ్ వీడి యోకాన్ తాజాగా తొలి 5 స్టార్ రేటింగ్ ఇన్వర్టర్ ఏసీలను మార్కెట్‌లోకి ప్రవేశపెట్టింది. అధిక ఇంధన సామర్థ్యం వీటి ప్రత్యేకతని కంపెనీ ఒక ప్రకటనలో తెలిపింది. 1 టన్ను, 1.5 టన్ను వేరియంట్లలో ఇవి అందుబాటులో ఉంటాయి. ఈ కొత్త పెంటా ఇన్వర్టర్ ఏసీ ఉత్పత్తుల ద్వారా ఏపీ, తెలంగాణ రాష్ట్రాల్లోని ఏసీ మార్కెట్‌లో 15 శాతం వాటాను లక్ష్యంగా నిర్దేశించుకున్నట్లు వీడియోకాన్ ఏసీ డివిజన్ సీవోవో సంజీవ్ బక్షి పేర్కొన్నారు. వినియోగదారులకు పెంటా ఇన్వర్టర్ ఏసీలు ఫిబ్రవరి నెల చివరి నాటికి అందుబాటులో ఉంటాయని వీడియోకాన్ టెక్నాలజీ, ఇన్నొవేషన్ హెడ్ అక్షయ్ దత్ ప్రకటనలో తెలిపారు. 1 టన్ను ఏసీ ధర రూ.39,000 కాగా, 1.5 టన్నుల ఏసీ ధర రూ.47,000.
  


  హైదరాబాద్: షెమారూ ఎంటర్‌టైన్‌మెంట్ సంస్థ యాడ్స్‌లేని నిరంతర భక్తి ప్రసారాలను అందించే ‘డీ2హెచ్ దర్శన్’ చానల్‌ను వినియోగదారులకు అందుబాటులోకి తీసుకురావడం కోసం వీడియోకాన్ డీ2హెచ్‌తో జతకట్టింది. డీ2హెచ్ దర్శన్‌లో టెంపుల్ టూరిజం, శ్లోకాలు, వేదాలు, భజనాలు, కథలు, పవిత్ర గ్రంథాలు, పండుగలు తదితర వాటికి సంబంధించిన విషయాలు ప్రసారం అవుతాయని, దీని వల్ల వినియోగదారులు హిందూ ధర్మం గురించి లోతుగా తెలుసుకోవచ్చని కంపెనీ ఒక ప్రకటనలో తెలిపింది.
  
   ఒక్కో రోజు ఒక్కో దేవునికి ప్రీతిపాత్రమైందని.. ఆ రోజు ఆ దేవుడికి సంబంధించిన విషయాలను ప్రత్యేకంగా తెలియజేస్తామని, అలాగే పండుగ రోజుల్లో ఆ పండుగ విశిష్టతలను వివరిస్తామని పేర్కొంది. ఈ చానల్ ను వినియోగదారులు నెలకు రూ.30ల ప్రీమియం చెల్లించి వీడియోకాన్ డీ2హెచ్‌లో 481 నెంబర్‌లో చూడొచ్చని తెలిపింది.  
  


 న్యూఢిల్లీ : ఎలక్ట్రానిక్ ఉత్పత్తుల కంపెనీ వీడి యోకాన్ ‘జెడ్51 నోవాప్లస్’ అనే కొత్త స్మార్ట్‌ఫోన్‌ను మార్కెట్‌లోకి విడుదల చేసింది. దీని ధర రూ.5,799. ఆండ్రాయిడ్ కిట్‌క్యాట్ ఆపరేటింగ్ సిస్టమ్‌పై  పనిచేసే ఈ స్మార్ట్‌ఫోన్‌లో 1.2 గిగాహెర్ట్జ్ క్వాడ్‌కోర్ ప్రాసెసర్, 1 జీబీ ర్యామ్, 8 జీబీ మెమరీ, 2,000 ఎంఏహెచ్ బ్యాటరీ, 8 ఎంపీ రియర్ కెమెరా, 5 ఎంపీ ఫ్రంట్ కెమెరా వంటి ప్రత్యేకతలు ఉన్నట్లు కంపెనీ తెలిపింది.


