రియాద్‌: మహిళల టెన్నిస్‌ సీజన్‌ ముగింపు టోర్నమెంట్‌ డబ్ల్యూటీఏ ఫైనల్స్‌లో బెలారస్‌ స్టార్, ప్రపంచ నంబర్‌వన్‌ సబలెంకా సెమీఫైనల్లోకి దూసుకెళ్లింది. సోమవారం జరిగిన పర్పుల్‌ గ్రూప్‌ రెండో లీగ్‌ మ్యాచ్‌లో సబలెంకా 6–3, 7–5తో నాలుగో సీడ్‌ జాస్మిన్‌ పావోలిని (ఇటలీ)పై గెలిచింది. తద్వారా వరుసగా రెండో విజయంతో సబలెంకాకు సెమీఫైనల్‌ బెర్త్‌ ఖరారైంది. ఇదే గ్రూప్‌లోని మరో లీగ్‌ మ్యాచ్‌లో ఏడో సీడ్‌ కిన్‌వెన్‌ జెంగ్‌ (చైనా) 7–6 (7/4), 3–6, 6–1తో ఐదో సీడ్‌ రిబాకినా (కజకిస్తాన్‌)ను ఓడించింది. ఫలితం రెండు పరాజయాలతో రిబాకినా సెమీఫైనల్‌ రేసు నుంచి నిష్క్రమించింది. జాస్మిన్, కిన్‌వెన్‌ జెంగ్‌ మధ్య జరిగే చివరి లీగ్‌ మ్యాచ్‌ విజేతకు రెండో సెమీఫైనల్‌ బెర్త్‌ లభిస్తుంది.

రియాద్‌: మహిళల టెన్నిస్‌ సీజన్‌ ముగింపు టోర్నమెంట్‌ డబ్ల్యూటీఏ ఫైనల్స్‌లో డిఫెండింగ్‌ చాంపియన్, పోలాండ్‌ స్టార్‌ ఇగా స్వియాటెక్‌ శుభారంభం చేసింది. ఆరెంజ్‌ గ్రూప్‌లో భాగంగా ఆదివారం జరిగిన తొలి లీగ్‌ మ్యాచ్‌లో ప్రపంచ రెండో ర్యాంకర్‌ స్వియాటెక్‌ 4–6, 7–5, 6–2తో ఎనిమిదో సీడ్‌ బార్బరా క్రెజికోవా (చెక్‌ రిపబ్లిక్‌)పై కష్టపడి గెలిచింది. 2 గంటల 33 నిమిషాలపాటు జరిగిన ఈ మ్యాచ్‌లో స్వియాటెక్‌ పది ఏస్‌లు సంధించింది. ఆరెంజ్‌ గ్రూప్‌లో భాగంగా జరిగిన మరో మ్యాచ్‌లో మూడో సీడ్‌ కోకో గాఫ్‌ (అమెరికా) 6–3, 6–2తో అమెరికాకే చెందిన జెస్సికా పెగూలాను ఓడించింది. పర్పుల్‌ గ్రూప్‌లో భాగంగా జరిగిన లీగ్‌ మ్యాచ్‌లో నాలుగో సీడ్‌ జాస్మిన్‌ పావోలిని (ఇటలీ) 7–6 (7/5), 6–4తో రిబాకినా (కజకిస్తాన్‌)పై గెలిచింది.

పారిస్‌ ఒలింపిక్స్‌ మహిళల టెన్నిస్‌ సింగిల్స్‌ పోటీల్లో వరల్డ్‌ నంబర్‌ వన్‌ ఇగా స్వియాటెక్‌కు (పోలాండ్‌) షాక్‌ తగిలింది. ఇవాళ (ఆగస్ట్‌ 1) జరిగిన సెమీఫైనల్లో చైనాకు చెందిన క్విన్‌వెన్‌ ఝెంగ్‌ స్వియాటెక్‌ను 6-2, 7-5 తేడాతో ఓడించింది. గంటా 51 నిమిషాల పాటు సాగిన ఈ పోటీలో క్విన్‌వెన్‌ వరుస సెట్లలో విజయం సాధించి ఫైనల్‌కు చేరింది. Qinwen Zheng becomes the 1st Chinese player in history to reach the final of the Olympics in singles. No man or woman has ever done it before today. Megastar in the making. 🇨🇳❤️🇨🇳 pic.twitter.com/24f1WkwBcz— The Tennis Letter (@TheTennisLetter) August 1, 2024ఒలింపిక్స్‌ టెన్నిస్‌ ఫైనల్లోకి ప్రవేశించిన తొలి చైనా క్రీడాకారిణిగా క్విన్‌వెన్‌ రికార్డు సృష్టించింది. ఈ మ్యాచ్‌లో ఓటమితో రొలాండ్‌ గారోస్‌లో 1149 రోజుల పాటు సాగిన స్వియాటెక్‌ జైత్రయాత్రకు బ్రేక్‌ పడింది. 2021 నుంచి రొలాండ్‌ అండ్‌ గారోస్‌లో స్వియాటెక్‌కు ఓటమనేదే లేదు. డొన్నా వెకిక్‌, అన్నా కరోలినా మధ్య జరిగే రెండో సెమీఫైనల్‌ విన్నర్‌తో క్విన్‌వెన్‌ ఫైనల్లో పోటీపడుతుంది.

ఈ ఏడాది ఆటకు వీడ్కోలు పలకనున్న అమెరికా టెన్నిస్‌ ప్లేయర్‌ డానియల్‌ కోలిన్స్‌ అద్భుతం చేసింది. మయామి ఓపెన్‌ డబ్ల్యూటీఏ–1000 టోరీ్నలో చాంపియన్‌గా నిలిచింది. ఫ్లోరిడాలో జరిగిన మహిళల సింగిల్స్‌ ఫైనల్లో 30 ఏళ్ల కోలిన్స్‌ 7–5, 6–3తో ప్రపంచ నాలుగో ర్యాంకర్‌ రిబాకినా (కజకిస్తాన్‌)పై గెలిచింది.కోలిన్స్‌కు 11 లక్షల డాలర్ల (రూ. 9 కోట్ల 16 లక్షలు) ప్రైజ్‌మనీతోపాటు 1000 ర్యాంకింగ్‌ పాయింట్లు లభించాయి. మార్టినా నవ్రతిలోవా, క్రిస్‌ ఎవర్ట్, వీనస్‌ విలియమ్స్, సెరెనా విలియమ్స్, స్లోన్‌ స్టీఫెన్స్‌ తర్వాత మయామి ఓపెన్‌ టైటిల్‌ నెగ్గిన ఆరో అమెరికన్‌ ప్లేయర్‌గా కోలిన్స్‌ గుర్తింపు పొందింది.

మెల్‌బోర్న్‌: ఆ్రస్టేలియన్‌ ఓపెన్‌ గ్రాండ్‌స్లామ్‌ టెన్నిస్‌ టోర్నీ మహిళల సింగిల్స్‌ విభాగంలో సంచలనాలు నమోదయ్యాయి. రష్యాకు చెందిన 16 ఏళ్ల మిరా అండ్రీవా అద్భుత ఆటతో ప్రపంచ ఆరో ర్యాంకర్, ఆరో సీడ్‌ ఆన్స్‌ జెబర్‌ (ట్యునీషియా)ను ఇంటిదారి పట్టించగా... ఎలీనా అవెనెస్యాన్‌ (రష్యా) ఎనిమిదో సీడ్‌ మరియా సాకరి (గ్రీస్‌)ను బోల్తా కొట్టించింది. కేవలం 54 నిమిషాల్లో ముగిసిన ఈ రెండో రౌండ్‌ మ్యాచ్‌లో అండ్రీవా 6–0, 6–2తో ఆన్స్‌ జెబర్‌పై, ఎలీనా 6–4, 6–4తో సాకరిపై గెలిచి మూడో రౌండ్‌లోకి దూసుకెళ్లారు.   ఇతర రెండో రౌండ్‌ మ్యాచ్‌ల్లో రెండో సీడ్‌ సబలెంకా (బెలారస్‌) 6–3, 6–2తో ఫ్రువిర్తోవా (చెక్‌ రిపబ్లిక్‌)పై, నాలుగో సీడ్‌ కోకో గాఫ్‌ (అమెరికా) 7–6 (7/2), 6–2తో డొలెహిడె (అమెరికా)పై, తొమ్మిదో సీడ్‌ క్రిచికోవా (చెక్‌ రిపబ్లిక్‌) 6–2, 6–2తో తమారా (జర్మనీ)పై గెలిచారు. పురుషుల సింగిల్స్‌ రెండో రౌండ్‌ మ్యాచ్‌లో డిఫెండింగ్‌ చాంపియన్‌ జొకోవిచ్‌ 3 గంటల 11 నిమిషాల్లో 6–3, 4–6, 7–6 (7/4), 6–3తో అలెక్సీ పాపిరిన్‌ (ఆ్రస్టేలియా)పై గెలిచాడు.   

మహిళల టెన్నిస్‌ సీజన్‌ ముగింపు టోర్నీ డబ్ల్యూటీఏ ఫైనల్స్‌లో టాప్‌ సీడ్, ప్రపంచ నంబర్‌వన్‌ సబలెంకా (బెలారస్‌)కు రెండో లీగ్‌ మ్యాచ్‌లో ఓటమి ఎదురైంది. మెక్సికోలోని కాన్‌కున్‌ నగరంలో జరుగుతున్న ఈ టోర్నీలో అమెరికా ప్లేయర్‌ జెస్సికా పెగూలా 6–4, 6–3తో సబలెంకాను ఓడించి సెమీఫైనల్‌ బెర్త్‌ను ఖరారు చేసుకుంది. 88 నిమిషాలపాటు జరిగిన ఈ మ్యాచ్‌లో పెగూలా ఐదు ఏస్‌లు సంధించడంతోపాటు సబలెంకా సర్వీస్‌ను ఐదుసార్లు బ్రేక్‌ చేసింది. సబలెంకా, రిబాకినా (కజకిస్తాన్‌) మధ్య జరిగే చివరి లీగ్‌ మ్యాచ్‌లో గెలిచిన ప్లేయర్‌కు రెండో సెమీఫైనల్‌ బెర్త్‌ లభిస్తుంది.    

మహిళల టెన్నిస్‌ సీజన్‌ ముగింపు టోర్నీ డబ్ల్యూటీఏ ఫైనల్స్‌లో గత ఏడాది రన్నరప్, ప్రపంచ నంబర్‌వన్‌ సబలెంకా (బెలారస్‌) శుభారంభం చేసింది. మెక్సికోలో జరుగుతున్న ఈ టోర్నీలో తొలి లీగ్‌ మ్యాచ్‌లో సబలెంకా 6–0, 6–1తో మరియా సాకరి (గ్రీస్‌)పై గెలిచింది. 74 నిమిషాలపాటు జరిగిన ఈ మ్యాచ్‌లో సబలెంకా ఆరు ఏస్‌లు సంధించి, తన ప్రత్యర్థి సర్వీస్‌ను ఐదుసార్లు బ్రేక్‌ చేసింది. మరో లీగ్‌ మ్యాచ్‌లో జెస్సికా పెగూలా (అమెరికా) 7–5, 6–2తో రిబాకినా (కజకిస్తాన్‌)పై విజయం సాధించింది.    

న్యూఢిల్లీ: ఐటీ సేవల దేశీ దిగ్గజం ఇన్ఫోసిస్‌.. గ్లోబల్‌ బ్రాండ్‌ అంబాసిడర్‌గా అంతర్జాతీయ మహిళా టెన్నిస్‌ స్టార్‌ ఇగా స్వైటెక్‌ను నియమించుకుంది. కొన్నేళ్ల పాటు అమల్లో ఉండే ఈ భాగస్వామ్యం ద్వారా సంస్థ డిజిటల్‌ ఇన్నోవేషన్‌ను ప్రమోట్‌ చేయడంతోపాటు.. ప్రపంచవ్యాప్తంగా మహిళలకు స్ఫూర్తినివ్వనుంది. అంతేకాకుండా సైన్స్, టెక్నాలజీ, ఇంజినీరింగ్, మ్యాథ్స్‌(ఎస్‌టీఈఎం–స్టెమ్‌)లలో వెనుకబడిన మహిళల కోసం ప్రోగ్రామ్‌లను సృష్టించనున్నట్లు ఇన్ఫోసిస్‌ తెలియజేసింది. మహిళా సాధకులపై స్వైటెక్‌ అత్యంత ప్రభావశీలిగా నిలుస్తుందని ఇన్ఫోసిస్‌ సీఈవో సలీల్‌ పరేఖ్‌ ఈ సందర్భంగా పేర్కొన్నారు. స్వైటెక్‌తో కలిసి ఇన్ఫోసిస్‌ యువతకు ప్రధానంగా మహిళలకు స్ఫూర్తినిచ్చే పనులు చేపట్టనున్నట్లు తెలియజేశారు. భవిష్యత్‌కు కీలకమైన స్టెమ్‌లో ఉపాధి అవకాశాలను అందిపుచ్చుకునేవిధంగా ప్రోత్సాహాన్నివ్వనున్నట్లు వివరించారు. 22ఏళ్ల స్వైటెక్‌ నాలుగుసార్లు గ్రాండ్‌ స్లామ్‌ టైటిళ్లను సొంతం చేసుకోవడంతోపాటు.. 2022 ఏప్రిల్‌ నుంచి ప్రపంచ నంబర్‌ వన్‌ టెన్నిస్‌ క్రీడాకారిణిగా నిలుస్తున్నట్లు ఇన్ఫోసిస్‌ తెలియజేసింది. 

Madrid Open: మహిళల టెన్నిస్‌ ప్రపంచ నంబర్‌వన్‌ ర్యాంకర్‌ ఇగా స్వియాటెక్‌ (పోలాండ్‌)ను ఓడించి బెలారస్‌ స్టార్‌ సబలెంకా మాడ్రిడ్‌ ఓపెన్‌ డబ్ల్యూటీఏ ప్రీమియర్‌ టోర్నీలో రెండోసారి చాంపియన్‌గా నిలిచింది. 2021లో ఈ టైటిల్‌ను నెగ్గిన రెండో ర్యాంకర్‌ సబలెంకా ఈ ఏడాది ఫైనల్లో 6–3, 3–6, 6–3తో స్వియాటెక్‌పై గెలిచింది. సబలెంకా కెరీర్‌లో ఇది 12వ సింగిల్స్‌ టైటిల్‌. విజేతగా నిలిచిన సబలెంకాకు 11,05,265 యూరోల (రూ. 10 కోట్ల 12 లక్షలు) ప్రైజ్‌మనీతోపాటు 1000 ర్యాంకింగ్‌ పాయింట్లు దక్కాయి.   

అంతర్జాతీయ టెన్నిస్‌ సమాఖ్య (ఐటీఎఫ్‌) మహిళల టోర్నీలో హైదరాబాద్‌ అమ్మాయి సహజ యామలపల్లి పోరాటం తొలి రౌండ్‌లోనే ముగిసింది. బెంగళూరులో బుధవారం జరిగిన మహిళల సింగిల్స్‌ తొలి రౌండ్‌ మ్యాచ్‌లో సహజ 6–7 (8/10), 3–6తో డయానా మర్సిన్‌కెవిచా (లాతి్వయా) చేతిలో ఓడిపోయింది. గంటా 38 నిమిషాలపాటు జరిగిన ఈ మ్యాచ్‌లో సహజ తన సర్వీస్‌ను ఐదుసార్లు కోల్పోయి ప్రత్యర్థి సర్వీస్‌ను నాలుగుసార్లు బ్రేక్‌ చేసింది. మరో మ్యాచ్‌లో భారత నంబర్‌వన్‌ అంకితా రైనా 6–3, 6–0తో వన్షిత (భారత్‌)పై నెగ్గి రెండో రౌండ్‌కు చేరింది.    

