ఆర్టీసీ బస్సు, మినీ లారీ ఢీ : డ్రైవర్‌ మృతి

Published Wed, Nov 20 2024 1:47 AM | Last Updated on Wed, Nov 20 2024 1:47 AM

చేబ్రోలు: ఆర్టీసీ బస్సు, మినీ లారీ ఢీ కొన్న ప్రమాదంలో లారీ డ్రైవర్‌ అక్కడక్కడే మరణించాడు. మరో ముగ్గురికి తీవ్ర గాయాలు, ఏడుగురికి స్వల్ప గాయాలయ్యాయి. పొన్నూరు ప్రాంతానికి చెందిన మినీ లారీ డ్రైవర్‌ బండారుపల్లి శ్రీనివాసరావు (42) పనుల నిమిత్తం మినీ లారీలో విజయవాడ వెళ్లాడు. తిరిగి పొన్నూరు వైపు మంగళవారం రాత్రి వస్తుండగా నారాకోడూరు గ్రామ శివారులో ఎదురుగా ఆర్‌టీసీ బస్సు వచ్చింది. రెండు ఎదురెదురుగా ఢీ కొన్నాయి. ఈ సంఘటనలో శ్రీనివాసరావు అక్కడికక్కడే మరణించాడు. ఆర్‌టీసీ బస్సులోని పది మందికి గాయాలయ్యాయి. ఈ దుర్ఘటనతో పొన్నూరు, గుంటూరు వైపు కొంత సేపు ట్రాఫిక్‌ నిలిచిపోయింది. గుంటూరు ప్రాంతానికి చెందిన కందుకూరి గురుబ్రహ్మాచారి, డి.బుజ్జి, నారాకోడూరుకు చెందిన మధుసూదనరావు తదితర క్షతగాత్రులను 108 వాహనం ద్వారా గుంటూరు ప్రభుత్వ వైద్యశాలకు తరలించారు. చేబ్రోలు ఎస్‌ఐ డి.వెంకటకృష్ణ కేసు నమోదు చేసుకొని దర్యాప్తు చేస్తున్నారు. మృతదేహాన్ని పోస్టుమార్టం నిమిత్తం ఆసుపత్రికి తరలించారు.