 హైదరాబాద్: డెరైక్ట్ టు హోమ్(డీటీహెచ్)  రంగంలో సేవలందించే వీడియోకాన్ డీ2హెచ్ కంపెనీ  గత ఆర్థిక సంవత్సరంలో రూ.2,338 కోట్ల నిర్వహణ ఆదాయం ఆర్జించింది. ఇది అంతకు ముందటి ఆర్థిక సంవత్సరం నిర్వహణ ఆదాయం కంటే 33 శాతం అధికమని వీడియోకాన్ డీ2హెచ్ ఒక ప్రకటనలో తెలిపింది. చందా ఆదాయం 38 శాతం వృద్ధితో రూ.2,058 కోట్లకు చేరిందని కంపెనీ ఎగ్జిక్యూటివ్ చైర్మన్ సౌరభ్ ధూత్ పేర్కొన్నారు. ఇబిటా 55 శాతం వృద్ధితో రూ.609 కోట్లకు చేరిందని వివరించారు. ఈ ఏడాది ఏప్రిల్‌లో న్యూయార్క్ స్టాక్ ఎక్స్ఛేంజ్‌లో విజయవంతగా తమ కంపెనీ లిస్ట్ అయిందని పేర్కొన్నారు. ఆర్థిక వృద్ధి అంచనాలు జోరుగా ఉన్నాయని, భవిష్యత్తులో మీడియా రంగం మంచి అభివృద్ధిని సాధిస్తుందని కంపెనీ సీఈఓ అనిల్ ఖేరా తెలిపారు. టీవీల విస్తరణ, హెచ్‌డీ వినియోగం పెరుగుతుండడం వంటి  కారణాల వల్ల రాబడులు పెరుగుతాయన్నారు. 


 రూ.60 కోట్లతో యూనిట్
 ఏడాదిలో ఉత్పత్తి ప్రారంభం
 వీడియోకాన్ మొబైల్స్ సీవోవో జెరాల్డ్ పెరీరా
  
 హైదరాబాద్, బిజినెస్ బ్యూరో: ఎలక్ట్రానిక్స్, గృహోపకరణాల తయారీ సంస్థ వీడియోకాన్.. మొబైల్స్ అసెంబ్లింగ్ యూనిట్‌ను హైదరాబాద్ సమీపంలో ఏర్పాటు చేస్తోంది. శంషాబాద్ వద్ద కంపెనీకి చెందిన ఉపకరణాల తయారీ ప్లాంటు వద్ద రూ.60 కోట్లతో ఈ యూనిట్‌ను నెలకొల్పుతోంది. తొలుత నెలకు 5 లక్షల ఫోన్లను అసెంబ్లింగ్ చేయాలని కంపెనీ నిర్ణయించింది. దశలవారీగా ఈ సామర్థ్యాన్ని పెంచనున్నారు. శంషాబాద్ ప్లాంటులో ఏడాదిలో కార్యకలాపాలు ప్రారంభిస్తామని వీడియోకాన్ మొబైల్స్ సీవోవో జెరాల్డ్ పెరీరా సాక్షి బిజినెస్ బ్యూరోకు శుక్రవారం తెలిపారు. ఫీచర్ ఫోన్లతోపాటు స్మార్ట్‌ఫోన్లు కూడా ఈ యూనిట్‌లో తయారవుతాయని వివరించారు. వీటితోపాటు డిమాండ్‌నుబట్టి ట్యాబ్లెట్ పీసీలను సైతం అసెంబుల్ చేస్తామని వెల్లడించారు.
 
 వాటా పెంచుకుంటాం..: దేశవ్యాప్తంగా నెలకు వివిధ బ్రాండ్లవి కలిపి 1.8 కోట్ల ఫోన్లు అమ్ముడవుతున్నాయి. ఇందులో వీడియోకాన్ వాటా 2.5-3 శాతం మధ్య ఉంటుందని జెరాల్డ్ పెరీరా తెలిపారు. ఫీచర్, స్మార్ట్, ట్యాబ్లెట్స్ విభాగంలో ఏ సమయంలోనైనా 30 మోడళ్లను మార్కెట్లో అందుబాటులో ఉంచుతున్నట్టు చెప్పారు. ‘మూడు నాలుగు నెలల కోసారి పాత వాటి స్థానంలో 30 శాతం మోడళ్లు కొత్తవి తీసుకొస్తున్నాం. ఫీచర్ ఫోన్లకు భారత్‌లో ఇంకా డిమాండ్ ఉంది. ఇక స్మార్ట్‌ఫోన్లు సైతం ఊపందుకున్న నేపథ్యంలో వీటిపైనా ప్రత్యేక దృష్టిపెట్టాం. డిసెంబర్‌కల్లా దేశవ్యాప్తంగా మొబైల్స్ మార్కెట్లో 5 శాతం, తెలంగాణ, ఆంధ్రప్రదేశ్‌లో 10 శాతం వాటా లక్ష్యంగా చేసుకున్నాం’ అని వెల్లడించారు. అవసరమైతే మరిన్ని ప్లాంట్లను పెట్టేందుకు సిద్ధమని చెప్పారు.
 