బెంగళూరు: అంతర్జాతీయ టెన్నిస్‌ సమాఖ్య (ఐటీఎఫ్‌) మహిళల టోర్నీ డబుల్స్‌ విభాగంలో హైదరాబాద్‌ క్రీడాకారిణులు భమిడిపాటి శ్రీవల్లి రష్మిక, సహజ యామలపల్లిలకు నిరాశ ఎదురైంది. మంగళవారం జరిగిన తొలి రౌండ్‌ మ్యాచ్‌ల్లో రష్మిక–వైదేహి (భారత్‌) ద్వయం 6–7 (5/7), 7–5, 5–10తో హెసీ అమండైన్‌ (ఫ్రాన్స్‌)–దాలియా జకుపోవిచ్‌ (స్లొవేనియా) జోడీ చేతిలో... సహజ–సోహా సాదిక్‌ (భారత్‌) ద్వయం 4–6, 6–7 (3/7)తో ఎలీనా టియోడోరా (రొమేనియా)–డయానా మర్సిన్‌కెవికా (లాత్వియా) జోడీ చేతిలో ఓడిపోయాయి. రెండో సీడ్‌ అంకిత రైనా–రుతుజా భోస్లే (భారత్‌) ద్వయం 5–7, 6–3, 10–6తో షర్మదా బాలు (భారత్‌)–సారా రెబెకా (జర్మనీ) జోడీని ఓడించి క్వార్టర్‌ ఫైనల్లోకి ప్రవేశించింది.     

సాక్షి, హైదరాబాద్‌: ఇటీవలే ప్రొఫెషనల్‌ టెన్నిస్‌కు గుడ్‌బై చెప్పిన భారత స్టార్‌ టెన్నిస్‌ క్రీడాకారిణి సానియా మీర్జా, హైదరాబాద్‌లోని ఎల్బీ స్టేడియంలో ఇవాళ (మార్చి 5) జరిగిన ఫేర్‌వెల్‌ ఎగ్జిబిషన్‌ మ్యాచ్‌లో పాల్గొంది. సింగిల్స్‌ విభాగంలో రోహన్‌ బోపన్నతో జరిగిన ఈ మ్యాచ్‌లో సానియా విజయం సాధించింది. మ్యాచ్‌ అనంతరం ఒక్కసారిగా భావోద్వేగానికి లోనైన సానియా.. తన 20 ఏళ్ల సుదీర్ఘ ప్రయాణంలో జరిగిన సంఘటనలు గుర్తు చేసుకుంటూ కంటతడి పెట్టింది. ఈ సందర్భంగా సానియా కొడుకు అమ్మ గ్రేట్ అంటూ తన ప్రేమను వ్యక్తం చేయడంతో స్టేడియం మొత్తం హర్షద్వానాలు మార్మోగింది. అనంతరం సానియా మిక్సడ్‌ డబుల్స్‌ మ్యాచ్‌ కూడా ఆడనుంది. ఈ మ్యాచ్‌లో రోహన్‌ బోపన్నతో జతకట్టనున్న సానియా.. ఇవాన్ డోడిక్, మ్యాటెక్ సాండ్స్ జోడీతో తలపడనుంది.  సానియా ఆడే చివరి మ్యాచ్‌ చూసేందుకు క్రీడారంగానికి చెందిన వారితో పాటు టాలీవుడ్‌, బాలీవుడ్‌, ఇతర రంగాలకు చెందిన సెలబ్రిటీలు ఎల్బీ స్టేడియంకు చేరుకున్నారు. టీమిండియా మాజీ కెప్టెన్‌ మహ్మద్‌ అజహారుద్దీన్‌, సిక్సర్ల కింగ్‌ యువరాజ్‌ సింగ్‌, సీతారమం ఫేమ్‌ దుల్కర్‌ సల్మాన్‌ ఈ ఈవెంట్‌లొ సెంటర్‌ ఆఫ్‌ అట్రాక్షన్‌గా నిలిచారు. ఇవాళ సాయంత్రం ఓ ప్రైవేట్ హోటల్‌లో జరిగే రెడ్ కార్పెట్ ఈవెంట్‌కు కేంద్ర మంత్రి కిరణ్ రిజిజు, హీరోలు మహేష్ బాబు, అల్లు అర్జున్, ఏ ఆర్ రెహమాన్, సురేష్ రైనా, జహీర్ ఖాన్, ఇర్ఫాన్ పఠాన్‌తో తోపాటు మరికొందరు స్పోర్ట్స్, సినిమా స్టార్స్ హాజరుకానున్నారని సమాచారం.  కాగా, సానియా తన 20 ఏళ్ల ప్రొఫెషనల్‌ టెన్నిస్‌ కెరీర్‌లో 6 గ్రాండ్ స్లామ్ టైటిల్స్, 43 WTA టైటిల్స్‌, ఏసియన్ గేమ్స్ లో 8 పతకాలు, కామన్వెల్త్ గేమ్స్ లో 2 మెడల్స్ సాధించిన విషయం తెలిసిందే. ఈ హైదరాబాదీ క్వీన్‌ డబుల్స్ లో 91 వారాల పాటు వరల్డ్ నెంబర్ వన్ ర్యాంక్‌లో కొనసాగింది. భారత టెన్నిస్‌కు సేవలందించినందకు గాను సానియాకు అత్యున్నత క్రీడా పురస్కారం ఖేల్ రత్న తోపాటు అర్జున, పద్మ భూషణ్, పద్మ శ్రీ అవార్డులు లభించాయి. సానియా ప్రస్తుతం మహిళల ఐపీఎల్‌లో రాయల్ ఛాలెంజర్స్ బెంగళూర్  టీమ్‌కు మెంటర్‌గా వ్యవహరిస్తుంది.     

ఒక ఏడాదిలో ఒక గ్రాండ్‌స్లామ్‌ టైటిల్‌ గెలిస్తే కొందరికి అదే జీవితకాలపు ఘనత.. రెండు గెలిస్తే ఆనందం రెట్టింపు.. మూడు గెలిస్తే గొప్ప ఆటగాళ్ల సరసన చోటు.. ఒకే క్యాలెండర్‌ ఇయర్‌లో నాలుగు ప్రతిష్ఠాత్మక గ్రాండ్‌స్లామ్‌లు గెలిస్తే అది టెన్నిస్‌ చరిత్రలో ఐదుగురికి మాత్రమే సాధ్యమైన అసాధారణ ప్రదర్శన.. ఈ నాలుగుతో పాటు ఒలింపిక్‌ స్వర్ణం కూడా గెలిస్తే ఆ అద్భుతం పేరే స్టెఫీ గ్రాఫ్‌.. సుదీర్ఘ కాలం ఆటపై తనదైన ముద్ర వేసి పలు రికార్డులతో కెరీర్‌ గ్రాఫ్‌ను ఆకాశాన నిలిపి ‘ఆల్‌టైమ్‌ గ్రేట్‌’ అనిపించుకున్న ఈ జర్మన్‌  స్టార్‌ సాధించిన ఘనతలెన్నో!  1999లో స్టెఫీగ్రాఫ్‌ ఆటకు గుడ్‌బై చెప్పినప్పుడు టెన్నిస్‌ ప్రపంచం ఆశ్చర్యంగా చూసింది. అప్పుడు ఆమెకు 30 ఏళ్లే! అప్పటి ఆమె ఫిట్‌నెస్‌ స్థాయి, ఆటపరంగా చూస్తే అదేమీ పెద్ద వయసు కాదు. పైగా అంతకు రెండు నెలల క్రితమే ప్రతిష్ఠాత్మక గ్రాండ్‌స్లామ్‌ టోర్నీ ఫ్రెంచ్‌ ఓపెన్‌లో ఆమె విజేతగా నిలిచింది. 19 ఏళ్ల వయసులో ఉత్సాహంగా చెలరేగుతున్న మార్టినా హింగిస్‌ను ఫైనల్లో ఓడించి మరీ టైటిల్‌ చేజిక్కించుకుంది. అనంతరం వింబుల్డన్‌ లోనూ ఫైనల్‌ చేరింది. మరికొన్నాళ్లు కొనసాగి ఉంటే మరింత ఘనత ఆమె ఖాతాలోకి చేరేదేమో! అయితే తాను అనుకున్న సమయంలో అనుకున్న తరహాలో ఆటను ముగించింది స్టెఫీ. ‘టెన్నిస్‌లో నేను సాధించాల్సిందంతా సాధించేశాను. ఇంకా ఏం మిగిలి లేదు. ఆటను ఇంకా ఆస్వాదించలేకపోతున్నాను. గతంలో ఉన్న ప్రేరణ కూడా కనిపించడం లేదు. మైదానంలోకి దిగుతున్నప్పుడు ఒక టోర్నీలో ఆడుతున్న భావనే రావడం లేదు’ అని ప్రకటించింది. నిజమే.. ఆమె కొత్తగా తనను తాను నిరూపించుకోవాల్సిందేమీ లేదు. ఎందుకంటే టెన్నిస్‌ ప్రపంచాన్ని ఏలిన స్టెఫీ కెరీర్‌ గ్రాఫ్‌ను చూస్తే అంతా అద్భుతమే కనిపిస్తుంది.  సీనియర్లను దాటి.. స్టెఫీ కెరీర్‌లో పెద్దగా ఒడిదుడుకుల్లేవ్‌. ఆరంభంలో సహజంగానే వచ్చే కొన్ని అడ్డంకులను దాటిన తర్వాత విజయప్రస్థానం మొదలైంది. ఆ తర్వాత ఆమెకు ఎదురు లేకుండా పోయింది. 13 ఏళ్ల వయసులో తొలి ప్రొఫెషనల్‌ టోర్నీ ఆడినప్పుడు ఆమె ప్రపంచ ర్యాంక్‌ 124. అయితే స్టెఫీ తండ్రి, తొలి కోచ్‌ పీటర్‌ గ్రాఫ్‌ ర్యాంకులను పట్టించుకోవాల్సిన అవసరం లేదని చెప్పేశాడు. తర్వాతి రెండేళ్లు ఒక్క టైటిల్‌ కూడా గెలవకపోయినా ఆట మెరుగుపర్చుకోవడంపైనే ఆమె దృష్టి పెట్టింది. అదే ఆమెకు ప్రత్యేక గుర్తింపును తెచ్చింది. 1985 వచ్చే సరికి నాటి దిగ్గజాలు మార్టినా నవత్రిలోవా, క్రిస్‌ ఎవర్ట్‌ల కెరీర్‌ చరమాంకంలో ఉంది. వీరిద్దరి తర్వాత ఎవరు అంటూ చర్చ మొదలైన సమయంలో అందరికంటే ముందుగా వినిపించిన పేరు స్టెఫీగ్రాఫ్‌దే. 1986 ఫ్యామిలీ సర్కిల్‌ కప్‌ ఫైనల్లో ఎవర్ట్‌నే ఓడించి తొలి డబ్ల్యూటీఏ టైటిల్‌ గెలుచుకోవడంతో కొత్త శకం మొదలైంది. ఆ తర్వాత కొద్ది రోజులకే మయామీ ఓపెన్‌ లో క్రిస్‌ ఎవర్ట్‌తో పాటు మార్టినా నవ్రతిలోవాపై కూడా విజయం సాధించడంతో ఇక కొత్త టెన్నిస్‌ రాణి ఎవరనే ప్రశ్నకు సమాధానం లభించింది.  22లో మొదటిది.. ఒకే ఏడాది ఎనిమిది డబ్ల్యూటీఏ టైటిల్స్‌తో మహిళల టెన్నిస్‌లో స్టెఫీ గ్రాఫ్‌ ఆధిపత్యం మొదలైంది. అయితే అసలు ఆటలోకి ఆమె ఇంకా అడుగు పెట్టలేదు. అదే గ్రాండ్‌స్లామ్‌ విజయం. ఎన్ని ట్రోఫీలు అందుకున్నా, గ్రాండ్‌స్లామ్‌ టైటిల్‌ అందుకోకపోతే వాటికి లెక్క లేదనేది స్టెఫీకి బాగా తెలుసు. ఆ చిరస్మరణీయ క్షణం 1987లో వచ్చింది. ఆ ఏడాది అప్పటికే ఆరు టోర్నీలు గెలిచి అమితోత్సాహంతో ఉన్న గ్రాఫ్‌కు ఫ్రెంచ్‌ ఓపెన్‌లో ఎదురు లేకుండా పోయింది. హోరాహోరీగా సాగిన ఫైనల్లో మార్టినా నవ్రతిలోవాను 6–4, 4–6, 8–6తో ఓడించి తొలి గ్రాండ్‌స్లామ్‌ను స్టెఫీ ముద్దాడింది. పశ్చిమ జర్మనీలో టెన్నిస్‌ క్రీడపై ఆసక్తి పెరిగి, ప్రధాన క్రీడల్లో ఒకటిగా ఎదిగేందుకు ఈ విజయం కారణంగా నిలిచిందని అప్పటి మీడియా స్టెఫీ ఘనతను ప్రశంసించింది. అదే సంవత్సరం ఆగస్టు 17న తొలిసారి వరల్డ్‌ నంబర్‌వన్‌ గా మారిన ఘనత.. మొత్తంగా 1302 రోజుల పాటు దిగ్విజయంగా సాగింది.  ఆల్‌టైమ్‌ గ్రేట్‌గా.. స్టెఫీని అందరికంటే ప్రత్యేకంగా నిలబెట్టిన ఏడాది 1988. హార్డ్‌ కోర్టు, క్లే, గ్రాస్‌.. ఇలా మూడు రకాల కోర్ట్స్‌లో చెలరేగిపోతున్న స్టెఫీ సామర్థ్యం ప్రపంచానికి తెలిసిపోయింది. ఇక ఏ టోర్నీ కోసం బరిలోకి దిగినా ఆమెదే విజయం అన్నట్లుగా మారిపోయింది. ఒక క్యాలెండర్‌ ఇయర్‌లో నాలుగు గ్రాండ్‌స్లామ్‌లు గెలిస్తే అదో గొప్ప ఘనతగా భావించే సమయమది. అప్పటికి టెన్నిస్‌ చరిత్రలో నలుగురు మాత్రమే దీనిని అందుకున్నారు. పురుషుల విభాగంలో డాన్‌ బడ్జ్, రాడ్‌ లేవర్‌ (రెండు సార్లు), మహిళల విభాగంలో మౌరీన్‌ కనోలీ, మార్గరెట్‌ కోర్ట్‌లకు మాత్రమే ఇది సాధ్యమైంది. ఇందులో ఆఖరిది 1970లో వచ్చింది. మారిన టెన్నిస్, పెరిగిన పోటీ నేపథ్యంలో ఎవరూ అంత నిలకడగా అన్ని గ్రాండ్‌స్లామ్‌లలో గెలవలేని పరిస్థితి. అయితే స్టెఫీ మాత్రం తానేంటో చూపించింది. ఆస్ట్రేలియన్, ఫ్రెంచ్, వింబుల్డన్, యూఎస్‌ ఓపెన్‌ లు గెలిచి ఐదో ప్లేయర్‌గా తన పేరు ముద్రించుకుంది. అంతకు ముందు మరో అరుదైన ఘనతతో ఉన్నత స్థానంలో నిలిచింది స్టెఫీ. అదే ఒలింపిక్స్‌ స్వర్ణపతకం. సియోల్‌ ఒలింపిక్స్‌ ఫైనల్లో తన చిరకాల ప్రత్యర్థి గాబ్రియెలా సబటిని (అర్జెంటీనా)ని ఓడించి ‘గోల్డెన్‌ స్లామ్‌’ అనే నామకరణానికి తాను కారణమైంది. ఇప్పటికీ 34 ఏళ్లు ముగిసినా మరెవరికీ అది సాధ్యం కాలేదంటే స్టెఫీ ప్రతిభ ఎంతటిదో అర్థమవుతోంది.  మరో దిగ్గజంతో జత కట్టి.. 1999 ఫ్రెంచ్‌ ఓపెన్‌ .. మహిళల విభాగంలో స్టెఫీ విజేత కాగా, మరో వైపు పురుషుల సింగిల్స్‌లో అమెరికన్‌ స్టార్‌ ఆండ్రీ అగస్సీ చాంపియన్‌ . టైటిల్‌ గెలిచిన తర్వాత ఆటగాళ్లకు ఇచ్చే ‘డిన్నర్‌’లో ఇద్దరూ కలిశారు. స్టెఫీకి అది చివరి గ్రాండ్‌స్లామ్‌ (22వది) కాగా, అగస్సీకి నాలుగోది మాత్రమే. సర్క్యూట్‌లో పరిచయం ఉంది. అప్పటికే దిగ్గజంగా గుర్తింపు తెచ్చుకున్న స్టెఫీ అంటే గౌరవం కూడా ఉంది అతనికి. కానీ ఈ సారి మాత్రం కాస్త మనసు విప్పి మాట్లాడుకున్నారు. దాంతో స్నేహం కాస్త బలపడింది. టెన్నిస్‌ జగత్తులో ఇద్దరు స్టార్ల మధ్య అనుబంధం అంత సులువు కాదు. అహం, ఆర్జన వంటివి తోడుగా వస్తాయి. కానీ వీరిద్దరి మధ్య ప్రేమ బంధంగా మారింది. రెండేళ్ల డేటింగ్‌ తర్వాత స్టెఫీ, అగస్సీ పెళ్లి చేసుకున్నారు. చివరకు ఎనిమిది గ్రాండ్‌స్లామ్‌లతో అగస్సీ ఆట ముగించాడు. వీరికి ఇద్దరు పిల్లలు. జర్మనీని వదిలి యూఎస్‌లో ఆమె స్థిరనివాసం ఏర్పరచుకుంది.  స్టెఫీగ్రాఫ్‌ విజయాల్లో  కొన్ని..      22 గ్రాండ్‌స్లామ్‌ల విజేత (7 వింబుల్డన్‌, 6 ఫ్రెంచ్‌ ఓపెన్, 5 యూఎస్‌ ఓపెన్, 4 ఆస్ట్రేలియన్‌ ఓపెన్‌ ). ఓపెన్‌ ఎరాలో అత్యధిక గ్రాండ్‌స్లామ్స్‌ గెలిచిన                     జాబితాలో రెండో స్థానం.       కెరీర్‌లో మొత్తం సింగిల్స్‌ టైటిల్స్‌ సంఖ్య: 107 (ఓవరాల్‌గా అత్యధిక టైటిల్స్‌ జాబితాలో మూడో స్థానం)      ప్రతి గ్రాండ్‌స్లామ్‌ను కనీసం 4 సార్లు గెలిచిన ఏకైక ప్లేయర్‌       వరల్డ్‌ నంబర్‌వన్‌ గా అత్యధిక వారాల (377) పాటు సాగిన ఘనత. (ఇందులో వరుసగా 186 వారాల రికార్డు)       ఇంటర్నేషనల్‌ హాల్‌ ఆఫ్‌ ఫేమ్‌లో చోటు    