 నెలకు 30 లక్షల యూనిట్లు..
 
 వీడియోకాన్ మహారాష్ట్రలోని ఔరంగాబాద్, ఉత్తరాఖండ్‌లోని కాశీపూర్ ప్లాంట్లలో మొబైల్స్‌ను ఉత్పత్తి చేస్తోంది. తమిళనాడులో కొత్త ప్లాంటు సిద్ధమవుతోంది. ప్రస్తుత సామర్థ్యం నెలకు 10 లక్షల యూనిట్లు. డిసెంబర్‌కల్లా దీన్ని 30 లక్షలకు పెంచాలనేది కంపెనీ లక్ష్యం. కొన్ని విడిభాగాలను విదేశాల నుంచి దిగుమతి చేస్తున్నామని వీడియోకాన్ ఆంధ్రప్రదేశ్, తెలంగాణ సర్కిల్స్ హెడ్ షేక్ రఫీ తెలిపారు.  శంషాబాద్ వద్ద అనుబంధ యూనిట్లు కూడా రానున్నాయని తెలిపారు.
  


 లేటెస్ట్ ఆండ్రాయిడ్ ఆపరేటింగ్ సిస్టమ్, క్వాడ్‌కోర్ ప్రాసెసింగ్ పవర్‌లతో కూడిన సరికొత్త స్మార్ట్‌ఫోన్ ఇన్ఫీనియం జెడ్50 నోవాను దేశీ స్మార్ట్‌ఫోన్ తయారీ సంస్థ వీడియోకాన్ ఇటీవల విడుదల చేసింది. అయిదు అంగుళాల స్క్రీన్ కలిగిఉన్న ఈ ఫోన్ ధర రూ.5,999లు మాత్రమే. మైక్రోప్రాసెసర్ సామర్థ్యం 1.3 గిగాహెర్ట్జ్ కాగా, ర్యామ్ ఒక జీబీగా ఉంది. అంతేకాదు.. ఎనిమిది జీబీలు ఉన్న మెమరీని మైక్రోఎస్‌డీ కార్డు ద్వారా 32 జీబీల వరకూ పెంచుకోవచ్చు.
 
 రెండు సిమ్‌లను సపోర్ట్ చేసే ఇన్ఫీనియం జెడ్ 50 నోవాలో 8, 2 మెగాపిక్సెళ్ల రెజల్యూషన్లున్న కెమెరాలు ఉపయోగించారు. ఆంటీవైరస్, జీపీఎస్ ఆధారిత వ్యక్తిగత భద్రత అప్లికేషన్ వీసెక్యూర్‌లు ఉచితంగా లభిస్తాయి. అంతేకాకుండా హంగామా, గేమ్‌లాఫ్ట్ వంటి సైట్లకు 90 రోజుల ఉచిత సబ్‌స్క్రిప్షన్ లభిస్తుంది. బ్లూటూత్ 4.0, వైఫై, మిరాకాస్ట్ సపోర్ట్ వంటి కనెక్టివిటీ ఆప్షన్లున్న ఈ స్మార్ట్‌ఫోన్ బడ్జెట్‌పై శ్రద్ధ ఉన్నవారికి మెరుగైన అవకాశమనే చెప్పాలి.
  
  


 న్యూఢిల్లీ: ఎలక్ట్రానిక్స్ పరిశ్రమ వృద్ధికి దోహదపడే పలు చర్యలను ఆర్థిక మంత్రి బడ్జెట్లో ప్రతిపాదించారని ఈ పరిశ్రమ వర్గాలు సంతోషం వ్యక్తం చేస్తున్నాయి. ఈ ప్రతిపాదనల  కారణంగా దేశీయ ఎలక్ట్రానిక్స్ పరిశ్రమ జోరు పెరుగుతుందని, ఉద్యోగావకాశాలు పెరుగుతాయని ఆ వర్గాలు అంటున్నాయి.
 