మెల్‌బోర్న్‌: భారత వెటరన్‌ టెన్నిస్‌ స్టార్‌ సానియా మీర్జా ఫిబ్రవరిలో జరిగే దుబాయ్‌ ఓపెన్‌ తర్వాత రిటైర్‌ అవుతున్నట్లు ప్రకటించింది. ఈ మేరకు ఆమె ట్విట్టర్‌లో భావోద్వేగపు లేఖను ‘లైఫ్‌ అప్‌డేట్‌’ అనే క్యాప్షన్‌తో పంచుకుంది. మూడు పేజీల ఈ లేఖలో తన 30 ఏళ్ల రాకెట్‌ పయనాన్ని, చివరి గమ్యాన్ని వివరించింది. ‘నా గ్రాండ్‌స్లామ్‌ ప్రయాణం 2005లో ఆ్రస్టేలియన్‌ ఓపెన్‌తోనే మొదలైంది. ఇప్పుడు గ్రాండ్‌స్లామ్‌ ఆట కూడా అక్కడే ముగించేందుకు సరైన వేదిక అనుకుంటున్నా. 18 ఏళ్ల క్రితం ఎక్కడైతే ఆరంభించానో అక్కడే ఆపేయబోతున్నా. ఇక కెరీర్‌లో చివరి టోర్నీ మాత్రం దుబాయ్‌ ఓపెన్‌. ఫిబ్రవరిలో ఈ టోరీ్నతో సుదీర్ఘ కెరీర్‌కు వీడ్కోలు పలుకుతాను. ఇన్నేళ్ల పయనంలో ఎన్నో ఆటుపోట్లే కాదు మరెన్నో మధురస్మృతులూ ఉన్నాయి’ అని అందులో పేర్కొంది. నాసర్‌ స్కూల్‌కు చెందిన ఆరేళ్ల బాలిక ఎలా టెన్నిస్‌ నేర్చుకుంది... తన కలలకు ఎక్కడ బీజం పడింది... అన్నింటికీ మించి దేశానికి ప్రాతినిధ్యం ఎలాంటి స్ఫూర్తినిచ్చిందో ఆ లేఖలో చెప్పుకొచ్చింది. అర్ధ సెంచరీని దాటిన తన గ్రాండ్‌స్లామ్‌ టోరీ్నల్లో గెలిచిన కొన్ని టైటిళ్లు దేవుడిచ్చిన వరమంది. ‘నా సుదీర్ఘ కెరీర్‌లో దేశానికి పతకాలు తేవడమే అతిపెద్ద గౌరవంగా భావిస్తాను. పతకం నా మెడలో పడినపుడు జాతీయ పతాకం రెపరెపలాడినపుడు కలిగే ఆనందం అన్నింటికి మించి ఉంటుంది. ఇప్పుడు దీన్ని తలచుకొని రిటైర్మెంట్‌ సందేశం రాస్తున్నప్పుడు చెరిగిపోని ఆ అనుభూతి నా కళ్లను చెమరుస్తోంది’ అని 36 ఏళ్ల సానియా పేర్కొంది.    ఇదిలా ఉంటే, మహిళల డబుల్స్‌లో మాజీ నెంబర్‌ వన్‌ అయిన 36 ఏళ్ల  సానియా మీర్జా.. డబుల్స్‌ విభాగంలో ఆస్ట్రేలియన్‌ ఓపెన్‌, వింబుల్డన్‌, యూఎస్‌ ఓపెన్‌ టైటిళ్లను, అలాగే మిక్స్‌డ్‌ డబుల్స్‌ విభాగంలో ఆస్ట్రేలియన్‌ ఓపెన్‌, ఫ్రెంచ్‌ ఓపెన్‌, యూఎస్‌ ఓపెన్‌ టైటిల్స్‌ను గెలిచింది. 2016 రియో ఒలింపిక్స్‌లో మిక్స్‌డ్‌ డబుల్స్‌లో సెమీఫైనల్లో ఓడిన సానియా జంట తృటిలో పతకం చేజార్చుకుంది. Life update :) pic.twitter.com/bZhM89GXga — Sania Mirza (@MirzaSania) January 13, 2023

అడిలైడ్‌: గత ఏడాది ఒక్క టైటిల్‌ నెగ్గలేకపోయిన బెలారస్‌ టెన్నిస్‌ స్టార్, ప్రపంచ ఐదో ర్యాంకర్‌ సబలెంకా ఈ సంవత్సరాన్ని టైటిల్‌తో ప్రారంభించింది. ఆదివారం ముగిసిన అడిలైడ్‌ ఇంటర్నేషనల్‌–1 ఓపెన్‌ డబ్ల్యూటీఏ–500 టోర్నీలో ఆమె విజేతగా నిలిచింది. ఫైనల్లో సబలెంకా 6–2, 7–6 (7/4)తో క్వాలిఫయర్‌ లిండా నొస్కోవా (చెక్‌ రిపబ్లిక్‌)పై గెలిచింది. ఈ టోర్నీలో సబలెంకా ప్రత్యర్థులకు ఒక్క సెట్‌ కూడా కోల్పోకపోవడం విశేషం. సబలెంకా కెరీర్‌లో ఇది 11వ టైటిల్‌కాగా... ఆమెకు 1,20,150 డాలర్ల ప్రైజ్‌మనీ (రూ. 98 లక్షల 92 వేలు)తోపాటు 470 ర్యాంకింగ్‌ పాయింట్లు లభించాయి.       

మెల్‌బోర్న్‌: టెన్నిస్‌ సీజన్‌ తొలి గ్రాండ్‌స్లామ్‌ టోర్నమెంట్‌ ఆస్ట్రేలియన్‌ ఓపెన్‌కు మరో దెబ్బ పడింది. ఇప్పటికే పురుషుల సింగిల్స్‌లో ప్రపంచ నంబర్‌వన్, 2022 యూఎస్‌ ఓపెన్‌ చాంపియన్‌ కార్లోస్‌ అల్‌కరాజ్‌ (స్పెయిన్‌)... మహిళల సింగిల్స్‌లో మాజీ నంబర్‌వన్‌ సిమోనా హలెప్‌ (రొమేనియా) వైదొలగగా.. ఈ జాబితాలో తాజాగా రెండుసార్లు ఆస్ట్రేలియన్‌ ఓపెన్‌ చాంపియన్, ప్రపంచ మాజీ నంబర్‌వన్‌ నయోమి ఒసాకా చేరింది. జపాన్‌కు చెందిన 25 ఏళ్ల ఒసాకా ఈ ఏడాది ఆస్ట్రేలియన్‌ ఓపెన్‌లో బరిలోకి దిగడంలేదని నిర్వాహకులు ఆదివారం ప్రకటించారు. అయితే ఒసాకా వైదొలగడానికి కారణం మాత్రం వారు వెల్లడించలేదు. 2019, 2021లలో ఆస్ట్రేలియన్‌ ఓపెన్‌ టైటిల్‌ నెగ్గిన ఒసాకా గత ఏడాది సెప్టెంబర్‌ నుంచి ఏ టోర్నీలోనూ ఆడలేదు. ప్రస్తుతం ఆమె 42వ ర్యాంక్‌కు పడిపోయింది. 2018, 2020 యూఎస్‌ ఓపెన్‌ గ్రాండ్‌స్లామ్‌ టోర్నీల్లోనూ విజేతగా నిలిచిన ఒసాకా 2021 ఫ్రెంచ్‌ ఓపెన్‌ మధ్యలో వైదొలిగింది. ఆ తర్వాత తాను మానసిక ఒత్తిడితో సతమతమవుతున్నానని తెలిపి రెండునెలలపాటు ఆట నుంచి విరామం తీసుకుంది. ఆ తర్వాత పలు టోర్నీలలో ఆమె బరిలోకి దిగినా టైటిల్‌ మాత్రం సాధించలేకపోయింది.    

టెక్సాస్‌: మహిళల టెన్నిస్‌ సంఘం (డబ్ల్యూటీఏ) సీజన్‌ ముగింపు టోర్నీ డబ్ల్యూటీఏ ఫైనల్స్‌లో ఫ్రాన్స్‌ క్రీడాకారిణి కరోలినా గార్సియా చాంపియన్‌గా అవతరించింది. మంగళవారం జరిగిన ఫైనల్లో ప్రపంచ ఆరో ర్యాంకర్‌ గార్సియా 7–6 (7/4), 6–4తో ప్రపంచ ఏడో ర్యాంకర్‌ సబలెంకా (బెలారస్‌)పై గెలిచింది. తద్వారా ఈ మెగా టోర్నీ చరిత్రలో అమెలీ మౌరెస్మో (2005లో) తర్వాత సింగిల్స్‌ టైటిల్‌ గెలిచిన రెండో ఫ్రాన్స్‌ క్రీడాకారిణిగా గార్సియా గుర్తింపు పొందింది. విజేతగా నిలిచిన గార్సియాకు 15 లక్షల 70 వేల డాలర్ల (రూ. 12 కోట్ల 76 లక్షలు) ప్రైజ్‌మనీతోపాటు 1,375 ర్యాంకింగ్‌ పాయింట్లు లభించాయి. తాజా విజయంతో గార్సియా, సబలెంకా డబ్ల్యూటీఏ ర్యాంకింగ్స్‌లో రెండు స్థానాల చొప్పున మెరుగుపర్చుకొని వరుసగా నాలుగు, ఐదు ర్యాంక్‌ల్లో నిలిచారు.

క్రీడలు.. జీవనతత్వాన్ని బోధిస్తాయి.. దీన్ని గ్రహించినవారు ఓటమికి కుంగిపోరు..  గెలుపుకి పొంగిపోరు!  అసలు గెలుపోటములనేవే లేవని.. ఎదురొడ్డి పోరాడడమే  ముఖ్యమని విశ్వసిస్తారు! ఆటల స్ఫూర్తిని బతుకు పోరుకు అన్వయించుకుని ఇటు జీవితంలో కానీ.. అటు మైదానంలో కానీ నిలబడ్డమే అచీవ్‌మెంట్‌గా భావిస్తారు..  అచీవర్స్‌గా మిగులుతారు!  వాళ్లను పరిచయం చేసేదే  ఈ కాలమ్‌! ఈ వారం..   సెరీనా విలియమ్స్‌ ఉరికే జలపాతాన్ని.. ఉత్తుంగ తరంగాన్ని టెన్నిస్‌ కోర్ట్‌లో చూస్తున్నారంటే..  ఆ క్రీడ సెరీనా విలియమ్స్‌దే!  మణికట్టు బలానికి.. చురుకైన కదలికలకు సినినమ్‌ సెరీనానే!! అమ్మ కడుపులోంచి ఆట భుజమ్మీద చేయ్యేసే భూమ్మీదకు వచ్చింది! నాన్న వేలు పట్టుకుని ప్లే గ్రౌండ్‌కే తొలి అడుగులు వేసింది! తాను కలలు కన్నది.. ఊహించిందీ టెన్నిస్‌ ప్రపంచాన్నే!  అంతెందుకు ఆమె ఉచ్ఛ్వశించింది.. నిశ్వసించిందీ టెన్నిస్‌నే! అలాంటి ఆటకు సెరీనా సెండాఫ్‌ ఇచ్చింది! ఊపిరి ఆగినంత పనయ్యుండదూ..!  ఆమె చేతిలో దర్జా ఒలకబోసిన రాకెట్‌ తన మనసును రాయి చేసుకుని ఉంటుంది!! ఆమె పాదాల లాఘవానికి ఆసరాగా నిలిచిన మైదానాలు బలహీనపడి ఉంటాయి!! స్టేడియం గ్యాలరీలు నిస్తేజమయ్యుంటాయి!!   సెరీనాకు తొమ్మిదేళ్లున్నప్పుడు ‘నీ ఆట ఎలా ఉండాలనుకుంటున్నావ్‌?’ అని అడిగారు.  ‘ఇతరులకు స్ఫూర్తిగా ఉండాలనుకుంటున్నా’ అని చెప్పింది తొణక్కుండా బెణక్కుండా! చెప్పినట్టుగానే ప్రత్యర్థి ఎంతటి ఘటికులైనా సరే.. తన గెలుపునే ఎయిమ్‌గా సర్వీస్‌ చేసింది. ఆ బ్లాక్‌ పాంథర్‌.. కాలిఫోర్నియా, కాంప్టన్‌లో తన టెన్నిస్‌ ప్రస్థానాన్ని ప్రారంభించింది. 2022 సెప్టెంబర్‌ 2.. యూఎస్‌ ఓపెన్‌ టోర్నమెంట్‌తో ముగించేసింది. అక్క వీనస్‌ విలియమ్స్‌ ఇంకా ఆడుతుండగానే తాను నిష్క్రమించింది.  ‘రిటైర్మెంట్‌ పదం అంటేనే నాకు నచ్చేది కాదు. అదేదో మాట్లాడకూడని విషయంగా అనిపించేది. నా భర్తతో, అమ్మానాన్నతో కూడా  దీని గురించి చర్చించలేదు ఎప్పుడూ! చాలామందికి రిటైర్మెంట్‌ ఒక ఆహ్లాదకరమైన విషయం కావచ్చు. నేనూ అంత తేలికగా తీసుకోగలిగితే ఎంత బావుండు అనిపించింది. ఒక ప్రవాహం నుంచి ఇంకో ప్రవాహానికి మళ్లుతున్న నేను.. అత్యంత ఉద్వేగభరితమైన  క్షణాన్ని ఎదుర్కొనే టైమ్‌ వచ్చినప్పుడు ఏడుపు ఆగలేదు. చెప్పలేనంత బాధ. ఇప్పటి వరకు నా జీవితంలో టెన్నిస్‌ తప్ప ఇంకోటి లేదు. రిటైర్మెంట్‌ ప్రకటనప్పుడు ఒంటరిగా వెళ్లేందుకు ధైర్యం చాల్లేదు. తోడుగా నా థెరపిస్ట్‌ను తీసుకెళ్లాను. రిటైర్మెంట్‌ను ప్రకటిస్తున్నప్పుడు గొంతులో ఏదో అడ్డుపడ్డట్టే అనిపించింది. కుప్పకూలిపోయాను. ఇలాంటి మలుపులో వచ్చి ఆగుతానని అనుకోలేదు. నా మూడో ఏటనే టెన్నిస్‌ బ్యాట్‌ను పట్టుకున్నానని మా నాన్న చెప్తూంటాడు. నాకు ఏడాదిన్నరప్పుడు మా అక్క (వీనస్‌) టెన్నిస్‌ కోర్ట్‌లో నన్ను తొట్టెలో తోసుకుంటూ వెళ్తున్న ఫొటో ఇప్పటికీ నా దగ్గర భద్రంగా ఉంది. నేను పర్‌ఫెక్షనిస్ట్‌ని. చిన్నప్పుడు నాకు ‘ఎ’ రాయడం రాకపోతే రాత్రంతా మేల్కొని దాన్ని దిద్దుతూనే ఉన్నా! ఏ పనినైనా కరెక్ట్‌గా నేర్చుకునే వరకు.. పర్‌ఫెక్ట్‌గా వచ్చేవరకు వదిలిపెట్టను. ఆటకు సంబంధించి కూడా అంతే! నా శక్తిసామర్థ్యాలపై అపనమ్మకం ఉన్నవారికి వారి అభిప్రాయం తప్పు అని నిరూపించేందుకు మరింత ఉగ్రంగా ఆడాను. అవతల నుంచి వచ్చే నెగిటివిటీని నా బలంగా మార్చుకున్నాను. ఇప్పుడు టెన్నిస్‌కు ఆవల నేనేంటో తెలుసుకోవడానికి..నన్ను నేను ఆవిష్కరించుకోవడానికి ప్రయత్నిస్తున్నాను’ అని చెప్పింది సెరీనా ఒక ఇంటర్వ్యూలో! రిటైర్మెంట్‌ అవసరం ఎందుకు వచ్చింది?  సెరీనా తన ఐదేళ్ల కూతురు ఒలింపియాతో కార్‌లో వెళ్తోంది. అమ్మ ఫోన్‌తో ఆటలాడుకుంటోంది పాప. ‘పెద్దయ్యాక ఏమవుతావు’ అని ఫోన్‌లోని రోబో ప్రశ్న. అమ్మ వినకుండా గుసగుసగా చెప్తోంది ఒలింపియా, ‘నేను ఒక చిన్న చెల్లికి అక్కని అవుతా’ అని. ఆ మాట అమ్మ చెవిన పడనే పడింది. అంతేకాదు ఒలింపియా రోజూ దేవుడి ముందు తనకో చిన్ని చెల్లినివ్వమని వేడుకునే వేడుకోలూ ఆ అమ్మ కంట పడుతూనే ఉంది. ఐదుగురు అక్కల మధ్య పెరిగిన సెరీనాకి ఆ అనుబంధం అంటే ఏంటో బాగా తెలుసు. ఆ బలాన్ని ఒలింపియాకు ఇవ్వాలనుకుంది. ఇంకో బిడ్డకు జన్మనిచ్చే సమయం ఆసన్నమైందని అర్థమైంది. అయినా టెన్నిస్‌ను వీడాలా అనే సందేహం! ‘టెన్నిస్‌.. కుటుంబం.. ఈ రెండింటిలో ఏది ఎంచుకోవాలి?’ అనే డైలమా! తను స్త్రీ కాబట్టే ఈ సందిగ్ధతా? మగవాళ్లకు ఉంటుందా?  కుటుంబమా? కెరీరా అనే గుంజాటనపడే ఆగత్యం ఎదురవుతుందా? అతని అవసరాలు, ఇంటి అవసరాలు చూడ్డానికి, పిల్లల్ని పెంచడానికి భార్య ఉంటుంది. అన్నీ తానై భర్తకు అండగా నిలబడుతుంది. అతని గెలుపు కోసం తను శ్రమిస్తుంది.. ప్రోత్సహిస్తుంది. అలాగని నేను మహిళనైనందుకు చింతించట్లేదు. ప్రతికూల పరిస్థితులనూ అవకాశాలుగా మలచుకోగల సత్తా ఉన్న మహిళగా నిలబడినందుకు గర్విస్తున్నాను.  సో.. కుటుంబాన్ని పెంచుకోవడం కోసం ఆటను వదులు కోవాలి.. కుటుంబం గురించి ఓ నిర్ణయం తీసుకోవాలసిన సమయమిది. కాబట్టి టెన్నిస్‌కు దూరం కాక తప్పదు.. దూరమవ్వాల్సిందే’ అని నిశ్చయించుకుంది. అలా  రిటైర్మెంట్‌ నిర్ణయాన్ని తీసేసుకుంది సెరీనా.  ఎంటర్‌ప్రెన్యూర్‌ సెరీనా  కొన్నేళ్ల కిందట సెరీనా వెంచర్స్‌ అనే క్యాపిటల్‌ ఫర్మ్‌ను ఆంభించింది. 40 ఏళ్లు దాటిన మహిళలను పక్కన పెట్టేస్తుంది మార్కెట్‌. కానీ సెరీనా వెంచర్స్‌ మాత్రం వయసుతో నిమిత్తం లేకుండా కేవలం మహిళా సాధికారత కోసమే పనిచేస్తోంది. ఒక ఆలోచనను కాని, డబ్బును కాని సెరీనా వెంచర్స్‌లో పెడితే దాన్ని ఒక ఉత్పత్తి కిందకు మారుస్తామని హామీ ఇస్తోంది ఆ ఫర్మ్‌. వోగ్‌కు ఇచ్చిన ఓ ఇంటర్వ్యూలో వ్యాపారవేత్తగా తన పాత్రను చక్కగా వివరించారు సెరీనా. తాను ఒక స్పాంజ్‌ వంటి దాన్నని.. రాత్రి పడుకునే ముందు అప్పటిదాకా ఉన్న ఒత్తిడిని పిండి.. ఉదయానికి కొత్త ఉత్సాహంతో నిద్రలేస్తానని చెప్తుంది.  ఈ  టెన్నిస్‌ లెజెండ్‌..  ఫ్యాషన్, స్టైల్‌ ఐకాన్‌ మాత్రమే కాదు మంచి ఇన్వెస్టర్‌ కూడా. నైజీరియన్‌ డాటా, ఇంటెలిజెన్స్‌ స్టార్టప్, ‘స్టియర్‌’లో 3.3 మిలియన్‌ డాలర్లు పెట్టుబడులు పెట్టడానికి సిద్ధంగా ఉంది. తన సెరీనా వెంచర్స్‌ కాకుండా వివిధ స్టార్టప్‌లలో, ముఖ్యంగా మహిళలు, నల్ల జాతీయుల అభివృద్ధికి పాటుపడే రంగాల్లో పెట్టుబడులు పెడుతోంది. ఇలా సెరీనా.. తన విజయాన్ని ఇతర మహిళల జీవితాలను మార్చడానికి వినియోగిస్తూ  స్త్రీ, పురుషులనే భేదం లేకుండా అందరికీ స్ఫూర్తిగా నిలిచింది.  – శ్రీదేవి కవికొండల హ్యాంగవుట్‌ ‘పికిల్‌ బాల్‌ ఆట రానురాను మరింత ప్రాభవం సంపాదించుకుంటోంది. ఆ ఆట అంటే నాకు ఇష్టం. ఆడుతుంటే చాలా సరదాగా ఉంటుంది. ఏమో ఇది నా సెకండ్‌ కెరీర్‌ అవొచ్చేమో!’ అంటుంది సెరీనా!  రిటైర్మెంట్‌ తర్వాత కొత్త ఉత్సాహంతో కనిపిస్తోంది ఆమె. మెక్సికోలో తన మేనకోడలి బ్యాచిలరేట్‌ పార్టీకి హాజరు అయి తానే కాబోయే పెళ్లికూతురు అన్నంతగా ఎంజాయ్‌ చేసింది. టీకప్పు పాటలతో క్యాంప్‌ ఫైర్‌ దగ్గర సెరీనా విలియమ్స్‌ ఆడిపాడిన వీడియో వైరల్‌ అయింది.  సెరీనా జంతు ప్రేమికురాలు. ‘నాకు ఎవరైనా  కుక్కపిల్లను బహుమతిగా ఇస్తే హ్యాపీగా ఫీలవుతా. పిల్లి పిల్లలంటే కూడా ఇష్టమే కానీ పిల్లులంటే భయం. జుట్టు ఎక్కువ రాల్చని పెద్ద కుక్క ఏదైనా ఉంటే చెప్తారా’ అని ఇన్‌స్టాగ్రామ్‌లో అభిమానులను అడుగుతోంది సెరీనా.  సెరీనా కోట్స్‌... విజయవంతమైన ప్రతి మహిళ ఇంకొకరికి స్ఫూర్తి. మనం ఒకరికొరకం పైకి ఎదగడానికి సహాయం చేసుకోవాలి. సిస్టర్‌హుడ్‌ను పెంపొందించుకోవాలి. ధైర్యంగా, దృఢంగా, ఎంత సాధించినా ఒదిగి ఉండాలి. వయసు అనేది మైండ్‌సెట్‌ మాత్రమే.  చనిపోయేవరకు పని చేస్తూనే ఉండు.. పోరాడుతూనే ఉండు. నువ్వు ఎవరైనా, ఎలా ఉన్నా నిన్ను నువ్వు ప్రేమించుకో.. ఇతరులను ఎప్పుడూ ప్రోత్సహిస్తూనే ఉండు!! 1995లో ప్రొఫెషనల్‌గా బరిలోకి దిగిన సెరీనా 1999 యూఎస్‌ ఓపెన్‌లో మొదటి సింగిల్స్‌ గెలిచింది. 23 సింగిల్స్‌ గెలిచి ప్రపంచంలో నంబర్‌ వన్‌గా నిలిచింది.  అక్క వీనస్‌తో కలసి 14 డబుల్స్‌ గెలిచింది. ప్రపంచంలో డబుల్స్‌ నెంబర్‌ 1గా నిలిచారు ఆ అక్కాచెల్లెళ్లు. ఆటలో వాళ్లను కొట్టేవారే లేరు.   ఒలింపిక్స్‌లో నాలుగు స్వర్ణాలు సాధించిన సెరీనా.. గెలిచినా, ఓడినా తన ఆటపై ఆమెకు బోలెడు ప్రేమ, నమ్మకం ఉంటాయి. 2017లో ఆమె ఆటను విమర్శించిన జర్నలిస్టుతో క్షమాపణలు చెప్పాలని డిమాండ్‌ చేసింది. మహిళల్లో అందరి కంటే గొప్ప ప్లేయర్‌ ఎవరు అంటే సెరీనా విలియమ్స్‌ అని బల్లగుద్ది చెప్పవచ్చు. 2017 ఆస్ట్రేలియన్‌ ఓపెన్‌ గెలిచినప్పుడు ఆమె రెండు నెలల గర్భవతి. ప్రసవం తర్వాత ఆరోగ్య సమస్యలతో గ్యాప్‌ తీసుకుని తిరిగి వచ్చినా హ్యామ్‌ స్ట్రింగ్‌ దెబ్బ తినడంతో 2022 ఆస్ట్రేలియన్‌ ఓపెన్‌ నుంచి విత్‌డ్రా కావలసి వచ్చింది. ఆఖరి ఆటలో కూడా సెరీనా అపజయాన్ని పొందింది.  2002 ఫ్రెంచ్‌ ఓపెన్‌ నుంచి 2003 ఆస్ట్రేలియన్‌ ఓపెన్‌ వరకు ముఖ్యమైన నాలుగు సింగిల్స్‌ గెలుచుకుంది. తర్వాత గాయాల వలన కొంచెం జోరు తగ్గినా 2012లో వింబుల్డన్‌ చాంపియన్‌షిప్‌తో మళ్లీ ఫామ్‌లోకి వచ్చింది.   2016, 2017 సంవత్సరాల్లో ప్రపంచంలోనే అత్యధిక పారితోషికం తీసుకున్న వందమంది ఫోర్బ్స్‌ జాబితాలో ఏకైక మహిళగా నిలిచింది సెరీనా.  ‘నేను బిలియనీర్‌ని అయినా కూడా నన్ను ప్రజలు సెరీనా భర్తగానే గుర్తిస్తారు’ అంటూ ఆమె భర్త జోక్‌ చేస్తుంటాడు.. భార్య ఘనతకు మురిసి పోతుంటాడు.  మహిళల్లో అందరి కంటే గొప్ప ప్లేయర్‌ ఎవరు అంటే సెరీనా విలియమ్స్‌ అని బల్లగుద్ది చెప్పవచ్చు. 2017 ఆస్ట్రేలియన్‌ ఓపెన్‌ గెలిచినప్పుడు ఆమె రెండు నెలల గర్భవతి. ప్రసవం తర్వాత ఆరోగ్య సమస్యలతో గ్యాప్‌ తీసుకుని తిరిగి వచ్చినా హ్యామ్‌ స్ట్రింగ్‌ దెబ్బ తినడంతో 2022 ఆస్ట్రేలియన్‌ ఓపెన్‌ నుంచి విత్‌డ్రా కావలసి వచ్చింది. ఆఖరి ఆటలో కూడా సెరీనా అపజయాన్ని పొందింది. 