  1. టెలికాం, ఐటీ ఉత్పత్తుల దిగుమతులపై 10 శాతం బేసిక్ కస్టమ్స్ డ్యూటీ(బీసీడీ)ని విధింపు.  దేశీయ ఉత్పత్తికి ఊతమివ్వడం, దిగుమతులపై ఆధారపడటాన్ని తగ్గించుకోవడం లక్ష్యాలుగా ఈ చర్య తీసుకున్నారు. ఇన్ఫర్మేషన్ టెక్నాలజీ అగ్రిమెంట్ 1లో లేని ఐటీ, టెలికాం ఉత్పత్తులకు ఈ సుంకం వర్తిస్తుంది.  ఈ చర్య కారణంగా వీఓఐపీ ఫోన్‌లు, కొన్ని టెలికాం నెట్‌వర్క్ ఉత్పత్తుల తయారీకి ప్రోత్సాహం లభిస్తుంది.
 
  2. పర్సనల్ కంప్యూటర్ల తయారీలో ఉపయోగించే విడిభాగాలపై ప్రస్తుతం విధిస్తున్న 4 శాతం స్పెషల్ అడిషనల్ డ్యూటీ(ఎస్‌ఏడీ)ను తొలగించారు. దిగుమతి చేసుకునే ఎలక్ట్రానిక్ ఉత్పత్తులపై విద్యా సుంకాన్ని విధించారు. ఫలితంగా దేశీయంగా తయారయ్యే ఉత్పత్తుల ధర, విదేశాల నుంచి దిగుమతి చేసుకునే ఉత్పత్తుల ధర ఒకే విధంగా ఉంటుంది.  
 
  3. కలర్ పిక్చర్ ట్యూబ్‌లపై దిగుమతి సుంకం తొలగింపు.  దీంతో వీటి ధరలు మరింతగా తగ్గుతాయి.
 
  4. 19 అంగుళాల లోపు  ఎల్‌ఈడీ, ఎల్‌సీడీ టీవీల తయారీలో ఉపయోగపడే స్క్రీన్‌లపై 10 శాతంగా ఉన్న బేసిక్ కస్టమ్స్ సుంకాన్ని పూర్తిగా తొలగించారు. ఫలితంగా వీటి ధరలు తగ్గుతాయి.
 
  5. ఒక ఏడాదిలో రూ. 25 కోట్లకు మించిన పెట్టుబడులపై 15% మూలధన ప్రోత్సాహకాలు లభిస్తాయి. ఫలి తంగా ఎంఎస్‌ఎంఈలో పెట్టుబడుల  పెరుగుతాయి.


  న్యూఢిల్లీ: టెలికాం నియంత్రణ సంస్థ ట్రాయ్ 9 టెలికాం కంపెనీలపై రూ. 50 లక్షల జరిమానాను వడ్డించింది. ఈ ఏడాది ఏప్రిల్-జూన్ త్రైమాసిక కాలానికి ప్రమాణాలకు తగ్గట్లుగా నాణ్యమైన టెలికాం సర్వీసులనందజేయనందుకు ట్రాయ్ ఈ జరిమానా విధించిందని అధికార వర్గాలు తెలిపాయి. అధిక మొత్తం జరిమానా(రూ.14.5 లక్షలు)ను  బీఎస్‌ఎన్‌ఎల్‌పై ట్రాయ్ విధించింది. వీడియోకాన్, లూప్ మొబైల్, ఎంటీఎన్‌ఎల్‌లపై ఎలాంటి జరిమానా లేదు. ఎయిర్‌సెల్, ఆర్‌కామ్‌లపై చెరో రూ.12.5 లక్షలు, ఐడియా సెల్యులర్(రూ.3 లక్షలు), భారతీ ఎయిర్‌టెల్, వొడాఫోన్‌లపై చెరో రూ.2 లక్షలు, ఎంటీఎస్‌పై రూ.50,000 వరకూ ట్రాయ్ జరిమానాలు విధించింది.