అమెరికా నల్లకలువ, 23 గ్రాండ్‌స్లామ్‌ల విన్నర్‌ అయిన సెరెనా విలియమ్స్‌ సంచలన ప్రకటన చేసింది. ఈ ఏడాది ఆగస్ట్‌ 9న ప్రొఫెషనల్‌ టెన్నిస్‌కు వీడ్కోలు పలుకుతున్నట్లు ప్రకటించిన ఈ దిగ్గజ క్రీడాకారిణి.. తన రిటైర్మెంట్‌ నిర్ణయంపై యూ టర్న్‌ తీసుకోబోతున్నట్లు ప్రకటించి, అందరినీ ఆశ్చర్యపరిచింది. యూఎస్ ఓపెన్-2022లో తన చివరి మ్యాచ్‌ ఆడిన సెరెనా.. మళ్లీ రంగంలోకి దిగడం ఖాయం అంటూ తాజాగా వెల్లడించింది.  తన వ్యాపార ప్రమోషన్‌లో భాగంగా ఇటీవల నిర్వహించిన ఓ కార్యక్రమంలో సెరెనా మాట్లాడుతూ.. తాను రిటైర్ కాలేదని, ఆట నుంచి  తనను ఎవరూ దూరం చేయలేరని, ఇప్పటికీ తాను ఇంట్లో  ప్రాక్టీస్ చేస్తున్నానని రీఎంట్రీపై హింట్‌ ఇచ్చింది. వచ్చే ఏడాది (2023) ఆస్ట్రేలియన్‌ ఓపెన్‌లో పునరాగమనం చేయవచ్చని పరోక్ష సంకేతాలు పంపింది.  కాగా, యూఎస్‌ ఓపెన్‌-2022 మూడో రౌండ్‌లో నిష్క్రమించిన తర్వాత నిర్వాహకులు సెరెనాకు గ్రాండ్‌గా వీడ్కోలు పలికిన విషయం తెలిసిందే. సెరెనా తాజా నిర్ణయంతో అభిమానులతో పాటు నిర్వాహకులు సైతం అవాక్కవుతున్నారు. 41 ఏళ్ల సెరెనా విలియమ్స్‌ చివరిగా 2017 ఆస్ట్రేలియన్‌ ఓపెన్‌ టైటిల్‌ సాధించింది.  చదవండి: 'రిటైర్మెంట్‌ క్లబ్‌లోకి స్వాగతం.. ఫెడ్డీ'

చెన్నై ఓపెన్‌ డబ్ల్యూటీఏ–250 టెన్నిస్‌ టోర్నీలో భారత క్రీడాకారిణి కర్మన్‌కౌర్‌ థండి సంచలనం సృష్టించింది. సింగిల్స్‌ తొలి రౌండ్‌లో ప్రపంచ 359వ ర్యాంకర్‌ కర్మన్‌కౌర్‌ 4–6, 6–4, 6–3తో ప్రపంచ 109వ ర్యాంకర్, ఎనిమిదో సీడ్‌ చోల్‌ పాక్వె (ఫ్రాన్స్‌)ను ఓడించి ప్రిక్వార్టర్‌ ఫైనల్‌ చేరింది. 2 గంటల 35 నిమిషాలపాటు జరిగిన ఈ మ్యాచ్‌లో కర్మన్‌ నాలుగు ఏస్‌లు సంధించి, ప్రత్యర్థి సర్వీస్‌ను ఐదుసార్లు బ్రేక్‌ చేసింది. ప్రిక్వార్టర్‌ ఫైనల్లో 2014 వింబుల్డన్‌ రన్నరప్‌ యుజీన్‌ బుషార్డ్‌ (కెనడా)తో కర్మన్‌ ఆడుతుంది.    

న్యూయార్క్‌: తన విజయవంతమైన టెన్నిస్‌ కెరీర్‌కు త్వరలోనే వీడ్కోలు పలుకుతానని అమెరికా టెన్నిస్‌ దిగ్గజం, 23 గ్రాండ్‌స్లామ్‌ సింగిల్స్‌ టైటిళ్ల విజేత సెరెనా విలియమ్స్‌ తెలిపింది. రెండో సంతానం, బిజినెస్‌ కార్యకలాపాలవైపు దృష్టిసారిస్తాను అని వివరించింది. ‘వచ్చే నెలలో నేను 41వ వసంతంలోకి అడుగుపెడతాను. దీంతో నా జీవితంలో టెన్నిస్‌ ఆట చాలనుకుంటున్నా. దీన్ని నేను రిటైర్మెంట్‌గా సంబోధించను. టెన్నిస్‌కు దూరంగా వెళుతున్నా. జీవితంలోని ఇతర ప్రాధాన్యతలవైపు పూర్తిగా మళ్లుతున్నా’ అని సెరెనా తెలిపింది. ప్రస్తుతం ఆమె టోరంటో ఓపెన్‌ బరిలోకి దిగింది. ఏడాది తర్వాత తొలి విజయం సాధించింది. తొలి రౌండ్‌లో సెరెనా 6–3, 6–4తో నూరియా (స్పెయిన్‌)పై గెలిచింది. గత ఏడాది ఫ్రెంచ్‌ ఓపెన్‌లో సెరెనా చివరిసారి నెగ్గింది. సెరెనా మరో గ్రాండ్‌స్లామ్‌ టైటిల్‌ సాధిస్తే ఆల్‌టైమ్‌ అత్యధిక గ్రాండ్‌స్లామ్‌ టైటి ల్స్‌ సాధించిన ప్లేయర్‌గా మార్గరెట్‌ కోర్ట్‌ (24 టైటిల్స్‌) పేరిట ఉన్న రికార్డును సమం చేస్తుంది.    

రోత్సె ఓపెన్‌ టెన్నిస్‌ టోర్నీలో సానియా మీర్జా (భారత్‌)–లూసీ హర్డెస్కా (చెక్‌ రిపబ్లిక్‌) పోరాటం తొలి రౌండ్‌లోనే ముగిసింది. లండన్‌లో జరుగుతున్న ఈ టోర్నీ లో  డబుల్స్‌ తొలి రౌండ్‌లో సానియా–హర్డెస్కా జోడీ గంటా 56 నిమిషాల్లో 5–7, 7–6 (7/3), 7–10తో షుకో అయోమా (జపాన్‌)–హావో చింగ్‌ చాన్‌ (చైనీస్‌ తైపీ) జంట చేతిలో ఓడింది. తొలి రౌండ్‌లో ఓడిన సానియా జోడీకి 4,200 డాలర్లు (రూ. 3 లక్షల 28 వేలు) ప్రైజ్‌మనీగా లభించాయి.    

Natela Dzalamidze: ఉక్రెయిన్‌పై దురాక్రమణకు పాల్పడుతున్న రష్యాను క్రీడా ప్రపంచం మొత్తం సామూహికంగా బహిష్కరించిన నేపథ్యంలో ఓ టెన్నిస్‌ క్రీడాకారిణి తన కెరీర్‌ కోసం రష్యా పౌరసత్వాన్ని వదులుకునేందుకు సిద్ధమైన వార్త ప్రస్తుతం క్రీడా వర్గాల్లో చర్చనీయాంశంగా మారింది. ఈ నెల 27 నుంచి ప్రారంభంకానున్న వింబుల్డన్-2022 పాల్గొనేందుకు రష్యాకు చెందిన నటేల జలమిడ్జే ఏకంగా తన జాతీయతను మార్చుకోవాలని డిసైడైంది. తాను రష్యన్ కాదని.. జార్జియా తరఫున ఆడతానని నటేల వింబుల్డన్ నిర్వాహకులను మొరపెట్టుకుంది. Tennis player Natela Dzalamidze, who was born in Moscow, will be able to get around the ban on Russians at Wimbledon this year Because she now represents the country of Georgia https://t.co/DySjBJtdIz — Bloomberg UK (@BloombergUK) June 20, 2022 రష్యా ఆటగాళ్లెవరూ వింబుల్డన్‌లో పాల్గొనడానికి వీళ్లేదని టోర్నీ నిర్వహకులు స్పష్టం చేసిన నేపథ్యంలో నటేల ఈ నిర్ణయం తీసుకున్నట్లు తెలుస్తోంది. 29 ఏళ్ల నటేల అలగ్జాండ్ర క్రునిక్ (సెర్బియా)తో కలిసి మహిళల డబుల్స్‌లో పాల్గొనేందుకు తన పేరును రిజిస్టర్‌ చేసుకుంది. కాగా, ఉక్రెయిన్‌పై దురాక్రమణకు పాల్పడుతున్న రష్యాను, ఆ దేశానికి వంతపాడుతున్న బెలారస్‌ను అంతర్జాతీయ ఒలింపిక్ సంఘం సహా తైక్వాండో, ఫిఫా, ఎఫ్1 రేస్ వంటి ప్రఖ్యాత క్రీడా సంఘాలు ఇదివరకే వెలివేసిన (నిషేధం) విషయం తెలిసిందే.  చదవండి: కోచ్‌పై గట్టిగా అరిచిన ప్రపంచ నంబర్‌1 ఆటగాడు.. వీడియో వైరల్‌..!

సాక్షి క్రీడా విభాగం: ‘ప్రొఫెషనల్‌ క్రీడల్లో అనుకున్న లక్ష్యాలు చేరుకోకుండానే ఆట నుంచి తప్పుకునే వారు 99 శాతం మంది ఉంటారు. కానీ యాష్లే బార్టీ మిగిలిన ఆ 1 శాతం మందిలో ఉంటుంది’ 25 ఏళ్ల వయసుకే బార్టీ సాధించిన ఘనతలు చూస్తే ఈ వ్యాఖ్య ఆమెకు సరిగ్గా సరిపోతుంది. మూడు వేర్వేరు సర్ఫేస్‌లలో (హార్డ్, క్లే, గ్రాస్‌కోర్టు) మూడు సింగిల్స్‌ గ్రాండ్‌స్లామ్‌ టైటిల్స్, ఒలింపిక్‌ పతకం, ఓవరాల్‌గా 121 వారాలు వరల్డ్‌ నంబర్‌వన్‌ ర్యాంక్, సంపాదనలో మేటి... ఇంకా సాధించడానికి ఏముంది! బార్టీ కూడా ఇలాగే ఆలోచించి ఉంటుంది. శిఖరాన చేరుకున్న తర్వాత ఇక ఎక్కడానికి ఎత్తులు లేవు అనిపించినప్పుడు ఆమె ఈ నిర్ణయం తీసుకొని ఉండవచ్చు. ఎలా మొదలు పెట్టామనే దానికంటే ఎలా ముగించామన్నదే ముఖ్యం అని భావిస్తే బార్టీ తన ఘనమైన కెరీర్‌కు అద్భుత రీతిలో గుడ్‌బై పలికింది. సొంతగడ్డపై భారీ సంఖ్యలో ఉన్న ప్రేక్షకుల మధ్య ప్రతిష్టాత్మక ఆస్ట్రేలియన్‌ ఓపెన్‌ గెలిచిన బార్టీ దానినే చివరి ఘట్టంగా మార్చుకుంది. నిజానికి కెరీర్‌ ఉచ్ఛ స్థితిలో ఉన్నప్పుడు దానికి ముగింపు పలకడం అంత సులువు కాదు. దానికి ఎంతో సాహసం, మానసిక దృఢత్వం కావాలి. బార్టీ తాజా ఫామ్, వయసును బట్టి చూస్తే రాబోయే కొన్నేళ్లు ఆమె మహిళల టెన్నిస్‌ను శాసించే స్థితిలో ఉంది. ఆర్జనపరంగా చూస్తే మహిళల వరల్డ్‌ నంబర్‌వన్‌తో ఒప్పందాల కోసం పెద్ద పెద్ద బ్రాండింగ్‌ సంస్థలు సిద్ధంగా ఉన్నాయి. రాబోయే రోజుల్లో ఆమె ప్రచార కార్యక్రమాల ద్వారానే లెక్కలేనంత సంపదనను సొంతం చేసుకోవచ్చు. ఇలాంటివి ఊరిస్తున్నా, వెనక్కి లాగే అవకాశం ఉన్నా బార్టీ ‘ఇట్స్‌ జస్ట్‌ మై వే’ అంటూ తనదైన దారిని ఎం చుకుంది. తన ప్రస్తుత స్థాయి ఏమిటో ఆమె పట్టించుకోలేదు. టెన్నిస్‌ మాత్రమే తనకు ప్రపం చం కాదని, కొత్త కలలను సాకారం చేసుకోవా ల్సి ఉందంటూ ముందుకు వెళ్లేందుకు నిశ్చ యించుకుంది. తానేంటో, తనకు కావాల్సింది ఏమిటో, తాను ఎలా సంతోషంగా ఉండగలనో గుర్తించి దాని ప్రకారమే నిర్ణయం తీసుకుంది.    బార్టీ కెరీర్‌ ఆసాంతం ఆసక్తికరం. నాలుగేళ్ల వయసులో రాకెట్‌ పట్టిన ఈ బ్రిస్బేన్‌ అమ్మాయి 14 ఏళ్ల వయసులో ఐటీఎఫ్‌ టోర్నీతో తొలిసారి ప్రొఫెషనల్‌ టెన్నిస్‌లోకి అడుగు పెట్టింది. తర్వాత సంవత్సరమే వింబుల్డన్‌ జూనియర్‌ టైటిల్‌ గెలవడంతో ఆమెకు గుర్తింపు వచ్చింది. ఆ తర్వాత కెరీర్‌లో ఒక్కో మెట్టు ఎక్కుతూ వచ్చింది. కేసీ డెలాక్వా తోడుగా మహిళల డబుల్స్‌లో మూడు గ్రాండ్‌స్లామ్‌లలో ఫైనల్‌ చేరగా, సింగిల్స్‌లోనూ మంచి ఫలితాలు వచ్చాయి. అయితే 2014లో అనూహ్యంగా ఆటకు విరామం ఇస్తున్నట్లు ప్రకటించింది. ‘చిన్నప్పటి నుంచే ఆడుతున్న నేను ఇంత ఒత్తిడిని తట్టుకోలేకపోతున్నాను. ఒక సాధారణ టీనేజర్‌గా నా జీవితం గడపాలని ఉంది’ అంటూ దాదాపు 18 నెలలు టెన్నిస్‌ నుంచి తప్పుకుంది. ఇదే సమయంలో క్రికెట్‌పై దృష్టి పెట్టింది. ప్రాథమిక స్థాయిలో ఎలాంటి శిక్షణ లేకపోయినా కొద్ది రోజుల్లోనే ఆటపై పట్టు సాధించి ఏకంగా ‘మహిళల బిగ్‌బాష్‌ లీగ్‌’లో బ్రిస్బేన్‌ హీట్స్‌ జట్టుకు ప్రాతినిధ్యం వహించింది. ఆ తర్వాత 2016 ఫిబ్రవరిలో మళ్లీ టెన్నిస్‌లోకి వచ్చిన యాష్లే బార్టీకి వెనక్కి తిరిగి చూసే అవసరం రాలేదు.

బీజింగ్‌: చైనా ఉపాధ్య‌క్షుడు జాంగ్ గ‌వోలీ త‌న‌ను బలవంతంగా లొంగదీసుకున్నాడంటూ సంచలన ఆరోపణలు చేసిన చైనా స్టార్‌ టెన్నిస్‌ క్రీడాకారిణి పెంగ్‌ షూయి మాట మార్చింది. తనపై లైంగిక దాడే జరగలేదంటూ తాజాగా ఓ ఇంటర్వ్యూలో పేర్కొంది. సింగపూర్‌కు చెందిన ఓ చైనా భాషా పత్రికతో మాట్లాడుతూ.. ఆమె ఈ మేరకు స్పష్టం చేసింది. లైంగిక దాడి అంశంపై తాను చేసిన ఆన్‌లైన్‌ పోస్ట్‌ను తప్పుగా అర్ధం చేసుకున్నారని, తనపై లైంగిక దాడి జరిగిందని తాను ఎక్కడా ప్రస్తావించలేదని తెలిపింది. ఇదిలా ఉంటే, లైంగిక దాడి విషయమై చైనా ప్ర‌భుత్వం పెంగ్‌పై ఒత్తిడి తెచ్చిందంటూ మహిళల టెన్నిస్ సమాఖ్య అనుమానం వ్యక్తం చేస్తుంది. పెంగ్‌.. చైనా ఉపాధ్యక్షుడిపై ఆరోపణలు చేసిన నాటి నుంచి కనిపించకుండా పోవడంతో టెన్నిస్‌ ప్రపంచం ఆందోళన వ్యక్తం చేసిన విషయం తెలిసిందే.  చదవండి: భార్య, గర్ల్‌ఫ్రెండ్ వల్లే అదంతా.. బీసీసీఐ బాస్‌ ఆసక్తికర వ్యాఖ్యలు

ఆటతో పాటు అందం కూడా కలిసి నడిచే మహిళల టెన్నిస్‌లో ఒక శకం ముగిసింది. 16 ఏళ్లుగా ప్రపంచ వ్యాప్తంగా అభిమానులను అలరించిన రష్యన్‌ బ్యూటీ మారియా షరపోవా టెన్నిస్‌కు గుడ్‌బై చెప్పింది. ఐదు గ్రాండ్‌స్లామ్‌ టైటిల్స్‌ నెగ్గినా... వరల్డ్‌ నంబర్‌వన్‌ ర్యాంక్‌ సాధించినా... తన అందంతోనే ఎక్కువగా ఆకర్షించిన ఈ బుట్టబొమ్మ తన రాకెట్‌ను పక్కన పెడుతున్నట్లు ప్రకటించింది. తన పేరుతో పెట్టిన క్యాండీ ‘షుగర్‌పోవా’లాగే ఎన్నో  తీపి జ్ఞాపకాలను పదిలపర్చుకొని వీడ్కోలు  పలుకుతున్నట్లు వెల్లడించింది.    పారిస్‌: రష్యా టెన్నిస్‌ స్టార్, మాజీ వరల్డ్‌ నంబర్‌వన్‌ మారియా షరపోవా ఆట నుంచి తప్పుకుంది. ‘టెన్నిస్‌–నేను గుడ్‌బై చెబుతున్నా’ అంటూ ప్రకటించింది. నాలుగు వేర్వేరు గ్రాండ్‌స్లామ్‌లను నెగ్గిన అతి కొద్ది మంది ప్లేయర్లలో ఆమె కూడా ఉండటం విశేషం. 32 ఏళ్ల షరపోవా కొన్నేళ్లుగా వరుస గాయాలతో సతమతమవుతోంది. కోలుకొని అప్పుడప్పుడూ బరిలోకి దిగుతున్నా ఫలితాలు అన్నీ ప్రతికూలంగా వచ్చాయి. ఒకప్పుడు వరల్డ్‌ నంబర్‌వన్‌గా నిలిచిన ఆమె ఇప్పుడు 373వ ర్యాంక్‌కు పడిపోయింది. దాంతో ఆట నుంచి తప్పుకోవాలని నిర్ణయించుకుంది. ఒకప్పటి సోవియట్‌ యూనియన్‌లో పుట్టినా... ఏడేళ్ల వయసులోనే ఆమె కుటుంబం అమెరికాకు వలస వెళ్లిపోయింది. ఆటలో మాత్రం రష్యాకు ప్రాతినిధ్యం వహించడాన్ని షరపోవా కొనసాగించింది. 2004 వింబుల్డన్‌ ఫైనల్లో అమెరికా నల్లకలువ సెరెనా విలియమ్స్‌ను ఓడించి 17 ఏళ్ల వయసులోనే తొలి గ్రాండ్‌స్లామ్‌ టైటిల్‌ నెగ్గి ప్రపంచం దృష్టిని ఆకర్షించిన ఈ భామ ఇక వెనుదిరిగి చూసుకోవాల్సిన అవసరం రాలేదు. ఆమె చక్కటి ఆటకు అందం తోడై అత్యంత పాపులర్‌ ప్లేయర్‌గా షరపోవాకు గుర్తింపు తెచ్చి పెట్టాయి. వరుసగా 11 ఏళ్ల పాటు అత్యధిక ఆర్జన ఉన్న మహిళా క్రీడాకారిణిగా ‘ఫోర్బ్స్‌’ జాబితాలో నిలిచింది.   28 ఏళ్ల ఆట, 5 గ్రాండ్‌స్లామ్‌ల తర్వాత గుడ్‌బై చెబుతున్నా. వేరే రంగంలో పోటీ పడి మరింత ఎత్తుకు ఎదిగే సత్తా నాలో ఇంకా ఉంది. నేను నా జీవితాన్ని టెన్నిస్‌కు ఇస్తే టెన్నిస్‌ నాకు జీవితాన్ని ఇచ్చింది. ఎంతగా శ్రమిస్తే అంత గొప్ప ఫలితాలు సాధించవచ్చని నేను నమ్మా. గతం గురించో, భవిష్యత్తు గురించో అతిగా ఆలోచించకుండా వర్తమానంలో కష్టపడటం వల్లే ఈ విజయాలు దక్కాయనేది నా భావన. టెన్నిస్‌ కోర్టుకు సంబంధించి అన్ని జ్ఞాపకాలూ పదిలంగా నా మనసులో ఉంటాయి. అవి కోల్పోతున్న బాధ నాకూ ఉంది. టెన్నిస్‌ అనేది నాకు శిఖరంలాంటిది. అక్కడికి చేరే క్రమంలో ఎన్నో ఎత్తుపల్లాలు చవి చూసినా ఒక్కసారిగా పైకి ఎక్కిన తర్వాత వచ్చే ఆనందమే వేరు. ఇక ముందు కూడా జీవితంలో కొత్త లక్ష్యాలు పెట్టుకొని శ్రమిస్తా. మరిన్ని విజయాలు అందుకున్నా. –వీడ్కోలు సందేశంలో షరపోవా    మొత్తం గెలిచిన మ్యాచ్‌లు: 645 మొత్తం ఓడిన మ్యాచ్‌లు: 171 కెరీర్‌లో సాధించిన ప్రైజ్‌మనీ:  3,87,77,962 డాలర్లు  (రూ. 277 కోట్ల 76 లక్షలు) షరపోవా సాధించిన గ్రాండ్‌స్లామ్‌ సింగిల్స్‌ టైటిల్స్‌: 5 (2004–వింబుల్డన్‌; యూఎస్‌ ఓపెన్‌–2006; ఆస్ట్రేలియన్‌ ఓపెన్‌–2008; ఫ్రెంచ్‌ ఓపెన్‌–2012, 2014) కెరీర్‌లో నెగ్గిన సింగిల్స్‌ టైటిల్స్‌ సంఖ్య: 36 అత్యుత్తమ ర్యాంకింగ్‌ (ఆగస్టు 22, 2005): 1 ప్రొఫెషనల్‌గా మారిన ఏడాది: 2001 ప్రస్తుత ర్యాంక్‌: 373 కెరీర్‌లో   నంబర్‌వన్‌ ర్యాంక్‌లో కొనసాగిన వారాలు: 21

ఒకరి కల నిజమైంది. మరొకరి కల మళ్లీ చెదిరింది. ఆడుతున్న తొలి గ్రాండ్‌స్లామ్‌ ఫైనల్లోనే కెనడా టీనేజర్‌ బియాంకా ఆండ్రీస్కూ అద్భుతం చేసింది. అమెరికా దిగ్గజం సెరెనా విలియమ్స్‌ను ఆమె సొంతగడ్డపైనే ఓడించింది. మహిళల టెన్నిస్‌లో తన ఎంట్రీని ‘గ్రాండ్‌’గా చాటుకుంది. అత్యధిక గ్రాండ్‌స్లామ్‌ సింగిల్స్‌ టైటిల్స్‌ నెగ్గిన క్రీడాకారిణిగా మార్గరెట్‌ కోర్ట్‌ పేరిట ఉన్న రికార్డును సమం చేసేందుకు వచ్చిన నాలుగో ‘గ్రాండ్‌’ అవకాశాన్ని సెరెనా విలియమ్స్‌ చేజార్చుకుంది. న్యూయార్క్‌: వందలకొద్దీ మ్యాచ్‌ల అనుభవం ఉన్నా... రెండంకెల గ్రాండ్‌స్లామ్‌ టైటిల్స్‌ తమ ఖాతాలో ఉన్నా... రెండు దశాబ్దాల ఘనమైన కెరీర్‌ ఉన్నా... మరోసారి చాంపియన్‌ కావాలంటే, ట్రోఫీని ఒడిసి పట్టుకోవాలంటే అసలు సిసలు సమరంలో బాగా ఆడాల్సిందే. లేదంటే అనుభవం లేని వారి చేతుల్లోనూ పరాభవం తప్పదని యూఎస్‌ ఓపెన్‌ మహిళల సింగిల్స్‌ ఫైనల్లో వరుసగా రెండో ఏడాదీ రుజువైంది. అందరి అంచనాలు తారుమారు చేస్తూ... తన జైత్రయాత్ర గాలివాటమేమీ కాదని నిరూపిస్తూ కెనడా టీనేజర్‌ బియాంకా ఆండ్రీస్కూ యూఎస్‌ ఓపెన్‌లో ‘గ్రాండ్‌ ఫినిష్‌’ ఇచ్చింది. ఆడుతున్న తొలి గ్రాండ్‌స్లామ్‌ ఫైనల్లోనే విజేతగా నిలిచింది. మహిళల సింగిల్స్‌ ఫైనల్లో 15వ సీడ్‌ బియాంక 6–3, 7–5తో 8వ సీడ్, 23 గ్రాండ్‌స్లామ్‌ టైటిల్స్‌ విజేత సెరెనా విలియమ్స్‌ (అమెరికా)పై విజయం సాధించింది. చాంపియన్‌ బియాంకాకు 38,50,000 డాలర్లు (రూ. 27 కోట్ల 59 లక్షలు)... రన్నరప్‌ సెరెనాకు 19,00,000 డాలర్లు (రూ. 13 కోట్ల 62 లక్షలు) ప్రైజ్‌మనీగా లభించాయి. తొలి గేమ్‌లోనే బ్రేక్‌... ఒక్క యూఎస్‌ ఓపెన్‌లోనే 101 విజయాలు సాధించిన సెరెనాతో ఫైనల్‌ అంటే ఏ ప్రత్యర్థికైనా హడలే. కానీ 19 ఏళ్ల బియాంకా ముఖంలో అలాంటి ఛాయలు కనిపించలేదు. ఫైనల్‌ వేదిక ఆర్థర్‌ యాష్‌ స్టేడియం 26 వేల మంది ప్రేక్షకులతో హౌస్‌ఫుల్‌కాగా... అందులో సెరెనా అభిమానులు, ఆమెకు మద్దతు పలుకుతున్న వారే అధికంగా ఉన్నారు. అయితేనేం బియాంకా తొణకలేదు. మ్యాచ్‌ తొలి సెట్, తొలి గేమ్‌లోనే సెరెనా సర్వీస్‌ను బ్రేక్‌ చేసి 19 ఏళ్ల ఈ కెనడా అమ్మాయి సంచలనం సృష్టించింది. ఆ తర్వాత తన సర్వీస్‌ను నిలబెట్టుకొని 2–0తో ఆధిక్యంలోకి వెళ్లిన బియాంకా ఆ తర్వాతా ఎక్కడా దూకుడు తగ్గించలేదు. బియాంకా ఆటతీరును పరిశీలిస్తే సెరెనాతో ఫైనల్లో ఎలా ఆడితే గెలుస్తారో అన్న విషయంపై పూర్తి హోంవర్క్‌ చేసినట్టు కనిపించింది. కచ్చితమైన సర్వీస్‌లు... పదునైన రిటర్న్‌లు... శక్తివంతమైన ఫోర్‌హ్యాండ్, బ్యాక్‌హ్యాండ్‌ షాట్‌లు... ఇలా పక్కా ప్రణాళికతో ఆడిన బియాంక చూస్తుండగానే తొలి సెట్‌లోని తొమ్మిదో గేమ్‌లో మరోసారి సెరెనా సర్వీస్‌ను బ్రేక్‌ చేసి సెట్‌ను 6–3తో గెల్చుకుంది. ఒత్తిడికి లోనై... బియాంక పుట్టకముందే యూఎస్‌ ఓపెన్‌ టైటిల్‌ను గెలిచిన సెరెనా తన అనుభవమంత వయస్సులేని ప్రత్యర్థి దూకుడు ముందు ఒత్తిడికి లోనైంది. కీలకమైన తొలి సర్వీస్‌లో తడబడటం... రెండో సర్వీస్‌లోనూ నిలకడలేమి... లెక్కలేనన్ని అనవసర తప్పిదాలతో సెరెనా ఆట సాగింది. మరోవైపు ప్రతి పాయింట్‌లో పూర్తి విశ్వాసంతో ఆడిన బియాంకా రెండో సెట్‌లోనూ చెలరేగిపోయింది. 5–1తో ఆధిక్యంలోకి వెళ్లింది. అయితే సెరెనా తన అనుభవాన్నంతా రంగరించి పోరాడింది. వరుసగా నాలుగు గేమ్‌లు గెలిచి స్కోరును 5–5తో సమం చేసింది. కానీ బియాంక 11వ గేమ్‌లో తన సర్వీస్‌ను నిలబెట్టుకొని.. 12వ గేమ్‌లో సెరెనా సర్వీస్‌ను బ్రేక్‌ చేసి విజయాన్ని ఖాయం చేసుకుంది.   నా విజయానుభూతిని మాటల్లో వర్ణించలేను. ఈ క్షణం కోసం నేను చాలా  కష్టపడ్డాను. ఈ ఏడాది నా కలలన్నీ నిజమయ్యాయి. ఈ అత్యున్నత వేదికపై సెరెనాలాంటి దిగ్గజంతో ఫైనల్‌ ఆడటం అద్భుతం. ఎవరితో, ఏ స్థాయి ప్రత్యర్థితో ఆడుతున్నాననే విషయంపై ఎక్కువగా దృష్టి పెట్టలేదు. ఎప్పటిలాగే నా అత్యుత్తమ ప్రదర్శన ఇచ్చాను. ఈ గొప్ప విజయం సాధించిన క్రమంలో ప్రతి అంశాన్ని నేను నియంత్రించిన తీరుపట్ల గర్వపడుతున్నాను. నా లక్ష్యం సాధ్యమైనన్ని గ్రాండ్‌స్లామ్‌ టైటిల్స్‌ గెలవడం. ప్రపంచ నంబర్‌వన్‌ కావడం. ఈ గెలుపుతో వచ్చిన ప్రైజ్‌మనీని ఏంచేయాలో ఇంకా ఆలోచించలేదు. ఇంత భారీ మొత్తాన్ని నా జీవితంలో అందుకోలేదు. –బియాంక ఆండ్రీస్కూ ఈ టోర్నమెంట్‌ మొత్తంలో నేను ఆడిన చెత్త మ్యాచ్‌ ఇదే. నేనింకా బాగా ఆడాల్సింది. మార్గరెట్‌ కోర్ట్‌ రికార్డును సమం చేయడానికి దగ్గరగా వచ్చినట్టే వచ్చి ఆగిపోతున్నాను. ఇలా జరగడం ఎంతో అసహనం కలిగిస్తోంది. ఆమె రికార్డును అందుకోవడానికి నేను ఆడట్లేదు. గ్రాండ్‌స్లామ్‌ టైటిల్స్‌ సాధించడానికి ఆడుతున్నాను. తుది ఫలితంతో నేను సంతోషంగా లేను. నిజాయతీగా చెప్పాలంటే ఫైనల్లో నేను బాగా ఆడలేదు. ఫైనల్లో బియాంక చాలా అద్భుతంగా ఆడింది. ఆమె విజయంపట్ల గర్వపడుతున్నాను. –సెరెనా విలియమ్స్‌ 1: కెనడా తరఫున గ్రాండ్‌స్లామ్‌ సింగిల్స్‌ టైటిల్‌ నెగ్గిన తొలి ప్లేయర్‌ బియాంక. గతంలో యూజిన్‌ బుషార్డ్‌ (2014 వింబుల్డన్‌ టోర్నీ మహిళల సింగిల్స్‌), మిలోస్‌ రావ్‌నిచ్‌ (2016 వింబుల్డన్‌ టోర్నీ పురుషుల సింగిల్స్‌) రన్నరప్‌గా నిలిచారు.   2: కెరీర్‌లో ఆడిన నాలుగో గ్రాండ్‌స్లామ్‌ టోర్నీలోనే గ్రాండ్‌స్లామ్‌ టైటిల్‌ను గెలిచిన రెండో ప్లేయర్‌ బియాంక. గతంలో మోనికా సెలెస్‌ (1990లో ఫ్రెంచ్‌ ఓపెన్‌) మాత్రమే ఈ ఘనత సాధించింది.   8: గ్రాండ్‌స్లామ్‌ టోర్నీ ఫైనల్లో సెరెనాను ఓడించిన ఎనిమిదో క్రీడాకారిణి బియాంక. గతంలో వీనస్‌ విలియమ్స్‌ (2 సార్లు–అమెరికా), షరపోవా (రష్యా), సమంతా స్టోసుర్‌ (ఆస్ట్రేలియా), ఎంజెలిక్‌ కెర్బర్‌ (2 సార్లు–జర్మనీ), గార్బిన్‌ ముగురుజా (స్పెయిన్‌), నయోమి ఒసాకా (జపాన్‌), సిమోనా హలెప్‌ (రొమేనియా) ఈ ఘనత సాధించారు.   1: సెరెనా తన కెరీర్‌లో తొలిసారి వరుసగా నాలుగు గ్రాండ్‌స్లామ్‌ ఫైనల్స్‌లో (2018– వింబుల్డన్, యూఎస్‌ ఓపెన్‌; 2019– వింబుల్డన్, యూఎస్‌ ఓపెన్‌) ఓడింది. 5: తాజా విజయంతో నేడు విడుదల చేసే మహిళల టెన్నిస్‌ సంఘం (డబ్ల్యూటీఏ) ప్రపంచ సింగిల్స్‌ ర్యాంకింగ్స్‌లో బియాంక తన కెరీర్‌ బెస్ట్‌ ఐదో ర్యాంక్‌కు చేరుకుంటుంది. 8: తన కెరీర్‌లో టాప్‌–10 ర్యాంకింగ్స్‌లోని క్రీడాకారిణులతో తలపడిన ఎనిమిది సార్లూ బియాంకానే గెలుపొందడం విశేషం. ఈ ఏడాది ఓవరాల్‌గా బియాంక 45 మ్యాచ్‌ల్లో విజయం సాధించింది.

బిడ్డకు పాలిచ్చి వచ్చిన పులి సెరెనా. బోనులోంచి బయటికి వచ్చిన చిరుత షరపోవా. ఇద్దరిలో ఆకలి ఉంది. బరిలో ఆహారం ఉంది. ఇదొక యుగాంతపు ఆట. ఉమెన్స్‌ టెన్నిస్‌లో ఈరోజు ధూమ్స్‌ డే. లైక్‌.. డూమ్స్‌ డే! సెరెనా, షరపోవాలు పరస్పర శత్రు ఘీంకార వందన సమర్పణతో బరిని బ్లాస్ట్‌ చేయబోతున్న మచ్‌ అవెయిటెడ్‌ అండ్‌ అన్‌ఎక్స్‌పెక్టెడ్‌ (ఎదురుచూడబోతామని ఎవరూ ఎదురుచూడని) ఈవెంట్‌ ఇవాళ్టిది. ఇదింకా ఫోర్త్‌ రౌండే. ఫైనల్స్‌ కాదు. సెమీ ఫైనల్‌ కాదు. క్వార్టర్‌ ఫైనల్‌ కాదు. కేవలం ప్రీక్వార్టర్‌. అంతే. బట్, ఇదొక యుగాంతపు ఆట. ఫ్రెంచ్‌ ఓపెన్‌లో ఆరో సీడ్‌ ప్లిస్కోవాను కొట్టి, సెరెనా అనే కొరివితో పెట్టుకోబోతున్నారు షరపోవా. పదకండవ సీడ్‌ జూలియా జార్జెస్‌ను ఓడించి, షరపోవాను చిన్నపిల్లలా ఆటాడించేందుకు సిద్ధమై ఉన్నారు సెరెనా. గ్రాండ్‌స్లామ్‌ టోర్నీ ఫైనల్‌లో ఇప్పటికి మూడుసార్లు షరపోవాపై గెలిచారు సెరెనా. ఇప్పటికి ఒకేసారి సెరెనాపై గెలిచారు షరపోవా. ఎవరు ఎవరిపై ఎన్నిసార్లు గెలిచారనేది.. ఈరోజు ఈ ఇద్దరి మధ్యా జరుగుతున్న ఆటలో ఓటమిని అంచనా వెయ్యడానికి పనికొచ్చే.. గెలుపు పాయింట్‌ ఏమీ కాబోదు. కానీ ప్రాణమున్న ఆట. సెరెనా ఒక బిడ్డకు జన్మనిచ్చాక, షరపోవా నిషేధం నుంచి పునర్జన్మించాక ఆడుతున్న ఆట. సెరెనా, షరపోవా చివరిసారిగా రెండున్నరేళ్ల క్రితం ఆస్ట్రేలియన్  ఓపెన్‌లో ఒకరితో ఒకరు తలపడ్డారు. తర్వాత ఇద్దరూ పరిస్థితులతో తలపడ్డారు. ఒక సంవత్సరం తేడాతో ఇద్దరి జీవితాల్లో మార్పులకు, మలుపులకు ఆస్ట్రేలియన్‌ ఓపెన్‌ కారణం అయింది. 2016 ఓపెన్‌లో వరల్డ్‌ యాంటీ డోపింక్‌ ఏజెన్సీ షరపోవాపై రెండేళ్ల నిషేధం విధించింది. ఆ రెండేళ్ల నిషేధాన్ని ఆ తర్వాత పదిహేను నెలలకు తగ్గించింది. లేకుంటే ఈ జూన్‌ 8 వరకు ఆ నిషేధం ఉండేది. ఈరోజు సెరెనా, షరపోవాల ఆట లేకపోయేది. షరపోవాలా సెరెనా కూడా తనకెంతో ప్రాణప్రదమైన టెన్నిస్‌కు కొన్ని నెలలు దూరంగా ఉండవలసి వచ్చింది. డోపింగ్‌ టెస్ట్‌లో ఫెయిల్‌ అయినందుకు షరపోవా ఆటకు దూరం అయితే, మాతృత్వపు టెస్ట్‌లో పాస్‌ అయినందుకు సెరెనా తన బిడ్డ కోసం ఆటలు కట్టిపెట్టవలసి వచ్చింది. 2017 ఆస్ట్రేలియన్‌ ఓపెన్‌ ఆడుతున్న సమయానికే ఆమె ఎనిమిది వారాల గర్భిణి. ఆ తర్వాత బిడ్డ పుట్టేవరకు, బిడ్డ పుట్టిన తర్వాత కూడా కొన్నాళ్లపాటు ఆటకు దూరంగా ఉన్నారు. తిరిగి ఈ ఏడాది ఫిబ్రవరిలో ఆటలోకి వచ్చారు. అక్కణ్ణుంచి ఇప్పుడు జరుగుతున్న ఫ్రెంచి ఓపెన్‌లోకి వచ్చారు. తొలి రౌండ్‌లో చెక్‌ అమ్మాయిని, రెండో రౌండ్‌లో ఆస్ట్రేలియా అమ్మాయినీ, మూడో రౌండ్‌లో జర్మన్‌ అమ్మాయినీ ఓడించి, నాలుగో రౌండ్‌లో రష్యా అమ్మాయి షరపోవా మీదకు రాకెట్‌ పట్టుకుని వచ్చేశారు. షరపోవా కూడా గ్యాప్‌ తర్వాత గత ఏడాది ఏప్రిల్‌లో ఆటలోకి వచ్చారు. అక్కణ్ణుంచి ఫ్రెంచ్‌ ఓపెన్‌కి వచ్చారు. తొలి రౌండ్‌లో నెదర్లాండ్స్‌ అమ్మాయిని, రెండో రౌండ్‌లో క్రొయేషియా అమ్మాయిని, మూడో రౌండ్‌లో చెక్‌ అమ్మాయిని ఓడించి నాలుగో రౌండ్‌లో అమెరికన్‌ యోధురాలు సెరెనా వైపు చిరుతలా చూస్తున్నారు. అయినా.. ఎన్ని చిరుతల్ని చూడలేదూ సెరెనా! షరపోవా కూడా! ఎదురుగా ఉన్నది యోధానుయోధులైతే మాత్రం ఎప్పుడైనా గాండ్రించకుండా ఉందా? గ్యాప్‌ వచ్చిన తర్వాత కూడా ఇంకా రిటైర్‌ కాకుండా ఉన్నారంటే.. వీళ్ల లోలోపలి ఫైరే.. వీళ్ల ఆటను వెలిగిస్తోంది. గత ఏడాది షరపోవా ఆత్మకథ ‘అన్‌స్టాపబుల్‌: మై లైఫ్‌ సో ఫార్‌’ విడుదలైంది. 2004 వింబుల్డన్‌ ఫైనల్‌లో తనపై ఓడిపోయినప్పుడు సెరెనా లాకర్‌ రూమ్‌లో కన్నీళ్లతో కూర్చొని ఉన్న దృశ్యాన్ని చూసినందుకు తనెప్పటికీ క్షమార్హురాలిని కాబోనని ఆ పుస్తకంలో రాసుకున్నారు షరపోవా. ‘ఒక బక్కపలుచని అమ్మాయి తనని ఓడించినందుకు సెరెనా నన్ను ద్వేషించి ఉండొచ్చు. తనది అనుకున్న దానిని నేను తీసేసుకున్నందుకు తను నన్ను ద్వేషించి ఉండొచ్చు. తన జీవితంలోని అతి దయనీయమైన క్షణాలు నా కంట్లో పడినందుకు తను నన్ను ద్వేషించి ఉండొచ్చు. అన్నిటికన్నా.. తను ఏడ్వటం నేను చూశాను. అందుకు మరీ ఎక్కువగా ద్వేషించి ఉండొచ్చు’ అని ఆ ప్యారాగ్రాఫ్‌ను కొనసాగించారు షరపోవా. ఈ విషయాన్ని శనివారం న్యూయార్స్‌ టైమ్స్‌ ప్రతినిధి సెరెనా ముందు ప్రస్తావించినప్పుడు.. ‘ఏడ్వకపోవడం విడ్డూరం గానీ, ఏడ్వటంలో ఆశ్చర్యం ఏముంది?’ అన్నారు సెరెనా. ‘ఆ సంగతిని లాకర్‌ రూమ్‌లోనే ఉంచేయవలసింది. పుస్తకం వరకూ తేకుండా. నాకూ ఎమోషన్స్‌ ఉంటాయి. నేనూ మనిషినే’ అని కూడా అన్నారు. అవును కదా! ఎంత ఫైర్‌ ఉన్న మనిషిలోనైనా ఏమూలో ‘ఐస్‌’ లేకుండా ఉంటుందా? ఎంత ‘అన్‌స్టాపబుల్‌’ అయినా చిన్న గులకరాయి తగలకుండా ఉంటుందా? బిడ్డకు పాలిచ్చి వచ్చిన పులి సెరెనా.  బోనులోంచి బయటికొచ్చిన చిరుత షరపోవా. ఆకలి ఉంది. బరిలో ఆహారం ఉంది.    - మాధవ్‌ శింగరాజు

సాక్షి క్రీడావిభాగం: తల్లి కాబోతున్న భారత టెన్నిస్‌ స్టార్‌ సానియా మీర్జా భవిష్యత్‌లో మళ్లీ రాకెట్‌ పడుతుందో లేదో తెలియదుకానీ... అమ్మతనం ఆటకు అడ్డంకి కాదని గతంలో పలువురు టెన్నిస్‌ స్టార్లు నిరూపించారు. ప్రసవానంతరం బరిలోకి దిగి గ్రాండ్‌స్లామ్‌ టైటిల్స్‌ గెలిచిన సందర్భాలున్నాయి. ఆ వివరాలు...  ►2008లో రిటైర్మెంట్‌ ప్రకటించిన కిమ్‌ క్లియ్‌స్టర్స్‌ (బెల్జియం) కుమార్తెకు జన్మనిచ్చిన ఏడాది తర్వాత పునరాగమనం చేసింది. 2009, 2010లలో యూఎస్‌ ఓపెన్‌; 2011లో ఆస్ట్రేలియన్‌ ఓపెన్‌  టైటిల్స్‌ కూడా సాధించింది.   ► మహిళల టెన్నిస్‌లో అత్యధిక సింగిల్స్‌ గ్రాండ్‌స్లామ్‌ టైటిల్స్‌ గెలిచిన మార్గరెట్‌ కోర్ట్‌ తల్లి హోదా వచ్చాక ఒకే ఏడాది ఏకంగా మూడు గ్రాండ్‌స్లామ్‌ టైటిల్స్‌ సాధించడం విశేషం. తొలి సంతానం కోసం 1971, 1972లో ఆటకు విరామం చెప్పిన మార్గరెట్‌ తల్లి అయ్యాక 1973లో పునరాగమనం చేసి ఆస్ట్రేలియన్, ఫ్రెంచ్, యూఎస్‌ ఓపెన్‌ గ్రాండ్‌స్లామ్‌ టైటిల్స్‌ సొంతం చేసుకుంది.   ►ఆస్ట్రేలియాకే చెందిన ఇవాన్‌ గూలాగాంగ్‌ 1977 మేలో పాపకు జన్మనిచ్చాక ఆ ఏడాది డిసెంబర్‌లో జరిగిన ఆస్ట్రేలియన్‌ ఓపెన్‌ టైటిల్‌తోపాటు  1980లో వింబుల్డన్‌ టైటిల్‌నూ సాధించింది.   ►గతేడాది అమెరికా స్టార్‌ సెరెనా విలియమ్స్‌ వారాల గర్భంతోనే ఆస్ట్రేలియన్‌ ఓపెన్‌ గ్రాండ్‌స్లామ్‌ టైటిల్‌ గెలిచింది. ఇప్పుడు కుమార్తె కలిగాక నెలల వ్యవధిలోనే సెరెనా పోటీల్లో పాల్గొంటోంది. ఇప్పటికి 23 గ్రాండ్‌స్లామ్‌ సింగిల్స్‌ టైటిల్స్‌ సాధించిన సెరెనా వచ్చేనెలలో ఫ్రెంచ్‌ ఓపెన్‌లో తన అదృష్టాన్ని పరీక్షించుకోనుంది.   ►రెండుసార్లు (2012, 2013) ఆస్ట్రేలియన్‌ ఓపెన్‌ టైటిల్‌ నెగ్గిన అజరెంకా (బెలారస్‌) 2016 డిసెంబర్‌లో మగ బిడ్డకు జన్మనిచ్చింది. 2017 జూలైలో వింబుల్డన్‌ టోర్నీ లో రాకెట్‌ పట్టి ప్రిక్వార్టర్‌ ఫైనల్‌కు చేరుకుంది. ఈ ఏడాది మయామి ఓపెన్‌ డబ్ల్యూటీఏ ప్రీమియర్‌ టోర్నీలోనూ సెమీఫైనల్‌కు చేరుకుంది.   

సాక్షి, హైదరాబాద్‌: అంతర్జాతీయ టెన్నిస్‌ సమాఖ్య (ఐటీఎఫ్‌) మహిళల టోర్నమెంట్‌లో హైదరాబాద్‌ అమ్మాయి యడ్లపల్లి ప్రాంజల డబుల్స్‌ విభాగంలో రన్నరప్‌గా నిలిచింది. ఈజిప్ట్‌లోని షర్మ్‌ ఎల్‌ షేక్‌ నగరంలో శనివారం జరిగిన మహిళల డబుల్స్‌ ఫైనల్లో ప్రాంజల (భారత్‌)–లీ పెచి (చైనీస్‌ తైపీ) ద్వయం 2–6, 3–6తో నాలుగో సీడ్‌ మార్టినా కోల్‌మాగ్నా (ఇటలీ)–వలెరియా సోలోవియా (రష్యా) జంట చేతిలో ఓడిపోయింది. 67 నిమిషాలపాటు జరిగిన ఫైనల్లో ప్రాంజల జంట తమ సర్వీస్‌ను ఐదుసార్లు కోల్పోయింది.   

సాక్షి, హైదరాబాద్‌: ఆలిండియా ఇంటర్‌ యూనివర్సిటీ మహిళల టెన్నిస్‌ టోర్నమెంట్‌లో ఉస్మానియా యూనివర్సిటీ (ఓయూ) జట్టు రాణించింది. విశాఖ పట్నంలోని గీతం యూనివర్సిటీలో జరిగిన ఈ చాంపియన్‌షిప్‌లో కాంస్య పతకాన్ని సొంతం చేసుకుంది. యూనివర్సిటీ ఆఫ్‌ ముంబై స్వర్ణాన్ని, ఎస్‌ఆర్‌ఎం యూనివర్సిటీ జట్టు రజతాన్ని గెలుచుకున్నాయి. కాంస్య పతక పోరులో ఉస్మానియా జట్టు 2–1తో ఎస్పీ యూనివర్సిటీ (పుణే)పై విజయం సాధించింది. ఈ మ్యాచ్‌లో భాగంగా జరిగిన తొలి సింగిల్స్‌లో దీక్ష అజిత్‌ (ఓయూ) 6–3, 6–2తో ప్రగతి (ఎస్పీయూ)పై గెలుపొందింది. రెండో సింగిల్స్‌లో శ్రావ్య శివాని (ఓయూ) 1–6, 0–6తో స్నేహల్‌ (ఎస్పీయూ) చేతిలో ఓడిపోవడంతో స్కోరు 1–1తో సమమైంది. ఫలితం తేల్చే డబుల్స్‌ మ్యాచ్‌లో దీక్ష– శ్రావ్య (ఓయూ) ద్వయం 3–6, 7–5, 10–5తో ప్రగతి–స్నేహల్‌ (ఎస్పీయూ) జంటపై గెలుపొందడంతో ఓయూకు పతకం ఖాయమైంది. అంతకుముందు జరిగిన సెమీస్‌ మ్యాచ్‌ల్లో ఓయూ 0–2తో యూనివర్సిటీ ఆఫ్‌ ముంబై చేతిలో ఓడిపోయింది. క్వార్టర్స్‌లో 2–0తో పంజాబ్‌ యూనివర్సిటీపై గెలుపొందింది.  

 సాక్షి, హైదరాబాద్‌: అఖిల భారత మహిళల టెన్నిస్‌ టోర్నమెంట్‌లో హైదరాబాద్‌ అమ్మాయి సింధు జనగాం ఆకట్టుకుంది. ఛత్తీస్‌గఢ్‌లోని రాయ్‌పూర్‌లో జరిగిన ఈ టోర్నీలో డబుల్స్‌ విభాగంలో రన్నరప్‌గా నిలిచింది. శుక్రవారం జరిగిన టైటిల్‌ పోరులో సింధు (తెలంగాణ)– మహ్రుక్‌ కోక్ని (మహారాష్ట్ర) ద్వయం 2–6, 4–6తో తీర్థ ఇస్కా (ఏపీ)– ప్రీతి ఉజ్జిని (కర్ణాటక) జోడి చేతిలో ఓటమి పాలైంది. అంతకుముందు జరిగిన సెమీఫైనల్లో సింధు–మహ్రుక్‌ ద్వయం 6–4, 6–2తో ధారణ–నవనీ (ఛత్తీస్‌గఢ్‌) జంటపై గెలుపొందింది.   


 ఐటీఎఫ్‌ టెన్నిస్‌ టోర్నీ  
 
 ఔరంగాబాద్‌: అంతర్జాతీయ టెన్నిస్‌ సమాఖ్య (ఐటీఎఫ్‌) మహిళల టెన్నిస్‌ టోర్నమెంట్‌లో ముగ్గురు హైదరాబాద్‌ క్రీడాకారిణులు తమ అదృష్టాన్ని పరీక్షించుకోనున్నారు. నగరానికి చెందిన భవిశెట్టి సౌజన్య, నిధి చిలుముల, ప్రాంజల ఈ టోర్నీ మెయిన్‌ ‘డ్రా’లో ఆడనున్నారు.
  
 మహిళల సింగిల్స్‌ విభాగంలో సౌజన్య మూడో సీడ్‌గా బరిలోకి దిగుతుండగా... నిధి, ప్రాంజలకు వరుసగా ఐదు, ఏడో సీడింగ్స్‌ దక్కాయి. డబుల్స్‌ విభాగంలో నిధి–శ్వేత రాణా జోడీకి రెండో సీడ్‌ దక్కగా, ప్రాంజల జంట మూడో సీడ్‌గా బరిలోకి దిగుతుంది.
 
 
  


 ఈసారి యూఎస్ ఓపెన్ మహిళల సింగిల్స్ విభాగంలో సీడెడ్ క్రీడాకారిణులకు అంతగా పేరులేని ప్రత్యర్థులు చుక్కలు చూపిస్తున్నారు. యువతారల ధాటికి టాప్-20 సీడింగ్స్ నుంచి కేవలం నలుగురు మాత్రమే బరిలో మిగిలారు. అనామక క్రీడాకారిణులను తక్కువ అంచనా వేయకూడదని నిరూపిస్తూ... ఫ్రాన్స్ అమ్మాయి క్రిస్టినా మ్లాడెనోవిచ్ ప్రిక్వార్టర్ ఫైనల్లో 13వ సీడ్ ఎకతెరీనా మకరోవాను ఇంటిదారి పట్టించి తన కెరీర్‌లో తొలిసారి గ్రాండ్‌స్లామ్ టోర్నీలో క్వార్టర్ ఫైనల్‌కు చేరుకుంది.
  
 - 13వ సీడ్ మకరోవాపై సంచలన విజయం  
 - తొలిసారి ‘గ్రాండ్‌స్లామ్’ క్వార్టర్స్‌లోకి వీనస్‌తో సెరెనా అమీతుమీ
 - యూఎస్ ఓపెన్ టోర్నీ
 న్యూయార్క్: సమకాలీన మహిళల టెన్నిస్‌లో సీడింగ్ లేకున్నా వారి ప్రతిభను తక్కువ అంచనా వేసే పరిస్థితి కనిపించడంలేదు. యూఎస్ ఓపెన్‌లో ఈ విషయం స్పష్టంగా కనిపిస్తోంది. సీజన్ చివరి గ్రాండ్‌స్లామ్ టోర్నమెంట్‌లో ఈసారి అన్‌సీడెడ్ క్రీడాకారిణులు అదరగొట్టే ఫలితాలు సాధిస్తున్నారు. తాజాగా 22 ఏళ్ల క్రిస్టినా మ్లాడెనోవిచ్ (ఫ్రాన్స్) అద్భుత పోరాటంతో ఆకట్టుకొని 13వ సీడ్  మకరోవా (రష్యా)ను ఓడించి క్వార్టర్ ఫైనల్లోకి దూసుకెళ్లింది. సోమవారం జరిగిన మహిళల సింగిల్స్ ప్రిక్వార్టర్ ఫైనల్లో మ్లాడెనోవిచ్ 7-6 (7/2), 4-6, 6-1తో మకరోవాపై గెలిచింది. తొలి రౌండ్‌లో యూఎస్ ఓపెన్ మాజీ చాంపియన్ స్వెత్లానా కుజ్‌నెత్సోవా (రష్యా)ను ఓడించిన మ్లాడెనోవిచ్ అదే జోరును కొనసాగిస్తూ తన కెరీర్‌లో 20వ ప్రయత్నంలో తొలిసారి గ్రాండ్‌స్లామ్ టోర్నీలో క్వార్టర్ ఫైనల్ దశకు అర్హత సాధించింది.
 
 రెండు గంటల 12 నిమిషాలపాటు జరిగిన ఈ మ్యాచ్‌లో మ్లాడెనోవిచ్ నిర్ణాయక మూడో సెట్‌లో చెలరేగి ఆడింది. మకరోవా సర్వీస్‌ను మూడుసార్లు బ్రేక్ చేసి విజయాన్ని ఖాయం చేసుకుంది. మరో మ్యాచ్‌లో 20వ సీడ్ అజరెంకా (బెలారస్) 6-3, 6-4తో లెప్‌చెంకో (అమెరికా)పై నెగ్గి క్వార్టర్స్‌కు చేరింది. ‘క్యాలెండర్ గ్రాండ్‌స్లామ్’ వేటలో టాప్ సీడ్ సెరెనా (అమెరికా) దూసుకుపోతోంది. ప్రిక్వార్టర్ ఫైనల్లో సెరెనా 6-3, 6-3తో 19వ సీడ్ మాడిసన్ కీస్ (అమెరికా)ను ఓడించింది. క్వార్టర్ ఫైనల్లో తన సోదరి వీనస్ విలియమ్స్ (అమెరికా)తో సెరెనా తలపడుతుంది. ప్రిక్వార్టర్ ఫైనల్లో వీనస్ 6-2, 6-1తో కొంటావీట్ (ఎస్తోనియా)పై గెలిచింది.
  
 జొకోవిచ్ ముందంజ
 పురుషుల సింగిల్స్‌లో టాప్ సీడ్ జొకోవిచ్ (సెర్బియా)తోపాటు 18వ సీడ్ లోపెజ్ (స్పెయిన్), 19వ సీడ్ సోంగా (ఫ్రాన్స్) క్వార్టర్ ఫైనల్లోకి చేరారు. ప్రిక్వార్టర్ ఫైనల్స్‌లో జొకోవిచ్ 6-3, 4-6, 6-4, 6-3తో అగుట్ (స్పెయిన్)పై, లోపెజ్ 6-3, 7-6 (7/5), 6-1తో ఫాగ్‌నిని (ఇటలీ)పై, సోంగా 6-4, 6-3, 6-4తో పెయిర్ (ఫ్రాన్స్)పై గెలిచారు.
  
 క్వార్టర్స్‌లో సానియా ద్వయం
 మహిళల డబుల్స్ మూడో రౌండ్‌లో సానియా మీర్జా (భారత్) -మార్టినా హింగిస్ (స్విట్జర్లాండ్) జంట 6-3, 6-0తో మిచెల్లా క్రాయిసెక్ (నెదర్లాండ్స్)-స్ట్రికోవా (చెక్ రిపబ్లిక్) జోడీపై నెగ్గి క్వార్టర్ ఫైనల్‌కు చేరింది. పురుషుల డబుల్స్ మూడో రౌండ్‌లో రోహన్ బోపన్న (భారత్)-ఫ్లోరిన్ మెర్జియా (రుమేనియా) ద్వయం 6-7 (4/7), 6-4, 6-3తో నెస్టర్ (కెనడా)-వాసెలిన్ (ఫ్రాన్స్) జంటపై గెలిచి క్వార్టర్ ఫైనల్లోకి అడుగుపెట్టింది.


 ఎనిమిదోసారి ‘మియామి’ టైటిల్ సొంతం
  
 ఫ్లోరిడా : మహిళల టెన్నిస్ ప్రపంచ నంబర్‌వన్ సెరెనా విలియమ్స్ తన కెరీర్‌లో 66వ సింగిల్స్ టైటిల్‌ను సొంతం చేసుకుంది. మియామి ఓపెన్ డబ్ల్యూటీఏ ప్రీమియర్ టోర్నీలో ఈ అమెరికా స్టార్ ఎనిమిదోసారి విజేతగా నిలిచింది. ఏకపక్షంగా జరిగిన ఫైనల్లో సెరెనా 6-2, 6-0తో కార్లా స్యురెజ్ నవారో (స్పెయిన్)పై గెలిచింది.
 
 విజేతగా నిలిచిన సెరెనాకు 9,00,400 డాలర్ల ప్రైజ్‌మనీ (రూ. 5 కోట్ల 77 లక్షలు)తోపాటు 1000 ర్యాంకింగ్ పాయింట్లు లభించాయి. టైటిల్ సాధించిన క్రమంలో సెరెనా ఒకే టోర్నీని ఎనిమిదిసార్లు నెగ్గిన నాలుగో క్రీడాకారిణిగా గుర్తింపు పొందింది. గతంలో ఈ ఘనతను మార్టినా నవ్రతిలోవా (చికాగో ఓపెన్-12 సార్లు), స్టెఫీ గ్రాఫ్ (బెర్లిన్ ఓపెన్-9 సార్లు), క్రిస్ ఎవర్ట్ (హిల్టర్ హెడ్ ఓపెన్-8 సార్లు) సాధించారు.


 డబ్ల్యూటీఏ ఫైనల్స్ టోర్నీ
 
 సింగపూర్: మహిళల టెన్నిస్ సీజన్ ముగింపు టోర్నమెంట్ డబ్ల్యూటీఏ ఫైనల్స్‌లో సానియా మీర్జా (భారత్)-కారా బ్లాక్ (జింబాబ్వే) జోడీ సెమీఫైనల్లోకి ప్రవేశించింది. గురువారం జరిగిన తొలి రౌండ్‌లో సానియా-కారా బ్లాక్ 6-3, 2-6, 12-10తో రాకెల్ కాప్స్ జోన్స్-అబిగెయిల్ స్పియర్స్ (అమెరికా)లపై గెలిచారు. 92 నిమిషాలపాటు జరిగిన ఈ మ్యాచ్‌లో రెండు జోడీలు తమ సర్వీస్‌ను మూడుసార్లు చొప్పున కోల్పోయాయి. నిర్ణాయక సూపర్ టైబ్రేక్‌లో ఆధిక్యం దోబూచులాడినా తుదకు సానియా జంటనే విజయం వరించింది.
 
 శనివారం జరిగే సెమీఫైనల్లో క్వెటా పెశెక్ (చెక్ రిపబ్లిక్)-స్రెబోత్నిక్ (స్లొవేనియా) జంటతో సానియా జోడీ తలపడుతుంది. పెశెక్, స్రెబోత్నిక్‌తో జరిగిన క్వార్టర్స్‌లో సారా ఎరాని-రొబెర్టా విన్సీ ద్వయం 1-2తో వెనుకబడిన దశలో గాయంతో వైదొలిగింది. ఈ టోర్నీలో కుద్రయెత్సేవా (రష్యా)-రొడియోనోవా (ఆస్ట్రేలియా); సు వీ సెయి (చైనీస్ తైపీ)-పెంగ్ షుయె (చైనా) జంటలు కూడా సెమీఫైనల్‌కు చేరుకున్నాయి.
  
  


 సెరెనాకు దారుణ ఓటమి
  
 సింగపూర్: మహిళల టెన్నిస్ సీజన్ ముగింపు టోర్నీ డబ్ల్యూటీఏ ఫైనల్స్‌లో ప్రపంచ నంబర్‌వన్ సెరెనా విలియమ్స్‌కు దారుణ ఓటమి ఎదురైంది. సిమోనా హలెప్ (రుమేనియా)తో బుధవారం జరిగిన ‘రెడ్ గ్రూప్’ లీగ్ మ్యాచ్‌లో సెరెనా 0-6, 2-6తో ఓడిపోయింది. తాను ఓడిపోయిన మ్యాచ్‌లో సెరెనా కేవలం రెండు గేమ్‌లు మాత్రమే గెలవడం 16 ఏళ్ల తర్వాత ఇప్పుడే. చివరిసారి సెరెనాకు ఈ తరహా ఓటమి 1998లో ఎదురైంది. ఒక్లాహామా సిటీ టోర్నమెంట్‌లో సెరెనా 1-6, 1-6తో జోనెట్ క్రుగెర్ (దక్షిణాఫ్రికా) చేతిలో ఓడిపోయింది.